Kareilok Armij ñan “Maram in Lõl”
1. Meram et eo elap kar kanan kake ilo Nan eo an Anij, im ien et eo ejej uan ej kareilok armij ñan meram in?
1 Ikijen ri kanan eo Isaiah, Jehovah ear kanan: “Ro dri ailiñ eo rar etetal ilo marok, rar lo juõn maram elap: ro rar jokwe i enen lurin mij, maram e ar romak ioir.” (Ais. 9:2) “Maram elap” in kar alikar loe ilo kõmman ko an Nejin Anij, Jesus Christ. Jerbal in kwalok nan eo an ke ear bed ion lal im tokjen ko rar walok jen katok eo an rar kakõmanmanlok wãwen eo an ro rar bed ilo marok ilo jitõb. Meram rot in ej men eo armij rej aikwiji ilo ien kein remarok. Kwojkwoj in Kejota eo an Iroij ej letok juõn ien ejej uan bwe jen kareilok armij ñan “maram in lõl.” (Jon 8:12) Yiõ eo lok, elõñ million armij rar kwalok air tõmak ilo air koba ibbed ilo bokake kien eo an Jesus: “Komin kõmõn men in ilo ememej Iõ.” (Luk 22:19) Ke Kwojkwoj in Kememej eo ilo yiõ in ej ebaktok, ewi wãwen jemaroñ bõk kunad im kareilok armij ñan meram eo elap me Jehovah ear kõmman bwe en romak?—Pil. 2:15.
2. Ewi wãwen jemaroñ kalaplok kamolol eo ilo buruõd kin katok in binmour eo, im ta tokjen eo enaj walok?
2 Kaddeklok Kamolol ilo Buruõm: Ien Kwojkwoj in Kememej eo ej juõn ien emõn ñan kalmenlokjen kin yokwe eo elap Jehovah im Jesus rar kwaloke ilo air letok katok in binmour eo kin armij. (Jon 3:16; 2 Kor. 5:14, 15) Ilo ad kõmmane, ejelok bere enaj kalaplok kamolol eo ilo buruõd kin ien in ekwojarjar. Aolep armij ro an Anij ren karõk ien ñan air konono im kalmenlokjen kin lajrak in read Bible ilo ien Kwojkwoj eo, einwõt kar kõlajraki ilo Examining the Scriptures Daily. Ilo ad lemnak kin kadkad ko relaptata kadkadin Jehovah, me rej alikar ilo men in letok eo kin binmour eo, ej kõmman bwe jen mõnõnõ kinke ej ad Anij. Ilo ad kalmenlokjen kin ta eo binmour eo ej melelen ñan kij make men in ej kalaplok yokwe eo ilo buruõd kin Anij im Nejin im ej kamakit kij ñan kate kij ñan kõmanman ankil an Anij.—Gal. 2:20.
3. Ewi wãwen jemaroñ kwalok ad kamolol kin Kwojkwoj in Kememej eo?
3 Elañe jej kamũlallok kamolol eo ad kin men in letok eo an Jehovah kin lomor, kijejeto eo ad kin Kwojkwoj in Kememej eo enaj jededlok ñan ri katak ro, ro jej jeblak ibbeir, ro nukid, ri turid, ri school ro mõttad, ri jerbal ro mõttad, im ro jet me jej kirtok ir ñan ien in ejej uan. (Luk 6:45) Kin men in, kõmman juõn jibadbad ejej uan ñan kirtok aolep rein, im lelok ñan ir juõn peba in kir ñan Kwojkwoj in Kememej eo bwe en jerbal einwõt juõn kein kakememej ñan ir. Bwe ren jab meloklok jabdewõt armij, elõñ rar kejbãrok juõn lajrak in etan armij ro ekkã air kirtok ir ñan Kwojkwoj eo, im kajjojo yiõ rej kobaik ãt ko rekãl. Ilo ad kõmman men ko ilo juõn wãwen ekwon im kõmman joñan wõt ad maroñ ñan kirtok ro rej itoklimo men in enaj juõn wãwen emõn ñan kwalok kamolol eo ad ñan Jehovah Anij kin “men in letok eo elap jen maroñ in ba.”—2 Kor. 9:15.
4. Ta eo emaroñ jibañ kij kalaplok ijo kunad ilo jerbal in kwalok nan ilo March im April?
4 Kalaplok Ijo Kunam ilo Jerbal in Kwalok Nan: Kwomaroñ ke kalaplok ijo kunam ilo jerbal in kwalok nan ilo March im April? Ilo ad kate kij ñan jaketo-jaketak “gospel in aibujuij an Kraist” enaj walok ilo kajerammõn eo an Anij. Jehovah, eo ej Unjen aolep kameramlok ko ilo jitõb, ear kakien: “Jen marok en romak maram.” (2 Kor. 4:4-6) Ñe ewõr aikwij, elder ro ren karõk kwelok ko ñan kwalok nan ilo ien im jikin ko jet, im tel ilo air jurake ro rekõnan kaetoklok ien air kwalok nan. Men in emaroñ kitibuj air kwalok nan iturin ial ilo jibboñtata ak karõk ñan kwalok nan ilo jikin business ak ikijen air kajerbal telephone ilo elikin raelep ak ilo jota. Einwõt juõn kein jibañ ñan kalaplok ijo kunam ilo jerbal in kwalok nan, kõmman juõn mejenkajjik kin joñan awa ko kwonaj jerbal, im kate yuk bwe kwon kõtõbraki. Ñan elõñ, air lelok ñan Jehovah men eo emõntata ej kitibuj air bõk kunair ilo auxiliary pioneer.—Kol. 3:23, 24.
