ഞാൻ വിക്കിനെ നേരി​ടുന്ന വിധം

സ്‌വെൻ സീവെർസ്‌ പറഞ്ഞ​പ്ര​കാ​രം

ചെറുപ്പം മുതലേ എനിക്കു വിക്കുണ്ട്‌. പിന്തി​രി​ഞ്ഞു നോക്കു​മ്പോൾ, ഈ പ്രശ്‌ന​ത്തോ​ടുള്ള എന്റെ മാതാ​പി​താ​ക്ക​ളു​ടെ സമീപ​നത്തെ ഞാൻ വിലമ​തി​ക്കു​ന്നു. വിക്കി​വി​ക്കി സംസാ​രി​ക്കു​മ്പോ​ഴെ​ല്ലാം അതു തിരു​ത്തു​ന്ന​തി​നു​പ​കരം ഞാൻ പറയുന്ന കാര്യ​ത്തിൽ ശ്രദ്ധ കേന്ദ്രീ​ക​രി​ക്കാ​നാണ്‌ അവർ എപ്പോ​ഴും ശ്രമി​ച്ചത്‌. സംസാ​ര​വൈ​കല്യ ചികി​ത്സ​ക​രു​ടെ അഭി​പ്രാ​യ​പ്ര​കാ​രം, കുട്ടി​യു​ടെ വിക്കി​ലേക്ക്‌ സദാ ശ്രദ്ധ തിരി​ക്കുന്ന മാതാ​പി​താ​ക്കൾ ആ വൈക​ല്യ​ത്തെ വർധി​പ്പി​ച്ചേ​ക്കാം.a

എനിക്കു മൂന്നു വയസ്സു​ള്ള​പ്പോൾ അമ്മ ഒരു യഹോ​വ​യു​ടെ സാക്ഷി​യാ​യി​ത്തീർന്നു. കൗമാ​ര​പ്രാ​യ​ത്തി​ലാ​യി​രി​ക്കേ ഞാൻ അമ്മയുടെ മാതൃക പിൻപ​റ്റാൻ തീരു​മാ​നി​ച്ചു. ബൈബിൾ നന്നായി പഠിക്കു​ന്ന​തിന്‌ എനിക്കു സഹായം ലഭിച്ചു. 1982 ജൂലൈ 24-ന്‌ ജർമനി​യി​ലെ ന്യൂമൂൻസ്റ്റെ​റിൽ നടന്ന ഒരു കൺ​വെൻ​ഷ​നിൽവെച്ച്‌ ദൈവ​ത്തി​ന്റെ ഒരു സമർപ്പിത ദാസനാ​യി ഞാൻ സ്‌നാ​പ​ന​മേറ്റു. പിന്നീട്‌ ഞാൻ ദക്ഷിണാ​ഫ്രി​ക്ക​യി​ലേക്കു താമസം മാറി. അവി​ടെ​യാ​യി​രി​ക്കെ, എല്ലാ സത്യ​ക്രി​സ്‌ത്യാ​നി​ക​ളോ​ടും ചെയ്യാൻ ആവശ്യ​പ്പെ​ട്ടി​രി​ക്കുന്ന പരസ്യ​മായ പ്രസം​ഗ​വേ​ല​യിൽ ഞാൻ തുടർന്നും പങ്കുപറ്റി. (മത്തായി 28:19, 20) വിക്കുള്ള ഒരാളെന്ന നിലയ്‌ക്ക്‌ എനിക്ക​തിന്‌ എങ്ങനെ കഴിയു​ന്നു​വെന്നു നിങ്ങൾ അതിശ​യി​ച്ചേ​ക്കാം.

