“Ren Mweie kin Jerbal ko Remõn”

¹ Ilo yiõ ko eliktata kin jerbal in kwalok nan eo an ilo kijejeto, ri jilek Paul ear jerbal ebak ibben Timothy im Titus. Ñan kajjojo iair, ear je nan in rejañ ko reinlokwõt. Ear jiroñ Titus bwe “ro r’ar tõmak Anij” rej aikwij “lale im kõmõn jerbal remõn.” (Taitõs 3:8) Ear jiroñ Timothy bwe ro rej likit air kejatdikdik ion Anij ren “mweie kin jerbal ko remõn.” (1 Tim. 6:17, 18) Men in ej nan in kakabilek emõn ñan kij aolep! Ak ta eo enaj kamakit kij ñan kõmman jerbal ko remõn ilo mour ko ad? Im jerbal ta ko jej aikwij kõmmani ilo ran ko rej bed iman?

² Kajur eo ilikin ad mweie kin jerbal ko remõn ej walok jen tõmak im yokwe eo ad ñan Jehovah im jen kejatdikdik eo ad eaibujuij me ear letok ñan kij. (1 Tim. 6:19; Taitõs 2:11) Elaptata ilo ien in ilo yiõ in, rej kakememej kij bwe Jehovah ear jilkintok Nejin ñan lal bwe Jesus en maroñ karreoik etan Jemen im ñan kabellok ial eo ñan jabdewõt armij ro tellokiir ñan bõk mour indio. (Mat. 20:28; Jon 3:16) Men in renaj kalikar kake ilo ien kememe Kwojkwoj in Kememej mij eo an Christ ilo March 28. Ilo uak ñan kejatdikdik in ewõr ibbed ñan bõk mour indio, jejjab emmakit ke ñan kõmman joñan ad maroñ ñan ad “mweie kin jerbal ko remõn”? Emol aet! Jerbal ta ko jemaroñ kõmmani kiõ?

³ Jerbal ko Remõn ñan Kõmmani ilo March im Etal: Emol, jenaj bed ilo Kwojkwoj eo​​—men in walok eo eaorõktata ilo yiõ eo ñan Ri Kennan ro an Jehovah ibelakin lal. (Luk 22:19) Ak jekõnan jake lañliñ in kin ien eo ibben elõñ joñan wõt ad maroñ. Lale report in kwalok nan eo ilo 2002 Yearbook, im kwonaj lo bwe ilo yiõ eo lok ilo elõñ ene ko ibelakin lal, ro rar kwelok ilo ien Kwojkwoj eo kar jilu, emen, lalem, ak elõñlok alen laplok jen oran ri kwalok ro. Emol aolep ro ilo congregation ko rar aikwij kate ir ñan kajededlok nan in kir ko ilujen territory eo air. Kin men in, jekõnan kajerbal joñan ien eo joñan wõt ad maroñ jen kiõ mae March 28 ñan kirtok armij ñan Kwojkwoj eo, im jibañ ir ñan katak kin kejatdikdik eo kin lomor.

⁴ Ñe ej itok April, ewi wãwen ad maroñ wõnmanlok im kwalok bwe jej “mweie kin jerbal ko remõn”? Ilo ad kate kij ilo jerbal in kwalok nan kin news eo emõn. Ñe jej jake kejatdikdik eo kin Ailiñ eo ibben ro jet jej “kijejeto ilo jerbal ko remõn.” (Taitõs 2:14; Mat. 24:14) Elañe kwar jab maroñ auxiliary pioneer ilo March, kwomaroñ ke kõmmane ilo April im/ak May? Elañe kwoj pioneer ilo March, kwomaroñ ke wõnmanlok wõt?

