നമ്മുടെ മഹാ​പ്ര​ബോ​ധ​ക​നിൽനി​ന്നു നിങ്ങൾ പഠിക്കു​ന്നു​ണ്ടോ?

“സ്‌പെ​യി​നി​ലെ ഏററവും നല്ല യൂണി​വേ​ഴ്‌സി​റ​റി​ക​ളി​ലൊ​ന്നിൽ ഞാൻ അഞ്ചു വർഷ​ത്തോ​ളം നിയമം പഠിച്ചു. എന്നാൽ അതി​നെ​ക്കാൾ വളരെ ഉത്‌കൃ​ഷ്ട​മായ സംഗതി​യാ​യി​രു​ന്നു ബൈബിൾ പഠിക്കാ​നാ​രം​ഭി​ച്ച​പ്പോൾ ഞാൻ മനസ്സി​ലാ​ക്കി​യത്‌. എങ്ങനെ പഠിക്ക​ണ​മെന്നു യൂണി​വേ​ഴ്‌സി​റ​റി​യും എങ്ങനെ ജീവി​ക്ക​ണ​മെന്നു ബൈബി​ളും എന്നെ പഠിപ്പി​ച്ചു” എന്നു കൂലി​യോ വിശദ​മാ​ക്കു​ന്നു.

ദൈവ​ത്തി​ന്റെ ചിന്തകൾ, തത്ത്വങ്ങൾ, പ്രബോ​ധ​നങ്ങൾ എന്നിവ​യി​ലേ​ക്കുള്ള കവാടം നമുക്കു തുറന്നു​കി​ട്ടു​ന്നതു ബൈബി​ളി​ലൂ​ടെ​യാണ്‌. തിരു​വെ​ഴു​ത്തു​കൾ യഹോ​വയെ “മഹാ​പ്ര​ബോ​ധക”നായി വർണി​ക്കു​ന്നു. എന്തെന്നാൽ അവനാണ്‌ അഖിലാ​ണ്ഡ​ത്തിൽവെച്ച്‌ ഏററവും മികച്ച ഗുരു. (യെശയ്യാവ്‌ 30:20, NW) അക്ഷരീ​യ​മാ​യി, എബ്രായ പാഠം അവനെ “പ്രബോ​ധകർ” എന്നു വിളി​ക്കു​ന്നു. ഇതു പൂജക​ബ​ഹു​വചന രൂപമാണ്‌. യഹോ​വ​യാൽ പഠിപ്പി​ക്ക​പ്പെ​ടു​ന്നതു മററ്‌ ഏതൊരു ഗുരു​വി​നു കീഴിൽ പഠിക്കു​ന്ന​തി​നെ​ക്കാ​ളും വളരെ ഉത്‌കൃ​ഷ്ട​മാ​ണെന്ന്‌ ഇതു നമ്മെ അനുസ്‌മ​രി​പ്പി​ക്കണം.

യഹോ​വ​യിൽനി​ന്നുള്ള പ്രാ​യോ​ഗിക ജ്ഞാനം

ദിവ്യ ബോധനം ഇത്ര പ്രയോ​ജ​ന​പ്ര​ദ​മാ​യി​രി​ക്കു​ന്നത്‌ എന്തു​കൊ​ണ്ടാണ്‌? മുഖ്യ​കാ​രണം അമൂല്യ​മായ അതിന്റെ ഉള്ളടക്ക​മാണ്‌. യഹോ​വ​യു​ടെ പ്രബോ​ധനം നമുക്കു “പ്രാ​യോ​ഗിക ജ്ഞാനം” പ്രദാനം ചെയ്യുന്നു. പിന്നെ, ദൈവ​ദ​ത്ത​ജ്ഞാ​നം അതു ബാധക​മാ​ക്കു​ന്ന​വരെ “ജീവ​നോ​ടെ കാത്തു​സൂ​ക്ഷി​ക്കു​ന്നു.”—സദൃശ​വാ​ക്യ​ങ്ങൾ 3:21, 22; സഭാ​പ്ര​സം​ഗി 7:12, NW.