ക്രിയാ​ത്മക മനോ​ഭാ​വ​മു​ണ്ടാ​യി​രി​ക്കു​ന്ന​തി​ന്റെ പ്രതി​ഫ​ല​ങ്ങൾ

ഒരു ക്രിയാ​ത്മക മനോ​ഭാ​വ​മു​ണ്ടാ​യി​രി​ക്കുക ചില​പ്പോ​ഴെ​ല്ലാം ബുദ്ധി​മു​ട്ടാ​ണെ​ന്നതു സമ്മതിച്ചേ മതിയാ​കൂ. എന്നാൽ അങ്ങനെ​യാ​യി​രി​ക്കു​ന്നത്‌ കാര്യ​മായ വ്യത്യാ​സ​മു​ണ്ടാ​ക്കു​മെന്ന്‌ ഞാൻ കണ്ടെത്തി​യി​ട്ടുണ്ട്‌. എപ്പോ​ഴും എനിക്ക്‌ എങ്ങനെ​യെ​ങ്കി​ലു​മൊ​ക്കെ ആശയവി​നി​യമം നടത്താൻ കഴിയു​ന്നു എന്നതാണു വസ്‌തുത. സംസാ​ര​ത്തി​ലൂ​ടെ​യ​ല്ലെ​ങ്കിൽ സന്ദേശങ്ങൾ എഴുതി​ക്കൊ​ണ്ടോ ബൈബിൾ സാഹി​ത്യ​ങ്ങൾ മറ്റുള്ള​വർക്കു കാട്ടി​ക്കൊ​ടു​ത്തു​കൊ​ണ്ടോ ഞാൻ ആശയവി​നി​യമം നടത്തുന്നു. സംഭാ​ഷ​ണ​ത്തി​നു തുടക്ക​മി​ടു​ന്ന​തി​ലെ ബുദ്ധി​മു​ട്ടു തരണം ചെയ്യാൻ ക്രിയാ​ത്മ​ക​മായ സമീപനം എന്നെ സഹായി​ക്കു​ന്നു. മുഖവുര വളരെ ലളിത​മാ​ക്കാൻ ഞാൻ ശ്രമി​ക്കു​ന്നു. സംഭാ​ഷ​ണ​ത്തി​ന്റെ തുടക്ക​ത്തിൽ കഴിയു​ന്നി​ട​ത്തോ​ളം സംസാ​രി​ക്കാൻ ഞാൻ വീട്ടു​കാ​രനെ അനുവ​ദി​ക്കു​ന്നു. ആളുകൾക്ക്‌ സംസാ​രി​ക്കാ​നി​ഷ്ട​മാണ്‌. അവരുടെ ചിന്താ​ഗതി മനസ്സി​ലാ​ക്കാൻ അതെനിക്ക്‌ അവസരം നൽകുന്നു. എന്നിട്ട്‌ അവർക്കു താത്‌പ​ര്യ​മുള്ള കാര്യങ്ങൾ എടുത്തിട്ട്‌ ഞാൻ സംഭാ​ഷണം തുടരു​ന്നു, ഒപ്പം ബൈബിൾ സന്ദേശ​വും വിശേ​ഷ​വ​ത്‌ക​രി​ക്കു​ന്നു. അവർ പറയു​ന്ന​തിൽ ശ്രദ്ധ കേന്ദ്രീ​ക​രി​ക്കു​ന്നത്‌ സംസാ​ര​വൈ​ക​ല്യം മറക്കാൻ എന്നെ സഹായി​ക്കു​ന്നു. അപ്പോൾ എനിക്ക്‌ അധികം വിക്കു​ണ്ടാ​കാ​റില്ല.

