യുവജ​നങ്ങൾ ചോദി​ക്കു​ന്നു . . .

റേവു​നൃ​ത്തം നിരു​പ​ദ്ര​വ​ക​ര​മായ വിനോ​ദ​മോ?

“കൈകൾ വിരി​ച്ചു​പി​ടിച്ച്‌ നൃത്തം​ചെ​യ്യവേ, സംഗീതം ശരീര​ത്തിൽ പടർന്നു​ക​യ​റവേ, ഇതര നർത്തകർ ഉത്തേജനം പകരു​ന്ന​താ​യി എനിക്ക​നു​ഭ​വ​പ്പെ​ടു​ന്നു. അത്‌ വികാ​രാ​തി​രേ​ക​ത്തി​ന്റേ​തായ ഒരനു​ഭൂ​തി​യു​ള​വാ​ക്കു​ന്നു.”—ജീന.

ഒരു റേവു​നൃ​ത്ത​ത്തിൽ പങ്കെടു​ക്കു​ന്ന​തി​ന്റെ രോമാ​ഞ്ച​ജ​ന​ക​മായ അനുഭൂ​തി​യെ ജീന വർണി​ക്കു​ന്നത്‌ അപ്രകാ​ര​മാണ്‌. മിക്ക​പ്പോ​ഴും രാത്രി മുഴുവൻ നീണ്ടു​നിൽക്കുന്ന ഈ നൃത്തപ​രി​പാ​ടി ആദ്യം ജനപ്രീ​തി​യാർജി​ച്ചത്‌ ബ്രിട്ട​നി​ലാ​യി​രു​ന്നു, 1980-കളിൽ. എന്നാൽ ഇപ്പോൾ ബെൽജി​യം, കാനഡ, ജർമനി, ഇന്ത്യ, ന്യൂസി​ലൻഡ്‌, ദക്ഷിണാ​ഫ്രിക്ക, ഐക്യ​നാ​ടു​കൾ എന്നിവ​യുൾപ്പെടെ ഗോള​ത്തി​ന്റെ എല്ലാഭാ​ഗ​ങ്ങ​ളി​ലും അവ സ്ഥാനം​പി​ടി​ച്ചി​രി​ക്കു​ന്നു.

രാവു​മു​ഴു​വൻ നീളുന്ന, ഉന്മാദം​പൂണ്ട നൃത്തത്തി​നാ​യി ആളുകൾക്ക്‌ കൂടി​വ​രാൻ കഴിയുന്ന നിശാ​ക്ല​ബ്ബു​കൾ, ഉപേക്ഷി​ക്ക​പ്പെട്ട പാണ്ടി​ക​ശാ​ലകൾ, കൊയ്‌ത്തു​ക​ഴിഞ്ഞ പാടങ്ങൾ എന്നിങ്ങനെ എവി​ടെ​യും റേവു​നൃ​ത്തങ്ങൾ സംഘടി​പ്പി​ക്ക​പ്പെ​ടു​ന്നു. “റേവു​നൃ​ത്തം ക്രമേണ നിശാ​ക്ല​ബ്ബു​ക​ളു​ടെ സ്ഥാനം കയ്യടക്കു​ക​യാണ്‌. ഇപ്പോൾ യുവജ​ന​ങ്ങൾക്ക്‌ അതാണു ഹരം,” ദക്ഷിണാ​ഫ്രി​ക്ക​യി​ലെ ജോഹാ​ന​സ്‌ബർഗിൽനി​ന്നുള്ള സൺഡേ ടൈംസ്‌ മാഗസി​നിൽ ആഡം ലെവിൻ എഴുതി. “നിങ്ങളു​ടെ കൗമാ​ര​പ്രാ​യ​ക്കാ​രായ കുട്ടികൾ അവയെ​ക്കു​റിച്ച്‌ ഇതുവരെ സൂചി​പ്പി​ച്ചി​ട്ടി​ല്ലെ​ങ്കിൽ നിങ്ങൾ തമ്മിൽ ആശയവി​നി​മ​യ​ത്തി​ന്റെ അഭാവ​മു​ണ്ടെ​ന്നർഥം,” അദ്ദേഹം കൂട്ടി​ച്ചേർത്തു.