തന്റെ ജീവി​ത​ത്തി​ലു​ട​നീ​ളം യഹോ​വ​യു​ടെ ജ്ഞാനമാ​ണു തന്നെ സംരക്ഷി​ച്ച​തെന്നു സങ്കീർത്തനം 119-ന്റെ രചയി​താവ്‌ തിരി​ച്ച​റി​ഞ്ഞു. ഉദാഹ​ര​ണ​ത്തിന്‌, അദ്ദേഹം ഇങ്ങനെ പാടു​ക​യു​ണ്ടാ​യി: “ആയിരം ആയിരം പൊൻവെള്ളി നാണ്യ​ത്തെ​ക്കാൾ നിന്റെ വായിൽനി​ന്നുള്ള ന്യായ​പ്ര​മാ​ണം എനിക്കു​ത്തമം. നിന്റെ ന്യായ​പ്ര​മാ​ണം എന്റെ പ്രമോ​ദം ആയിരു​ന്നി​ല്ലെ​ങ്കിൽ ഞാൻ എന്റെ കഷ്ടതയിൽ നശിച്ചു​പോ​കു​മാ​യി​രു​ന്നു. നിന്റെ കല്‌പ​നകൾ എന്നെ എന്റെ ശത്രു​ക്ക​ളെ​ക്കാൾ ബുദ്ധി​മാ​നാ​ക്കു​ന്നു. അവ എപ്പോ​ഴും എന്റെ പക്കൽ ഉണ്ട്‌. നിന്റെ സാക്ഷ്യങ്ങൾ എന്റെ ധ്യാന​മാ​യി​രി​ക്ക​കൊ​ണ്ടു എന്റെ സകലഗു​രു​ക്കൻമാ​രി​ലും ഞാൻ ബുദ്ധി​മാ​നാ​കു​ന്നു.”—സങ്കീർത്തനം 119:72, 92, 98, 99.

യഹോ​വ​യു​ടെ ന്യായ​പ്ര​മാ​ണ​മി​ല്ലാ​യി​രു​ന്നെ​ങ്കിൽ ‘തന്റെ കഷ്ടതയിൽ നശിച്ചു​പോ​കു​മാ​യി​രു​ന്നതു’ സങ്കീർത്ത​ന​ക്കാ​രൻ മാത്ര​മ​ല്ലാ​യി​രു​ന്നു. ദൈവിക തത്ത്വങ്ങൾ ബാധക​മാ​ക്കി​യ​തു​കൊ​ണ്ടാ​ണു തന്റെ ജീവിതം രക്ഷപെ​ട്ടത്‌ എന്നു ബോധ്യ​മുള്ള ഒരു യുവതി​യാ​ണു സ്‌പാ​നീ​ഷു​കാ​രി​യായ റോസ. “26 വയസ്സാ​യ​പ്പോ​ഴേ​ക്കും ഞാൻ രണ്ടു പ്രാവ​ശ്യം ആത്മഹത്യ​ക്കു ശ്രമി​ച്ചു​ക​ഴി​ഞ്ഞി​രു​ന്നു” എന്ന്‌ അവൾ ഓർമി​ക്കു​ന്നു.

റോസ ഏർപ്പെ​ട്ടി​രുന്ന സംഗതി​ക​ളിൽ വ്യഭി​ചാ​ര​വും മദ്യപാ​ന​വും മയക്കു​മ​രു​ന്നു ദുരു​പ​യോ​ഗ​വു​മൊ​ക്കെ ഉണ്ടായി​രു​ന്നു. അവൾ പറയുന്നു: “ഒരു ദിവസം ഞാൻ വിഷാ​ദ​ത്തി​ന്റെ അഗാധ ഗർത്തത്തി​ലാ​ണ്ടു​പോയ നേരം. നമ്മുടെ പ്രശ്‌നങ്ങൾ പരിഹ​രി​ക്കാൻ ബൈബി​ളി​നു നമ്മെ എങ്ങനെ സഹായി​ക്കാ​നാ​കു​മെ​ന്ന​തി​നെ​ക്കു​റിച്ച്‌ സാക്ഷി​ക​ളായ ഒരു ദമ്പതികൾ എന്നോടു സംസാ​രി​ച്ചു. അങ്ങനെ ഞാൻ ദൈവ​വ​ചനം പഠിക്കാൻ ആരംഭി​ച്ചു. എനിക്ക്‌ അത്‌ അത്യധി​കം ആകർഷ​ക​മായ അനുഭ​വ​മാ​യി. ശുദ്ധമായ, തികച്ചും പുതു​തായ ഒരു ജീവി​ത​ത്തി​നു തുടക്കം കുറി​ക്കാ​നുള്ള ശക്തി എനിക്ക്‌ ഒരു മാസത്തി​നു​ള്ളിൽത്ത​ന്നെ​യു​ണ്ടാ​യി. ഇപ്പോൾ എനിക്കു ജീവി​ത​ത്തിൽ ഒരു ഉദ്ദേശ്യ​മാ​യി. ഇനി എനിക്കു മദ്യത്തി​ന്റെ​യോ മയക്കു​മ​രു​ന്നി​ന്റെ​യോ താങ്ങ്‌ ആവശ്യ​മില്ല. യഹോ​വ​യു​ടെ സുഹൃ​ത്താ​യി​രി​ക്കാൻ ഞാൻ വളരെ​യ​ധി​കം ആഗ്രഹി​ച്ച​തു​കൊണ്ട്‌, അവന്റെ നിലവാ​ര​ങ്ങൾക്കു ചേർച്ച​യിൽ ജീവി​ക്കാൻ ഞാൻ ദൃഢചി​ത്ത​യാ​യി​രു​ന്നു. ദൈവ​വ​ച​ന​ത്തി​ന്റെ പ്രാ​യോ​ഗിക ജ്ഞാനമി​ല്ലാ​യി​രു​ന്നെ​ങ്കിൽ ഞാനി​പ്പോൾ ജീവി​ച്ചി​രി​ക്കു​മാ​യി​രു​ന്നില്ല, തീർച്ച​യാ​യും ഞാൻ ജീവി​ത​മൊ​ടു​ക്കി​യേനേ.”

