“[En Lõt Am̦, NW] Kwal̦o̦k Naan eo Em̦m̦an”
1. Ta joñak eo em̦m̦an Paul ear kõm̦m̦ane kõn jerbalin kwal̦o̦k naan?
1 “Kwõn kajejjet jerbal eo am̦.” (2 Ti. 4:5) Ear pidodo an rijjilõk Paul ba naan kein ñan Timote kõnke e make ear kajejjet jerbal eo an. Ilo m̦ool, jãn iiõ eo 47 ñan 56, Paul ear kadedel̦o̦k jilu tũreep in kwal̦o̦k naan ãinwõt juon mijinede. Elõñ alen an bokin Jerbal kwal̦o̦k bwe ear lukkuun lõt an Paul kwal̦o̦k naan. (Jrb. 23:11, UBS; 28:23, UBS) Ta ko jemaroñ kõm̦m̦ani bwe en lõt ad kwal̦o̦k naan rainin?
2. Ta ko jemaroñ kõm̦m̦ani bwe en lõt ad kwal̦o̦k naan ñe jej em̦ ñan em̦?
2 Jãn Em̦ ñan Em̦: Bwe jen maroñ tõpar armej ro me rejjañin kar roñ kõn nuuj eo em̦m̦an, jej aikuj jibadekl̦o̦k m̦õko im̦weer ilo iien ko reoktak jãn doon. Ñan waanjoñak, ekkã an em̦m̦aan ro pãd ilo m̦õko im̦weer ilo jota ak ilo weekend. Jej aikuj kate kõj ñan tõpar armej ro ilo ad bar jepl̦aak elõñ alen ñan m̦õko me jaar jab tõpar armej ro ie. Ta el̦aññe jej kõm̦m̦ane men in ak ejjel̦o̦k tõprak jej loe? Eokwe, jemaroñ pukot wãween ko jet ñan tõpar er, ãinwõt jeje lõta ak talboon.
3. Iien ta ko jet repel̦l̦o̦k im rem̦m̦an ñan kwe ñan kwal̦o̦k naan?
3 Ilo̦bwilej im Iien Em̦m̦antok: Rũkarejar ro an Jeova rainin rej kwal̦o̦k naan kõn “jel̦ãl̦o̦kjen̦” eo em̦ool ñan aolep ro im rekõn̦aan roñjake. Jet iien rej kõm̦m̦ane men in “ilo ial̦ ko” im “ilo jikin wiakake ko.” (JK. 1:20, 21, UBS) Ñe jej kõm̦m̦ani m̦akũtkũt ko ad kajjojo raan, jej ke l̦õmn̦ak in kwal̦o̦k naan ñan armej ro jet? Jej ke kate wõt kõj ñan kwal̦o̦k kõn naan in Anij ñan ro jet ilo jabdewõt iien epel̦l̦o̦k? (Jrb. 18:5, UBS) El̦aññe uwaak eo ad ej aet, mel̦el̦ein men in bwe jej kate kõj ñan kõm̦m̦an bwe en lõt ad kwal̦o̦k naan.—Jrb. 10:42; 17:17; 20:20, 21, 24.
4. Ewi wãween jar im kõl̦mãnl̦o̦kjen̦ ej jipañ kõj bwe en lõt ad kwal̦o̦k naan?
4 Jet iien jemaroñ mijak in kwal̦o̦k naan kõnke ewõr juon ad m̦õjn̦o̦ ak kõn ad ejjookok. Ilo m̦ool, Jeova emel̦el̦e kõn joñan maroñ ko ad. (Sam 103:14) Kõn men in, ñe men in ej wal̦o̦k, jemaroñ jar ñan Jeova bwe en kaperan kõj ñan kwal̦o̦k naan. (Jrb. 4:29, 30, UBS) Bareinwõt, ilo iien ko jej katak Baibõl̦ ippãd make im kõl̦mãnl̦o̦kjen̦, em̦m̦an bwe jen bar l̦õmn̦ak kõn wãween ko me remaroñ kõm̦akũt bũruod im kal̦apl̦o̦k ad kaorõk ennaan eo em̦m̦an jej kwal̦o̦ke ñan armej. (Pil. 3:8) Men in enaaj kõm̦akũt kõj ñan kijejeto ilo kwal̦o̦k naan!
5. Ewi wãween jemaroñ bõk kun̦aad im kajejjet kanaan eo ilo bokin Joel?
5 Joel ear kanaan bwe m̦okta jãn an itok raan eo el̦ap an Jeova, armej ro an Jeova renaaj wõnm̦aanl̦o̦k wõt ilo aer kwal̦o̦k naan im reban kõtl̦o̦k bwe jabdewõt men ak armej en kabõjrak er jãn aer kõm̦m̦ane men in. (Joel 2:2, 7-9) Jen kate wõt kõj ñan bõk kun̦aad ilo jerbal in me ejãmin bar wal̦o̦k!