റേവു​നൃ​ത്ത​ത്തി​ലേ​ക്കൊ​രു എത്തി​നോ​ട്ടം

ചില​പ്പോൾ, റേവു​നൃ​ത്തങ്ങൾ സംഘടി​പ്പി​ക്ക​പ്പെ​ടുന്ന സ്ഥലം അതു നടത്തുന്ന ദിവസം​വരെ വെളി​പ്പെ​ടു​ത്താ​തെ രഹസ്യ​മാ​ക്കി​വെ​ക്കാ​റുണ്ട്‌. എന്നുവ​രി​കി​ലും ദീപങ്ങൾ അത്യു​ജ്ജ്വല പ്രകാശം പൊഴി​ക്കു​മ്പോൾ, താളാത്മക ടെക്‌നോ സംഗീതം ആരംഭി​ക്കു​മ്പോൾ എങ്ങുനി​ന്നെ​ല്ലാ​മോ ഡസൻക​ണ​ക്കിന്‌, ആയിര​ക്ക​ണ​ക്കിന്‌ വിചിത്ര വേഷധാ​രി​ക​ളായ യുവജ​നങ്ങൾ സന്നിഹി​ത​രാ​യേ​ക്കാം. “ഏകീകൃ​ത​രായ ഒരുകൂ​ട്ടം ആളുകൾ ചുറ്റും നൃത്തം​ചെ​യ്‌ത്‌ സംഗീ​ത​ത്തി​ന്റെ താളത്തി​നൊത്ത്‌ തങ്ങളുടെ ക്രോധം അഴിച്ചു​വി​ടു​ന്ന​തു​പോ​ലെ​യാ​ണത്‌,” ഒരു രണ്ടാം​വർഷ കോ​ളെജ്‌ വിദ്യാർഥി​നി​യായ കെയ്‌റ്റി പറയുന്നു.

എന്നിരു​ന്നാ​ലും, കേവല​മൊ​രു നൃത്ത​ത്തെ​ക്കാൾ കവിഞ്ഞ​താണ്‌ റേവു​നൃ​ത്തം. അതൊരു സംസ്‌കാ​ര​മാണ്‌, അഥവാ റേവു​നൃ​ത്ത​പ്രേ​മി​കൾ വിളി​ക്കാ​നി​ഷ്ട​പ്പെ​ടു​ന്ന​തു​പോ​ലെ, ഒരു “അരങ്ങ്‌” ആണ്‌. വംശം, ദേശീയത, ലൈം​ഗി​കാ​ഭി​ലാ​ഷം എന്നീ വ്യത്യാ​സ​ങ്ങ​ളി​ല്ലാ​തെ, റേവു​നൃ​ത്ത​ങ്ങ​ളു​ടെ അടിസ്ഥാന തത്ത്വങ്ങൾ സമാധാ​നം, സ്‌നേഹം, ഐക്യം, ആദരവ്‌ തുടങ്ങി​യ​വ​യാ​ണെ​ന്നാണ്‌ പൊതു​വേ​യുള്ള വെപ്പ്‌. “ഈ കൂടി​വ​ര​വു​ക​ളിൽവെച്ച്‌ സംസ്‌കാ​രങ്ങൾ കൂട്ടി​ക്ക​ലർത്താൻ ഞങ്ങൾ ശ്രമി​ച്ചു​കൊ​ണ്ടി​രി​ക്കു​ന്നു,” നൃത്ത സംഗീ​ത​ത്തി​നു പ്രാധാ​ന്യം കൊടു​ക്കുന്ന ഒരു കടയുടമ പറയുന്നു. “ഒരുമ എന്ന ലക്ഷ്യം സഫലീ​ക​രി​ക്കാ​നുള്ള ഫലപ്ര​ദ​മായ ഒരു മുഖാ​ന്ത​ര​മാണ്‌ കൂട്ടായി നൃത്തം ചെയ്യു​ന്നത്‌,” അദ്ദേഹം കൂട്ടി​ച്ചേർക്കു​ന്നു.

ഉത്‌കൃ​ഷ്ട​മെ​ന്നു തോന്നുന്ന ഇത്തരം ആശയങ്ങ​ളു​ടെ വീക്ഷണ​ത്തിൽ നിങ്ങളി​ങ്ങനെ ചോദി​ച്ചേ​ക്കാം, ‘റേവു​നൃ​ത്ത​ത്തി​ലെന്താ കുഴപ്പം?’ എന്നാൽ, നിങ്ങൾ പരിചി​ന്തി​ക്കേ​ണ്ടി​യി​രി​ക്കുന്ന മറ്റൊരു വശം കൂടി റേവു​നൃ​ത്ത​ത്തി​നുണ്ട്‌.