സത്യമാ​യും, യഹോ​വ​യിൽനി​ന്നുള്ള ജ്ഞാനം ജീവര​ക്ഷാ​ക​ര​മാണ്‌. അതു​കൊണ്ട്‌, ദിവ്യ ബോധ​ന​ത്തി​ന്റെ വിലതീ​രാത്ത ഉള്ളടക്ക​ത്തിൽനി​ന്നു മാത്രമല്ല, തന്റെ ദാസൻമാ​രെ പ്രബോ​ധി​പ്പി​ക്കാൻ യഹോവ ഉപയോ​ഗി​ക്കുന്ന ഉപാധി​യിൽനി​ന്നും നമുക്കു പ്രയോ​ജനം നേടാ​നാ​വും. ദൈവ​പു​ത്ര​നായ യേശു​ക്രി​സ്‌തു നമ്മോടു കൽപ്പി​ച്ചി​രി​ക്കു​ന്നത്‌ പഠിപ്പി​ക്കു​ന്ന​വ​രും ശിഷ്യ​രാ​ക്കു​ന്ന​വ​രും ആയിരി​ക്കാ​നാണ്‌. അതു​കൊണ്ട്‌, പ്രബോ​ധനം നൽകു​ന്ന​തി​നുള്ള ഏററവും ഫലപ്ര​ദ​മായ വിധങ്ങൾ പഠിക്കാൻ നാം ആഗ്രഹി​ക്കു​ന്നു.—മത്തായി 28:19, 20.

യഹോവ ദൃഷ്ടാ​ന്തങ്ങൾ ഉപയോ​ഗി​ക്കു​ന്നു

“ഉപമ കൂടാതെ അവരോട്‌ [യേശു] ഒന്നും സംസാ​രി​ക്കു​മാ​യി​രു​ന്നില്ല” എന്നു മർക്കോ​സി​ന്റെ സുവി​ശേഷം പറയുന്നു. (മർക്കോസ്‌ 4:34, NW) യേശു​വി​ന്റെ പഠിപ്പി​ക്ക​ലി​ലെ ഈ സവി​ശേ​ഷ​ത​യിൽ അതിശ​യി​ക്കാ​നൊ​ന്നു​മില്ല. ഇസ്രാ​യേൽ ജനതക്കു യഹോ​വ​യു​ടെ പ്രാവ​ച​നിക സന്ദേശങ്ങൾ നൽകപ്പെട്ട വിധങ്ങ​ളി​ലൊന്ന്‌ അവൻ കേവലം അനുക​രി​ച്ചു​വെ​ന്നേ​യു​ള്ളൂ. വ്യക്തവും ശക്തവു​മായ ദൃഷ്ടാ​ന്തങ്ങൾ ഇവയി​ലുണ്ട്‌.—യെശയ്യാ​വു 5:1-7; യിരെ​മ്യാ​വു 18:1-11; യെഹെ​സ്‌കേൽ 15:2-7; ഹോശേയ 11:1-4.

ഉദാഹ​ര​ണ​ത്തിന്‌, വിഗ്ര​ഹങ്ങൾ ഉപയോ​ഗ​ശൂ​ന്യ​മാ​ണെന്നു നമ്മെ പഠിപ്പി​ക്കാൻ യഹോവ ശക്തമായ ദൃഷ്ടാന്തം ഉപയോ​ഗി​ക്കു​ന്ന​തെ​ങ്ങ​നെ​യെന്നു ശ്രദ്ധി​ക്കുക. യെശയ്യാ​വു 44:14-17 (പി.ഒ.സി. ബൈബിൾ) പ്രസ്‌താ​വി​ക്കു​ന്നു: “അവൻ ദേവദാ​രു വെട്ടുന്നു. . . . മരവും തിര​ഞ്ഞെ​ടുത്ത്‌ വൃക്ഷങ്ങൾക്കി​ട​യിൽ വളരാൻ അനുവ​ദി​ക്കു​ന്നു. അവൻ ദേവദാ​രു നടുക​യും . . . ചെയ്യുന്നു. പിന്നെ അതു വിറകിന്‌ എടുക്കും. ഒരു ഭാഗം കത്തിച്ചു തീ കായു​ന്ന​തി​നും ആഹാരം പാകം ചെയ്യു​ന്ന​തി​നും ഉപയോ​ഗി​ക്കു​ന്നു. വേറൊ​രു ഭാഗ​മെ​ടുത്ത്‌ ദേവനെ ഉണ്ടാക്കി ആരാധി​ക്കു​ക​യും വിഗ്രഹം കൊത്തി​യെ​ടുത്ത്‌ അതിന്റെ മുമ്പിൽ പ്രണമി​ക്കു​ക​യും ചെയ്യുന്നു. തടിയു​ടെ ഒരുഭാ​ഗം കത്തിച്ച്‌ അതിൽ മാംസം ചുട്ടു​തിന്ന്‌ തൃപ്‌ത​നാ​കു​ന്നു. . . . ശേഷിച്ച ഭാഗം​കൊണ്ട്‌ അവൻ ദേവനെ, വിഗ്ര​ഹത്തെ, ഉണ്ടാക്കി അതിനെ പ്രണമിച്ച്‌ ആരാധി​ക്കു​ന്നു. എന്നെ രക്ഷിക്ക​ണമേ, അവിടു​ന്നാ​ണ​ല്ലോ എന്റെ ദൈവം എന്ന്‌ അവൻ അതി​നോ​ടു പ്രാർത്ഥി​ക്കു​ന്നു.” വിഗ്ര​ഹാ​രാ​ധ​ന​യും വ്യാജ തത്ത്വങ്ങ​ളും നിരാ​ക​രി​ക്കു​ന്ന​തി​നു പരമാർഥ​ഹൃ​ദ​യരെ സഹായി​ക്കാൻ ഇത്തരം ദൃഷ്ടാ​ന്തങ്ങൾ ശക്തമായ ഉപകര​ണ​ങ്ങ​ളാണ്‌.

