ഛിന്ന​ഗ്ര​ഹ​ങ്ങ​ളും ധൂമ​കേ​തു​ക്ക​ളും ഭൂമി​യും—കൂട്ടി​യി​ടി​യു​ടെ വക്കിലോ?

‘ജൂൺ 30. പ്രഭാതം പൊട്ടി​വി​ടർന്നതേ ഉള്ളൂ. സൈബീ​രി​യ​യി​ലെ ഒരു ഗ്രാമം അത്യപൂർവ​മായ ഒരു പ്രതി​ഭാ​സ​ത്തി​നു സാക്ഷ്യം വഹിച്ചു. ചക്രവാ​ള​ത്തിൽ ഒരു വസ്‌തു നല്ല തിളക്ക​ത്തോ​ടെ കത്തിജ്വ​ലി​ക്കു​ന്നതു കർഷക​രു​ടെ ദൃഷ്ടി​യിൽ പെട്ടു. നഗ്നനേ​ത്ര​ങ്ങൾക്കു താങ്ങാ​വു​ന്ന​തി​നെ​ക്കാൾ ഉജ്ജ്വല​മാ​യി​രു​ന്നു ആ പ്രഭാ​പൂ​രം. ചക്രവാ​ള​ത്തിൽ അൽപ്പം താഴെ​യാ​യി ആ വസ്‌തു​വി​ന്റെ അതേ ദിശയിൽ ഇരുണ്ട ഒരു ചെറിയ മേഘം പ്രത്യ​ക്ഷ​പ്പെട്ടു. ജ്വലി​ച്ചു​കൊ​ണ്ടി​രുന്ന ആ വസ്‌തു ഭൗമോ​പ​രി​ത​ല​ത്തോട്‌ അടുത്ത​പ്പോ​ഴേ​ക്കും ധൂളി​യാ​യി തീർന്ന​തു​പോ​ലെ തോന്നി. അതിന്റെ സ്ഥാനത്തു​നിന്ന്‌ ഇരുണ്ട പുകപ​ടലം ഉയർന്നു. കല്ലുക​ളു​ടെ ഒരു കൂട്ടം താഴെ വീഴു​ന്ന​തു​പോ​ലുള്ള ശബ്ദത്തിൽ ഞെട്ടി​ക്കുന്ന ഒരു സ്‌ഫോ​ട​ന​വും ഉണ്ടായി. കെട്ടി​ടങ്ങൾ കുലുങ്ങി, അഗ്നിനാ​ളം മാനം​മു​ട്ടെ ഉയർന്നു. പരി​ഭ്രാ​ന്ത​രായ ഗ്രാമീ​ണർ തെരു​വി​ലേ​ക്കോ​ടി. വൃദ്ധകൾ തേങ്ങി; അതു ലോകാ​വ​സാ​നം ആണെന്നാണ്‌ എല്ലാവ​രും കരുതി​യത്‌.’—റഷ്യയി​ലെ ഇർകൂ​ട്‌സ്‌കി​ലെ സിബിർ ദിനപ്പ​ത്ര​ത്തിൽ 1908 ജൂലൈ 2-നു പ്രസി​ദ്ധീ​ക​രിച്ച ഒരു റിപ്പോർട്ടി​ന്റെ സംഗ്രഹം.

ബാഹ്യാ​കാ​ശത്തു നിന്നുള്ള ഒരു വസ്‌തു പൊട്ടി​ത്തെ​റി​ച്ചത്‌ ആയിരു​ന്നു അതെന്ന്‌ ആ ഗ്രാമീ​ണർ തിരി​ച്ച​റി​ഞ്ഞില്ല. ആ സംഭവം കഴിഞ്ഞിട്ട്‌ ഇപ്പോൾ 90-ലധികം വർഷം പിന്നി​ട്ടി​രി​ക്കു​ന്നു. ഒരു ഛിന്ന​ഗ്ര​ഹ​വു​മാ​യോ ധൂമ​കേ​തു​വു​മാ​യോ ഭൂമി കൂട്ടി​യി​ടി​ക്കും എന്നാണ്‌ നമ്മുടെ ഗ്രഹത്തി​ന്റെ അന്ത്യത്തെ കുറിച്ച്‌ ഇന്നു നിലവി​ലുള്ള ഏറ്റവും ഭീതി​ജ​ന​ക​മായ മുന്നറി​യി​പ്പു​ക​ളിൽ ഒന്ന്‌. ആകാശ ഗോള​ങ്ങ​ളു​മാ​യുള്ള കൂട്ടി​യി​ടി​യു​ടെ ഫലമായി ഭൂമി നശിപ്പി​ക്ക​പ്പെ​ടും എന്ന ഭയജന​ക​മായ മുന്നറി​യി​പ്പു​ക​ളോ​ടുള്ള ബന്ധത്തിൽ എൻഇഒ (ഭൗമ സമീപ വസ്‌തു​ക്കൾ), പിഎച്ച്‌ഒ (വിനാശക സാധ്യതാ വസ്‌തു​ക്കൾ) തുടങ്ങിയ ചുരു​ക്ക​പ്പേ​രു​കൾ ഉയർന്നു കേൾക്കു​ന്നു. ഹോളി​വു​ഡ്ഡാ​കട്ടെ, അതി​നോ​ടുള്ള ബന്ധത്തിൽ ഡീപ്പ്‌ ഇംപാ​ക്‌റ്റ്‌, അർമ​ഗെ​ദോൻ തുടങ്ങിയ സിനി​മകൾ നിർമിച്ച്‌ വൻ വിജയം കൊയ്‌തി​രി​ക്കു​ന്നു.