റേവു​നൃ​ത്ത​ത്തി​ന്റെ അധമവശം

റേവു​നൃ​ത്ത​ങ്ങ​ളിൽ ഒട്ടും​തന്നെ മദ്യം ഉപയോ​ഗി​ക്കു​ന്നി​ല്ലെ​ന്നാണ്‌ ചിലർ അവകാ​ശ​പ്പെ​ടു​ന്നത്‌. എന്നാൽ മയക്കു​മ​രു​ന്നു​ക​ളു​ടെ കാര്യം അതല്ല. “മയക്കു​മ​രു​ന്നു​കൾ ഇത്രമാ​ത്രം ലഭ്യമ​ല്ലാ​യി​രു​ന്നെ​ങ്കിൽ റേവു​നൃ​ത്തങ്ങൾ ഇത്ര പെട്ടെന്നു ജനരജ്ഞ​ക​മാ​കു​മാ​യി​രു​ന്നോ​യെന്ന്‌ ഒരുവൻ ചിന്തി​ച്ചു​പോ​കും,” റേവു നർത്തക​നായ ബ്രയാൺ സമ്മതിച്ചു പറയുന്നു. “അവ കൂടാതെ റേവു​നൃ​ത്തങ്ങൾ നിലവിൽ വരുമാ​യി​രു​ന്നോ​യെ​ന്നു​തന്നെ അനേകർ ചിന്തി​ക്കു​ന്നു,” അദ്ദേഹം കൂട്ടി​ച്ചേർക്കു​ന്നു.

മരിജ്വാ​ന​യും എൽഎസ്‌ഡി-യും ചില റേവു​നൃ​ത്ത​ങ്ങ​ളിൽ സുലഭ​മാ​ണെ​ങ്കി​ലും അത്തരക്കാർക്കു പ്രിയം, സാധാ​ര​ണ​മാ​യി ‘എക്‌സ്റ്റസി’ എന്നറി​യ​പ്പെ​ടുന്ന എംഡി​എംഎ ആണെന്നു തോന്നു​ന്നു. എക്‌സ്റ്റസി താരത​മ്യേന സുരക്ഷി​ത​മാ​ണെന്ന്‌ ഉപഭോ​ക്താ​ക്കൾ അവകാ​ശ​പ്പെ​ടു​ന്നു. അത്‌ രാത്രി മുഴുവൻ നൃത്തം​ചെ​യ്യാൻ ഉത്തേജ​ന​മേ​കു​ക​യും സുഖാ​നു​ഭൂ​തി​പ​ക​രു​ക​യും മാത്രമേ ചെയ്യു​ന്നു​ള്ളൂ എന്ന്‌ അവർ വാദി​ക്കു​ന്നു. എന്നിരു​ന്നാ​ലും, “വിശപ്പ്‌, ഉറക്കം, മാനസി​കാ​വസ്ഥ, ആവേശം, കൂടാതെ മറ്റു മാനസിക ധർമങ്ങൾ എന്നിവ​യു​ടെ​മേൽ എക്‌സ്റ്റസി നീണ്ടു​നിൽക്കു​ന്ന​തും ഹാനി​ക​ര​വു​മായ ഫലങ്ങൾ ചെലു​ത്തി​യേക്കാ”മെന്ന്‌, “ജനപ്രീ​തി​യാർജിച്ച മയക്കു​മ​രുന്ന്‌ മസ്‌തി​ഷ്‌കത്തെ അപകട​ത്തി​ലാ​ക്കി​യേ​ക്കാം” എന്ന തലക്കെ​ട്ടിൻ കീഴിൽ ദ ന്യൂ​യോർക്ക്‌ ടൈംസ്‌ ചൂണ്ടി​ക്കാ​ട്ടു​ന്നു. എന്നാലതു മാത്രമല്ല തിക്തഫ​ലങ്ങൾ. “എക്‌സ്റ്റസി നിമിത്തം ചിലർ മരണമ​ട​ഞ്ഞി​ട്ടുണ്ട്‌. അത്‌ സാധാ​ര​ണ​യ​ള​വിൽ ഉപയോ​ഗി​ച്ച​വ​രു​ടെ​പോ​ലും ഹൃദയ​ത്തി​ന്റെ​യോ കരളി​ന്റെ​യോ പ്രവർത്തനം അപകട​ത്തി​ലാ​കു​ക​യോ ബോധ​ക്ഷയം അനുഭ​വ​പ്പെ​ടു​ക​യോ ചെയ്‌ത നിരവധി കേസുകൾ ഉണ്ടായി​ട്ടുണ്ട്‌” എന്ന്‌ ഡോ. ഹോവാർഡ്‌ മകിനി പ്രസ്‌താ​വി​ക്കു​ന്നു. അപ്പോൾ നല്ല കാരണ​ത്താൽത്ത​ന്നെ​യാണ്‌ ഡോ. സിൽവാൻ ഡി മിറോൻഡോ ഇങ്ങനെ പറയു​ന്നത്‌: “എക്‌സ്റ്റസി ഉപയോ​ഗി​ക്കുന്ന റേവു​നൃ​ത്ത​ക്കാർ മരണത്തി​നൊ​പ്പ​മാ​ണു നൃത്തം​ച​വി​ട്ടു​ന്നത്‌.”

