Wõn Ro Rej Kõm̦anm̦an Ankilaan Jeova Rainin?

1. Ñããt jenaaj jino katak kõn bok eo Wõn Ro Rej Kõm̦anm̦an Ankilaan Jeova Rainin? im ewi wãween bok in enaaj jipañ kõj?

¹ Ilo wiik eo ilo Oktoba 28, jenaaj jino katak kõn bok eo Wõn Ro Rej Kõm̦anm̦an Ankilaan Jeova Rainin? ilo kweilo̦k in Katak Baibõl̦ an Eklejia. Kar kõjjel̦ã kõn bok in ekããl ilo kweilo̦k eo el̦ap etan “Kõjparok Bũruom̦!” Bok in ej ñan jipañ ri katak Baibõl̦ ro ñan jel̦ã kõn doulul in. Ñe jenaaj etale kobban bok in, enaaj l̦apl̦o̦k ad kam̦m̦oolol bwe jej uwaan doulul eo an Jeova. Bareinwõt, ad naaj etale bok in enaaj jipañ kõj ñan jel̦ã kilen kõjerbale ilo kwal̦o̦k naan.—Sam 48:13, UBS.

2. Ewi wãween ad naaj katak kake bok in ilo eklejia eo?

² Kilen Ad Naaj Katak Kake: Eo ej tõl enaaj aikuj kõm̦m̦an bwe en jejjet joñan iien eo ej etale aolepen juon katak. Ewõr 28 katak ko ilo bok in im enaaj jinoe kajjojo katak ilo an riiti taitõl̦ eo. Innem, enaaj kajjitõk bwe eo ej riit en jino riiti pãrokõrããp eo jinointata. Ãlikin, eo ej tõl enaaj kwal̦o̦k kajjitõk eo ñan pãrokõrããp in me ear kõpooje ñan ri kweilo̦k ro. Tokãlik, naaj aikuj riit im etale pãrokõrããp ko me kar kõjjemo̦o̦ji ilo elõñ m̦õttan ko. Kajjojo m̦õttan ko rej jino kõn naan ko remeej im jenaaj etale m̦õttan kein juon ilo̦k juon. Ãlikin wõt aer riiti pãrokõrããp ko ilo juon m̦õttan, em̦m̦aan eo ej tõl enaaj kajjitõk ippãn ri kweilo̦k ro kõn ewi wãween kõmel̦el̦e ko ie rej uwaake kajjitõk eo ilo taitõl̦ in katak eo. Ebar lõñ pija ko ilo bok in im remaroñ bar uwaak jãni. Ñe ewõr iien, riiti eoon ko me rej rejetake mel̦el̦e eo. M̦okta jãn an wõnm̦aanl̦o̦k ñan katak eo tok juon, eo ej tõl enaaj bar ãliji katak eo ilo an kõjerbal kajjitõk ko itulal̦ ilo katak eo. El̦aññe ewõr bo̦o̦k eo me ej ba “Kal̦apl̦o̦k Am̦ Jel̦ã,” naaj aikuj riiti innem kajjitõk kõn ewi wãween men in emaroñ jipañ ri katak Baibõl̦ ro ñe renaaj l̦oore. Ñe ej wõr wõt iien, em̦m̦aan eo ej tõl emaroñ kõjerbal kajjitõk eo ilo taitõl̦ eo ñe ej kõm̦m̦an ãlij. Keememej bwe ejjab menin aikuj ñan l̦oore wãween kein ñe jej katak ippãn armej ro.

3. Ta eo jemaroñ kõm̦m̦ane ñan bõk tokjãn ad katak bok in ekããl?

³ Bwe jen bõk tokjãn ad katak kõn bok in, jej aikuj lukkuun pojakl̦o̦k im̦aan ñan kweilo̦k ko. Jen kate kõj ñan uwaak. Jemaroñ l̦õmn̦ak kõn ewi wãween katak ko ilo bok in renaaj jipañ ri katak Baibõl̦ ro ilo iien eo jej etali. Ilo ad etale im katak bok in ekããl, jenaaj pojak ñan jipañ ro jet ñan kobatok ippãd ilo ad kõm̦anm̦an ankilaan Anij. Ilo wãween in, er bareinwõt renaaj maroñ bõk jeraam̦m̦an eo ñan pãdwõt im mour indeeo ioon lal̦.—1 Jon 2:17.