ആകാശത്തു നിന്ന്‌ ഒരു അഗ്നി​ഗോ​ളം വീണ്‌ നിങ്ങളും നിങ്ങളു​ടെ കുട്ടി​ക​ളും കൊല്ല​പ്പെ​ടാൻ എത്ര​ത്തോ​ളം സാധ്യ​ത​യുണ്ട്‌? ഇരുമ്പു കഷണങ്ങ​ളും ഐസ്‌ കട്ടകളും നിങ്ങളു​ടെ പിൻമു​റ്റത്തു പതിക്കു​മെന്നു പ്രതീ​ക്ഷി​ക്ക​ണ​മോ? നിങ്ങൾ താമസി​ക്കു​ന്നത്‌ ഒരു തീര​പ്ര​ദേ​ശത്ത്‌ ആണെങ്കിൽ, ഗതി​തെ​റ്റിയ ഒരു ഛിന്ന​ഗ്രഹം സമു​ദ്ര​ത്തിൽ വീഴു​ന്ന​തി​ന്റെ ഫലമായി ഉയർന്നേ​ക്കാ​വുന്ന കൂറ്റൻ തിരമാല നിങ്ങളു​ടെ വീടിനെ തകർത്തു തരിപ്പ​ണ​മാ​ക്കു​മോ?

ഗ്രഹാ​വ​ശി​ഷ്ട​ങ്ങൾക്കി​ട​യിൽ ഭ്രമണം ചെയ്യൽ

നമ്മുടെ സൗരയൂ​ഥ​ത്തിൽ സൂര്യ​നും ഒമ്പതു ഗ്രഹങ്ങ​ളും അവയുടെ ഉപഗ്ര​ഹ​ങ്ങ​ളും മാത്രമല്ല ഉള്ളത്‌. ധൂമ​കേ​തു​ക്ക​ളും (ഐസും പൊടി​പ​ട​ല​ങ്ങ​ളും ഉറച്ചു​ണ്ടാ​യത്‌) ഛിന്ന​ഗ്ര​ഹ​ങ്ങ​ളും (ചെറിയ ഗ്രഹങ്ങൾ) ഉൽക്കക​ളു​മൊ​ക്കെ (മിക്ക​പ്പോ​ഴും ഛിന്ന​ഗ്ര​ഹ​ങ്ങ​ളു​ടെ അവശി​ഷ്ടങ്ങൾ) സൗരയൂ​ഥ​ത്തിൽ ഭ്രമണം ചെയ്യു​ന്നുണ്ട്‌. ബഹിരാ​കാ​ശത്തു നിന്നുള്ള ഇത്തരം വസ്‌തു​ക്ക​ളു​മാ​യി ഭൂമി കൂട്ടി​യി​ടി​ച്ചേ​ക്കാം എന്നു ശാസ്‌ത്ര​ജ്ഞർക്കു നേരത്തേ അറിവു​ള്ള​താണ്‌. നമ്മുടെ ഗ്രഹം വളരെ അപകട​ക​ര​മായ ഒരു സ്ഥാനത്താ​ണെന്നു മനസ്സി​ലാ​ക്കാൻ കുണ്ടും​കു​ഴി​യും നിറഞ്ഞ ചന്ദ്ര​പ്ര​തലം നോക്കു​കയേ വേണ്ടൂ. ഭൂമി​യി​ലേക്കു പാഞ്ഞു​വ​രുന്ന ആകാശ വസ്‌തു​ക്കൾ അന്തരീ​ക്ഷ​ത്തിൽ വെച്ച്‌ എരിഞ്ഞു​പോ​കു​ന്ന​തു​കൊ​ണ്ടും ഭൗമോ​പ​രി​തലം വിവർത്ത​നിക പാളി​ക​ളാൽ (plate tectonics) ക്രമമാ​യി പുതു​ക്ക​പ്പെ​ടു​ന്ന​തു​കൊ​ണ്ടും മണ്ണൊ​ലി​പ്പു നടക്കു​ന്ന​തു​കൊ​ണ്ടു​മാണ്‌ ഭൗമോ​പ​രി​ത​ല​ത്തിൽ ചന്ദ്രോ​പ​രി​ത​ല​ത്തി​ലെ പോലെ ഗർത്തങ്ങൾ ഇല്ലാത്തത്‌.