ഹെർബൽ ആസിഡ്‌, ആക്‌സി​ല​റേഷൻ, ഹെർബൽ എക്‌സ്റ്റസി, റഷ്‌ തുടങ്ങിയ ജൈവ മയക്കു​മ​രു​ന്നു​കൾപോ​ലും ഉപദ്ര​വ​കാ​രി​ക​ളാ​യേ​ക്കാം. ഉദാഹ​ര​ണ​ത്തിന്‌, ജൈവ മയക്കു​മ​രു​ന്നായ ആക്‌സി​ല​റേഷൻ ചില പ്രത്യേക സാഹച​ര്യ​ങ്ങ​ളിൽ ഹൃദയാ​ഘാ​ത​ത്തി​നോ മരണത്തി​നോ​പോ​ലും ഇടവരു​ത്തി​യേ​ക്കാ​മെന്ന്‌ പറയ​പ്പെ​ടു​ന്നു.

റേവു​നൃ​ത്ത​ങ്ങ​ളിൽ ഉപയോ​ഗി​ക്കുന്ന മയക്കു​മ​രു​ന്നു​കൾ ഹാനി​ക​ര​മ​ല്ലെന്ന്‌ ഇനിയും ശാഠ്യം പിടി​ക്കു​ന്നവർ പരിചി​ന്തി​ക്കേ​ണ്ട​തായ മറ്റൊരു ഘടകം കൂടി​യുണ്ട്‌. എക്‌സ്റ്റ​സി​യെന്ന രൂപേണ വിറ്റഴിച്ച മയക്കു​മ​രു​ന്നു​ക​ളു​ടെ 90 ശതമാ​ന​വും എക്‌സ്റ്റസി അല്ലെന്ന്‌ കാനഡ​ക്കാ​ര​നായ യാൻ ബിഗ്‌സ്‌ എന്ന കുറ്റാ​ന്വേ​ഷകൻ അഭി​പ്രാ​യ​പ്പെ​ടു​ന്നു. “അതിൽ കൂടു​ത​ലും പിസിപി-യോ അപകട​ക​ര​മായ മറ്റ്‌ മയക്കു​മ​രു​ന്നു​ക​ളോ ആണ്‌. ഇത്തരം മയക്കു​മ​രു​ന്നു വിൽക്കു​ന്ന​വ​രാ​കട്ടെ, തത്ത്വദീ​ക്ഷ​യി​ല്ലാ​ത്ത​വ​രും. മയക്കു​മ​രു​ന്നി​ന്റെ കരാള ഹസ്‌തം ഇരയെ വരിഞ്ഞു​മു​റു​ക്കാൻ തുടങ്ങു​മ്പോ​ഴേ​ക്കും അവർ സ്ഥലംവി​ട്ടി​രി​ക്കും,” അദ്ദേഹം പറയുന്നു.a

ചില റേവു​നൃ​ത്ത​ങ്ങ​ളിൽ മയക്കു​മ​രു​ന്നു​കൾ ഉപയോ​ഗി​ക്കാ​റി​ല്ലാ​യി​രി​ക്കാ​മെന്നു സമ്മതി​ക്കു​ന്നു. എന്നാൽ, റേവു​നൃ​ത്ത​ത്തിന്‌ സന്നിഹി​ത​രാ​കു​ന്ന​വ​രിൽ ആരെങ്കി​ലും, അനേക​രും അല്ലെങ്കിൽ ഭൂരി​ഭാ​ഗ​വും ഒരു നിയമ​വി​രുദ്ധ പദാർഥ​ത്തി​ന്റെ സ്വാധീ​ന​ത്തിൻ കീഴിൽ ആയിരി​ക്കു​മോ​യെ​ന്നത്‌ മുൻകൂ​ട്ടി​പ്പ​റ​യുക മിക്ക​പ്പോ​ഴും അസാധ്യ​മാ​ണെന്ന്‌ റേവ്‌ നർത്തകർപോ​ലും സമ്മതി​ക്കും.

റേവു​നൃ​ത്തം യഥാർഥ​ത്തിൽ നിങ്ങൾക്കു​ള്ള​തോ?

