Jen Anõke Ri Kanaan Ro—Amos
1. Etke joñak eo an Amos emaroñ kakajoor kõj?
1 Kwõnañin ke l̦õmn̦ak bwe kwõjjab ekkar ñan jerbal in kwal̦o̦k naan kõnke ejabwe jel̦ãl̦o̦kjen̦ ippam̦ ak bwe kwõj itok jãn juon baam̦le ettã? El̦aññe aet, eokwe joñak eo an Amos emaroñ kakajoor eok. Amos ear juon ri lale jiip im ri kallib. Meñe ãindein, Jeova ear jitõñe bwe en kwal̦o̦k kõn ennaan eo an eaorõk. (Amos 1:1, UBS; 7:14, 15, UBS) Tok ñan rainin, Jeova ej wõnm̦aanl̦o̦k wõt im kõjerbal ro rettã. (1 Ko. 1:27-29, UBS) Ta ko jet jemaroñ katak jãn ri kanaan Amos me remaroñ jipañ kõj ilo kwal̦o̦k naan?
2. Etke jemaroñ jutak pen meñe jej iioon jum̦ae ilo kwal̦o̦k naan?
2 Ear Jutak Pen Meñe Ear Iioon Jum̦ae: Ilo bwij ko joñoul bwijjin Israel, ear wõr juon bũrij etan Amazaia me ear kabuñ ñan juon koon in ekjab. Ke ear roñ kõn kanaan eo an Amos, ear ãinwõt ñe ear uwaake im ba: ‘Kwõn ro̦o̦l! Jab itok ñan ippem! Ewõr make amim kabuñ!’ (Amos 7:12, 13, UBS) Amazaia ear ukot naan ko an Amos ke ear kajjitõk ippãn Kiiñ Jeroboam ñan kabõjrak jerbal eo an ri kanaan in. (Amos 7:7-11) Ak Amos ear jab lõl̦ño̦ñ im mijak. Rainin, jet ri tõl in kabuñ ko rej kõm̦m̦an kon̦ ippãn kien ko bwe ren rejetake kõttõpar ko aer ñan kaeñtaan ro doon Jeova. Bõtab, Jeova ej kallim̦ur bwe ejjel̦o̦k jabdewõt kein tarin̦ae enaaj ko̦kkure kõj.—Ais. 54:17, UBS.
3. Ta men ko ruo jej karoñ armej ro kaki rainin?
3 Ear Kwal̦o̦k Ekajet eo an Anij im Jeraam̦m̦an ko Repãd Im̦aan: Ri kanaan Amos ear kwal̦o̦k kõn an naaj Jeova ekajete bwij ko joñoul bwijjin Israel. Ilo jem̦l̦o̦kin l̦o̦k bok eo ear je ilo Baibõl̦, ear bareinwõt kwal̦o̦k kõn jeraam̦m̦an im kallim̦ur ko an Jeova. (Amos 9:13-15) Ãindeinl̦o̦k wõt kõj, jej kwal̦o̦k kõn “raan in ekajet” eo an Anij. Ak men in ej baj jidikin wõt “gospel in an aelõñ” eo me jej aikuj karoñ aolep armej ro kake. (2 Pi. 3:7; Matu 24:14) Ñe Jeova enaaj ko̦kkure aolep ro renana ilo Armagedon, lal̦ in enaaj oktak im juon pedetaij.—Sam 37:34.
4. Etke jej lõke im tõmak bwe jemaroñ kajejjet ankilaan Jeova?
4 Ilo lal̦ in, elõñ armej ro rej jum̦ae ad kwal̦o̦k naan kõn Aelõñ eo. Men in ej mãlejjoñe kõj el̦aññe jenaaj peek wõt ilo bũruod ñan tiljek ñan Jeova im kõm̦anm̦an ankilaan. (Jon 15:19) Bõtab, jej tõmak bwe Jeova enaaj wõnm̦aanl̦o̦k wõt im jipañ kõj ñan kajejjet ankilaan ãinwõt an kar jipañ Amos.—2 Ko. 3:5, UBS.