ഭൗമാ​ന്ത​രീ​ക്ഷ​ത്തിൽ ഓരോ ദിവസ​വും 20 കോടി ഉൽക്കകൾ കാണ​പ്പെ​ടു​ന്നെന്നു ശാസ്‌ത്രജ്ഞർ കണക്കാ​ക്കു​ന്നു. അന്തരീ​ക്ഷ​ത്തിൽ പ്രവേ​ശി​ക്കുന്ന ഈ വസ്‌തു​ക്ക​ളിൽ മിക്കതും വളരെ ചെറു​താ​യ​തി​നാൽ ആരു​ടെ​യും ശ്രദ്ധയിൽ പെടാതെ അവ കത്തി​യെ​രി​ഞ്ഞു​പോ​കു​ന്നു. എങ്കിലും അവയിൽ ചിലത്‌, ഭൗമാ​ന്ത​രീ​ക്ഷ​ത്തിൽ പ്രവേ​ശി​ക്കു​മ്പോ​ഴുള്ള ഉയർന്ന താപനി​ലയെ അതിജീ​വി​ക്കു​ന്നു. വായു നിമി​ത്ത​മുള്ള ഘർഷണം​മൂ​ലം അവയുടെ വേഗം മണിക്കൂ​റിൽ 320 കിലോ​മീ​റ്റർ ആയി കുറയു​ന്നു. അവയുടെ അവശി​ഷ്ടങ്ങൾ ഉൽക്കശി​ല​ക​ളാ​യി ഭൗമോ​പ​രി​ത​ല​ത്തിൽ പതിക്കു​ന്നു. അവയിൽ മിക്കതും സമു​ദ്ര​ത്തി​ലോ ജനവാസം ഇല്ലാത്ത മേഖല​ക​ളി​ലോ പതിക്കു​ന്ന​തി​നാൽ അവ മൂലം മനുഷ്യർക്ക്‌ അപകടം സംഭവി​ക്കു​ന്നി​ല്ലെന്നു തന്നെ പറയാം. എന്നാൽ ഭൗമാ​ന്ത​രീ​ക്ഷ​ത്തിൽ പ്രവേ​ശി​ക്കുന്ന അത്തരം വസ്‌തു​ക്കൾ നിമിത്തം ഭൂമി​യു​ടെ ഭാരം ഓരോ ദിവസ​വും നൂറു​ക​ണ​ക്കി​നു ടൺ വർധി​ക്കു​ന്ന​താ​യി കണക്കാ​ക്ക​പ്പെ​ടു​ന്നു.

കൂടാതെ, ഒരു കിലോ​മീ​റ്റ​റിൽ അധികം വ്യാസ​മു​ള്ള​തും ഭൂമി​യു​ടെ ഭ്രമണ​പ​ഥത്തെ മുറിച്ചു കടക്കു​ക​യോ അതിന്റെ സമീപ​ത്തേക്കു വരുക​യോ ചെയ്യു​ന്ന​തു​മായ 2,000-ത്തോളം ഛിന്ന​ഗ്ര​ഹങ്ങൾ ഉണ്ടായി​രി​ക്കാം എന്നാണ്‌ ജ്യോ​തി​ശ്ശാ​സ്‌ത്ര​ജ്ഞ​രു​ടെ കണക്കു​കൂ​ട്ടൽ. പക്ഷേ, അവയിൽ കേവലം 200 എണ്ണത്തെ മാത്രമേ അവർ കണ്ടെത്തി സഞ്ചാര​പഥം മനസ്സി​ലാ​ക്കി​യി​ട്ടു​ള്ളൂ. 50 മീറ്ററിൽ കൂടുതൽ വ്യാസ​മു​ള്ള​തും ഭൂമി​യു​ടെ ഭ്രമണ​പ​ഥ​ത്തി​ന്റെ അടു​ത്തേക്ക്‌ അപകട​ക​ര​മാ​യി പാഞ്ഞു​വ​രു​ന്ന​തു​മായ ഏതാണ്ട്‌ പത്തു ലക്ഷം ഛിന്ന​ഗ്ര​ഹങ്ങൾ ഉണ്ടെന്നു കണക്കാ​ക്ക​പ്പെ​ടു​ന്നു. ആ വലുപ്പ​മുള്ള ഛിന്ന​ഗ്ര​ഹങ്ങൾ ഭൗമോ​പ​രി​ത​ല​ത്തിൽ പതിച്ച്‌ അപകടം വിത​ച്ചേ​ക്കാം. താരത​മ്യേന വലുപ്പം കുറഞ്ഞ ഈ വസ്‌തു​ക്ക​ളിൽ ഏതാണ്ട്‌ പത്തു മെഗാടൺ—ഒരു വലിയ അണു​ബോം​ബി​ന്റെ അത്രയും—ഊർജ​മുണ്ട്‌. ചെറിയ കൂട്ടി​യി​ടി​ക​ളിൽ നിന്നു നമ്മെ രക്ഷിക്കാൻ ഭൗമാ​ന്ത​രീ​ക്ഷ​ത്തി​നു സാധി​ക്കു​മെ​ങ്കി​ലും പത്തോ അതില​ധി​ക​മോ മെഗാടൺ ഊർജ​മുള്ള വസ്‌തു​ക്കളെ തടഞ്ഞു​നിർത്താൻ അതിനു കഴിയില്ല. സ്ഥിതി​വി​വര കണക്കുകൾ അനുസ​രിച്ച്‌ പത്തു മെഗാടൺ ഊർജ​മുള്ള ഒരു വസ്‌തു​വു​മാ​യുള്ള കൂട്ടി​യി​ടി ശരാശരി നൂറു വർഷത്തിൽ ഒരിക്കലേ ഉണ്ടാകു​ക​യു​ള്ളൂ എന്നാണ്‌ ചില ഗവേഷകർ അവകാ​ശ​പ്പെ​ടു​ന്നത്‌. ചില കണക്കു​കൂ​ട്ട​ലു​കൾ അനുസ​രിച്ച്‌, ഒരു കിലോ​മീ​റ്റ​റോ​ളം വ്യാസ​മുള്ള വസ്‌തു​ക്കൾ 1,00,000 വർഷത്തിൽ ഒരിക്കലേ ഭൗമോ​പ​രി​ത​ല​ത്തിൽ പതിക്കു​ക​യു​ള്ളൂ.