സംഗീ​ത​വും നൃത്തവും അതിൽത്തന്നെ തെറ്റല്ല, ആനന്ദ​പ്ര​ദ​മായ സമയം ഉണ്ടായി​രി​ക്കാ​നാ​ഗ്ര​ഹി​ക്കു​ന്ന​തും അനുചി​തമല്ല. എന്താ​ണെ​ങ്കി​ലും, “ചിരി​പ്പാൻ ഒരു കാലം; . . . നൃത്തം​ചെ​യ്‌വാൻ ഒരു കാലം” ഉണ്ട്‌ എന്നു ബൈബിൾ പറയു​ന്നു​ണ്ട​ല്ലോ. (സഭാ​പ്ര​സം​ഗി 3:4) അത്‌ ഇങ്ങനെ​യും അനുശാ​സി​ക്കു​ന്നു: “നിന്റെ യൗവന​ത്തിൽ സന്തോ​ഷിക്ക.” (സഭാ​പ്ര​സം​ഗി 11:9) അതേ, നിങ്ങൾ ആനന്ദി​ക്കാൻ സ്രഷ്ടാവ്‌ ആഗ്രഹി​ക്കു​ന്നു! എന്നാൽ, “സർവ്വ​ലോ​ക​വും ദുഷ്ടന്റെ [പിശാ​ചായ സാത്താന്റെ] അധീന​ത​യിൽ കിടക്കു​ന്നു”വെന്നതു നിങ്ങൾ ഓർമി​ക്കണം. (1 യോഹ​ന്നാൻ 5:19) അതു​കൊണ്ട്‌, ഈ ലോകം പാടി​പ്പു​ക​ഴ്‌ത്തുന്ന പല വിനോ​ദ​രൂ​പ​ങ്ങ​ളും അനാ​രോ​ഗ്യ​ക​ര​മായ ഘടകങ്ങ​ളാൽ മിക്ക​പ്പോ​ഴും മലീമ​സ​മാ​ണെന്ന വസ്‌തുത നിങ്ങളെ അത്ഭുത​പ്പെ​ടു​ത്തേ​ണ്ട​തില്ല.

ഉദാഹ​ര​ണ​ത്തിന്‌, റേവു​നൃ​ത്ത​ങ്ങ​ളിൽ സംബന്ധി​ക്കു​ന്ന​വ​രെ​ക്കു​റിച്ച്‌ ചിന്തി​ക്കുക. ‘ജഡത്തി​ലെ​യും ആത്മാവി​ലെ​യും സകല കൻമഷ​വും നീക്കി തങ്ങളെ​ത്തന്നേ വെടി​പ്പാ​ക്കാ’നുള്ള ബൈബി​ളി​ന്റെ അനുശാ​സനം പിൻപ​റ്റു​ന്ന​വ​രാ​ണോ അവർ? (2 കൊരി​ന്ത്യർ 7:1) റേവ്‌ നർത്തകർ സമാധാ​ന​വും സ്‌നേ​ഹ​വും ഐക്യ​വു​മൊ​ക്കെ ഉയർത്തി​പ്പി​ടി​ച്ചേ​ക്കാ​മെ​ന്നതു ശരിതന്നെ. എന്നാൽ “ഉന്നതത്തിൽനി​ന്നുള്ള ജ്ഞാനം” ‘സമാധാ​ന​പൂർണ്ണം’ മാത്രമല്ല “ശുദ്ധവു”മാണ്‌. (യാക്കോബ്‌ 3:15, 17, പിഒസി ബൈബിൾ) നിങ്ങൾ സ്വയം ഇങ്ങനെ ചോദി​ക്കുക, ‘റേവു​നൃ​ത്ത​ങ്ങ​ളിൽ പതിവാ​യി പങ്കെടു​ക്കു​ന്ന​വ​രു​ടെ ധാർമി​കത ദൈവ​വ​ച​ന​മായ ബൈബി​ളി​ലെ നിലവാ​ര​ങ്ങൾക്കു നിരക്കു​ന്ന​താ​ണോ? “ദൈവ​പ്രി​യ​മി​ല്ലാ​തെ ഭോഗ​പ്രി​യ​രായ”വരോ​ടൊ​ത്തു രാത്രി​മു​ഴു​വൻ ചെലവ​ഴി​ക്കാൻ ഞാനാ​ഗ്ര​ഹി​ക്കു​ന്നു​വോ?’—2 തിമൊ​ഥെ​യൊസ്‌ 3:4, 5; 1 കൊരി​ന്ത്യർ 6:9, 10; യെശയ്യാ​വു 5:11, 12 താരത​മ്യം ചെയ്യുക.