⁵ Jet ro ewõr air jikin jerbal rej lo bwe remaroñ jolok juõn awa ak elõñlok ilo jerbal in kwalok nan ñe rej etal ñan jikin jerbal eo, rej kwalok nan iturin ial ak kwalok ñan armij ro rej jerbal ilo business ko emõkaj air bellok ilo jibboñ. Ro jet rej schedule bwe mõttan in awa in air mõñã in raelep rej kajerbale ñan kwalok nan. Jet rej lo bwe remaroñ kõmman juõn Bible study ibben ri jerbal ro mõttair ilo ien eo. Elõñ sister ro me rej jerbal ilo mweo imwiir rar maroñ karõk jet awa ko ñan kwalok nan ke ajiri ro rej bed ilo school. Ilo an mõkajlok air ruj ilo jet jibboñ ko ñan kõmman jerbal ko ilo mweo, ear laplok an wõr air ien ilo ran ñan kõmman jerbal in kwalok nan im katakin armij.​​—Ep. 5:15, 16.

⁶ Meñe kwojjab maroñ auxiliary pioneer, bõlen kwomaroñ kõmman juõn schedule ñan kalaplok ijo kunam ilo jerbal in kwalok nan, im kõmman joñan am maroñ ñan “kõmõnmõn emõn, . . . mweie kin jerbal ko remõn, im . . . mol kab pojõk in lelok men in tiriamo” kin mol eo ibben ro jet.​​—1 Tim. 6:18.

⁷ Kememej Jerbal Emõn in Kõmman Ri Kalor ro: Kajjojo yiõ ewõr ro rej itoklimo me rej itok ñan Kwojkwoj in Kememej eo. Emaroñ ke bwe jet ilo congregation eo ren lale rein rar kwelok ak rejjab katak kiõ? Remaroñ ke bar jeblak ibbeir kin mejenkajjik eo ñan jibañ ir kõmman wõnmanlok ko ilo jitõb? Emaroñ bwe jet ian rein rar bed ilo Kwojkwoj eo rej nukin Ri Kennan ro. Ro jet remaroñ ro rar katak mokta im men eo wõt rej aikwiji ej ñan bõk jet nan in rejañ ko ñan bar jino air katak im ñan keini air bed ilo kwelok ko. Enaj juõn lañliñ elap ñan lo an rein erom ri karejar ro rekijejeto an Jehovah ibbed!

⁸ Ilo ad kalaplok ijo kunad ilo jerbal in kwalok nan ilo March im maanlok, ekkã ad naj lo elõñlok armij ro rej itoklimo me jemaroñ bar jeblak ibbeir. Kajeoñ in bõkmantak juõn kajitõk ibbeir. Inem kallimur bwe kwonaj uake kajitõk eo ñe kwoj bar jeblak. Ñe jej kõmman men in, enaj bellok juõn ial ñan bar jeblak. Ñe emõkaj ad bar jeblak, enaj emõnlok. Elañe jaar jab maroñ jino juõn Bible study ilo ien eo mokta, inem je kõnan kajeoñ in kõmmane ñe jej bar jeblak.

⁹ Ñe jej kwalok nan iturin ial, jej aikwij lemnak wõt kin wãwen eo jemaroñ ijjino bwebwenato ko ibben armij. Elõñ armij ro rej itoklimo rar lelok etair, address, im number in telephone ko ñan ri kwalok ro ke rar kwalok nan im iion ir iturin ial. Elañe armij eo kwoj iion e ejjab jokwe ilo territory eo am, bõk Please Follow Up (S-43) form eo ilo Kingdom Hall, kanne, im leloke ñan congregation secretary eo, eo enaj leloke ñan congregation eo ej lolorjake territory eo ijo armij eo ej jokwe ie. Elañe secretary eo ejjab maroñ kõmmane, enaj jilkinloke ñan ra eo ñan air lolorjake. Ilo wãwen in, remaroñ bar jeblak im kaddeklok itoklimo eo an armij eo.