ഗർത്തങ്ങ​ളും സ്‌ഫോ​ട​ന​ങ്ങ​ളും കൂട്ടി​യി​ടി​ക​ളും വെളി​പ്പെ​ടു​ത്തു​ന്നത്‌

ബഹിരാ​കാ​ശ​ത്തു​നി​ന്നുള്ള വലിയ വസ്‌തു​ക്ക​ളു​മാ​യി കഴിഞ്ഞ കാലത്തു നമ്മുടെ ഗ്രഹം കൂട്ടി​യി​ടി​ച്ചി​ട്ടു​ണ്ടെന്നു വിശ്വ​സി​ക്കു​ന്നതു ബുദ്ധി​മു​ട്ടുള്ള സംഗതി​യല്ല. ഭൗമോ​പ​രി​ത​ലത്തെ വികൃ​ത​മാ​ക്കുന്ന, ഇതി​നോ​ടകം കണ്ടെത്തിയ 150-ലധികം ഗർത്തങ്ങൾ ഇതിനുള്ള തെളി​വാണ്‌. അവയിൽ ചിലതു ശരിക്കും ദൃശ്യ​മാണ്‌, ചില ഗർത്തങ്ങൾ കാണണ​മെ​ങ്കിൽ ബഹിരാ​കാശ വാഹന​ങ്ങ​ളു​ടെ​യോ ഉപഗ്ര​ഹ​ങ്ങ​ളു​ടെ​യോ സഹായം വേണം. മറ്റു ചിലവ​യാ​കട്ടെ, ഇതി​നോ​ടകം തന്നെ നികന്നു​പോ​യി​രി​ക്കു​ന്നു അല്ലെങ്കിൽ സമു​ദ്ര​ത്തി​ന്റെ അടിത്ത​ട്ടിൽ ആണ്‌.

ഏറ്റവും പ്രസി​ദ്ധ​മായ ഗർത്തങ്ങ​ളിൽ ഒന്നായ ചീക്‌സൂ​ലൂബ്‌, ഭൗമോ​പ​രി​ത​ല​ത്തിൽ 180 കിലോ​മീ​റ്റർ വ്യാസ​മുള്ള ഒരു വിള്ളൽ സൃഷ്ടി​ച്ചി​രി​ക്കു​ന്നു. മെക്‌സി​ക്കോ​യി​ലെ യൂക്കെ​റ്റാൻ ഉപദ്വീ​പി​ന്റെ വടക്കേ അറ്റത്തു കാണ​പ്പെ​ടുന്ന ഈ വലിയ ഗർത്തം 10 കിലോ​മീ​റ്റർ വ്യാസ​മുള്ള ഒരു ധൂമ​കേ​തു​വോ ഛിന്ന​ഗ്ര​ഹ​മോ ഇടിച്ച​തി​ന്റെ ഫലമായി ഉണ്ടായ​താ​ണെന്നു കരുത​പ്പെ​ടു​ന്നു. ഈ കൂട്ടി​യി​ടി​യു​ടെ ഫലമായി ഉണ്ടായ കാലാ​വസ്ഥാ വ്യതി​യാ​ന​മാണ്‌ ദിനോ​സ​റു​ക​ളും കരയി​ലും കടലി​ലു​മുള്ള മറ്റു ചില ജീവി​ക​ളും അന്യം നിന്നു​പോ​കാൻ കാരണം എന്നാണു ചിലരു​ടെ അഭി​പ്രാ​യം.

യു.എസ്‌.എ-യിലെ അരി​സോ​ണ​യിൽ ഒരു ഇരുമ്പ്‌ ഉൽക്ക അനിത​ര​സാ​ധാ​ര​ണ​മായ—ഏതാണ്ട്‌ 1,200 മീറ്റർ വ്യാസ​വും 200 മീറ്റർ ആഴവു​മുള്ള—ഒരു ‘ഉൽക്കാ ഗർത്തം’ സൃഷ്ടി​ച്ചി​രി​ക്കു​ന്നു. അത്തരം ഒരു ഉൽക്ക ഒരു നഗരത്തിൽ പതിക്കു​ക​യാ​ണെ​ങ്കിൽ എന്തെല്ലാം അത്യാ​ഹി​തങ്ങൾ ഉണ്ടാകും? ജനനി​ബി​ഡ​മായ മൻഹാട്ടൺ പട്ടണത്തി​ലാണ്‌ അതു പതിക്കു​ന്ന​തെ​ങ്കിൽ ആ പട്ടണം നാമാ​വ​ശേ​ഷ​മാ​കും എന്ന്‌ ന്യൂ​യോർക്ക്‌ നഗരത്തി​ലെ അമേരി​ക്കൻ മ്യൂസി​യം ഓഫ്‌ നാച്ച്വറൽ ഹിസ്റ്ററി​യിൽ സ്ഥാപി​ച്ചി​രി​ക്കുന്ന ഒരു പ്രസിദ്ധ ചിത്രം പ്രകട​മാ​ക്കു​ന്നു.

