Lõta eo jãn Kumi eo Ej Lale Aolep Eklejia ko an Ri Kõnnaan ro an Jeova—2016
Yokwe Ro Jeim im Jatim:
Rũkanaan Aiseia ear kile bwe unin an kar Aelõñ in Juda lo tõprak im jeraam̦m̦an ilo men otemjej, ej kõnke Jeova ear kajeraam̦m̦an er. Jemaroñ riiti naan ko an ilo Aiseia 26:12 (UBS), ke ear ba: ‘Jeova, jabdewõt men ko kõmij katõpraki rej itok jãn men ko kwõj kõm̦m̦ani.’ Eñin ejja eñjake eo wõt ad ñe jej kõl̦mãnl̦o̦kjen̦ kõn aolep tõprak ko jaar loi ilo iiõ eo ej jem̦l̦o̦k. Em̦ool, elõñ jerbal ko rel̦l̦ap Jeova ej kõm̦m̦ani kiiõ me rejjañin kar wal̦o̦k m̦okta! (Ex. 34:10) Baj l̦õmn̦ak m̦õk kõn jet iaan jeraam̦m̦an ko ear litok ñan kõj.
Juon iaan jeraam̦m̦an kein ej weep jait eo ad, jw.org. Weep jait in ewal̦o̦k ilo elõñl̦o̦k jãn 600 kajin ko, im ebar wõr bok ko ie me armej ro remaroñ riiti im taunl̦outi ilo elõñl̦o̦k jãn 750 kajin ko. Ewi joñan an weep jait in jipañ kõj ñan tõpar armej ro em̦ool bũrueer? L̦õmn̦ak m̦õk kõn bwebwenato in: Ewõr ruo rippãlele rar illu ippãn kabuñ ko kõn aer etao im nana jerbal ko aer. Ilo aerro kar kajjioñ in pukot kabuñ eo em̦ool, erro ar lo weep jait eo ad. Rar jino etal wõt ñan weep jait eo ad im riiti katak ko ilo bok ko im alwõje pija ko ie. Rar bar taunl̦outi bok jidikdik eo, Liñõri Baibõl̦ Raan Otemjej, im jino aer etale unin tõl in raan eo ippãn jo̦dikdik ro ruo nejierro. Eñin men eo rar kõm̦m̦ane ilo jibboñõn eo Ri Kõnnaan ro an Jeova rar kal̦l̦al̦l̦al̦ ilo kõjãm eo aer. Rukwal̦o̦k ro rar kile bwe tokjãn an kar baam̦le in etal ñan weep jait eo ad, rar kõm̦m̦an elõñ kain oktak ilo mour ko aer. Rar jol̦o̦k eo ko im il ko wõj iãnbwinnier. Rar bar jol̦o̦k ekjab ko ilo m̦weo im̦weer, im bõjrak jãn aer bõk kun̦aaer ilo raan ko rel̦l̦ap an lal̦ in. Bareinwõt, rar jol̦o̦k aer alwõji pija ko renana im rejekkar—baam̦le in ear kõm̦m̦ani aolep oktak kein m̦okta jãn an kar rippãlele rein iioon Ri Kõnnaan ro an Jeova! Ilo iien in kõmij je lõta in, rippãlele rein jim̦or im juon iaan ajri ro nejierro rej kiiõ rukwal̦o̦k naan im rippãlele rein rej l̦õmn̦ak in peptaij.
Elõñ rar jejetok im kwal̦o̦k aer kam̦m̦oolol kõn juon iaan men ko rekããl jej kõm̦m̦ani ãinwõt JW Broadcasting. Broadcast eo an kajjojo allõñ ej wal̦o̦k ilo elõñl̦o̦k jãn 70 kajin, im ej pojãn wal̦o̦k ilo bar kajin ko jet. Elõñ baam̦le rej alwõje bũrookraam̦ in ilo jo̦teen eo rej kõm̦m̦ane iien Kabuñ an Baam̦le eo aer. Juon jeid im jatid em̦m̦aan ear ba, “Elukkuun lõñl̦o̦k wõt uwaan doulul eo an Jeova ipel̦aakin lal̦ in, ak ej kab kiiõ n̦e me jelukkuun epaake ro ilo ra eo ad el̦ap ilo New York!”
