Објавителите на Царството известуваат
Надминување на предизвиците во „Земјата на неочекуваното“
КОРИНТСКИТЕ христијани од првиот век апостол Павле ги прашал: „Ако трубата не дава разбирлив глас, тогаш кој ќе се готви за битка? Така и вие, ако со јазикот свој не изговарате разбирливи зборови, како ќе се разбере она што го зборувате?“ (1. Коринтјаните 14:8, 9).
На Папуа Нова Гвинеја, понекогаш наречена Земја на неочекуваното, Јеховините сведоци наидуваат на застрашувачки препреки при разгласувањето на јасната порака од Библијата. Тие им проповедаат на луѓе кои зборуваат на преку 700 различни јазици и кои имаат широка разновидност на обичаи. Сведоците се борат и со планински терен, недостиг на патишта, како и со сѐ поголем криминал. Освен сиве овие тешкотии, постои противење и од извесни религиозни групи и, понекогаш, дури и од школски службеници.
Меѓутоа, добрата духовна поука и сѐ поголемата библиотека со помагала за проучување на Библијата на локалните јазици, ги опремуваат Сведоците да ја пренесат добрата вест како еден јасен трубен повик. Честопати, одѕивот е позитивен, како што покажуваат следниве извештаи:
• На почетокот на една нова учебна година, наставникот сакал да знае зошто децата на Јеховините сведоци не го поздравуваат знамето или не ја пеат националната химна. Своето прашање го упатил до Мајола, 13-годишна ученичка која е крстен Сведок. Мајола дала јасен, библиски темелен одговор. Наставникот го прифатил нејзиното резонирање, бидејќи било на темел на Библијата. Нејзиното објаснение било споделено и со останатиот училишен персонал.
Подоцна, кога на учениците им била дадена задача да пишуваат состави, Мајола ја избрала темата за тројство. Нејзиниот состав ја добил највисоката оценка во одделението, и наставникот ја прашал каде ги нашла информациите. Таа му ја покажала книгата Ти можеш засекогаш да живееш во рајот на Земјата на англиски јазик. Наставникот почнал да ја покажува книгата пред целото одделение, и мнозина посакале да добијат сопствен примерок. Следниот ден, Мајола им дала 14 книги и 7 списанија на своите школски другарчиња, и започнала библиски студии со три од нив. Целта на Мајола е да стане полновремен министер.
• Една изолирана група Јеховини сведоци во едно крајбрежно село близу Порт Морсби, се соочувала со противење уште од раните 1970-ти. Меѓутоа, неодамна тие добиле помош од неочекуван извор. Бискупот на тамошната Обединета црква, еден домородец од Папуа Нова Гвинеја, кој бил школуван преку море, еден ден во црквата замолил за прашања од слушателите. Еден човек прашал: „Во нашето село постојат две религии — Обединетата црква и Јеховините сведоци. Што да правиме кога Сведоците ќе дојдат на нашата врата?“ После долга пауза, бискупот одговорил: „Знаете, навистина не знам што да ви кажам. Неодамна, двајца млади Сведоци дојдоа на мојата врата. Ми поставија едно прашање и, со сето мое универзитетско школување, јас не го знаев одговорот. Но, тие лесно ми го дадоа одговорот на темел на Библијата. Затоа, нема да ви кажам што да правите — тоа ќе ви го оставам вам. Не морате да слушате ако не сакате, но немојте да бидете насилни спрема нив“.
Еден патувачки претставник на Watch Tower Society, кој подоцна ја посети оваа група Сведоци, извести: „Скоро секој во селото ги слушаше Сведоците кога тие одеа да проповедаат. Некои дури и ги покануваа во своите домови. Сега е рај за проповедање“.