100 മീറ്ററിൽ താഴെ വ്യാസ​മു​ള്ള​തെന്നു കണക്കാ​ക്ക​പ്പെ​ടുന്ന ഒരു ഛിന്ന​ഗ്ര​ഹ​മോ ഉൽക്കയോ ആയിരു​ന്നു 1908 ജൂൺ 30-ന്‌, അന്തരീ​ക്ഷ​ത്തി​ലേക്കു പാഞ്ഞു​വന്ന്‌ സൈബീ​രി​യ​യി​ലെ അത്ര ജനനി​ബി​ഡ​മ​ല്ലാഞ്ഞ ടുങൂ​സ്‌കാ മേഖല​യു​ടെ 10 കിലോ​മീ​റ്റർ ഉയരത്തിൽ വെച്ചു പൊട്ടി​ത്തെ​റി​ച്ചത്‌. അതിനെ കുറി​ച്ചാ​ണു മുഖവു​ര​യിൽ സൂചി​പ്പി​ച്ചത്‌. 15 മെഗാടൺ ശക്തി ഉണ്ടായി​രു​ന്ന​താ​യി കണക്കാ​ക്ക​പ്പെട്ട ആ സ്‌ഫോ​ടന ഫലമായി വൃക്ഷങ്ങൾ കടപു​ഴകി, അഗ്നി​പ്ര​ളയം ഉണ്ടായി, നിരവധി മാനുകൾ ചത്തൊ​ടു​ങ്ങി; 2,000 ചതുരശ്ര കിലോ​മീ​റ്റർ ഭൂഭാഗം നശിപ്പി​ക്ക​പ്പെട്ടു. ജനനി​ബി​ഡ​മായ ഒരു മേഖല​യ്‌ക്കു മുകളിൽ ആയിരു​ന്നു ആ സ്‌ഫോ​ടനം എങ്കിൽ, എത്ര ആളുകൾ കൊല്ല​പ്പെ​ടു​മാ​യി​രു​ന്നു?

1994 ജൂ​ലൈ​യിൽ, ഷൂമേക്കർ-ലെവി 9 എന്ന ധൂമ​കേ​തു​വി​ന്റെ കഷണങ്ങൾ വ്യാഴ​ത്തിൽ ഇടിച്ച​പ്പോൾ എല്ലാ ടെലി​സ്‌കോ​പ്പു​ക​ളും ആ ഗ്രഹത്തിൽ കേന്ദ്രീ​ക​രി​ച്ചി​രു​ന്നു. വ്യാഴ​ത്തിൽ താത്‌കാ​ലി​ക​മാ​യി വീണ വിള്ളലു​കൾ ആ കൂട്ടി​യി​ടി നേരിൽക്കണ്ട ആളുക​ളു​ടെ മനസ്സിൽ മായാതെ നിൽക്കും. ഒന്നിനു പുറകെ ഒന്നായി വ്യാഴ​ത്തിൽ ഉണ്ടായ കൂട്ടി​യി​ടി​കൾ, ആ ധൂമ​കേതു ഭൂമിയെ ലക്ഷ്യമാ​ക്കി​യാണ്‌ നീങ്ങി​യി​രു​ന്ന​തെ​ങ്കിൽ എന്തു സംഭവി​ക്കു​മാ​യി​രു​ന്നു എന്നു ചിന്തി​ക്കാൻ വിദഗ്‌ധ​രെ​യും സാധാ​ര​ണ​ക്കാ​രെ​യും ഒരു​പോ​ലെ പ്രേരി​പ്പി​ച്ചി​രി​ക്കു​ന്നു.

ദുരന്ത രംഗങ്ങൾ

ഒരു ധൂമ​കേ​തു​വി​ന്റെ​യോ ഛിന്ന​ഗ്ര​ഹ​ത്തി​ന്റെ​യോ കൂട്ടി​യി​ടി നിമിത്തം നമ്മുടെ ഗ്രഹത്തി​നു നേരി​ട്ടേ​ക്കാ​വുന്ന പ്രത്യാ​ഘാ​ത​ങ്ങളെ കുറിച്ച്‌ ശാസ്‌ത്ര​ജ്ഞ​ന്മാർ ഭീതി​പൂർവം പരിചി​ന്തി​ച്ചി​രി​ക്കു​ന്നു. ഒരു വലിയ കൂട്ടി​യി​ടി​യു​ടെ സത്വര ഫലങ്ങളെ കുറി​ച്ചുള്ള അവരുടെ വീക്ഷണം ഇങ്ങനെ​യാണ്‌: ആദ്യം, പാറച്ചീ​ളു​ക​ളും പൊടി​പ​ട​ല​ങ്ങ​ളും അടങ്ങിയ പൊട്ടി​ത്തെ​റി​ച്ചേ​ക്കാൻ സാധ്യ​ത​യുള്ള ഒരു പടലം ഉണ്ടാകും. താഴേക്കു വീഴുന്ന അവശി​ഷ്ടങ്ങൾ, ആകാശത്തെ കടും ചെമപ്പാ​ക്കു​ക​യും വനത്തെ​യും പുൽമേ​ടു​ക​ളെ​യും അഗ്നിക്കി​ര​യാ​ക്കുന്ന ഒരു ഉൽക്കാ​വർഷം സൃഷ്ടി​ക്കു​ക​യും ചെയ്യും. തന്മൂലം കരയിലെ മിക്ക ജീവി​ക​ളും നശിക്കും. സ്‌ഫോ​ട​നത്തെ തുടർന്ന്‌ അന്തരീ​ക്ഷ​ത്തിൽ ദീർഘ​കാ​ലം തങ്ങിനിൽക്കുന്ന പൊടി​പ​ടലം സൂര്യ​പ്ര​കാ​ശം ഭൂമി​യിൽ എത്തുന്നതു തടയും. അങ്ങനെ അന്തരീക്ഷ ഊഷ്‌മാവ്‌ വളരെ താഴു​ക​യും ഇരുട്ടു മൂടിയ പ്രതല​ത്തിൽ പ്രകാശ സംശ്ലേ​ഷണം സ്‌തം​ഭി​ക്കു​ക​യും ചെയ്യും. അതു സമു​ദ്ര​ത്തി​ലെ ഭക്ഷ്യശൃം​ഖ​ലയെ താറു​മാ​റാ​ക്കു​ക​യും പരിണ​ത​ഫ​ല​മാ​യി മിക്ക സമുദ്ര ജീവി​ക​ളും നശിക്കു​ക​യും ചെയ്യും. ഗോള​വ്യാ​പ​ക​മാ​യി അമ്ലമഴ പെയ്യു​ക​യും ഓസോൺ പാളി നശിക്കു​ക​യും ചെയ്യു​മ്പോൾ ഈ പ്രകൃതി വിപത്ത്‌ അതിന്റെ പൂർണ​ത​യിൽ എത്തും.