പരിഗ​ണ​ന​യർഹി​ക്കുന്ന പ്രധാ​ന​പ്പെട്ട ചോദ്യ​ങ്ങ​ളാ​ണവ. എന്തെന്നാൽ പൗലൊസ്‌ എഴുതി: “മോശ​മായ സഹവാ​സങ്ങൾ പ്രയോ​ജ​ന​പ്ര​ദ​മായ ശീലങ്ങളെ പാഴാ​ക്കു​ന്നു.” (1 കൊരി​ന്ത്യർ 15:33, NW) ദൈവ​നി​യ​മ​ങ്ങ​ളോട്‌ അവമതിപ്പ്‌ പ്രകടി​പ്പി​ക്കു​ന്ന​വ​രോ​ടൊ​ത്തു തുടർച്ച​യാ​യി സഹവസി​ക്കു​ന്നത്‌ ആത്യന്തി​ക​മാ​യി ആപത്ത്‌ വിളി​ച്ചു​വ​രു​ത്തും. കാരണം, ബൈബിൾ പ്രസ്‌താ​വി​ക്കു​ന്നു: “ജ്ഞാനി​ക​ളോ​ടു​കൂ​ടെ നടക്ക; നീയും ജ്ഞാനി​യാ​കും; ഭോഷ​ന്മാർക്കു കൂട്ടാ​ളി​യാ​യ​വ​നോ വ്യസനി​ക്കേ​ണ്ടി​വ​രും.”—സദൃശ​വാ​ക്യ​ങ്ങൾ 13:20.

മിക്ക റേവു​നൃ​ത്ത​ങ്ങ​ളും, യഥാർഥ​ത്തിൽ മയക്കു​മ​രു​ന്നു​പ​യോ​ഗി​ക്കാ​നുള്ള കൂടി​വ​ര​വു​ക​ളാ​ണെ​ന്ന​താണ്‌ വസ്‌തുത. പങ്കെടു​ക്കു​ന്നവർ ദാരു​ണ​മായ ഭവിഷ്യ​ത്തു​കൾ കൊയ്യു​ക​യും ചെയ്‌തേ​ക്കാം. ഉദാഹ​ര​ണ​ത്തിന്‌, നിയമ​വി​രു​ദ്ധ​മാ​യി സംഘടി​പ്പി​ച്ച​തി​നാ​ലോ മയക്കു​മ​രു​ന്നു​കൾ ലഭ്യമാ​യി​രു​ന്ന​തി​നാ​ലോ ചില റേവു​നൃ​ത്തങ്ങൾ പൊലീസ്‌ റെയ്‌ഡി​നെ​ത്തു​ടർന്ന്‌ നിരോ​ധി​ക്ക​പ്പെ​ട്ടി​ട്ടുണ്ട്‌. നിയമം അനുസ​രി​ക്കാത്ത അത്തരക്കാ​രി​ലൊ​രാ​ളാ​യി എണ്ണപ്പെ​ടാൻ നിങ്ങൾ ആഗ്രഹി​ക്കു​മോ? (റോമർ 13:1, 2) നിയമ​ലം​ഘനം നടക്കു​ന്നി​ല്ലെ​ങ്കിൽപോ​ലും “ലോക​ത്താ​ലുള്ള കളങ്കം പററാ​ത​വണ്ണം” അത്തര​മൊ​രു പരിപാ​ടി​യിൽ പങ്കെടു​ക്കാൻ നിങ്ങൾക്കാ​കു​മോ? (യാക്കോബ്‌ 1:27) വെറി​ക്കൂത്ത്‌, അഥവാ “കുടി​ച്ചു​കൂ​ത്താ​ട്ടങ്ങൾ” (NW) ബൈബിൾ കുറ്റം​വി​ധി​ക്കു​ന്ന​തു​കൊണ്ട്‌, ദൈവ​ത്തി​ന്റെ​യും മനുഷ്യ​രു​ടെ​യും മുമ്പാകെ ശുദ്ധമായ ഒരു മനസ്സാക്ഷി കാത്തു​കൊ​ള്ളാൻ റേവു​നൃ​ത്ത​ത്തിൽ പങ്കെടു​ക്കു​ന്നതു നിങ്ങളെ പ്രാപ്‌ത​രാ​ക്കു​മോ?—ഗലാത്യർ 5:21; 2 കൊരി​ന്ത്യർ 4:1, 2; 1 തിമൊ​ഥെ​യൊസ്‌ 1:18, 19.

