വർഗങ്ങൾ വംശനാ​ശത്തെ അഭിമു​ഖീ​ക​രി​ക്കു​ന്ന​തി​ന്റെ കാരണം

വർഗങ്ങൾ നാമാ​വ​ശേ​ഷ​മാ​കു​ന്നതു വിവി​ധ​കാ​ര​ണങ്ങൾ കൊണ്ടാണ്‌. മൂന്നു പ്രധാ​ന​പ്പെട്ട കാരണങ്ങൾ പരിചി​ന്തി​ക്കുക. ഇതിൽ രണ്ടെണ്ണ​ത്തി​നു മനുഷ്യർ പരോ​ക്ഷ​മാ​യി ഉത്തരവാ​ദി​ക​ളാണ്‌. മറ്റേതി​നാ​കട്ടെ, പ്രത്യ​ക്ഷ​മാ​യും.

ആവാസ നശീക​ര​ണം

വർഗങ്ങ​ളു​ടെ എണ്ണം കുറയാൻ ഏറെയും കാരണം ആവാസ നശീക​ര​ണ​മാണ്‌. ദി അറ്റ്‌ലസ്‌ ഓഫ്‌ എൻഡേ​ഞ്ചേർഡ്‌ സ്‌പീ​ഷീസ്‌, “ഏറ്റവും ഗുരു​ത​ര​മായ ഭീഷണി” എന്നാൽ, “തടുക്കാൻ ഏറ്റവും പ്രയാ​സകര”മായതും എന്ന്‌ ഇതിനെ വിശേ​ഷി​പ്പി​ക്കു​ന്നു. ലോക​ത്തി​ന്റെ വർധി​ച്ചു​വ​രുന്ന ജനസംഖ്യ, മുമ്പ്‌ വന്യജീ​വി​ക​ളു​ടെ ഭവനമാ​യി​രുന്ന പ്രദേശം കൂടുതൽ കൂടുതൽ കയ്യേറാൻ മനുഷ്യ​രെ നിർബ​ന്ധി​ക്കു​ന്നു. ലോക​ത്തി​ലെ മഴക്കാ​ടു​കൾ ഇതിനു ശ്രദ്ധേ​യ​മായ ഒരു ഉദാഹ​ര​ണ​മാണ്‌.

‘40 വർഷത്തി​നു​ള്ളിൽ മഴക്കാ​ടു​ക​ളൊ​ന്നും അവശേ​ഷി​ക്കില്ല’ എന്നതാണു ഞെട്ടി​ക്കുന്ന കണക്കു​കൂ​ട്ടൽ. വില​യേ​റിയ വിഭവ​ങ്ങ​ളു​ടെ ഖേദക​ര​മായ നഷ്ടം എന്നു പലരും വിശേ​ഷി​പ്പി​ക്കുന്ന ഒരു സാഹച​ര്യ​ത്തി​ന്മേൽ ഇതു ശ്രദ്ധ കേന്ദ്രീ​ക​രി​ക്കു​ന്നു. യഥാർഥ​ത്തിൽ, പാശ്ചാ​ത്യ​ലോ​ക​ത്തിൽ അറിയ​പ്പെ​ടുന്ന എല്ലാ ഔഷധ​ങ്ങ​ളു​ടെ​യും ഏതാണ്ട്‌ കാൽഭാ​ഗം ഉഷ്‌ണ​മേ​ഖലാ മഴക്കാ​ടു​ക​ളിൽനി​ന്നു വന്നവയാണ്‌. ഗ്രഹത്തി​ന്റെ കരയുടെ 7 ശതമാ​ന​ത്തോ​ളം ഭാഗത്തു മാത്രമേ മഴക്കാ​ടു​ക​ളു​ള്ളു​വെ​ങ്കി​ലും കരയിൽ വളരുന്ന സസ്യങ്ങ​ളു​ടെ അഞ്ചിൽ നാലു ഭാഗത്തി​ന്റെ ആവാസ​മാ​ണിത്‌.