ക്രിസ്‌തീ​യ യോഗ​ങ്ങ​ളിൽ അഭി​പ്രാ​യങ്ങൾ പറയാ​നും ക്രിയാ​ത്മക സമീപനം എന്നെ സഹായി​ക്കു​ന്നു. ബൈബിൾ ചർച്ചക​ളിൽ ഞാൻ എത്രയ​ധി​കം പങ്കുപ​റ്റു​ന്നു​വോ സദസ്സും അധ്യയ​ന​നിർവാ​ഹ​ക​നും അത്രയ​ധി​കം എന്റെ സംസാ​ര​രീ​തി​യോ​ടു പരിചി​ത​മാ​കു​ക​യും ഞാൻ എങ്ങനെ സംസാ​രി​ക്കു​ന്നു എന്നതി​നു​പ​കരം എന്താണ്‌ പറയു​ന്നത്‌ എന്ന്‌ ശ്രദ്ധി​ക്കു​ക​യും ചെയ്യു​ന്ന​താ​യി ഞാൻ കണ്ടെത്തി​യി​ട്ടുണ്ട്‌.

വിജയ​ത്തി​ന്റെ ആഹ്ലാദം നുകര​ണ​മെ​ങ്കിൽ ഞാൻ ശ്രമം തുട​രേ​ണ്ടി​യി​രി​ക്കു​ന്നു. ആത്മാനു​ക​മ്പ​യ്‌ക്കു വശംവ​ദ​നാ​യി അന്തർമു​ഖ​നാ​കു​ന്ന​തിൽനി​ന്നും ഇതെന്നെ തടയുന്നു. ആത്മാനു​ക​മ്പ​യു​മാ​യുള്ള പോരാ​ട്ടം ഇപ്പോ​ഴും തുടരു​ക​യാണ്‌. ഒരാൾ കുതി​ര​പ്പു​റ​ത്തു​നി​ന്നു വീണാൽ ആത്മവി​ശ്വാ​സം നഷ്ടപ്പെ​ടാ​തി​രി​ക്കാൻ അയാൾ തിരിച്ച്‌ അതിന്റെ പുറത്തു കയറു​ന്നത്‌ പ്രധാ​ന​മാ​ണെന്ന്‌ ഒരു ചൊല്ലുണ്ട്‌. അതു​കൊണ്ട്‌ യോഗ​ത്തിൽ അഭി​പ്രാ​യം പറയു​ന്ന​തി​നി​ട​യിൽ വിക്കു​മൂ​ലം തുടരാ​നാ​കാ​തെ വന്നാൽ ആലങ്കാ​രി​ക​മാ​യി ഞാൻ വീണ്ടും കുതി​ര​പ്പു​റത്തു കയറാൻ ശ്രമി​ക്കു​ന്നു. അതായത്‌, അടുത്ത അവസര​ത്തിൽത്തന്നെ ഞാൻ അഭി​പ്രാ​യം പറയുന്നു.

മറ്റുള്ള​വർക്ക്‌ സഹായി​ക്കാ​വുന്ന വിധം

ഫോൺവി​ളി​ക്കേ​ണ്ട​തു​ള്ള​പ്പോ​ഴോ അപരി​ചി​ത​രോട്‌ വിവരങ്ങൾ ചോദി​ച്ചു മനസ്സി​ലാ​ക്കേ​ണ്ട​തു​ള്ള​പ്പോ​ഴോ നയപൂർവ​മുള്ള സഹായത്തെ ഞാൻ വിലമ​തി​ക്കു​ക​തന്നെ ചെയ്യുന്നു. എന്നാൽ ചിലർ അതിരു​വി​ട്ടു സഹായി​ക്കാൻ മുതി​രു​ന്നു. തീരു​മാ​ന​ശേ​ഷി​യി​ല്ലാത്ത ഒരു കുട്ടി​യോ​ടെ​ന്ന​പോ​ലെ​യാണ്‌ അവർ എന്നോടു പെരു​മാ​റു​ന്നത്‌.