അത്തര​മൊ​രു ഛിന്ന​ഗ്രഹം സമു​ദ്ര​ത്തിൽ പതിക്കു​ക​യാ​ണെ​ങ്കിൽ വലിയ വിനാശ സാധ്യ​ത​ക​ളുള്ള കൂറ്റൻ തിരമാ​ലകൾ, സുനാ​മി​കൾ, ഉണ്ടാകും. കൂട്ടി​യി​ടി നടന്നി​ടത്ത്‌ ഉണ്ടാകുന്ന ആഘാത തരംഗത്തെ മറിക​ട​ക്കുന്ന സുനാ​മി​കൾ കൊടും​നാ​ശം വിതച്ചു​കൊണ്ട്‌ കൂടുതൽ ദൂരേക്ക്‌, തീര​പ്ര​ദേ​ശ​ങ്ങ​ളിൽനിന്ന്‌ ആയിര​ക്ക​ണ​ക്കി​നു കിലോ​മീ​റ്റർ അകലേക്ക്‌ ആഞ്ഞടി​ക്കും. ജ്യോ​തി​ശ്ശാ​സ്‌ത്ര​ജ്ഞ​നായ ജാക്ക്‌ ഹിൽസ്‌ പറയുന്ന പ്രകാരം “നഗരങ്ങൾ തലയു​യർത്തി നിന്നി​ടത്ത്‌ വെറും ചെളി മാത്രം കാണും.”

എന്നിരു​ന്നാ​ലും ഇത്തരം ഉറച്ച പ്രസ്‌താ​വ​ന​ക​ളോ​ടുള്ള ബന്ധത്തിൽ ആളുകൾ ജാഗ്രത ഉള്ളവർ ആയിരി​ക്കേ​ണ്ട​തുണ്ട്‌. ഈ സിദ്ധാ​ന്ത​ങ്ങ​ളിൽ മിക്കതും വെറും സങ്കൽപ്പങ്ങൾ മാത്ര​മാണ്‌. വ്യക്തമാ​യും, ഒരു ഛിന്ന​ഗ്രഹം ഭൂമി​യു​മാ​യി കൂട്ടി​യി​ടി​ക്കു​ന്നത്‌ ആരും ഒരിക്ക​ലും കണ്ടിട്ടില്ല, അതിനെ കുറി​ച്ചൊ​ട്ടു പഠിച്ചി​ട്ടു​മില്ല. കൂടാതെ എന്തും പൊടി​പ്പും തൊങ്ങ​ലും വെച്ച്‌ എഴുതുന്ന ഇന്നത്തെ വാർത്താ​മാ​ധ്യ​മങ്ങൾ, അപൂർണ​മോ കൃത്യ​മ​ല്ലാ​ത്തതു പോലു​മോ ആയ വിവര​ങ്ങളെ അടിസ്ഥാ​ന​മാ​ക്കി അതിശ​യോ​ക്തി ജനിപ്പി​ക്കുന്ന വാർത്തകൾ അച്ചടി​ക്കാൻ തിടുക്കം കൂട്ടുന്നു. (മുകളി​ലുള്ള ചതുരം കാണുക.) വാസ്‌ത​വ​ത്തിൽ, ആകാശ​ത്തു​നി​ന്നു വീഴുന്ന ഒരു വസ്‌തു നിമിത്തം കൊല്ല​പ്പെ​ടാ​നുള്ള സാധ്യത ഒരു കാറപ​ക​ട​ത്തിൽ മരണമ​ട​യാ​നുള്ള സാധ്യ​ത​യേ​ക്കാൾ വളരെ കുറവാ​ണെന്ന്‌ പറയ​പ്പെ​ടു​ന്നു.

എന്തു ചെയ്യേ​ണ്ട​തുണ്ട്‌?

പാഞ്ഞടു​ക്കുന്ന ഒരു ധൂമ​കേ​തു​വോ ഛിന്ന​ഗ്ര​ഹ​മോ മൂലമുള്ള വിപത്ത്‌ ഒഴിവാ​ക്കാ​നുള്ള ഏറ്റവും മെച്ചമായ മാർഗം, അതിനെ തടഞ്ഞു​നിർത്താ​നോ കുറഞ്ഞ​പക്ഷം അതിന്റെ ഗതി മാറ്റാ​നോ ആയി ഒരു റോക്കറ്റ്‌ വിക്ഷേ​പി​ക്കു​ന്നത്‌ ആയിരി​ക്കും എന്നാണു നിരവധി വിദഗ്‌ധ​രും കരുതു​ന്നത്‌. ഛിന്ന​ഗ്രഹം ചെറുത്‌ ആയിരി​ക്കു​ക​യും അതിന്റെ കൂട്ടി​യി​ടി നിരവധി വർഷങ്ങൾക്കു മുമ്പു​തന്നെ മനസ്സി​ലാ​ക്കാൻ സാധി​ക്കു​ക​യും ചെയ്യു​ന്ന​പക്ഷം ഈ മാർഗം പര്യാ​പ്‌ത​മാ​യേ​ക്കാം.