മരംമു​റി​ക്ക​ലും മാറി​ക്കൊ​ണ്ടി​രി​ക്കുന്ന കൃഷി​രീ​തി​ക​ളും പശ്ചിമാ​ഫ്രി​ക്കൻ മഴക്കാ​ടു​ക​ളിൽനിന്ന്‌ അവയുടെ സമൃദ്ധ​മായ വൃക്ഷ പൈതൃ​കം അപഹരി​ക്കു​ന്നു. ഇന്ത്യൻ ഉപഭൂ​ഖ​ണ്ഡ​ത്തിൽ തടിയു​ടെ നഷ്ടം കാലാ​വ​സ്ഥ​പോ​ലും മാറ്റി​യി​രി​ക്കു​ന്നു, ചിലയി​ട​ങ്ങ​ളിൽ മഴ കുറച്ചു​കൊ​ണ്ടും എന്നാൽ മറ്റിട​ങ്ങ​ളിൽ വെള്ള​പ്പൊ​ക്കം വരുത്തി​ത്തീർത്തു​കൊ​ണ്ടും.

കൃഷി ചെയ്യു​ന്ന​തി​നു നിലം വെടി​പ്പാ​ക്കാൻ മനുഷ്യൻ മരങ്ങൾ വെട്ടി​യി​ടു​മ്പോൾ, സസ്യങ്ങൾ, മൃഗങ്ങൾ, പറവകൾ, ഇഴജന്തു​ക്കൾ, പ്രാണി​കൾ എന്നിവ ചത്തൊ​ടു​ങ്ങു​ന്നു. വർഷത്തിൽ വനത്തിന്റെ ഒരു ശതമാനം വീതം നഷ്ടപ്പെ​ട്ടു​കൊ​ണ്ടി​രി​ക്കു​ക​യാ​ണെന്നു ഹാർവാർഡ്‌ പ്രൊ​ഫസർ എഡ്വേർഡ്‌ വിൽസൻ കണക്കാ​ക്കു​ന്നു. ക്രമേണ ഇത്‌ ആയിര​ക്ക​ണ​ക്കി​നു വർഗങ്ങ​ളു​ടെ വംശനാ​ശ​ത്തിന്‌ ഇടയാ​ക്കു​ന്നു. ഒരു ശാസ്‌ത്രീയ നാമം നൽകു​ന്ന​തി​നു​മു​മ്പു​തന്നെ ഒട്ടേറെ വർഗങ്ങൾ അപ്രത്യ​ക്ഷ​മാ​കു​മെന്ന ഭയമുണ്ട്‌.

ഭീഷണി നേരി​ടുന്ന മറ്റൊരു ആവാസ​മായ ലോക​ത്തി​ന്റെ ആർദ്ര​നി​ല​ങ്ങ​ളി​ലും അവസ്ഥ ഇതുതന്നെ. വികസ​ന​പ്ര​വർത്തകർ വീടുകൾ പണിയു​ന്ന​തി​നാ​യി ഈ പ്രദേ​ശങ്ങൾ വറ്റി​ച്ചെ​ടു​ക്കു​ന്നു, അല്ലെങ്കിൽ കൃഷി​ചെ​യ്യു​ന്ന​തി​നാ​യി കർഷകർ ഇവയെ കൃഷി​സ്ഥ​ല​ങ്ങ​ളാ​ക്കി മാറ്റുന്നു. കഴിഞ്ഞ 100 വർഷങ്ങ​ളി​ലാ​യി യൂറോ​പ്പി​ന്റെ ഉണങ്ങിയ പുൽപ്ര​ദേ​ശ​ത്തി​ന്റെ 90 ശതമാ​ന​ത്തോ​ളം കൃഷി​ക്കു​വേണ്ടി എടുത്തു​ക​ഴി​ഞ്ഞി​രി​ക്കു​ന്നു. കഴിഞ്ഞ 20 വർഷങ്ങ​ളാ​യി ബ്രിട്ട​നി​ലെ മേച്ചിൽസ്ഥ​ല​ങ്ങ​ളു​ടെ നഷ്ടംമൂ​ലം സോങ്ങ്‌ ത്രഷു​ക​ളു​ടെ എണ്ണത്തിൽ 64 ശതമാനം കുറവു വന്നിട്ടുണ്ട്‌.

