Jerbal in Kwalok Nan eo Ad—Juõn Wãwen Kwalok Yokwe eo Emol
1 Ikijen jerbal in kwalok nan eo ad jej kwalok bokake eo ad ñõn kien ko ruo relaptata. (Mat. 22:37-39) Yokwe eo ad ñõn Jehovah ej kamakit kij ñõn konono kake e ilo emõn. Yokwe eo ad kin ro ri turid ej kamakit kij ñõn rejañ ir ñõn bukõt jelalokjen eo kin ankil an Anij im karõk ko an bwe, einwõt kij, ren maroñ yokwe Jehovah im likit ir ilo lãjrak eo ñõn bõk jerammõn eo kin mour indio. Inem, ikijen jerbal in kwalok nan eo ad jej nebar ãt eo etan Jehovah im jaketo-jaketak kejatdikdik eo eaorõk kin Ailiñ eo ibben ro ri turid. Aet, jerbal in kwalok nan eo ad ej juõn wãwen kwalok yokwe eo emol ñõn Anij im armij.
2 Yokwe eo ad ej kamakit kij ñõn konono ñõn jabdewõt kain armij ilo jabdewõt kain wãwen ko. (1 Kor. 9:21-23) Ñõn wanjoñok: Ilo juõn balun, juõn Christian elder ear jijet turin juõn Roman Catholic priest. Elder eo ear ture buruen priest eo ilo an bõkmantak jet kajitõk ko ilo jela kilen inem kareilok bwebwenato eo ñõn Ailiñ eo. Ilo ien eo priest eo ear to jen balun eo, ear bõk ruo ian book ko ad. Kar juõn tokjen emõn kin yokwe eo emol elder eo ear kwaloke ñõn ri turin!
3 Yokwe eo Emol ej Kamakit Kij ñõn Kwalok Nan: Ro rej bõk kwunair ilo jerbal in auxiliary im full-time pioneer emol rej kwalok yokwe eo emol ñõn Anij im ri turin. Pioneer ro ien otemjej rej lelok ien im kajur eo air ñõn jibañ ro jet ilo jitõb. Ta eo ej kamakit ir ñõn kõmmõn men in? Juõn pioneer ear ba: “I jela bwe yokwe ej juõn leen jitõbõn Anij. Inem elañe ejako, I jamin kar bed ilo mol eo, im bareinwõt lo tõbrak ko einwõt juõn pioneer. Yokwe ej kõmmõn bwe in lemnak kake armij, jela kin aikwij ko air, im ij jela bwe armij rej emmakit ñõn yokwe.” Jesus ear kwalok yokwe rot in ñõn armij. Juõn ien ke e im ri kalor ro an remõk rar jino etal ñõn juõn jikin ñõn “kakije jirik ien” jar ko rar tõbare mõkajlok jen ir. Ta eo Jesus ear kõmmõne? “Ej tiriamokake ir,” im ear karmijete aikwij ko an make bwe en “katakin ir men ko relõñ.”—Mark 6:30-34.
4 Meñe armij rej karmijete news eo emõn jej lelok ñõn ir, jej lo juõn lõñliñ iloa, ilo ad jela bwe emmakit kin yokwe, jaar kõmmõn joñan wõt ad maroñ ñõn jibañ ir bõk lomor. Eliktata ñe Jesus enaj ekajete kij aolep, jenaj mõnõnõ bwe jaar kwalok yokwe eo emol ilo ad ‘kajejit jerbal eo ad.’—2 Tim. 4:5.