Осаменост во свет на масовна комуникација

МОБИЛНИ телефони, СМС и имејл пораки, мрежи на пријатели, соби за муабетење. Никогаш порано немало толку многу и толку лесно достапни средства за комуникација. Сепак, во овој свет на масовна комуникација, многу луѓе, и млади и стари, се чувствуваат осамени. Зошто?

Во една своја книга, истражувачите Џон Т. Качопо и Вилијам Патрик темелно ја разработуваат темата осаменост. Тие се осврнуваат на едно истражување според кое „зголемената употреба на интернетот може да предизвика луѓето сѐ повеќе да се изолираат едни од други и да ја зголеми појавата на депресија доколку служи како замена за директен контакт меѓу луѓето“ (Loneliness—Human Nature and the Need for Social Connection).

Брзото темпо на живот што го наметнува современото општество тешко дека придонесува да постои срдечен однос меѓу луѓето. Насмевката и топлината што зрачи од очите на едно лице не може да се пренесе преку телефон или преку компјутерска порака.

Ова може да биде случај на работното место, а уште повеќе во семејниот круг. Во многу домови, членовите на семејството доаѓаат и си одат без да јадат заедно и без да разговараат. Тинејџерите имаат свој компјутер и живеат речиси изолирани од другите во семејството. Иронично е што, и покрај сите електронски уреди за комуникација што ги имаат, многу млади се чувствуваат осамени.

Во денешно време, дури и брачниот однос може да страда поради чувство на осаменост. Слабата комуникација може да доведе до тоа брачните партнери да живеат заедно само во техничка смисла. Една од најтешките форми на осаменост е да бидеш осамен иако имаш брачен партнер.

Самохраните родители се особено подложни на чувства на осаменост. Овој свет на масовна комуникација може, меѓу другото, да ги отуѓи од нивните деца и да предизвика да се чувствуваат уште поосамени. Исто така, многу лица што не се во брак би сакале да имаат брачен партнер, но нивните емоционални потреби остануваат незадоволени.

Осаменоста станува општествено зло кое може да води до алкохолизам, прејадување, злоупотреба на дрога, промискуитетен начин на живот, па дури и до самоубиство. Според тоа, многу е важно да ги препознаеме причините за појава на осаменоста. Тоа е првиот чекор што може да ни помогне да се справиме со овој проблем.