Bo̦o̦k in Kajjitõk

◼ Ñããt eo jemaroñ lel̦o̦k bok ko ad ñan armej ro?

Jej aikuj lukkuun lale m̦okta el̦aññe armej eo ej itoklimo. El̦aññe ewõr an itoklimo, eokwe jemaroñ lel̦o̦k jabdewõt bok ko me jej lil̦o̦ki ñan armej. Meñe jej kile bwe ejabwe ak ejjel̦o̦k an armej eo jããn ñan jabawõt im jipañ jerbal in, eokwe jen wõnm̦aanl̦o̦k wõt im lel̦o̦k an bok. (Job 34:​19, UBS; Rev. 22:​17) Bõtab, jeban lel̦o̦k bok kein ad reaorõk ñan ro me ejjel̦o̦k aer itoklimo im reban riiti.​—Matu 7:⁠6.

Ewi wãween kwõmaroñ kile el̦aññe ewõr an armej eo itoklimo ak jaab? Eokwe, el̦aññe armej eo em̦õn̦õn̦õ in bwebwenato ippam̦, emaroñ mel̦el̦ein bwe ej itoklimo. Ej ke roñjake, uwaake kajjitõk ko me kwõj kwal̦o̦ki im kwal̦o̦k l̦õmn̦ak ko an? Men kein rej bar kwal̦o̦k bwe ewõr an itoklimo. Ñe ej lale eoon ko me jej riiti jãn Baibõl̦ eo, men in ej bareinwõt kwal̦o̦k bwe armej in ej kautiej Naan in Anij. Ñe jej lel̦o̦k bok ñane, em̦m̦an ñan kajjitõk ippãn el̦aññe enaaj riiti bok eo. Ri kwal̦o̦k naan ro rej aikuj kate er ñan lale el̦aññe ewõr an armej eo itoklimo. Ñan waanjoñak, el̦aññe jej kwal̦o̦k naan iturin ial̦ ko, jejjab aikuj leto letak bok ko ñan aolep armej ro me jej iioon er. Ñe jejaje el̦aññe armej eo ej itoklimo ak jaab, eokwe em̦m̦anl̦o̦k jen lel̦o̦k juon tract jãn ad lel̦o̦k juon bok.

Ri kwal̦o̦k naan ro rej ebbõk bok ko ekkar ñan joñan aikuj ko aer, jab ekkar ñan joñan aer jabawõt. Jejjab jabawõt ñan kõl̦l̦ã on̦ean bok ko. Unin ad jabawõt ej kõnke jekõn̦aan jipañ aolep men ko me doulul in ej kõm̦m̦ani ipel̦aakin lal̦ in ñan kowõnm̦aanl̦o̦k wõt jerbal in kwal̦o̦k naan. Ñe el̦ap ad kwal̦o̦k kam̦m̦oolol, jenaaj m̦õn̦õn̦õ in jabawõt jãn kõn̦aan ko ad im jab jãn bween jããn ko ad meñe jej m̦weiie ak jaab. (Mark 12:​41-44; 2 Ko. 9:⁠7) Ad kwal̦o̦k kam̦m̦oolol enaaj bareinwõt kõm̦m̦an bwe jen ebbõk bok ko ekkar ñan joñan wõt aikuj ko ad bwe jen jab jerwaani bok kein raorõk.

[Naan ko ilo peij 2]

Ri kwal̦o̦k naan ro rej aikuj kate er ñan lale el̦aññe ewõr an armej eo itoklimo ak jaab