ഉള്ളു ചികയുന്ന ചോദ്യ​ങ്ങൾ

ചിന്തോ​ദ്ദീ​പ​ക​മായ ചോദ്യ​ങ്ങ​ളി​ലൂ​ടെ തന്റെ ചില ദാസൻമാ​രു​ടെ ചിന്തകൾക്കു യഹോവ മാററം വരുത്തി​യ​തെ​ങ്ങനെ എന്നതിന്റെ ദൃഷ്ടാ​ന്ത​ങ്ങ​ളും ബൈബി​ളി​ലുണ്ട്‌. ഗോ​ത്ര​പി​താ​വായ ഇയ്യോബ്‌ ആയിരു​ന്നു ഇവരിൽ ഒരാൾ. ദൈവ​വു​മാ​യുള്ള ബന്ധത്തിൽ തന്റെ നിസ്സാ​ര​ത്വ​ത്തെ മനസ്സി​ലാ​ക്കാൻ യഹോവ ക്ഷമാപൂർവം അവനെ സഹായി​ച്ചു. ഇതു സാധി​ച്ചെ​ടു​ത്തതു ചോദ്യ​ങ്ങ​ളു​ടെ ഒരു പരമ്പര ഉപയോ​ഗി​ച്ചാ​യി​രു​ന്നു. ഉത്തരം കൊടു​ക്കാൻ ഇയ്യോബ്‌ ദയനീ​യ​മാ​യി പരാജ​യ​പ്പെ​ടു​ന്ന​തരം ചോദ്യ​ങ്ങ​ളാ​യി​രു​ന്നു അവയെ​ല്ലാം.

യഹോവ ഇയ്യോ​ബി​നോ​ടു ചോദി​ച്ചു: “ഞാൻ ഭൂമിക്കു അടിസ്ഥാ​ന​മി​ട്ട​പ്പോൾ നീ എവി​ടെ​യാ​യി​രു​ന്നു? . . . സമുദ്രം ചാടി​പ്പു​റ​പ്പെ​ട്ട​പ്പോൾ അതിനെ കതകു​ക​ളാൽ അടെച്ചവൻ ആർ? . . . കാർത്തി​ക​യു​ടെ ചങ്ങല നിനക്കു ബന്ധിക്കാ​മോ? മകയി​ര​ത്തി​ന്റെ ബന്ധനങ്ങൾ അഴിക്കാ​മോ? . . . ദൈവ​ത്തി​ന്നു​ള്ള​തു​പോ​ലെ നിനക്കു ഭുജം ഉണ്ടോ?” ഇരുത്തി​ക്കളഞ്ഞ ഈ ചോദ്യം​ചെ​യ്യ​ലിൽ ഈ പ്രധാന ചോദ്യ​വു​മു​ണ്ടാ​യി​രു​ന്നു: “നീ നീതി​മാ​നാ​കേ​ണ്ട​തി​ന്നു എന്നെ [യഹോ​വയെ] കുററം പറയു​മോ?”—ഇയ്യോബ്‌ 38:4, 8, 31; 40:8, 9.

താൻ കാര്യ​മ​റി​യാ​തെ​യാ​ണു സംസാ​രി​ച്ച​തെന്നു തിരി​ച്ച​റി​യാൻ തുളച്ചു​ക​യ​റുന്ന ഇത്തരം ചോദ്യങ്ങൾ ഇയ്യോ​ബി​നെ പ്രാപ്‌ത​നാ​ക്കി. അതു​കൊണ്ട്‌, അവൻ പറഞ്ഞ​തെ​ല്ലാം പിൻവ​ലിച്ച്‌ മനസ്‌ത​പി​ച്ചു. (ഇയ്യോബ്‌ 42:6) ഈ സംഭവ​ത്തി​ലെ​പ്പോ​ലെ, തിര​ഞ്ഞെ​ടുത്ത ചോദ്യ​ങ്ങൾ നമ്മുടെ കുട്ടി​ക​ളു​ടെ​യോ ബൈബിൾ വിദ്യാർഥി​ക​ളു​ടെ​യോ തെററായ ചിന്തകളെ മാററി​യെ​ടു​ക്കാൻ സഹായി​ച്ചേ​ക്കാം.

