Kilen bwe En Em̦m̦anl̦o̦k Wõt Wãween Ad Kwal̦o̦k Naan​—Je Mel̦el̦e ko kõn Armej ro Rej Kwal̦o̦k Aer Itoklimo

“Kwõn kõjparok eok, im menin katakin ko am̦.” (1 Ti. 4:16) Naan kein an rijjilõk Paul ñan Timote rej kaalikkar bwe jej aikuj kate kõj bwe en em̦m̦anl̦o̦k wõt wãween ad kwal̦o̦k naan. Jej aikuj kõm̦m̦ane men in jekdo̦o̦n ñe kõj ri kããl ak el̦ap imminene ippãd ilo jerbal in kwal̦o̦k naan. Ewõr juon katak ekããl me ekkã an naaj wal̦o̦k ilo Ad Jerbal ñan Anij. Etan katak in ej “Kilen bwe En Em̦m̦anl̦o̦k Wõt Wãween Ad Kwal̦o̦k Naan.” Katak in enaaj jipañ kõj ñan kakõm̦anm̦anl̦o̦k wõt wãween ad kwal̦o̦k naan. Kajjojo iien enaaj wal̦o̦k katak in, jenaaj etale juon kõl eaorõk me aolep ri kwal̦o̦k naan ro rej aikuj kõm̦m̦ane. Katak eo enaaj bar jipañ kõj bwe jen jel̦a kilen kõm̦m̦ane kõl in eaorõk. Ãlikin ad etale katak eo, kajjojo ri kwal̦o̦k naan ej aikuj kate ñan kõm̦m̦ane kõl eo ilo aolepen allõñ eo. Innem ilo jem̦l̦o̦kinl̦o̦k allõñ eo, enaaj wal̦o̦k juon katak ilo kweilo̦k in Ad Jerbal ñan Anij me enaaj rõjañ kõj ñan kwal̦o̦k tõprak ko jaar loi jãn ad kar l̦oore kõl eo. Ilo allõñ in, jenaaj kate kõj ñan je mel̦el̦e ko kõn armej ro me rej kwal̦o̦k aer itoklimo.

Unin An Aorõk Kõl In: Bwe jen maroñ kajejjet jerbal eo ad jãn Jijej, elõñl̦o̦k men ko jej aikuj kõm̦m̦ani, ijello̦kun ad em̦ ñan em̦ wõt. Jej aikuj bar jepl̦aak ippãn armej ro me rej kwal̦o̦k aer itoklimo im katak ippãer bwe m̦ool eo en tõpar bũrueer. Men in ej ãinwõt ñe jej utdikdiki juon ine bwe en eddekl̦o̦k. (Matu 28:19, 20; 1 Ko. 3:6-9, UBS) Jej kõm̦m̦ane men in ilo ad pukotl̦o̦k armej rein me rar kwal̦o̦k aer itoklimo bwe jen bwebwenato ippãer kõn men ko rej itoklimo kaki im wõnm̦aanl̦o̦k kõn men eo jaar kõnnaan ippãer kake. Eñin unin, elukkuun aorõk bwe jen je mel̦el̦e ko kõn ro me jej kwal̦o̦k naan ñan er im rej kwal̦o̦k aer itoklimo.