എന്റെ സ്‌നേ​ഹ​സ​മ്പ​ന്ന​യായ ഭാര്യ ട്രേസി​യു​ടെ സഹായ​വും ഞാൻ വിലമ​തി​ക്കു​ന്നു. അവൾ എന്റെ “വായ്‌” ആയി പ്രവർത്തി​ക്കു​ന്ന​തി​നു​മുമ്പ്‌ ഞങ്ങൾ സാഹച​ര്യ​ത്തെ​ക്കു​റിച്ച്‌ വിശദ​മാ​യി ചർച്ച​ചെ​യ്യു​ന്നു. ഞാൻ ചെയ്യാൻ ആഗ്രഹി​ക്കു​ന്നത്‌ എന്താ​ണെന്ന്‌ അപ്പോൾ അവൾക്ക്‌ അറിയാം. (പുറപ്പാ​ടു 4:10, 14, 15 താരത​മ്യം ചെയ്യുക.) അപ്രകാ​രം, ഭർത്താ​വെ​ന്ന​നി​ല​യിൽ എന്നോ​ടവൾ ആദരവു പ്രകട​മാ​ക്കു​ന്നു. എന്റെ ജീവി​ത​ത്തി​ന്റെ മുഴു​നി​യ​ന്ത്ര​ണ​വും എന്റെ കയ്യിൽത്ത​ന്നെ​യാ​ണെന്ന തോന്നൽ അവൾ എനിക്കു നൽകുന്നു.

മറ്റൊരു സഹായ​മാ​യി​രു​ന്നു ദിവ്യാ​ധി​പത്യ ശുശ്രൂ​ഷാ​സ്‌കൂൾ. ഈ പ്രതി​വാര യോഗ​ത്തിൽവെച്ച്‌ വിദ്യാർഥി​കൾ പരസ്യ ബൈബിൾ വായന​യി​ലും ബൈബിൾ വിഷയ​ങ്ങളെ ആസ്‌പ​ദ​മാ​ക്കി​യുള്ള ഹ്രസ്വ പ്രസം​ഗ​ങ്ങ​ളി​ലും പങ്കെടു​ക്കു​ന്നു. സദസ്യ​രു​ടെ മുമ്പാകെ മിക്ക​പ്പോ​ഴും നന്നായി വായി​ക്കാ​നും സംസാ​രി​ക്കാ​നും എനിക്കു സാധി​ക്കു​ന്ന​തിൽ ഞാൻ അത്ഭുത​പ്പെ​ട്ടി​ട്ടുണ്ട്‌. സ്‌കൂ​ളിൽ പേർ ചാർത്തി​യി​ല്ലാ​യി​രു​ന്നെ​ങ്കിൽ ഈ കഴിവി​നെ​ക്കു​റിച്ച്‌ ഞാൻ ഒരിക്ക​ലും ബോധ​വാ​നാ​കു​മാ​യി​രു​ന്നില്ല.

ദിവ്യാ​ധി​പ​ത്യ ശുശ്രൂ​ഷാ​സ്‌കൂ​ളിൽ നിയമ​നങ്ങൾ നിർവ​ഹി​ച്ചി​രു​ന്ന​പ്പോൾ പ്രബോ​ധകൻ, ഞാൻ എങ്ങനെ പറയു​ന്നു​വെ​ന്ന​തി​ലല്ല മറിച്ച്‌ എന്തു പറയുന്നു എന്നതിൽ ശ്രദ്ധ കേന്ദ്രീ​ക​രി​ച്ചി​രു​ന്നു. അത്‌ വിശേ​ഷി​ച്ചും പ്രോ​ത്സാ​ഹ​ജ​ന​ക​മാ​യി​രു​ന്നു. ദിവ്യാ​ധി​പത്യ ശുശ്രൂ​ഷാ​സ്‌കൂൾ ഗൈഡ്‌ബുക്കുംb എനിക്കു വളരെ പ്രയോ​ജനം ചെയ്‌തി​ട്ടുണ്ട്‌, അതിന്റെ ചില വശങ്ങൾ ബാധക​മാ​ക്കു​ന്നത്‌ സാധാരണ സംസാ​ര​പ്രാ​പ്‌തി​യു​ള്ള​വരെ അപേക്ഷിച്ച്‌ വിക്കു​ള്ള​വർക്ക്‌ കൂടുതൽ വെല്ലു​വി​ളി ഉയർത്തു​ന്നു​വെ​ങ്കിൽപ്പോ​ലും. ഉദാഹ​ര​ണ​ത്തിന്‌, വിക്കു​മൂ​ലം നിർദിഷ്ട സമയത്തി​നു​ള്ളിൽ എനിക്ക്‌ പ്രസംഗം തീർക്കാൻ കഴിയാ​റില്ല. എങ്കിലും എനിക്കു പരിഹ​രി​ക്കാൻ സാധി​ക്കുന്ന വശങ്ങൾ പ്രബോ​ധകൻ വിശേ​ഷ​വ​ത്‌ക​രി​ക്കു​ന്നത്‌ വളരെ പ്രോ​ത്സാ​ഹ​ജ​ന​ക​മാണ്‌.

