Kwõnaaj Ke Kijejeto Ãinwõt Jeova im Jijej ilo Naaj Iien Kwõjkwõj Eo?

1. Ta eo Ri Kõnnaan ro an Jeova rej kate er ñan kõm̦m̦ane ilo iien Kwõjkwõj eo?

¹ Jeova ej kijejeto in kajejjet karõk ko an. Ikijjeen jet iaan jeraam̦m̦an ko me Aelõñ eo an Anij enaaj bũktok, Aiseia 9:7, (UBS) ej ba: “Kijejeto eo an Irooj Ekajoor Bõtata enaaj katõprak men kein.” Nejin Anij ear bar kwal̦o̦k an kijejeto. Ke ear pãd ijin ioon lal̦, ear lukkuun kijejeto kõn kabuñ eo em̦ool. (Jon 2:13-17; 4:34, UBS) Ilo iien Kwõjkwõj in Keememej Mej eo an Jijej kajjojo iiõ, elõñ milien rukwal̦o̦k naan ro rej kate er ñan ãinwõt Jeova im Jijej ilo aer kijejeto im kal̦apl̦o̦k kun̦aaer ilo kwal̦o̦k naan. Kwõnaaj ke bar kobal̦o̦k ippãn armej rein im kal̦apl̦o̦k kun̦aam̦?

2. Ad kijejeto ilo jerbalin kwal̦o̦k naan enaaj jipañ kõj ñan ta ilo M̦aaj 7 raan im m̦aanl̦o̦k?

² Iien Leto Letak Peba in Kũr Eo: Ilo iiõ in, jenaaj jino ad kũr armej ro ilo raanin Jãdede, M̦aaj 7 raan. Kwõn pepe kiiõ ñan kal̦apl̦o̦k iien am̦ kwal̦o̦k naan. Enaaj juon iien ekalañlõñ ñe eklejia ko rej kate er joñan wõt aer maroñ ñan kadedel̦o̦k aolep territory ko aer. Kate eok ñan kũr ro kwõj katak Baibõl̦ ippãer, ro ilo jikin jerbal, jikin jikuul̦, ro nukum̦, im ro kwaar kwal̦o̦k naan ñan er. Lel̦o̦k ñan er juon peba in kũr ak kwal̦o̦k Weep jait eo, jw.org/mh.

3. Ta ko jemaroñ kõm̦m̦ani bwe jen kal̦apl̦o̦k ijo kun̦aad ñan kwal̦o̦k naan ilo M̦aaj im Eprõl̦?

³ Akjel̦õri Bainier: Ad kijejeto enaaj jipañ kõj bwe en l̦apl̦o̦k ad kwal̦o̦k naan. Ejjel̦o̦k pere bwe enaaj lõñ renaaj akjel̦õri bainier ilo M̦aaj im Eprõl̦ kõnke ewõr ad maroñ kiiõ ñan kõm̦m̦ane 30 awa ilo allõñ kein ruo. Ilo iien kabuñ an baam̦le eo am̦ ak ñe kwõj katak ippam̦ make, kwõn jar im lale ta ko kwõmaroñ kõm̦m̦ani ñan am̦ maroñ akjel̦õri bainier. (JK. 15:22) Ad kijejeto in kũr armej ro ñan iien Kwõjkwõj eo emaroñ lujur ro jet ñan bar kijejeto ilo iien in. El̦aññe kwõj kõm̦m̦an oktak ko ilo jikejuul̦ ko am̦ bwe kwõn maroñ kal̦apl̦o̦k kun̦aam̦ ilo kwal̦o̦k naan, kwõnaaj anõke Jijej ilo an kar kijejeto.—Mark 6:31-34.

4. Ta tõprak ko jenaaj loi ñe jej kijejeto ãinwõt Jeova im Jijej?

⁴ Ñe jenaaj kijejeto ãinwõt Jeova im Jijej ilo naaj iien Kwõjkwõj eo, enaaj lõñ jeraam̦m̦an ko jenaaj bũki. Enaaj lõñl̦o̦k armej ro jaar kwal̦o̦k naan ñan er. Jenaaj lo lañlõñ eo me ej itok jãn ad karejar ñan Jeova im lel̦o̦k ñan ro jet. (Jrb. 20:35, UBS) El̦aptata, jenaaj kam̦õn̦õn̦õik bũruon Anij eo ad ekijejeto im Nejin.