Etellokin im Bojak ñõn Katakin Ro Jet
1 Ke kar jitõñe Moses einwõt eo ear binej jenkwon Jehovah, ear jab eñjake an tellokin ñõn keañ kin nan eo an Jehovah ñõn Pharoah. (Ex. 4:10; 6:12) Jeremiah ear kalikar an jab liki e make ñõn jerbal einwõt ri kanan eo an Jehovah, ilo an ba ñõn Anij bwe ejaje kennan. (Jer. 1:6) Jekdon eñjake in jab liki eo air ilo jinoin, ri kanan rein ruo rar kamol ir einwõt ri kennan ro reberan an Jehovah. Air maroñwe e jen Anij.
2 Rainin, kamolol ñõn Jehovah, ewor ibbed ta eo jej aikwiji ñõn kõtõbrak jerbal eo ad kin liki. (2 Kor. 3:4, 5; 2 Tim. 3:17) Einwõt juõn mechanic (ri kõmmõne wa) ewor an maroñ im elõñ kein jerbal ibben, emwij letok ñõn kij kein jerbal ko ñõn kõtõbrak jerbal eo ad ilo bolemen. Ilo February jenaj lelok jabdewõt 192-peij book me ewor ilo congregation eo. Meñe kein jerbal kein ilo jitõb rejjab kãl, unin tel ko air jen Jeje ko rej kãl wõt im book kein renaj jibañ armij ñõn katak kin mol eo. Ennan ko in tok me rej rejañ kake kwomaroñ ukõte ekkar ñõn jabdewõt book eo kwoj leloke.
3 Kwomaroñ kajerbal katak eo kin jelalokjen ñõn kaitoklimoin armij kin Nan in Anij. Kwomaroñ jino juõn bwebwenato ilo am ba:
◼ “Rainin rej kalikar aikwij eo kin jelalokjen emõn. Ilo am lemnak, kain jelalokjen rot juõn armij en jibadõke ñõn bõk elap mõnõnõ im lo tõbrak ko ilo mour? [Kõtlok an uak.] Tokjen ko indio remaroñ itok ñõn ro rej bõk jelalokjen eo kin Anij. [Konono Jabõn Kennan 9:10, 11.] Book in [kwalok unin tel in book eo kwoj leloke] ej bedbed ion Bible eo. Ej jitõñlok ñõn unjen eo wõt kin jelalokjen eo me emaroñ tellok ñõn mour indio.” Kwalok juõn wanjoñok ilo book eo. Elañe ewor itoklimo eo emol, doore book eo im kõmmõn karõk ñõn bar jeblak. Ba bwe meñe book eo jej leloke ilo ejelok wõnãn, jej mõnõnõ in bõk jidik jabawot kin jerbal eo ad ibelakin lõl.
4 Ñe kwoj bar jeblak ibben juõn ri mweo eo kwar bwebwenato ibben kin aorõkin jelalokjen eo kin Bible, kwomaroñ ba:
◼ “Ilo trip eo aõ mokta, jaar bwebwenato bwe Bible eo ej unjen jelalokjen me emaroñ kamol ilju eo ad indio. Bõtab, jej aikwij kate kij ñõn katak kin ta eo jej aikwij jela kake jen Jeje ko. [Konono Jabõn Kennan 2:1-5.] Elõñ armij rej lo bwe ebin melele jet mõttan ko ilo Bible. I kõnan kwalok ilo tu-karu kil eo elap am kajerbale ñõn jibañ armij ñõn katak kin irinekatak ko ilo Bible.” Ilo kajerbal book eo kwar leloke, eliklok ñõn jikin eo ekkar im kwalok ilo tu-karu juõn katak kin Bible eo. Elañe ri mweo ekõnan keini an katak, kameleleik e bwe kwonaj bar jeblak im bõktok book in jibañ katak Bible eo ad Kwo Maroñ Mour Indrio ilo Paradise ion Lõl.