ടൈം മാഗസിൻ മഡഗാ​സ്‌കർ ദ്വീപി​നെ “ഭൂമി​ശാ​സ്‌ത്ര​പ​ര​മായ ഒരു നോഹ​യു​ടെ പെട്ടകം” എന്നു വിളി​ക്കു​ന്നു​ണ്ടെ​ങ്കി​ലും അതിന്റെ ബഹുല​മായ വൈവി​ധ്യ​മാർന്ന വന്യജീ​വി​കൾ അപകട​ത്തി​ലാണ്‌. ജനസംഖ്യ ഉയർന്നു​വ​രി​ക​യും അന്താരാ​ഷ്‌ട്ര ബാധ്യ​തകൾ വളർന്നു​വ​രി​ക​യും ചെയ്യു​മ്പോൾ ദ്വീപു​വാ​സി​ക​ളു​ടെ​മേൽ വനങ്ങൾ നെൽപ്പാ​ട​ങ്ങ​ളാ​ക്കി മാറ്റാ​നുള്ള സമ്മർദം വർധി​ച്ചു​വ​രു​ന്നു. കഴിഞ്ഞ 20 വർഷം​കൊണ്ട്‌ ഗോൾഡൻബാം​ബൂ ലീമറി​ന്റെ ആവാസ​ത്തി​ന്റെ മുക്കാൽ ഭാഗം അപ്രത്യ​ക്ഷ​മാ​യി​രി​ക്കു​ന്ന​തി​നാൽ ഈ മൃഗങ്ങ​ളിൽ 400 എണ്ണം മാത്രമേ അവശേ​ഷി​ക്കു​ന്നു​ള്ളൂ.

കര ഉപയോ​ഗി​ക്കു​ന്ന​തിൽ മനുഷ്യൻ വരുത്തി​യി​ട്ടുള്ള സമൂല​മാ​റ്റം തീർച്ച​യാ​യും പ്രാ​ദേ​ശിക വന്യജീ​വി​കളെ നശിപ്പി​ക്കു​ന്നു. മറ്റൊരു ഉദാഹ​ര​ണ​മെന്ന നിലയിൽ 1,600 വർഷം​മുമ്പ്‌ ഹവായി​യിൽ എത്തിയ പോളി​നേ​ഷ്യ​ക്കാ​രെ​ക്കു​റി​ച്ചു പരിചി​ന്തി​ക്കുക. അവരുടെ പ്രവർത്ത​ന​ങ്ങ​ളു​ടെ ഫലമായി പക്ഷിക​ളിൽ 35 വർഗങ്ങൾ നാമാ​വ​ശേ​ഷ​മാ​യി.

ഓസ്‌​ട്രേ​ലി​യ​യി​ലും ന്യൂസി​ലൻഡി​ലും മുൻകാ​ല​ങ്ങ​ളിൽവന്നു കുടി​യേ​റി​പ്പാർത്തവർ വളർത്തു​പൂ​ച്ച​കളെ ഇറക്കു​മതി ചെയ്‌തു. ഇവയിൽ ചിലതു വന്യമാ​യി​ത്തീർന്നു. ന്യൂ സയൻറിസ്റ്റ്‌ മാഗസിൻ പറയു​ന്ന​ത​നു​സ​രിച്ച്‌, മെരു​ക്ക​മി​ല്ലാത്ത ഈ പൂച്ചകൾ ഇപ്പോൾ, ഓസ്‌​ട്രേ​ലി​യൻ സ്വദേ​ശി​ക​ളായ സസ്‌ത​നി​ക​ളിൽപ്പെട്ട 64 വർഗങ്ങളെ കൊന്നു​തി​ന്നു​ന്നു. ഇറക്കു​മതി ചെയ്യപ്പെട്ട ചെമന്ന യൂറോ​പ്യൻ കുറു​ന​രി​കൾക്കൊ​പ്പം ഇവ വംശനാ​ശ​ഭീ​ഷ​ണി​യി​ലാ​യി​രി​ക്കുന്ന, അവശേ​ഷി​ക്കുന്ന വർഗങ്ങളെ ആക്രമി​ക്കു​ന്നു.