ആത്മവി​ശ്വാ​സം വളർത്തി​യെ​ടു​ക്കൽ

താൻ ഒന്നിനും യോഗ്യ​ത​യി​ല്ലാ​ത്ത​വ​നെ​ന്നോ അപര്യാ​പ്‌ത​നെ​ന്നോ തോന്നുന്ന ആരെ​യെ​ങ്കി​ലും നമുക്കു സഹായി​ക്കേ​ണ്ട​തു​ണ്ടെ​ങ്കി​ലോ? യഹോ​വ​യും അവന്റെ പ്രവാ​ച​ക​നായ മോശ​യും തമ്മിലുള്ള സംഭാ​ഷണം ഈ വിഷയ​ത്തിൽ നമുക്കു സഹായ​ക​മാണ്‌. ഫറവോ​ന്റെ​യും ഇസ്രാ​യേ​ല്യ​രു​ടെ​യും മുമ്പാകെ ദൈവം മോശയെ തന്റെ വക്താവാ​യി നിയമി​ച്ച​പ്പോൾ ആ കർത്തവ്യ​ത്തി​നു താൻ അപര്യാ​പ്‌ത​നാ​ണെന്നു പ്രവാ​ച​കനു തോന്നി. “ഞാൻ വിക്കനും തടിച്ച നാവു​ള്ള​വ​നും ആകുന്നു” എന്ന്‌ അവൻ പറഞ്ഞു. എന്നുവ​രി​കി​ലും ദൈവ​ത്തി​ന്റെ മറുപടി ഇതായി​രു​ന്നു: “മനുഷ്യ​ന്നു വായി കൊടു​ത്തതു ആർ? . . . യഹോ​വ​യായ ഞാൻ അല്ലയോ? ആകയാൽ നീ ചെല്ലുക; ഞാൻ നിന്റെ വായോ​ടു​കൂ​ടെ ഇരുന്നു നീ സംസാ​രി​ക്കേ​ണ്ടതു നിനക്കു ഉപദേ​ശി​ച്ചു​ത​രും.”—പുറപ്പാ​ടു 4:10-12.

മോശ​യു​ടെ സഹോ​ദ​ര​നായ അഹരോ​നെ യഹോവ അവന്റെ വക്താവാ​യി നിയമി​ച്ചു. അങ്ങനെ അവർ തങ്ങളുടെ വേല നിർവ​ഹി​ക്കാൻ ഈജി​പ്‌തി​ലേക്കു പുറ​പ്പെട്ടു. (പുറപ്പാ​ടു 4:14-16) വീടു​തോ​റു​മുള്ള ശുശ്രൂ​ഷ​യി​ലോ തെരു​വു​സാ​ക്ഷീ​ക​ര​ണ​ത്തി​ലോ ആദ്യമാ​യി ഏർപ്പെ​ടു​മ്പോൾ മോശ​യ്‌ക്കു തോന്നി​യ​തു​പോ​ലെ​യുള്ള അപര്യാ​പ്‌ത​താ​ബോ​ധം തോന്നി​യി​ട്ടുള്ള അനേക​മാ​ളു​കൾ യഹോ​വ​യു​ടെ സാക്ഷി​ക​ളി​ലുണ്ട്‌. മോശ​യു​ടെ കാര്യ​ത്തി​ലെ​ന്ന​പോ​ലെ, നമുക്കു യഹോ​വ​യു​ടെ പിന്തു​ണ​യു​ണ്ടെ​ന്നും നമ്മോ​ടൊ​പ്പം പരിച​യ​സ​മ്പ​ന്ന​നായ ഒരു ശുശ്രൂ​ഷ​ക​നു​ണ്ടെ​ന്നും അറിയു​ന്നതു പരി​ഭ്ര​മ​മ​ക​റ​റാൻ നമ്മെ സഹായി​ക്കും. ആവർത്ത​ന​പു​സ്‌ത​ക​ത്തിൽ ഉടനീളം കാണുന്ന ശക്തമായ പ്രസം​ഗങ്ങൾ നടത്താ​റായ ഘട്ടത്തോ​ളം ആത്മവി​ശ്വാ​സം വളർത്തി​യെ​ടു​ക്കാൻ മോശ​യ്‌ക്കു സാധിച്ചു. അതു​പോ​ലെ യഹോ​വ​യു​ടെ സഹായ​ത്താൽ സംസാ​ര​പ്രാ​പ്‌തി വളർത്തി​യെ​ടു​ക്കാൻ നമുക്കും കഴിയും.