റേവു​നൃ​ത്ത​ങ്ങ​ളു​ടെ അപകടം സംബന്ധി​ച്ചു ക്രിസ്‌ത്യാ​നി​കൾ ജാഗ്ര​ത​യു​ള്ള​വ​രാ​യി​രി​ക്ക​ണ​മെ​ന്നതു വ്യക്തമാണ്‌. എന്നാൽ നിരാ​ശ​പ്പെ​ടേണ്ട. എന്തെന്നാൽ നിങ്ങൾക്കാ​സ്വ​ദി​ക്കാൻ കഴിയുന്ന മറ്റനേകം വിനോ​ദ​ങ്ങ​ളുണ്ട്‌. ഉദാഹ​ര​ണ​ത്തിന്‌, യഹോ​വ​യു​ടെ സാക്ഷി​ക​ളു​ടെ ഇടയിലെ അനേകം കുടും​ബങ്ങൾ ആരോ​ഗ്യാ​വ​ഹ​മായ കൂടി​വ​ര​വു​കൾ ക്രമീ​ക​രി​ക്കാ​റുണ്ട്‌.b ശ്രദ്ധാ​പൂർവ​ക​മായ ആസൂ​ത്ര​ണ​വും മേൽനോ​ട്ട​വും​മൂ​ലം പങ്കെടു​ക്കുന്ന എല്ലാവ​രും ആത്മീയ​വും ശാരീ​രി​ക​വു​മാ​യി നവോൻമേ​ഷ​മു​ള്ള​വ​രാ​കു​ന്നു. കൂടുതൽ പ്രധാ​ന​മാ​യി, പരിപു​ഷ്ടി​പ്പെ​ടു​ത്തുന്ന സഹവാസം, തന്റെ ജനം ആമോ​ദി​ക്ക​ണ​മെന്ന്‌ ഇച്ഛിക്കുന്ന “സന്തുഷ്ട ദൈവ”മായ യഹോ​വയെ പ്രീതി​പ്പെ​ടു​ത്തു​ന്നു.—1 തിമൊ​ഥെ​യൊസ്‌ 1:11, NW; സഭാ​പ്ര​സം​ഗി 8:15.

[അടിക്കു​റി​പ്പു​കൾ]

[26-ാം പേജിലെ ചതുരം]

ടെക്‌നോ എന്താണ്‌?

ലളിത​മാ​യി പറഞ്ഞാൽ, ഇലക്‌​ട്രോ​ണിക്‌ നൃത്തസം​ഗീ​ത​മാണ്‌ ടെക്‌നോ. ഇതിൽ അനേകം ശൈലി​ക​ളുണ്ട്‌. മിക്ക ആളുക​ളും ടെക്‌നോ​യെ താളാ​ത്മ​ക​മായ ഒന്നായി വർണി​ക്കും. കാരണം ഒരു മിനി​റ്റിൽ 115 മുതൽ 160 വരെ താളങ്ങൾ പകരാൻ ഇതിനാ​കും.

“ടെക്‌നോ​യു​മാ​യി പരിചി​ത​രാ​കാ​ത്ത​വർക്ക്‌ അത്‌, ദന്തഡോ​ക്ട​റു​ടെ കസേര​യി​ലി​രി​ക്കു​മ്പോൾ കേൾക്കുന്ന ഡെന്റൽ ഡ്രില്ലി​ന്റെ ശബ്ദവും സൊ​ദോ​മും ഗൊ​മോ​ര​യും നശിപ്പി​ക്ക​പ്പെട്ട രാത്രി​യി​ലേ​തെന്നു തോന്നി​ക്കുന്ന ശബ്ദവും ഇടകലർന്ന​തു​പോ​ലി​രി​ക്കും,” ദി യൂറോ​പ്യൻ പ്രസ്‌താ​വി​ക്കു​ന്നു. എന്നാൽ, ചില ശ്രോ​താ​ക്കൾ ടെക്‌നോ​യു​ടെ ഇടമു​റി​യാത്ത താളങ്ങ​ളാൽ വശീക​രി​ക്ക​പ്പെ​ടു​ന്നു. “ഈ സംഗീതം അപരി​മിത സ്വാത​ന്ത്ര്യ​ത്തി​ന്റെ​യും സ്വാ​ശ്ര​യ​ത്വ​ത്തി​ന്റെ​യും വികാരം എന്നിലു​ള​വാ​ക്കു​ന്നു,” 18-കാരി​യായ ക്രിസ്റ്റിന പ്രസ്‌താ​വി​ക്കു​ന്നു. അങ്ങനെ​ത​ന്നെ​യാണ്‌ സോണി​യ​യ്‌ക്കും അനുഭ​വ​പ്പെ​ടു​ന്നത്‌. അവൾ അനുസ്‌മ​രി​ക്കു​ന്നു, “ആദ്യ​മൊ​ക്കെ ടെക്‌നോ സംഗീതം എനി​ക്കൊ​ട്ടും പിടി​ച്ചില്ല. എന്നാലത്‌ കേൾക്കു​ന്തോ​റും ഇമ്പകര​മാ​യി​ത്തീ​രു​ന്നു. ഉച്ചത്തിൽവെ​ച്ചാൽ അതിന്റെ മുഴങ്ങുന്ന താളങ്ങ​ളിൽ മയങ്ങി​വീ​ണ​തു​തന്നെ. നിങ്ങൾ യാന്ത്രി​ക​മാ​യി ചലിക്കും. ശ്രദ്ധി​ക്കാ​ത്ത​പക്ഷം, നിങ്ങളു​ടെ മുഴു ശരീര​വും താളത്തി​ന്റെ ചൊൽപ്പ​ടി​യി​ലാ​കും.” 19-കാരി​യായ ഷേർലി​യെ സംബന്ധി​ച്ചി​ട​ത്തോ​ളം ടെക്‌നോ​യിൽ ഇതിലു​മ​ധി​കം ഉൾപ്പെ​ട്ടി​രി​ക്കു​ന്നു. “അത്‌ കേവല​മൊ​രു സംഗീ​ത​ത്തി​ലും കവിഞ്ഞ​താണ്‌. വസ്‌ത്ര​ത്തി​ലൂ​ടെ​യും ഭാഷയി​ലൂ​ടെ​യും പ്രകടി​പ്പി​ക്ക​പ്പെ​ടുന്ന മുഴു​ജീ​വി​ത​രീ​തി​യു​മാ​ണത്‌.”