കൂടുതൽ സേവന​പ​ദ​വി​കൾ

മുൻകാ​ല​ങ്ങ​ളിൽ, നാം യോഗ​ങ്ങ​ളിൽ പഠിക്കുന്ന ക്രിസ്‌തീയ പ്രസി​ദ്ധീ​ക​ര​ണ​ങ്ങ​ളിൽനിന്ന്‌ പരസ്യ​വാ​യന നടത്താ​നുള്ള പദവി എനിക്കു​ണ്ടാ​യി​രു​ന്നു. പ്രാപ്‌ത​രായ മറ്റ്‌ ശുശ്രൂ​ഷ​ക​രു​ടെ അസാന്നി​ധ്യ​ത്തിൽ അധ്യയനം നിർവ​ഹി​ക്കു​ന്ന​തി​നുള്ള പദവി​യും എനിക്കു ലഭിച്ചി​രു​ന്നു. ഇപ്പോൾ ഞാനൊ​രു അധ്യയ​ന​നിർവാ​ഹ​ക​നാണ്‌. ആദ്യ​മൊ​ക്കെ പരി​ഭ്രമം തോന്നി​യി​രു​ന്നെ​ങ്കി​ലും അത്തരം നിയമ​നങ്ങൾ നിർവ​ഹി​ക്കു​ന്ന​തിൽ ദൈവ​ത്തി​ന്റെ സഹായം ഞാൻ അനുഭ​വി​ച്ച​റി​ഞ്ഞി​ട്ടുണ്ട്‌.