നേരി​ട്ടുള്ള ആക്രമണം

നായാട്ട്‌ പുതി​യൊ​രു പ്രതി​ഭാ​സമല്ല. ഉൽപ്പത്തി​യി​ലെ ബൈബിൾ വിവരണം 4,000-ത്തിലേറെ വർഷങ്ങൾക്കു​മു​മ്പു ജീവി​ച്ചി​രുന്ന നായാ​ട്ടു​കാ​ര​നായ, മത്സരി​യായ നി​മ്രോ​ദി​നെ​ക്കു​റി​ച്ചു പ്രതി​പാ​ദി​ക്കു​ന്നു. അവൻ ഒരു വർഗത്തെ ഒന്നടങ്കം ഉന്മൂലനം ചെയ്‌ത​തി​നെ​ക്കു​റി​ച്ചുള്ള പ്രതി​പാ​ദ്യ​മൊ​ന്നു​മി​ല്ലെ​ങ്കി​ലും അവൻ പരാ​ക്ര​മ​ശാ​ലി​ക​ളായ നായാ​ട്ടു​കാ​രു​ടെ ഒരു മാതൃ​ക​യാ​യി​രു​ന്നു.—ഉല്‌പത്തി 10:9.

നൂറ്റാ​ണ്ടു​ക​ളാ​യി നായാ​ട്ടു​കാർ ഗ്രീസിൽനി​ന്നും മെസ​പ്പൊ​ട്ടേ​മി​യാ​യിൽനി​ന്നും സിംഹ​ങ്ങ​ളെ​യും നുബി​യ​യിൽനി​ന്നു കാണ്ടാ​മൃ​ഗ​ങ്ങ​ളെ​യും ഉത്തര ആഫ്രി​ക്ക​യിൽനിന്ന്‌ ആനക​ളെ​യും ബ്രിട്ട​നിൽനി​ന്നു കരടി​ക​ളെ​യും നീർനാ​യ്‌ക്ക​ളെ​യും കിഴക്കൻ യൂറോ​പ്പിൽനി​ന്നു കാട്ടു​പോ​ത്തി​നെ​യും ഉന്മൂല​നാ​ശം ചെയ്‌തി​ട്ടുണ്ട്‌. “1870-കളിലും 1880-കളിലു​മാ​യി നായാ​ട്ടു​കാർ കിഴക്കൻ ആഫ്രി​ക്ക​യിൽ മാത്ര​മാ​യി ഒരു ദശലക്ഷം വരുന്ന ആനകളിൽ കാൽഭാ​ഗ​ത്തി​നെ കൊന്നി​ട്ടുണ്ട്‌,” ബിബിസി പരിപാ​ടി​കൾ പട്ടിക​പ്പെ​ടു​ത്തുന്ന റേഡി​യോ ടൈംസ്‌ എന്ന മാഗസിൻ പറയുന്നു. “അരനൂ​റ്റാ​ണ്ടോ​ളം, ആഫ്രി​ക്ക​യൊ​ട്ടാ​കെ വെടി​യൊ​ച്ച​കൊ​ണ്ടു മുഖരി​ത​മാ​യി​രു​ന്നു. പ്രസി​ദ്ധ​രും സമ്പന്നരും ഉന്നത പദവി​യി​ലു​ള്ള​വ​രു​മായ ആളുകൾ ആനകൾ, കാണ്ടാ​മൃ​ഗങ്ങൾ, ജിറാ​ഫു​കൾ, വലിയ പൂച്ചകൾ എന്നുവേണ്ട അവരുടെ കണ്ണിൽപെ​ട്ട​തി​നെ​യൊ​ക്കെ​യും വെടി​വെ​ച്ചി​രു​ന്നു. . . . ഇന്നു തികച്ചും ഞെട്ടി​ക്കു​ന്ന​താ​യി കാണ​പ്പെ​ടു​ന്നത്‌ അന്നു സ്വീകാ​ര്യ​മായ പെരു​മാ​റ്റ​മാ​യി​രു​ന്നു.”