¹⁰ Elañe kwar bõk juõn number in telephone ak jab juõn address, inem kwomaroñ kõmman juõn bar jeblak ilo am telephone e armij eo. Keboje lok iman ta eo kwo kõnan bwebwenato ibben. Book in Reasoning en bed ebak bwe en mõkaj am maroñ lale. Jet rej lo tõbrak ko remõn ilo air katak ibben armij ikijen kajerbal telephone, ekoba ro ebin ad lo ir ilo moko imwiir. Juõn sister ear kajitõk number in telephone ko an kõrã ro rej itoklimo me ear iion ir ilo jerbal eo jen em ñan em, im tokjen men in ear ijjino ruo Bible study.

¹¹ Jerbal Ibben Elder ro ñan Jibañ Ro Rej Inactive: Elder ro elap air itoklimo ñan lelok jibañ ko reyokwe ñan rein. Elõñ armij rot in, ilo air bõk buñten nee ko mokta, ededelok air jino bed ilo kwelok ko an congregation eo. Rej kile aikwij eo ñan bed ebak ñan dolul eo an Jehovah elañe rekõnan bõk jokane ilo jitõb einwõt Sam 91 ej kwalok kake. Jet iair rebojak kiõ ñan bar bõk kunair ilo jerbal in kwalok nan. Elañe ro jet me rej inactive im rej bed ilo Kwojkwoj eo ilo alliñ in, remaroñ mõnõnõ in bõk juõn Bible study. Elañe ej eindein, elder ro remaroñ kõmman karõk bwe juõn en katak ibben ro rej mõnõnõ in bõk jibañ. Elañe rej kajitõk ibbam ñan lelok jibañ ilo wãwen in, enaj lap air kamolol kin jerbal eo am.​​—Rom 15:1, 2.

¹² Wõnmanlok im “Kõmõn Jerbal Remõn”: Elõñ ro rar bõk kunair ilo jerbal in auxiliary pioneer iumin juõn ak elõñlok jen juõn alliñ rar lo bwe jerbal in kwalok nan eo air ilo alliñ ko jet ear laplok. Rar iion armij ro rej itoklimo me rar kile aikwij eo ñan bar jeblak ibbeir. Men in ear kamakit ir ñan kate ir kalaplok jerbal in kwalok nan eo air bwe ren maroñ bar iion rein rej itoklimo. Jet rar ijjino Bible study ko, im men in ear jibañ ir bwe en laplok kunair ilo jerbal in kwalok nan.

¹³ Ro jet joñan air lo mõnõnõ in kalaplok jerbal in kwalok nan im kõmman ri kalor ro, men in ear kamakit ir ñan etale lajrak in men ko raorõk ibbeir. Tokjen men in, jet rar maroñ kadiklok awa in air bed ilo jikin jerbal ko air im rar deloñ ilo jerbal in auxiliary pioneer jen alliñ ñan alliñ. Ro jet rar maroñ deloñ ilo jerbal in regular pioneer. Ear laplok air maroñ likit kejatdikdik eo air ion Anij im jab ion men ko an lal in. Rar lo bwe air “mol kab pojõk in lelok men in tiriamo,” men in ear bõktok jerammõn ko relap jen Jehovah im ear kakajur kejatdikdik eo air ñan “bõk mour eo emol.” (1 Tim. 6:18, 19) Emol, ke elõñlok armij rej bõk jerbal in pioneer, aolepen congregation eo enaj bõk tokjen. Pioneer ro ekkã air bwebwenato kin experience ko air im rej kirtok ro jet ñan jerbal ibbeir, im men in ej kõmman bwe en kajurlok mour in jitõb eo ilo congregation eo.

¹⁴ Kimij kejatdikdik bwe kij aolep naj “mweie kin jerbal ko remõn” ilo ien Kwojkwoj in Kememej in im etal ilo ad kalaplok ijo kunad ilo jerbal in kwalok nan in Christian. Jen kwalok ad kamolol kin men eo Jehovah ear kõmmane ilo an letok ñan kij kejatdikdik eo ñan mour indio ilo juõn lal ekãl im wãnik.​​—2 Pit. 3:13.