എങ്കിലും വർഷങ്ങ​ളോ​ളം, സഭയിലെ പ്ലാറ്റ്‌ഫാ​റ​ത്തിൽനിന്ന്‌ വായി​ക്കാ​നോ പഠിപ്പി​ക്കാ​നോ പരിമി​ത​മായ അവസര​ങ്ങളേ എനിക്കു ലഭിച്ചി​രു​ന്നു​ള്ളൂ. ഇത്‌ മനസ്സി​ലാ​ക്കാ​വു​ന്ന​തേ​യു​ള്ളൂ, കാരണം സദസ്യർക്കു മനസ്സി​ലാ​കുന്ന തരത്തിൽ ആശയങ്ങ​ളെ​ല്ലാം പറഞ്ഞു​പി​ടി​പ്പി​ക്കാൻ എനിക്ക്‌ ഒട്ടേറെ സമയ​മെ​ടു​ക്കേ​ണ്ടി​വന്ന സന്ദർഭ​ങ്ങ​ളു​ണ്ടാ​യി​ട്ടുണ്ട്‌. അതു​കൊണ്ട്‌ മറ്റ്‌ നിയമ​നങ്ങൾ കൈകാ​ര്യം ചെയ്യു​ന്ന​തിന്‌ ഞാൻ എന്റെ കഴിവ്‌ മുഴുവൻ വിനി​യോ​ഗി​ച്ചു. ആദ്യം സഭയിൽ വീക്ഷാ​ഗോ​പു​രം, ഉണരുക! മാസി​ക​ക​ളു​ടെ വിതരണ സഹായി​യാ​യി ഞാൻ സേവിച്ചു. ശുശ്രൂ​ഷാ​ദാ​സ​നാ​യി നിയമനം ലഭിച്ച​ശേഷം ബൈബി​ളു​കൾ, പുസ്‌ത​കങ്ങൾ എന്നിവ​യു​ടെ​യും മറ്റ്‌ പ്രസി​ദ്ധീ​ക​ര​ണ​ങ്ങ​ളു​ടെ​യും വിതരണം ഞാനാണു നോക്കി​ന​ട​ത്തി​യത്‌. പിന്നീട്‌ നമ്മുടെ പരസ്യ​സാ​ക്ഷീ​ക​ര​ണ​വേ​ല​യിൽ ഉപയോ​ഗി​ക്കുന്ന പ്രദേശ കാർഡു​കൾ പരി​ശോ​ധി​ക്കു​ന്ന​തിന്‌ എന്നെ നിയമി​ച്ചു. ഈ നിയമ​ന​ങ്ങ​ളിൽ ശ്രദ്ധ കേന്ദ്രീ​ക​രി​ക്കു​ന്ന​തും ശുഷ്‌കാ​ന്തി​യോ​ടെ ജോലി ചെയ്യു​ന്ന​തു​മെ​ല്ലാം എനിക്ക്‌ വളരെ സന്തോഷം കൈവ​രു​ത്തി.

കഴിഞ്ഞ എട്ടു വർഷമാ​യി ഞാൻ ട്രേസി​യോ​ടൊ​പ്പം ഒരു മുഴു​സമയ സുവി​ശേ​ഷ​ക​നാ​യും സേവി​ച്ചി​രി​ക്കു​ന്നു. ഈ മേഖല​യി​ലും യഹോവ എന്നെ തീർച്ച​യാ​യും അനു​ഗ്ര​ഹി​ച്ചി​ട്ടുണ്ട്‌. വാസ്‌ത​വ​ത്തിൽ, യഹോവ എന്റെ പോരാ​യ്‌മയെ, അതായത്‌ വിക്കിനെ, ഉപയോ​ഗി​ക്കു​ന്ന​തിൽ ഞാൻ ചില​പ്പോൾ അതിശ​യി​ച്ചി​ട്ടുണ്ട്‌. സമർപ്പിത ക്രിസ്‌ത്യാ​നി​ക​ളാ​യി​ത്തീ​രാൻ ഞാൻ സഹായി​ച്ചി​ട്ടുള്ള അഞ്ചു പേരിൽ രണ്ടു പേർ വിക്കു​ള്ള​വ​രാണ്‌.

സഭാമൂ​പ്പ​നാ​യി സേവി​ക്കാൻ നിയമനം ലഭിച്ച ആ ദിവസം ഞാനി​ന്നും സന്തോ​ഷ​ത്തോ​ടെ ഓർക്കു​ന്നു. പ്ലാറ്റ്‌ഫാ​റ​ത്തിൽനി​ന്നു​കൊണ്ട്‌ പഠിപ്പി​ക്കാ​നുള്ള എന്റെ പ്രാപ്‌തി പരിമി​ത​മാ​ണെ​ങ്കി​ലും മറ്റുള്ള​വരെ വ്യക്തി​പ​ര​മായ അടിസ്ഥാ​ന​ത്തിൽ സഹായി​ക്കു​ന്ന​തിൽ ശ്രദ്ധ കേന്ദ്രീ​ക​രി​ക്കാൻ ഞാൻ ശ്രമി​ക്കു​ന്നു. ഗൗരവ​മേ​റിയ പ്രശ്‌ന​ങ്ങളെ അഭിമു​ഖീ​ക​രി​ക്കുന്ന സഭാം​ഗ​ങ്ങളെ സഹായി​ക്കാൻ തിരു​വെ​ഴു​ത്തു​പ​ര​മായ ഗവേഷണം നടത്താ​നുള്ള എന്റെ പ്രാപ്‌തിക്ക്‌ വിക്ക്‌ ഒരു തടസ്സമല്ല.

