Целата Божја пророчка реч ќе се исполни!
1 Јеховините сведоци отсекогаш се интересирале за библиските пророштва. Затоа, бевме восхитени кога дознавме дека темата на овогодишниот обласен конгрес ќе биде „Божјата пророчка реч“. Желно сакавме да дознаеме што ни подготвил Јехова како ‚храна навреме‘ (Мат. 24:45). Тој не нѐ разочара.
2 Врвни точки од конгресот: Клучното предавање од петокот, „Обрни внимание на Божјата пророчка реч“, вклучуваше една просветлувачка дискусија за извештајот на преображението (Мат. 17:1—9). Тоа нагласи дека токму сега се наоѓаме на прагот на најдоброто време затоа што сме длабоко, длабоко навлезени во времето на крајот, а новиот систем непосредно претстои! Еден важен начин на кој треба да обрнеме внимание на Божјата реч е да ја читаме редовно. Циклусот „Уживај во читањето на Божјата реч“ даде практични предлози за тоа како да го направиме нашето читање на Библијата пополезно и поугодно.
3 Саботата попладне разгледавме некои причини зошто треба да бидеме уверени дека живееме во последните денови. Можеш ли да се сетиш на сите нив? Неделата наутро, пророштвото на Авакум беше живо прикажано кога дознавме дека нашево време е многу слично со неговото време и дека наскоро ќе настапат значајни моменти кога Јехова ќе ги уништи злобните и ќе ги спаси праведните. Дали ја сфати смислата на библиската драма за Јаков и Исав? Мораме активно да бараме благослов од Јехова, спротивставувајќи му се на духот на апатија и рамнодушност.
4 Фасцинантна нова книга: Колку само бевме возбудени кога ја добивме новата книга, Обрни внимание на Даниеловите пророштва! Говорникот што ја објави, наведе: „Освен уште неколку детали, сите пророштва во книгата на Даниил се исполнети“. Зарем тоа не ја подвлекува итноста на нашево време?
5 Конгресната програма во голема мера ја зајакна нашата увереност дека сите Божји ветувања кои сѐ уште не се исполнети, ќе се обистинат. Поттикнати сме постојано да им ја објавуваме на другите Божјата пророчка реч!