എന്നാൽ, ഭൂമി​യു​മാ​യി കൂട്ടി​യി​ടി​ച്ചേ​ക്കാ​വുന്ന വലിയ വസ്‌തു​ക്കളെ നേരി​ടാൻ അണ്വാ​യു​ധം പ്രയോ​ഗി​ച്ചാൽ മതി​യെ​ന്നാണ്‌ ചില ശാസ്‌ത്ര​ജ്ഞ​രു​ടെ നിർദേശം. അത്തര​മൊ​രു സാഹച​ര്യ​ത്തിൽ, ശ്രദ്ധാ​പൂർവ​മുള്ള ഒരു അണുസ്‌ഫോ​ടനം കൂട്ടി​യി​ടി ഒഴിവാ​ക്കി​ക്കൊ​ണ്ടു ഛിന്ന​ഗ്ര​ഹത്തെ സുരക്ഷി​ത​മായ ഒരു ഭ്രമണ​പ​ഥ​ത്തി​ലേക്കു തള്ളിനീ​ക്കു​മെ​ന്നാ​ണു വിശ്വ​സി​ക്ക​പ്പെ​ടു​ന്നത്‌. ഛിന്ന​ഗ്ര​ഹ​ത്തി​ന്റെ വലുപ്പ​വും ഭൂമി​യോ​ടുള്ള അതിന്റെ അടുപ്പ​വു​മാണ്‌ നടത്ത​പ്പെ​ടേണ്ട അണുസ്‌ഫോ​ട​ന​ത്തി​ന്റെ ശക്തി നിർണ​യി​ക്കു​ന്നത്‌.

വേണ്ടത്ര നേര​ത്തേ​തന്നെ മുന്നറി​യി​പ്പു ലഭിക്കു​ന്നി​ല്ലെ​ങ്കിൽ, ഈ പ്രതി​രോധ നടപടി​ക​ളിൽ ഒന്നു​പോ​ലും ഫലപ്രദം ആയിരി​ക്കു​ക​യില്ല എന്നതാണു പ്രശ്‌നം. ഛിന്ന​ഗ്ര​ഹ​ങ്ങളെ കണ്ടെത്തു​ന്ന​തിൽ മുഴു ശ്രദ്ധയും കേന്ദ്രീ​ക​രി​ച്ചി​രി​ക്കുന്ന സ്ഥാപന​ങ്ങ​ളാണ്‌ സ്‌പെ​യ്‌സ്‌വാച്ച്‌, നിയർ എർത്ത്‌ ആസ്റ്ററോ​യിഡ്‌ ട്രാക്കിങ്‌ തുടങ്ങിയ ജ്യോ​തി​ശ്ശാ​സ്‌ത്ര സംഘങ്ങൾ. ഈ മേഖല​യിൽ കൂടുതൽ കാര്യങ്ങൾ ചെയ്യേ​ണ്ട​തു​ണ്ടെ​ന്നാ​ണു അനേക​രു​ടെ​യും അഭി​പ്രാ​യം.

ഇത്തരം ആകാശ വസ്‌തു​ക്ക​ളു​ടെ സ്ഥാനവും ചലനവും സംബന്ധി​ച്ചുള്ള അപൂർണ മനുഷ്യ​ന്റെ അറിവു പരിമി​ത​മാ​ണെന്നു സമ്മതി​ക്കേ​ണ്ടി​യി​രി​ക്കു​ന്നു. എന്നുവ​രി​കി​ലും, ഭൂമി​യിൽ ജീവന്റെ നിലനിൽപ്പ്‌ അപകട​ത്തി​ലാ​ണെ​ന്നുള്ള ഭീഷണി​ക​ളെ​പ്രതി അമിത​മാ​യി ഉത്‌ക​ണ്‌ഠ​പ്പെ​ടു​ക​യോ അങ്ങേയറ്റം ഭയവി​ഹ്വ​ലർ ആകുക​യോ ചെയ്യേണ്ട യാതൊ​രു ആവശ്യ​വും ഇല്ല. ഭൂമി​യു​മാ​യി കൂട്ടി​യി​ടിച്ച്‌ അതിലെ സർവ ജീവജാ​ല​ങ്ങ​ളെ​യും നശിപ്പി​ക്കാൻ യാതൊ​രു ഛിന്ന​ഗ്ര​ഹ​മോ ധൂമ​കേ​തു​വോ അനുവ​ദി​ക്ക​പ്പെ​ടു​ക​യില്ല എന്നതി​നുള്ള ഏറ്റവും ഈടുറ്റ ഉറപ്പ്‌ പ്രപഞ്ച നിർമാ​താ​വായ യഹോ​വ​യാം ദൈവ​ത്തിൽനി​ന്നാ​ണു വരുന്നത്‌.a ബൈബിൾ ഇങ്ങനെ ഉറപ്പേ​കു​ന്നു: “നീതി​മാ​ന്മാർ ഭൂമിയെ അവകാ​ശ​മാ​ക്കി എന്നേക്കും അതിൽ വസിക്കും.”—സങ്കീർത്തനം 37:29; യെശയ്യാ​വു 45:18.