കഴിഞ്ഞ അഞ്ചു വർഷങ്ങ​ളിൽ കൂടു​തൽക്കൂ​ടു​തൽ പ്രസം​ഗങ്ങൾ നടത്താ​നുള്ള ക്ഷണം എനിക്കു ലഭിച്ചി​രി​ക്കു​ന്നു. ദിവ്യാ​ധി​പത്യ ശുശ്രൂ​ഷാ​സ്‌കൂ​ളിൽ പ്രസം​ഗങ്ങൾ നടത്തു​ന്ന​തി​നു​പു​റമേ മറ്റു യോഗ​ങ്ങ​ളിൽ ഹ്രസ്വ​മായ അറിയി​പ്പു​കൾ കൈകാ​ര്യം ചെയ്യാ​നും എനിക്കു സാധി​ച്ചി​രി​ക്കു​ന്നു. ക്രമേണ എന്റെ സംസാ​ര​ത്തി​ന്റെ ഒഴുക്ക്‌ മെച്ച​പ്പെട്ടു. എന്നാൽ ഗുരു​ത​ര​മായ വിധത്തിൽ വിക്ക്‌ എന്നെ വീണ്ടും പിടി​കൂ​ടി. ‘എനിക്കി​നി നിയമ​ന​ങ്ങ​ളൊ​ന്നും ലഭിക്കാൻ പോകു​ന്നില്ല,’ ഞാൻ വിചാ​രി​ച്ചു. എന്നാൽ എന്നെ അത്ഭുത​പ്പെ​ടു​ത്തു​മാറ്‌ എന്റെ പേര്‌ അടുത്ത പട്ടിക​യിൽത്ത​ന്നെ​യു​ണ്ടാ​യി​രു​ന്നു! വിക്കു​മൂ​ലം എനിക്കു പരിപാ​ടി തുടരാ​നാ​കു​ന്നി​ല്ലെ​ങ്കിൽ ഒന്നു നോക്കി​യാൽ മതി പ്ലാറ്റ്‌ഫാ​റ​ത്തിൽ വന്ന്‌ താൻ പ്രസംഗം തുടർന്നു​കൊ​ള്ളാ​മെന്ന്‌ ഞങ്ങളുടെ സഭയിലെ അധ്യക്ഷ മേൽവി​ചാ​രകൻ പറഞ്ഞു. ഒന്നോ രണ്ടോ തവണ സ്‌നേ​ഹ​പു​ര​സ്സ​ര​മായ ഈ വാഗ്‌ദാ​നം ഞാൻ സ്വീക​രി​ക്കു​ക​യു​ണ്ടാ​യി. എങ്കിലും ഇക്കഴിഞ്ഞ മാസങ്ങ​ളി​ലൊ​ന്നും എനിക്ക്‌ അങ്ങനെ ചെയ്യേണ്ടി വന്നിട്ടില്ല. എന്റെ സംസാ​ര​പ്രാ​പ്‌തി മെച്ച​പ്പെ​ട്ട​പ്പോൾ പരസ്യ പ്രസം​ഗ​ങ്ങ​ളുൾപ്പെടെ നീണ്ട പരിപാ​ടി​കൾ നടത്താ​നുള്ള നിയമ​നങ്ങൾ എനിക്കു ലഭിച്ചു. അടുത്ത​യി​ടെ, യഹോ​വ​യു​ടെ സാക്ഷി​ക​ളു​ടെ ഒരു സർക്കിട്ട്‌ സമ്മേള​ന​ത്തിൽ രണ്ടു പ്രകട​ന​ങ്ങ​ളിൽ പങ്കെടു​ക്കാൻ ആവശ്യ​പ്പെ​ട്ട​പ്പോ​ഴാണ്‌ എന്റെ അഭിവൃ​ദ്ധി​യെ​ക്കു​റിച്ച്‌ ഞാൻ മുഴു​വ​നാ​യി മനസ്സി​ലാ​ക്കി​യത്‌.

