Karõk Bwe Kwon Bar Jeblak!
1 “Elap an emõn bwebwenato eo! Ij aikwij kememej ñan bar jeblak.” Kwo nañin ba ke nan kein im tokelik meloklok jikin eo armij eo ej jokwe ie? Elañe eindein, kwoj jelã bwe wãwen eo wõt kwomaroñ kõmman bwe kwon bar jeblak ej ilo am je kamelele ko.
2 Je Aolep Kamelele ko: Ñe kwoj kememej wõt bwebwenato eo ibben juõn armij eo ej itoklimo, bõk jidik ien ñan je aolep kamelele ko rej jerbal ñan armij eo. Je etan armij eo im ewi wãwen kwomaroñ kile e. Je address eo an, kwon jab kajidede kin address eo—lale bwe en jimwe men eo kwoj jeje. Kwon je ta eo kwar bwebwenato kake, jabdewõt eon ko kwar readi, im book ta eo kwar lelok ñan e.
3 Elañe kwar bõkmantak juõn kajitõk kwonaj uake ilo trip in lal, kwon je kajitõk eo. Ewõr ke juõn men kwar katak kin armij eo, family eo an, ak kabuñ eo an? Elañe aet, kwon je men eo. Inem ñe kwoj bar jeblak, ilo am bõkmantak kin men eo kwoj kwalok am itoklimo ilo armij eo. Eliktata, kobaik ran eo im awa eo kwar iion armij eo ilo trip eo mokta im ñããt eo kwar karõk ñan bar jeblak. Ilo am je note ko rejimwe, enaj wõr am kein kakememej ko ralikar im ejamin bidodo am meloklok kallimur eo am ñan bar jeblak.—1 Tim. 1:12.
4 Ñe ededelok am kanne record eo am, likiti ibben kein kwalok nan ko jet am—ieb in kwalok eo, Bible eo, book in Reasoning, im book im magazine ko—bwe en bidodo am loe. Ej emõnlok ñan je address ko an moko ejelok armij ie ilo house-to-house record ko me rej jenolok jen record ko kwoj kajerbali ñan je note in bar jeblak ko am. Ilo mol, jekdon am kate yuk ñan kejbãrok juõn record in bar jeblak ko, men eo eaorõk ej bwe kwon bar jeblak!
5 Lemnak kin Armij eo: Ñe kwoj kebojak kin jerbal in kwalok nan, elij note in bar jeblak ko am. Lemnak kin kajjojo armij im ewi wãwen eo emõntata ñan kebak armij eo ñe kwoj bar jeblak. Lemnak kin ewi wãwen kwomaroñ kaddek itoklimo eo an armij eo ñan an kõnan katak Bible. Kõmman karõk rot kein remaroñ kalaplok tõbrak ko am einwõt juõn ri kwalok kin news eo emõn im, tokjen men in ej kalaplok lañliñ eo am.—Ken. 21:5a.
6 Inem tokelik ñe kwoj iion juõn armij eo ej mõnõnõ in roñjake, jab bõk lemnak eo bwe enaj bidodo am kememej armij eo. Jen men in, je kamelele ko, elij note ko am, lemnak wõt kin armij eo, inem kwon bar jeblak!