“കർത്താ​വി​ന്നു പ്രസാ​ദ​മാ​യതു എന്തെന്നു പരി​ശോ​ധി”ക്കാൻ ക്രിസ്‌ത്യാ​നി​കൾ ആഗ്രഹി​ക്കു​ന്നു. (എഫെസ്യർ 5:9) അതു​കൊണ്ട്‌, മറ്റേ​തൊ​രു സംഗീ​ത​ത്തി​ലു​മെ​ന്ന​പോ​ലെ ടെക്‌നോ​യു​ടെ കാര്യ​ത്തി​ലും അവർ ജാഗ്ര​ത​യു​ള്ള​വ​രാ​യി​രി​ക്കണം. ടെക്‌നോ​യോ​ടു കൂടുതൽ ആകർഷി​ക്ക​പ്പെ​ടു​ന്നെന്നു കണ്ടെത്തു​ന്ന​പക്ഷം സ്വയം ചോദി​ക്കുക: ‘ഈ സംഗീത ശൈലി എപ്രകാ​ര​മാണ്‌ എന്നെ ബാധി​ക്കു​ന്നത്‌? ഇതെന്നിൽ സന്തുഷ്ടി​യും സ്വസ്ഥത​യും സമാധാ​ന​വു​മാ​ണോ ഉളവാ​ക്കു​ന്നത്‌? അതോ ഒരുപക്ഷേ, കോപ​വും അധാർമി​ക​ചി​ന്ത​ക​ളും ഇളക്കി​വി​ട്ടു​കൊണ്ട്‌ അതെന്നെ ആകുല​ചി​ത്ത​നാ​ക്കു​ന്നു​വോ? ഈ സംഗീത ശൈലി​യോ​ടുള്ള എന്റെ ആകർഷണം അത്‌ ഉയർത്തി​പ്പി​ടി​ക്കുന്ന ജീവി​ത​രീ​തി​യി​ലേക്ക്‌ എന്നെ അടുപ്പി​ക്കു​മോ? ഈ സംഗീതം ശ്രവി​ക്കാ​നോ ഇതി​നൊ​ത്തു നൃത്തം​ചെ​യ്യാ​നോ​വേണ്ടി ഒരു റേവു​നൃ​ത്ത​ത്തിൽ പങ്കെടു​ക്ക​ത്ത​ക്ക​വണ്ണം ഞാൻ പ്രലോ​ഭി​ത​നാ​കു​മോ?’

സംഗീ​ത​ത്തോ​ടുള്ള നിങ്ങളു​ടെ അഭിരു​ചി എന്തായി​രു​ന്നാ​ലും, നിങ്ങൾക്കും നിങ്ങളു​ടെ സ്വർഗീയ പിതാ​വി​നും മധ്യേ കയറി​പ്പ​റ്റാൻ അതിനെ ഒരിക്ക​ലും അനുവ​ദി​ക്ക​രുത്‌. അതാണ്‌ വാസ്‌ത​വ​ത്തിൽ ഏറ്റവും പ്രധാനം.