തുറന്നു പറയട്ടെ, എന്റെ സംസാ​ര​പ്രാ​പ്‌തി മെച്ച​പ്പെ​ട്ട​തെ​ങ്ങ​നെ​യാ​ണെന്ന്‌ എനിക്ക്‌ പൂർണ​മാ​യി മനസ്സി​ലാ​യി​ട്ടില്ല. നാളെ അത്‌ വീണ്ടും ക്ഷയിച്ചു തുടങ്ങി​യേ​ക്കാം. വാസ്‌ത​വ​ത്തിൽ, പ്ലാറ്റ്‌ഫാ​റ​ത്തിൽനി​ന്നു സംസാ​രി​ക്കു​ന്ന​തിൽ മെച്ച​പ്പെ​ട്ടി​ട്ടു​ണ്ടെ​ന്നതു ശരിയാ​ണെ​ങ്കി​ലും ആളുക​ളോട്‌ വ്യക്തി​പ​ര​മാ​യി സംസാ​രി​ക്കു​മ്പോൾ എനിക്ക്‌ വളരെ ബുദ്ധി​മുട്ട്‌ അനുഭ​വ​പ്പെ​ടാ​റുണ്ട്‌. അതു​കൊണ്ട്‌, ഇത്‌ ഞാൻ വിക്കിനെ കീഴട​ക്കിയ വിജയ​ഗാ​ഥ​യൊ​ന്നു​മല്ല. വിക്കു​മൂ​ലം ബുദ്ധി​മു​ട്ട​നു​ഭ​വ​പ്പെ​ടു​മ്പോൾ എന്റെ പരിമി​തി​കളെ മനസ്സി​ലാ​ക്കി​ക്കൊണ്ട്‌ ‘ദൈവ​ത്തി​ന്റെ സന്നിധി​യിൽ താഴ്‌മ​യോ​ടെ നടപ്പാൻ’ സ്വയം ഓർമി​പ്പി​ക്കാൻ ഞാൻ ശ്രമി​ക്കു​ന്നു.—മീഖാ 6:8.

ഭാവി​യിൽ എന്തുതന്നെ സംഭവി​ച്ചാ​ലും, ദൈവ​ത്തി​ന്റെ ആസന്നമായ പുതിയ ലോക​ത്തിൽ വിക്ക്‌ പൂർണ​മാ​യി ഇല്ലാതാ​കു​മെന്ന അറിവു​ള്ള​തു​കൊണ്ട്‌ ഞാൻ എന്റെ ശ്രമം തുടരും. “വിക്കന്മാ​രു​ടെ നാവു തടവി​ല്ലാ​തെ വ്യക്തമാ​യി സംസാ​രി​ക്കും” എന്ന്‌ ബൈബിൾ പറയുന്നു. ഇത്‌ അക്ഷരാർഥ​ത്തി​ലും ആത്മീയാർഥ​ത്തി​ലും സത്യമാ​യി ഭവിക്കു​മെ​ന്നും “ഊമന്റെ നാവും ഉല്ലസിച്ചു ഘോഷി​ക്കു”മെന്നും ഞാൻ ഉറച്ചു വിശ്വ​സി​ക്കു​ന്നു.—യെശയ്യാ​വു 32:4; 35:6.

[അടിക്കു​റി​പ്പു​കൾ]

[15-ാം പേജിലെ ചിത്രം]

ഭാര്യ ട്രേസി​യോ​ടൊ​പ്പം