ഒരു ദൃഷ്ടാ​ന്ത​പാ​ഠം

മററു​ള്ള​വരെ സഹായി​ക്കാ​നുള്ള ആത്മാർഥ​മായ ആഗ്രഹ​വും അത്യന്താ​പേ​ക്ഷി​ത​മാണ്‌. ആ ഗുണമാ​ണു യോനാ പ്രവാ​ച​കന്‌ ഇല്ലാ​തെ​പോ​യത്‌. നഗരത്തി​ന്റെ ആസന്നമാ​യി​രുന്ന നാശ​ത്തെ​ക്കു​റി​ച്ചു നിനെ​വേ​ക്കാർക്കു മുന്നറി​യി​പ്പു കൊടു​ക്കാൻ യഹോവ യോനാ​യെ നിയമി​ച്ചു. അത്ഭുത​ക​ര​മെന്നു പറയട്ടെ, നിനെ​വേ​ക്കാർ അനുത​പി​ച്ചു. (യോനാ 3:5) അതുകാ​രണം യഹോവ ദുരന്തം നീട്ടി​വെച്ചു. തന്റെ പ്രസം​ഗ​വേ​ല​യു​ടെ വിജയ​ത്തിൽ അത്യധി​കം ആഹ്ലാദി​ക്കു​ന്ന​തി​നു​പ​കരം താൻ മുൻകൂ​ട്ടി​പ്പ​റ​ഞ്ഞതു നടക്കാ​തെ​പോ​യ​തിൽ യോനാ​യ്‌ക്ക്‌ അമർഷ​മാ​ണു തോന്നി​യത്‌. ശരിയായ വീക്ഷണം കിട്ടാൻ യഹോവ എങ്ങനെ​യാണ്‌ അവനെ സഹായി​ച്ചത്‌?

മററു​ള്ള​വ​രെ​ക്കു​റി​ച്ചു ചിന്തയു​ണ്ടാ​യി​രി​ക്കേ​ണ്ട​തി​ന്റെ പ്രാധാ​ന്യ​ത്തെ​പ്പ​ററി യോനാ​യെ പഠിപ്പി​ക്കാൻ യഹോവ ഒരു ആവണക്കു ചെടിയെ ഉപയോ​ഗി​ച്ചു. ഒററ രാത്രി​കൊണ്ട്‌ ആ ചെടി അത്ഭുത​ക​ര​മാ​യി വളർന്നു. നിനെ​വേ​യു​ടെ അതിർത്തി​യിൽ ഒരു കുടിലു തീർത്തി​രുന്ന യോനാ​യ്‌ക്ക്‌ ഈ ചെടി കുളിർമ​യേ​റും തണലായി മാറി. ഈ നിസ്സാര ചെടി​യെ​ച്ചൊ​ല്ലി യോനാ “അത്യന്തം സന്തോഷി”ക്കാൻ തുടങ്ങി. പക്ഷേ, ചെടിയെ ഉണക്കി​ക്ക​ള​യാൻവേണ്ടി അതിനെ ആക്രമി​ക്കാൻ യഹോവ ഒരു പുഴു​വി​നെ വരുത്തി. വെയി​ലും ഉഷ്‌ണ​ക്കാ​റ​റും​കൊ​ണ്ടു കോപാ​കു​ല​നാ​യി യോനാ പറഞ്ഞു: “ജീവി​ച്ചി​രി​ക്കു​ന്ന​തി​നെ​ക്കാൾ മരിക്കു​ന്നതു എനിക്കു നന്നു.” (യോനാ 4:5-8) ഇതി​ലെ​ല്ലാ​മുള്ള പാഠ​മെ​ന്താ​യി​രു​ന്നു?

യഹോവ യോന​യു​മാ​യി സംസാ​രി​ച്ചു, എന്നിട്ടു പറഞ്ഞു: “നീ അദ്ധ്വാ​നി​ക്ക​യോ വളർത്തു​ക​യോ ചെയ്യാതെ ഒരു രാത്രി​യിൽ ഉണ്ടായ്‌വ​രി​ക​യും ഒരു രാത്രി​യിൽ നശിച്ചു​പോ​ക​യും ചെയ്‌തി​രി​ക്കുന്ന ആവണക്കി​നെ​ക്കു​റി​ച്ചു നിനക്കു അയ്യോ​ഭാ​വം തോന്നു​ന്നു​വ​ല്ലോ. എന്നാൽ വലങ്കയ്യും ഇടങ്കയ്യും തമ്മിൽ തിരി​ച്ച​റി​ഞ്ഞു​കൂ​ടാത്ത ഒരു ലക്ഷത്തി​രു​പ​തി​നാ​യി​ര​ത്തിൽ ചില്വാ​നം മനുഷ്യ​രും അനേകം മൃഗങ്ങ​ളു​മുള്ള മഹാന​ഗ​ര​മായ നീനെ​വേ​യോ​ടു എനിക്കു അയ്യോ​ഭാ​വം തോന്ന​രു​തോ.”—യോനാ 4:9-11.