Kweilo̦k ko rel̦l̦ap rej iien ko rem̦m̦antata ippãn armej ro an Jeova, jejjab ba wõt kweilo̦k el̦ap eo (regional convention) ilowaan kar iiõ in jerbalin kwal̦o̦k naan eo an 2015. Ilo kar bũrookraam̦ eo ad ekar wal̦o̦k 42 pijain alwõj im slideshow ko, im bareinwõt 6 kõjañjañ ko me kar kõjo̦i kajjojo iien m̦okta jãn an kar jino bũrookraam̦ eo. Juon jeid im jatid em̦m̦aan ear ba kõn kweilo̦k el̦ap eo, “Il̦akkar lale ãinwõt ejjel̦o̦k juon ear kõn̦aan jutak jãn jea eo an, joñan aer kar jab kõn̦aan jako jãn juon katak.” Juon mijinede me ear itok ñan kweilo̦k el̦ap eo ear ba, “Pija ko rar kõm̦m̦an bwe en l̦apl̦o̦k wõt aõ tõmak m̦ool eo im Aelõñ eo.”
Jeova ear bar kajeraam̦m̦an kõj kõn jet al in kweilo̦k ko rekããl ilowaan kar iiõ eo ej jem̦l̦o̦kl̦o̦k. Ruo rippãlele rar jejetok im ba: “Ñe kõmij roñjake al ko rekããl ej ãinwõt ñe Jeova ej atbo̦kwõj kõm. Rar kam̦õn̦õn̦õik kõm ilo iien ko kõmar bũrom̦õj im inepata.” Iien kweilo̦k el̦ap ko rej kakeememej kõj kõn joñan an kar kumi in kõjañjañ eo an doulul in kate er ñan kõpooji al ko ñan kõj, im un eo ej ñan bõktok aiboojoj im nõbar ñan Jeova!
Eklejia eo am̦ enañin ke kwal̦o̦k naan ilo̦bwilej kõn waan bwilbwil ko? Kilen kwal̦o̦k naan in ekããl ej juon jeraam̦m̦an el̦ap kõnke elõñ tõprak ko jaar loi jãne! Jet armej rej jokwe ilo apartment ko el̦ak gate ko aer ak ilo m̦õko reutiej im emo an jabdewõt del̦o̦ñ ie. Kõn men in, epen tõpar er. Bõtab ikijjeen wãween in ekããl, jaar maroñ tõpar rein, im ebar lõñ armej ro jaar tõpar er ekoba inactive ro. Ilo kar Jãnwõde 2015, juon em̦m̦aan ilo South Korea ear kepaak juon jeid im jatid ilo waan bwilbwil eo. Ear ba ñane bwe raan kein el̦apl̦o̦k an kõn̦aan jel̦ã kõn Anij. Jãn iien eo, kar jino katak Baibõl̦ ippãn em̦m̦aan in. Ilo Pãpode, ear etal im kweilo̦k, im ej kab juon alen an pãd ilo kweilo̦k ko; ilo M̦aaj, ear jol̦o̦k an kõbaatat. Im ilo Eprõl̦, ear etal im alwõje ra eo ilo South Korea, im ej kiiõ wõnm̦aanl̦o̦k wõt ilo an kõm̦m̦an wõnm̦aanl̦o̦k ko ilo mour eo an. Ekanooj in lõñ bwebwenato kar jilkintok ñan kõm ilo Ra eo ad el̦ap ak eñin ej juon iaaer.
Kõmij jar im kõjatdikdik bwe bok eo kar kõjjel̦ã kake ilo kweilo̦k el̦ap eo, enaaj jipañ ro rekõn kijejeto ilo aer kar karejar ñan Jeova ñan aer bar jepl̦aak ñan ippãn m̦okta jãn an itok jem̦l̦o̦kin! Kõmij rõjañ kom̦ aolep ñan anõke Jeova ikijjeen ami kwal̦o̦k yokwe im karwaineneik ro rej jepl̦aaktok.—Ezk. 34:16, UBS.
Elukkuun alikkar an kar Jeova kajeraam̦m̦an armej ro an ilo kar iiõ in kwal̦o̦k naan eo ej jem̦l̦o̦kl̦o̦k. Bar ta ko jet renaaj wal̦o̦k? Eokwe, jen kõttar ñan iien eo jenaaj loe. Ak ilo tõre in, kõm kõn̦aan jiroñ waj kom̦ bwe kõmij lukkuun yokwe kom̦ aolep im ejjab jem̦l̦o̦k am jar kõn kom̦.
Kõmij lewaj naanin kajeraam̦m̦an ñan kom̦,
Ro jeimi im jatimi,
Kumi eo Ej Lale Aolep Eklejia ko an Ri Kõnnaan ro an Jeova