ഗംഭീ​ര​നാ​യ കടുവ​യു​ടെ അവസ്ഥ​യെ​ക്കു​റി​ച്ചു വീണ്ടും ചിന്തി​ക്കുക. പരിരക്ഷണ ശ്രമങ്ങൾ വിജയ​ക​ര​മാ​യി​രു​ന്ന​താ​യി 1980-കളിലെ കാനേ​ഷു​മാ​രി​കൾ സൂചി​പ്പി​ച്ചു. “എങ്കിലും കാര്യങ്ങൾ അവ കാണ​പ്പെ​ട്ട​തു​പോ​ലെ​യാ​യി​രു​ന്നില്ല,” 1995 ബ്രിട്ടാ​നിക്ക ബുക്ക്‌ ഓഫ്‌ ദി ഇയർ പറയുന്നു. “അനധി​കൃത മൃഗ​വേ​ട്ട​ക്കാ​രു​മാ​യി രഹസ്യ​ധാ​ര​ണ​യി​ലെ​ത്തി​യി​രു​ന്ന​വ​രോ തങ്ങളുടെ മേലധി​കാ​രി​കളെ പ്രീണി​പ്പി​ക്കാൻമാ​ത്രം ഉത്സുക​രാ​യി​രു​ന്ന​വ​രോ ആയ ഉദ്യോ​ഗ​സ്ഥ​ന്മാർ ഊതി​വീർപ്പി​ച്ചി​രു​ന്ന​വ​യാ​യി​രു​ന്നു മുൻ കാനേ​ഷു​മാ​രി​ക​ളെന്നു കൂടുതൽ സൂക്ഷ്‌മ​മായ കണക്കുകൾ വെളി​പ്പെ​ടു​ത്തി. . . . ദുർലഭ വസ്‌തു​ക്കൾക്കു വില കൂടി​യ​പ്പോൾ കടുവ അവയവ​ങ്ങ​ളു​ടെ രഹസ്യ വാണിഭം തഴച്ചു​വ​ളർന്നു.” അങ്ങനെ 1995-ൽ സൈബീ​രി​യൻ കടുവ​യു​ടെ വില, 9,400 ഡോള​റി​നും 24,000 ഡോള​റി​നും ഇടയ്‌ക്കാ​യി​രു​ന്നു​വെന്നു കണക്കാ​ക്ക​പ്പെ​ടു​ന്നു—വില​യേ​റിയ അതിന്റെ തുകലി​നു മാത്ര​മാ​യി​രു​ന്നില്ല ഈ വില. അതിന്റെ അസ്ഥികൾ, കണ്ണുകൾ, മീശ​രോ​മങ്ങൾ, പല്ലുകൾ, ആന്തരി​കാ​വ​യ​വങ്ങൾ, ലൈം​ഗി​കാ​വ​യ​വങ്ങൾ എന്നിവ​യ്‌ക്കു​മാ​യി​രു​ന്നു. ഇവയെ​ല്ലാം പരമ്പരാ​ഗത പൗരസ്‌ത്യ ഔഷധ​ങ്ങ​ളിൽ വളരെ വില​പ്പെ​ട്ട​താ​ണെന്നു കണക്കാ​ക്ക​പ്പെ​ടു​ന്നു.

ആനക്കൊ​മ്പും കാണ്ടാ​മൃ​ഗ​ത്തി​ന്റെ കൊമ്പും കടുവാ​ത്തോ​ലും മറ്റു മൃഗാ​വ​യ​വ​ങ്ങ​ളും ഇപ്പോൾ കോടി​ക്ക​ണ​ക്കി​നു ഡോളർ വാരി​ക്കൂ​ട്ടുന്ന—മയക്കു​മ​രു​ന്നു കള്ളക്കടത്തു കഴിഞ്ഞാൽ അടുത്ത സ്ഥാനമുള്ള—കരിഞ്ചന്ത ബിസി​ന​സാ​ണെന്നു ടൈം പറയുന്നു. മാത്രമല്ല, ഇതു വലിയ സസ്‌ത​നി​ക​ളിൽ മാത്രം ഒതുക്കി​നിർത്ത​പ്പെ​ടു​ന്നു​മില്ല. 1994-ൽ പരമ്പരാ​ഗത ചൈനീസ്‌ ഔഷധ​ത്തിൽ ഞെട്ടി​പ്പി​ക്കു​ന്ന​വി​ധം രണ്ടു കോടി കടൽക്കു​തി​ര​ക​ളെ​യാണ്‌ ഉപയോ​ഗി​ച്ചത്‌. ഇത്‌, തെക്കു​കി​ഴക്കൻ ഏഷ്യയു​ടെ ചില പ്രദേ​ശ​ങ്ങ​ളിൽ പിടി​ക്ക​പ്പെ​ടുന്ന കടൽക്കു​തി​ര​ക​ളു​ടെ എണ്ണത്തിൽ 60 ശതമാനം കുറവു​വ​രു​ത്തി​യി​രി​ക്കു​ന്ന​താ​യി റിപ്പോർട്ടു​ചെ​യ്യ​പ്പെട്ടു.