എന്തൊരു ശക്തമായ ദൃഷ്ടാ​ന്ത​പാ​ഠം! ആയിര​ക്ക​ണ​ക്കി​നാ​ളു​ക​ളെ​ക്കാൾ യോനാ​യ്‌ക്കു താത്‌പ​ര്യം ആവണക്കു ചെടി​യു​ടെ കാര്യ​ത്തി​ലാ​യി​രു​ന്നു. ദൈവ​ത്തി​ന്റെ സൃഷ്ടി​ക​ളിൽ ഏതെങ്കി​ലും ഒന്നി​നോ​ടുള്ള താത്‌പ​ര്യം പ്രശം​സ​നീ​യം​തന്നെ. എങ്കിലും ആളുക​ളു​ടെ ജീവൻ രക്ഷിക്കാൻ സഹായി​ക്കു​ന്ന​താ​ണു നമ്മുടെ ഏററവും പ്രധാ​ന​മായ വേല.

ക്ഷമയോ​ടെ പ്രബോ​ധി​പ്പി​ക്കൽ

യോനാ മനസ്സി​ലാ​ക്കി​യ​തു​പോ​ലെ, നമ്മുടെ ശുശ്രൂഷ നിറ​വേ​റ​റുക എല്ലായ്‌പോ​ഴും എളുപ്പമല്ല. (2 തിമൊ​ഥെ​യൊസ്‌ 4:5) എന്നാൽ അതു സാധി​ക്ക​ണ​മെ​ങ്കിൽ നമുക്കു മററു​ള്ള​വ​രോ​ടു ക്ഷമാപൂർവ​ക​മായ ഒരു മനോ​ഭാ​വ​മു​ണ്ടാ​യി​രി​ക്കണം.

നിങ്ങളു​ടെ ഒരു ബൈബിൾ വിദ്യാർഥി മന്ദഗതി​യി​ലു​ള്ള​വ​നോ ഒരുത​ര​ത്തിൽ പറഞ്ഞാൽ യുക്തി​ര​ഹി​ത​നോ ആണെങ്കിൽ നിങ്ങൾ എങ്ങനെ പ്രതികരിക്കും? അത്തരം പ്രശ്‌നങ്ങൾ കൈകാ​ര്യം ചെയ്യേ​ണ്ട​തെ​ങ്ങ​നെ​യെന്നു നമ്മുടെ മഹാ​പ്ര​ബോ​ധകൻ നമ്മെ പഠിപ്പി​ക്കു​ന്നു. സോ​ദോം, ഗൊ​മോറ എന്നിവ​യു​ടെ​മേൽ ആസന്നമാ​യി​രുന്ന ന്യായ​വി​ധി​യെ​ക്കു​റിച്ച്‌ അബ്രഹാം തുട​രെ​ത്തു​ടരെ ചോദ്യ​ങ്ങൾ ചോദി​ച്ച​പ്പോൾ അവൻ അസാമാ​ന്യ ക്ഷമ പ്രകടി​പ്പി​ച്ചു. അബ്രഹാം ചോദി​ച്ചു: “ദുഷ്ട​നോ​ടു​കൂ​ടെ നീതി​മാ​നെ​യും നീ സംഹരി​ക്കു​മോ?” പിന്നെ അബ്രഹാം ഇങ്ങനെ അപേക്ഷി​ച്ചു: “ആ പട്ടണത്തിൽ അമ്പതു നീതി​മാൻമാർ ഉണ്ടെങ്കിൽ നീ അതിനെ സംഹരി​ക്കു​മോ? അതിലെ അമ്പതു നീതി​മാൻമാർ നിമിത്തം ആ സ്ഥലത്തോ​ടു ക്ഷമിക്ക​യി​ല്ല​യോ?” അനുകൂ​ല​മായ മറുപടി യഹോ​വ​യിൽനി​ന്നു കിട്ടി​യ​പ്പോൾ സംഖ്യ പത്താക്കി ചുരു​ക്കു​ന്ന​തു​വരെ യാചി​ച്ചു​കൊ​ണ്ടി​രി​ക്കാൻ അബ്രഹാ​മിന്‌ അതു പ്രേര​ണ​യേകി. ലോത്തി​ന്റെ കുടും​ബം മാത്രമേ രക്ഷിക്ക​പ്പെ​ടാൻ യോഗ്യ​രാ​യു​ള്ളൂ​വെന്നു യഹോ​വക്ക്‌ അറിയാ​മാ​യി​രു​ന്നു. അവസാനം അതിനു​വേ​ണ്ടുന്ന ക്രമീ​ക​രണം അവൻ ചെയ്യു​ക​യും ചെയ്‌തു. എന്നാൽ യഹോ​വ​യു​ടെ കാരു​ണ്യ​ത്തി​ന്റെ വ്യാപ്‌തി ബോധ്യ​മാ​കു​ന്ന​തു​വരെ തന്നെ ചോദ്യം ചെയ്‌തു​കൊ​ണ്ടി​രി​ക്കാൻ ദൈവം അബ്രഹാ​മി​നെ ക്ഷമാപൂർവം അനുവ​ദി​ച്ചു.—ഉല്‌പത്തി 18:20-32.