[അടിക്കു​റി​പ്പു​കൾ]

[27-ാം പേജിലെ ചതുരം]

1997 XF11-ന്റെ കാര്യം

1998 മാർച്ച്‌ 12-ന്‌, അസുഖ​ക​ര​മായ വാർത്ത ഗോള​മെ​മ്പാ​ടും പരന്നു: ഒന്നര കിലോ​മീ​റ്റർ വ്യാസ​മുള്ള ഒരു ഛിന്ന​ഗ്രഹം ഭൂമിയെ ലക്ഷ്യമാ​ക്കി പുറ​പ്പെ​ട്ടി​രി​ക്കു​ന്നു, അത്‌ 2028 ഒക്‌ടോ​ബർ 26 “വ്യാഴാഴ്‌ച” ഇവിടെ എത്തി​ച്ചേ​രും. 1997 ഡിസംബർ 6-ന്‌ അരി​സോണ സർവക​ലാ​ശാ​ല​യി​ലെ ‘ബഹിരാ​കാശ നിരീക്ഷണ’ സംഘത്തിൽപെട്ട ജിം സ്‌കൊ​ട്ടി എന്ന ജ്യോ​തി​ശ്ശാ​സ്‌ത്ര​ജ്ഞ​നാണ്‌, 1997 XF11 എന്നു നാമക​രണം ചെയ്യപ്പെട്ട ഈ ഛിന്ന​ഗ്ര​ഹത്തെ കണ്ടെത്തി​യത്‌. കഴിഞ്ഞ​കാല വിവര​ങ്ങ​ളും പുത്തൻ നിരീ​ക്ഷ​ണ​ങ്ങ​ളും കോർത്തി​ണക്കി ജ്യോതി-ഭൗതിക ശാസ്‌ത്ര​ത്തി​നാ​യുള്ള ഹാർവാർഡ്‌-സ്‌മി​ത്ത്‌സോ​ണി​യൻ കേന്ദ്ര​ത്തി​ലെ ശാസ്‌ത്രജ്ഞർ പുറ​പ്പെ​ടു​വിച്ച വിജ്ഞാ​പ​നങ്ങൾ ഉപയോ​ഗിച്ച്‌ ഛിന്ന​ഗ്ര​ഹ​ത്തി​ന്റെ ഭ്രമണ​പഥം ഭൂമി​യിൽനിന്ന്‌ ഏതാണ്ട്‌ 50,000 കിലോ​മീ​റ്റർ അകലെ—ജ്യോ​തി​ശ്ശാ​സ്‌ത്ര മാപി​നി​യിൽ വെറും തലനാ​രിഴ ദൂരം—ആയിരി​ക്കു​മെന്ന്‌, ‘കൂട്ടി​യി​ടി​യു​ടെ വക്കിലാ​ണെന്ന്‌’ ചിലർ പ്രവചി​ച്ചു. ഭൂമി ലക്ഷ്യമാ​ക്കി പാഞ്ഞു​വ​രുന്ന ഈ ഛിന്ന​ഗ്ര​ഹ​ത്തി​ന്റെ ഭീതി​പ്പെ​ടു​ത്തുന്ന അനുകരണ ചിത്രങ്ങൾ ടെലി​വി​ഷൻ സ്‌ക്രീ​നിൽ നിറഞ്ഞു​നി​ന്നു. ഒരു ദിവസം കഴിഞ്ഞില്ല, അതിനു​മു​മ്പേ അപകടം ഒഴിവാ​യി​ക്കി​ട്ടി. പുതിയ വിവര​ങ്ങ​ളും കണക്കു​കൂ​ട്ട​ലു​ക​ളും അനുസ​രിച്ച്‌ ഭൂമി​യിൽ നിന്ന്‌ 10,00,000 കിലോ​മീ​റ്റർ അകലെ ആയിരി​ക്കും അതിന്റെ സഞ്ചാര​പഥം. മുമ്പു നിരീ​ക്ഷി​ക്ക​പ്പെട്ട, ഈ വലുപ്പ​ത്തി​ലുള്ള ഏതൊരു ഛിന്ന​ഗ്ര​ഹ​ത്തെ​ക്കാ​ളും കൂടുതൽ അടുത്താണ്‌ അത്‌. എന്നാൽ ആ അകലം സുരക്ഷി​ത​മാണ്‌. പെട്ടെ​ന്നു​തന്നെ “കഷ്ടിച്ച്‌ അപകടം ഒഴിവാ​യി​ക്കി​ട്ടി’ എന്നിങ്ങ​നെ​യുള്ള തലക്കെ​ട്ടു​കൾ മാധ്യ​മ​ങ്ങ​ളിൽ പ്രത്യ​ക്ഷ​പ്പെട്ടു.

[26-ാം പേജിലെ ചിത്രം]

1. ഹാലി​യു​ടെ ധൂമ​കേ​തു

2. ഇകിയാ-സെകി ധൂമ​കേ​തു

3. 951 ഗാസ്‌പ്രാ ഛിന്ന​ഗ്ര​ഹം

4. ഏതാണ്ട്‌ 4,000 അടി വ്യാസ​വും 600 അടി ആഴവും ഉള്ള ഒരു ഉൽക്കാ ഗർത്തം

[കടപ്പാട്‌]

Courtesy of ROE/Anglo-Australian Observatory, photograph by David Malin

NASA photo

NASA/JPL/Caltech

Photo by D. J. Roddy and K. Zeller, U.S. Geological Survey

[25-ാം പേജിലെ ചിത്ര​ത്തിന്‌ കടപ്പാട്‌]

NASA photo