Jej Aikuj Jepl̦aak ñan Ippãn Ro Me Rar M̦õn̦õn̦õ in Roñjake
1. Wõn ro jej aikuj jepl̦aak ippãer bwe ren maroñ jel̦ã kõn m̦ool eo?
1 Juon ri kallib ej aikuj utdikdiki ine ko kõtkan bwe ren maroñ eddekl̦o̦k. Ilo kõkkar, jej ãinwõt ri kallib ro me rej ekkat ine in m̦ool eo ilo bũruon armej ro jej kwal̦o̦k naan ippãer. (1 Ko. 3:6) Jej aikuj bar jepl̦aak ippãn armej rein im kõjerbale Naan in Anij el̦aññe jekõn̦aan bwe ren jel̦ã kõn m̦ool eo im jerbale. Ad jepl̦aak ñan ippãer ej ãinwõt ñe jej bar ilo̦k im utdikdiki juon ine bwe en eddekl̦o̦k.
2. Ta eo jemaroñ kõm̦m̦ane bwe jãn maroñ bar jepl̦aak ippãn ro me rar m̦õn̦õn̦õ in roñjake?
2 Kwal̦o̦k juon Kajjitõk: Ñe kwõj kapojak am̦ naan in ijjino, bõlen em̦m̦an ñe kwõj kõpooj juon kajjitõk me kwõmaroñ doore ippãn armej eo bwe kwõn maroñ bar jepl̦aak im uwaake tokãlik. Kwõn kwal̦o̦ke kajjitõk in ãlikin amiro bwebwenato, im kwõn kõm̦m̦an karõk ñan bar jepl̦aak ippãn. Elõñ rar lo tõprak ilo aer kar kõjerbali kajjitõk ko jãn bok eo etan Baibel Ej Katakin. Aer kõjerbali kajjitõk kein jãn bok in ear kepel̦l̦o̦k juon iien em̦m̦an bwe ren kwal̦o̦k ñan armej eo kilen ad katak Baibõl̦ ippãn armej ro.
3. Ta ko jemaroñ je ñe em̦õj ad bwebwenato ippãn juon eo ewõr an itoklimo?
3 Je ilo Juon Bok ak Peba: Ãlikin wõt am̦ bwebwenato ippãn juon eo ewõr an itoklimo, kwõn je etan armej eo im ia eo ej jokwe ie. Ebar em̦m̦an ñe kwõj je raan eo im awa eo kwaar kõnnaan ippãn, men ko komiro kar kõnnaan kaki, im bok eo kwaar lel̦o̦k. Armej eo ewõr ke an kabuñ? Ewõr ke ippãn ak nejin? Ear ke kwal̦o̦k men ko ekõn̦aan kõm̦m̦ani im bareinwõt men ko ej inepata kaki? El̦aññe aet, eokwe em̦m̦an ñe kwõj je men kein kõnke remaroñ jipañ eok ilo am̦ naaj bwebwenato ippãn ilo raan ko im̦aan. Bareinwõt, kwõn je raan eo im awa eo kwaar ba ñan armej eo bwe kwõnaaj jepl̦aak im bar je kajjitõk eo komiro naaj bwebwenato kake ippãn doon.
4. Ñe jej kajjioñ in tõpar armej ro me ewõr aer itoklimo, etke jej aikuj kijenmej?
4 Kijenmej: Setan eban bõjrak jãn an kajjioñ in jol̦o̦k ‘naan eo kar kallib n̦a ilo bũruon’ armej ro ewõr aer itoklimo. (Mark 4:14, 15) Kõn men in, kwõn jab ebbeer ñe epen am̦ bar loe ak tõpare armej eo ewõr an itoklimo ilo m̦weo im̦õn. Kwõmaroñ je juon lõta ak peba jidikdik im likũti ilo turin kõjãm in m̦weo im̦õn armej eo. Juon jeid im jatid kõrã ear jino katak ippãn juon kõrã, bõtab ke ear jepl̦aak, kõrã eo ear jako jãn m̦weo. Kõn men in, ear je juon lõta ñan kõrã eo. Tokãlik ke liin jeid im jatid ear jepl̦aak im loe kõrã eo, kõrã eo ear kam̦m̦oolole kõn an kar l̦õmn̦ak kõn e im jejel̦o̦k. Ñe jej nikniki ad utdikdik ine in m̦ool eo ilo kõkkar, jenaaj lukkuun m̦õn̦õn̦õ ñe jej loe an ine kein eddekl̦o̦k im “jebar leir, juon jilñuul, juon jiljinoñoul, im juon jibukwi.”—Mark 4:20.