ഒരു വർഗം നാമാ​വ​ശേ​ഷ​മാ​കു​ന്ന​തു​വരെ വേട്ടയാ​ട​പ്പെ​ടു​മ്പോൾ ആരെ കുറ്റ​പ്പെ​ടു​ത്ത​ണ​മെന്നു തിരി​ച്ച​റി​യാൻ ബുദ്ധി​മു​ട്ടില്ല. ഇനി, പണം വാരു​ന്ന​വ​രു​ടെ കാര്യ​മോ? അപകടം നേരി​ടുന്ന മാക്കത്ത​ത്ത​യും ഗോൾഡൻ കോണ്യു​റും ബ്രസീ​ലി​ലെ ഒരു കരിഞ്ച​ന്ത​വിൽപ്പ​ന​ക്കാ​രന്‌ 500 ഡോളർ നേടി​ക്കൊ​ടു​ക്കു​ന്ന​താ​യി റിപ്പോർട്ടു​ചെ​യ്യ​പ്പെ​ട്ടി​രു​ന്നു. എന്നാൾ അയാൾ അതു വിദേ​ശത്തു വിൽക്കു​മ്പോൾ ആ തുകയു​ടെ മുന്നര​യി​ര​ട്ടി​യി​ല​ധി​കം ലാഭം കൊയ്യു​ന്നു.

യുദ്ധങ്ങ​ളും അവയുടെ ഉപഫല​ങ്ങ​ളും വർധി​ച്ചു​വ​രുന്ന അഭയാർഥി​ക്കൂ​ട്ട​ങ്ങ​ളും ഇവയ്‌ക്കൊ​പ്പം ഉയർന്നു​വ​രുന്ന ജനനനി​ര​ക്കും വർധി​ച്ചു​വ​രുന്ന മലിനീ​ക​ര​ണ​വും എന്തിന്‌ വിനോ​ദ​സ​ഞ്ചാ​രം പോലും വംശനാ​ശത്തെ അഭിമു​ഖീ​ക​രി​ക്കുന്ന വർഗങ്ങൾക്കു ഭീഷണി​യാണ്‌. മോ​ട്ടോർബോ​ട്ടു​ക​ളി​ലി​രു​ന്നു കാഴ്‌ച​കാ​ണു​ന്നവർ, ഡോൾഫി​നു​കളെ കാണാൻ തടിച്ചു​കൂ​ടു​മ്പോൾ അവയ്‌ക്കു പരി​ക്കേൽപ്പി​ക്കു​ന്നു. ബോട്ടു​ക​ളിൽനി​ന്നുള്ള ജലാന്തര ആരവം ഡോൾഫി​നു​ക​ളു​ടെ മൃദു​ല​മായ പ്രതി​ധ്വ​നി-ദിശാ​നിർണയ വ്യവസ്ഥ​യ്‌ക്കു കേടു​വ​രു​ത്തി​യേ​ക്കാം.

മനുഷ്യർ വരുത്തി​വെ​ക്കുന്ന വിനയു​ടെ ഈ ഖേദക​ര​മായ പട്ടിക കണ്ടശേഷം, ‘വംശനാ​ശ​ഭീ​ഷണി നേരി​ടുന്ന വർഗങ്ങളെ സംരക്ഷി​ക്കാൻ പരിര​ക്ഷകർ എന്താണ്‌ ചെയ്‌തു​കൊ​ണ്ടി​രി​ക്കു​ന്നത്‌, അവർ എത്രമാ​ത്രം വിജയി​ച്ചി​ട്ടുണ്ട്‌?’ എന്നെല്ലാം നിങ്ങൾ ആശ്ചര്യ​പ്പെ​ടു​ന്നു​ണ്ടാ​യി​രി​ക്കാം.

[6-ാം പേജിലെ ചിത്രം]

മനുഷ്യൻ മരം​വെ​ട്ടി​യി​ടു​മ്പോൾ സസ്യങ്ങൾ, മൃഗങ്ങൾ, പറവകൾ, ഇഴജന്തു​ക്കൾ, പ്രാണി​കൾ എന്നിവ ചത്തൊ​ടു​ങ്ങു​ന്നു