Риби што пливаат во јата

Секоја година, во сообраќајни несреќи има над милион загинати и околу 50 милиони повредени. Од друга страна, милиони риби можат да пливаат заедно во јато речиси без да се допрат една со друга. Како го прават тоа и што можеме да научиме од нив за да се намали бројот на сообраќајни несреќи?

Размисли: Рибите што пливаат во јата ги добиваат информациите за своето опкружување преку очите и преку еден посебен сетилен орган наречен странична линија. Тие ги користат овие сетила за да ја одредат положбата на другите риби околу нив, а потоа реагираат во склад со добиените информации:

1. За да се движат една покрај друга. Ја приспособуваат брзината на движење според рибите што пливаат покрај нив и држат растојание од нив.

2. За да се приближат. Одат кон рибите што се на поголема оддалеченост.

3. За да избегнат судир. Го менуваат правецот на движење за да не се удрат во другите риби.

На темел на овие три карактеристики на рибите што пливаат во јато, една јапонска компанија за производство на автомобили конструираше неколку мали роботи-автомобили кои можат да се движат во група без да се судрат. Наместо очи, роботите користат комуникациска технологија, а наместо странична линија, ласерски детектор што ја одредува оддалеченоста од другите возила. Компанијата смета дека оваа технологија ќе ѝ помогне да создаде автомобили „што нема да се судираат“ и кои ќе „придонесат за безбедност во сообраќајот и за возење со помалку стрес“.

„Со помош на најновата електронска технологија се трудиме да го копираме начинот на кој рибите пливаат во јато“, вели Тошијуки Андоу, главен инженер на проектот за изработка на роботи-автомобили. „Во нашиот моторизиран свет можеме многу да учиме од рибите што пливаат во јато.“

Што мислиш? Дали начинот на кој рибите пливаат во јато е производ на случајност или е дело на мудар Творец?