Jej Aikwij Jeblak im Bar Jeblak
1 Kwar uak ke ilo emõn ilo ien eo moktata ke juõn armij ear konono ibbam kin news eo emõn? Elañe jab, kwomaroñ kamolol bwe Ri Kennan ro an Jehovah rar jeblak im bar jeblak mae ien kwar bõk juõn katak kin Bible. Emõn lemnak kin men in ñe kwoj jerbal im bar jerbal ilo territory eo am.
2 Mour ko an armij emakijkij an ukoktak. Rej jelmae abañ im wãwen ko rekãl, roñ kin men in walok ko ilo bukwon eo ak lal in me rej kainebata, eñtan kin jorrãn ko ikijen economy, ak iion nañinmij ak mij ilo family eo. Men kein remaroñ kõmman bwe ren kõnan jelã kin un ko unjen men in kainebata kein. Jej aikwij kile men ko rej kainebataik armij inem uak kin juõn ennan ekainemõn.
3 Men in Ej Juõn Jerbal in Lomor: Lemnak kin ri jerbal in lomor ro ilo juõn jikin ejorrãn. Meñe jet rej kabuk armij ilo juõn jikin rej lo eiet armij ñan lomor ir, rejjab kadikdik im bõjrak kinke ri jerbal ro mõttair rej lo elõñlok armij ñan lomor ir ilo jikin ko jet. Jerbal in lomor eo ad ejañin jemlok. Kajjojo yiõ, jej lo buki thousand armij me rekõnan deor jen “eñtan eo elap.”—Rev. 7:9, 14.
4 “Bwe ro otemjej rej kir etan Iroij re naj mour.” (Rom. 10:13-15) Nan kein ren kar kalikar ñan kij aikwij eo ñan kate wõt ilo jerbal in kwalok nan. Jen ien eo ke jej kab jino jerbal ilo territory eo, ajiri ro rar rittolok im ebwe air ritto ñan air make lemnak kin ilju eo air im un eo unin mour. Jejjab jelã wõn ro eliktata renaj roñjake. (Ekl. 11:6) Elõñ ro rar jumae mokta rar oktak im bõk mol eo. Jerbal eo ad, ejjab ñan ekajete armij, ak ñan lelok ñan ir juõn ien emõn ñan roñ im ñan bõk lomor jen jukjuk im bed in emor. Einwõt an kar ri kaloran Jesus kõmmane ilo jinoin jej aikwij “ilok” ñan armij ro im kajeoñ in kaitoklimoiir kin ennan in Ailiñ eo.—Mat. 10:6, 7.
5 An wõr wõt ien emõn ñan ad kwalok nan ej juõn wãwen Jehovah ej kwalok an tiriamokake. (2 Pet. 3:9) Ñe jej kõtlok bwe ro jet ren roñ im bar roñ kin ennan eo ad, jej kalikar yokwe eo an Anij, im ilo wãwen in jej nebar e.