5. Ewi wãwen elõñ rej bõk tokjen jen diklok in awa ko ñan auxiliary pioneer?
5 Kwomaroñ ke Auxiliary Pioneer? Emotlok kiõ jiljilimjuõn yiõ jen ke rar kadiklok awa in auxiliary pioneer. Oktak in ear kamaroñ elõñ ñan air bõk kunair ilo jerbal in. Kwonañin ke kajeoñ in kõmmane? Jet rej kõmman bwe en juõn air manit ñan auxiliary pioneer ilo kajjojo yiõ. Ilo elõñ congregation ko elõñ ri kwalok ro rej bõk kunair ilo jerbal in ibben don, im ej ien eo elap an kamõnõnõ ñan congregation eo ilo yiõ eo. Kwomaroñ ke karõk ien ñan am bõk kunam ilo jerbal in auxiliary pioneer ilo ien Kwojkwoj in Kememej in? April enaj juõn alliñ elap an emõn ñan jet, kinke ewõr lalem Saturday im Sunday.
6. Ta karõk ko remõn kar kõmmani?
6 Kar karõk ke bwe circuit overseer eo en lolok congregation eo am ilo March ak April? Juõn jerammõn emaroñ bellok ñan yuk. Einwõt kar kejelã kake mokta, ilo yiõ in jerbal eo ilo 2006, aolep ro rej auxiliary pioneer ilo alliñ eo ke circuit overseer eo ej lolok congregation eo remaroñ bed ilo kwelok eo jinoin ibben pioneer ro. Ejelok bere bwe melele ko rekõketak ilo jitõb me renaj litoki ilo kwelok in enaj jibañ elõñ ro rej auxiliary pioneer ñan air jibadõk mejenkajjik eo bwe ren erom regular pioneer ro. Bareinwõt, ilo March jenaj mõnõnõ in jibañ armij ro ñan air bõk meram eo ilo jitõb ikijen book in katak ko Jelãlokjen Eo Ej Tellok ñan Mour Indio, ak Kwo Maroñ Mour Indrio ilo Paradise ion Lõl. Kwon kõmman bwe en mejenkajjik eo am ñan jino juõn katak kin Bible.
7, 8. (a) Ta eo emaroñ jibañ kij ñan kõmman juõn schedule ñan auxiliary pioneer? (b) Ewi wãwen rejetak eo an aolep ro uan family eo emaroñ jibañ, im ewi wãwen rej aolep bõk tokjen?
7 Ñe kwoj lemnak kin 50 awa ko auxiliary pioneer ro rej aikwij tõbari, bebe kin ta schedule eo enaj kõtlok am kwalok kin meram in mol eo iumin 12 awa ko ilo kajjojo week. Bwebwenato ibben ro rar lo tõbrak ilo air kõmmane, im bareinwõt ro jet. Men in emaroñ rejañ ir bwe ren jerbal ibbam. Kin karõk ko remõn, ro emwij air baptais, dik im ritto jimor, rar lo bwe ear jab lukkun bin ñan air jibadõk mejenkajjik in emõn. Jar kake. Inem, elañe emaroñ, kõmman karõk ko ñan am auxiliary pioneer!—Mal. 3:10.
8 Elõñ family ko rar lo bwe rejetak ko an aolep remaroñ kõmman bwe juõn iair en maroñ tõbar mejenkajjik in. Juõn family ear bebe bwe ro lalem emwij air baptais ren kadeloñ etair ñan auxiliary pioneer. Ajiri ro ruo me rejañin baptais rar kõmman jibadbad ko ejej uair ñan kalaplok jerbal ko air. Ewi wãwen an family in bõk tokjen jen jibadbad ko air? Rar je: “Ear juõn alliñ elap an emõn im kalañliñ, im kim ar eñjake bwe lukluk in family eo ear kajurlok. Kimij kamolol Jehovah kin jerammõn in emõn!”
9. Ewi wãwen jemaroñ kõmman bwe en romak meram eo ad ilo ien Kwojkwoj eo?
9 Jerbal ko ad ejej uair ilo March im April enaj ke kakajur kij, im karuaklok kij ñan Jemed ilañ? Men in ej wawa ion jibadbad ko ad make ñan kalaplok yokwe eo ad ñan Anij im Nejin im ñan kalaplok ijo kunad ilo jerbal in kwalok nan. Jen bebe einwõt ri jeje sam, eo ear al: “Ña I naj kanuij kamolol Jeova kin loñiõ; aet I naj nebar E i bwiljin jar eo elap.” (Sam. 109:30) Jehovah enaj kajerammõn jerbal ko ad rekijejeto ilo ien Kwojkwoj eo. Inem jen kõmman bwe en romak meram eo elap bwe en lõñlok armij ro rej etal jen marok im bõk “maram in mour.”—Jon 8:12.
[Kajjitõk ko]