അബ്രഹാ​മി​ന്റെ പരിമി​ത​മായ ഗ്രാഹ്യ​ത്തോ​ടും വികാ​ര​വി​ചാ​ര​ങ്ങ​ളോ​ടും യഹോവ പരിഗണന കാട്ടി. ഒരു പ്രത്യേക പഠനഭാ​ഗം മനസ്സി​ലാ​ക്കാ​നോ ആഴത്തിൽ വേരൂ​ന്നിയ ഒരു സ്വഭാ​വത്തെ പിഴു​തെ​റി​യാ​നോ നമ്മുടെ വിദ്യാർഥി പാടു​പെ​ടു​മ്പോൾ അയാളു​ടെ പരിമി​തി​കൾ നാമും മനസ്സി​ലാ​ക്കണം. അങ്ങനെ​യാ​ണു ക്ഷമ പ്രകടി​പ്പി​ക്കാൻ നാം പ്രാപ്‌ത​രാ​യി​ത്തീ​രു​ന്നത്‌.

യഹോ​വ​യിൽനി​ന്നു പഠിച്ചു​കൊ​ണ്ടേ​യി​രി​ക്കുക

നിസ്സം​ശ​യ​മാ​യും, യഹോ​വ​യാം ദൈവം മഹാ​പ്ര​ബോ​ധ​ക​നാണ്‌. ദൃഷ്ടാ​ന്തങ്ങൾ, ചോദ്യ​ങ്ങൾ, ദൃഷ്ടാ​ന്ത​പാ​ഠങ്ങൾ എന്നിവ​പോ​ലുള്ള ഉപാധി​ക​ളി​ലൂ​ടെ അവൻ ക്ഷമാപൂർവം ഗ്രാഹ്യം പ്രദാനം ചെയ്യുന്നു. അവന്റെ പഠിപ്പി​ക്കൽവി​ധങ്ങൾ നാം എത്ര​ത്തോ​ളം അനുക​രി​ക്കു​ന്നു​വോ നാം അത്ര​ത്തോ​ളം മെച്ചപ്പെട്ട അധ്യാ​പ​ക​രാ​യി​ത്തീ​രും.

മററു​ള്ള​വ​രെ പഠിപ്പി​ക്കു​ന്നവർ സ്വയം പഠിപ്പി​ക്കു​ന്നത്‌ അവഗണി​ക്കാൻ പാടി​ല്ലാ​ത്ത​തു​കൊണ്ട്‌, നാം “യഹോ​വ​യാൽ ഉപദേ​ശി​ക്കപ്പെ”ടുന്നതിൽ തുടരണം. (യെശയ്യാ​വു 54:13) “നിന്റെ കണ്ണു നിന്റെ ഉപദേ​ഷ്ടാ​വി​നെ കണ്ടു​കൊ​ണ്ടി​രി​ക്കും. നിങ്ങൾ വലത്തോ​ട്ടോ ഇടത്തോ​ട്ടോ തിരി​യു​മ്പോൾ: വഴി ഇതാകു​ന്നു, ഇതിൽ നടന്നു​കൊൾവിൻ എന്നൊരു വാക്കു പിറകിൽനി​ന്നു കേൾക്കും.” (യെശയ്യാ​വു 30:20, 21) യഹോ​വ​യു​ടെ വഴിയിൽ നടക്കു​ന്ന​തിൽ തുടർന്നു​കൊ​ണ്ടും അങ്ങനെ ചെയ്യാൻ മററു​ള്ള​വരെ സഹായി​ച്ചു​കൊ​ണ്ടും നമ്മുടെ മഹാ​പ്ര​ബോ​ധ​ക​നിൽനി​ന്നു പഠിക്കു​ന്ന​തി​നുള്ള അനുപ​മ​മായ പദവി നമുക്കു നിലനിർത്താ​നാ​വും.

[28-ാം പേജിലെ ചിത്രം]

യഹോവ ഇയ്യോ​ബി​നോ​ടു ചോദി​ച്ചു: “നിന്റെ കല്‌പ​നെ​ക്കോ കഴുകൻ മേലോ​ട്ടു പറക്കയും ഉയരത്തിൽ കൂടു വെക്കു​ക​യും ചെയ്യു​ന്നതു?”

[28-ാം പേജിലെ ചിത്രം]

ആളുകളെക്കുറിച്ചു കൂടുതൽ ചിന്തയു​ള്ള​വ​രാ​യി​രി​ക്കാൻ ഒരു ആവണക്കു ചെടിയെ ഉപയോ​ഗി​ച്ചു​കൊണ്ട്‌ യഹോവ യോനാ​യെ പഠിപ്പി​ച്ചു