5 Elõñ armij rej inebata kin iñtan eo an elõñ million ajiri ro ilo lõl in. Bõlen kwomaroñ jibañ ri mweo ñõn lo lemnak eo an Anij kin abañ in, ilo am ba:
◼ “Ejelok bere kwar lo report in news ko kin ajiri ro ibelakin lõl me rej kwule, nañinmij, im rej jerwan ir. Etke dolul ko rej inebata kake men kein rar jab maroñ kakõmõnmõnlok wãwen eo? [Kõtlok an uak.] Anij ekõnan wõt men eo emõntata kin armij. Lale ta eo ear kallimur kake kin ajiri im ritto ro, einwõt emwij jeje ilo Bible eo. [Konono Revelation 21:4.] Book in [kwalok unin tel in book eo] ej letok tibrik in kamelele ko kin juõn lõl kõmmõn in Anij ijo enaj ejelok iñtan ko.” Elañe emaroñ, kwalok juõn pija kin Paradise eo, im bwebwenato kake. Lelok book eo, im kõmmõn karõk ñõn bar jeblak. Bõk ilo mõnõnõ jabdewõt jabawot armij eo ej leloke ñõn jerbal eo ad.
6 Elañe ilo jinoin kwar konono kin iñtan eo an ajiri ro, ilo lolok eo am tokelik kwomaroñ wõnmanlok ilo bwebwenato eo ilo am ba:
◼ “Ke I ar itok mokta, kwar kwalok am inebata kin abañ eo an ajiri ro me rej iñtan kinke family ko rej jibel jen don, kin ñitta, nañinmij, im kowadoñ. Ej juõn men in kainemõn ñõn konono ilo Bible kin juõn lõl ijo ajiri im ritto ro rejamin iñtan kin nañinmij, metak, ak mij. Juõn kanan ilo book in Isaiah ej kwalok kin juõn mour emõnlok me enaj itok ion lõl.” Konono im bwebwenato kin Isaiah 65:20-25. Tellok ñõn juõn katak kin Bible ilo book eo Mour Indrio.
7 Kinke manit in jar ekkã ibben armij ro rej itoklimo ilo kabuñ, kwomaroñ jino juõn bwebwenato kin katak in ilo am ba:
◼ “Ilo juõn ien ilo mour eo ad, enañin kij aolep jaar iion abañ ko me rar kamakit kij ñõn jar ñõn Anij kin jibañ. Im elõñ rej eñjake bwe kar ejelok uak ñõn jar ko air. Meñe jar ko ilobwilij kin ainemõn an ri tel in kabuñ ko ej einwõt rejjab eoroñe. Jej ba men in kinke tarinae im kowadon rej wõnmanlok im kabañ armij. Anij ej lukkun roñjake ke jar ko? Elañe ej, etke elõñ jar ko rej einwõt ejelok uak ko ñõn i. [Kõtlok an uak.] Psalm 145:18 ej kamelele kin ta eo ej men in aikwij elañe enaj wor uak ñõn jar ko ad. [Konono eon eo.] Kin juõn men, jar ko ñõn Anij rej aikwij mol im ekkar ñõn mol eo ilo Nan eo An, Bible eo.” Kwalok book eo kwoj leloke, im kalikar ta eo ej ba kin aorõkin jar.
8 Ñe kwoj bar jeblak ibben juõn armij eo kwar bwebwenato ibben kin jar, kwomaroñ kajeoñ ennan in:
◼ “I ar mõnõnõ kin bwebwenato eo ad kin jar. Ejelok bere kwonaj lo lemnak ko an Jesus kin ta eo jen jar kake einwõt juõn men in tel ejibañ.” Konono Matthew 6:9, 10, im kalikar men ko reaorõk Jesus ear kwalok kaki ilo joñok in jar eo an. Kwalok katak 27, “Wãwen eo ñõn Bõk Jibañ Ikijen Jar,” ilo book eo Mour Indrio, im kajitõk elañe kwomaroñ kwalok ñõn e kilen katak katak eo.
9 Ñe ej itok ikijen lelok jelalokjen kin Anij ñõn ro jet, jemaroñ kajitõk, “Wõn ej maroñwe men kein?” Jeje ko rej uak: “Kij.”—2 Kor. 2:16, 17.