Школа која ни помага да го примениме она што го учиме
1 Додека го разгледуваме материјалот што е наведен во распоредот за Теократската школа за служба за 2006, ние настојуваме да извлечеме корист од библиските поуки со тоа што ги применуваме во нашата света служба и во секојдневниот живот. Решени сме да го применуваме она што го учиме (Јован 13:17; Фил. 4:9).
2 Коментирање: Во распоредот за оваа година предвидена е една минута повеќе во делот каде што присутните можат да коментираат за своите избрани стихови. Ова значи дека братот што ќе ја има оваа задача, треба да внимава да го заврши својот дел за пет минути наместо за шест. Оние што коментираат од место, исто така треба да внимаваат на времето. Ако промисли внимателно, оној што коментира може да каже корисни информации за 30 секунди или помалку. За ова време од пет минути, свој коментар би можеле да дадат дури десетмина од присутните.
3 Говори што поучуваат: Избраните стихови и поучниот говор треба да се сосредоточат на вредноста на материјалот и на тоа како да се примени во нашата служба и во други аспекти од животот. Говорникот треба да направи повеќе отколку само да ги поттикне слушателите да постапуваат на одреден начин. Тој треба точно да каже што да се стори, да покаже како може тоа да се направи и да го насочи вниманието кон користите од таквите постапки. Би можел да го каже следново: „На овој начин стихот ни дава водство“ или „Вака би можеле да ги употребиме овие стихови во службата“. Старешините и слугите помошници кои ги познаваат локалните околности треба да настојуваат колку што е можно поконкретно да објаснат како практично да се примени материјалот.
4 Кога се објаснува практичната примена, многу е корисно да се наведат библиски примери. Откако ќе спомне некој библиски пример, говорникот би можел да каже: „И ти би можел да се најдеш во слична ситуација“. Тој треба да биде сигурен дека објаснувањето на библискиот пример е во склад со контекстот, со целата Библија и со сѐ што било објавено од „верниот и разборит роб“ (Мат. 24:45).
5 Мудроста е способност успешно да се примени спознанието и разбирањето. „Мудроста е најважна“ (Посл. 4:7, NW). Додека стекнуваме практична мудрост преку нашето проучување во Теократската школа за служба, да ја изоструваме и уметноста тоа да им го пренесеме на другите.