കടലാ​സി​ല്ലാത്ത ഓഫീസ്‌—വഴുതി​മാ​റുന്ന ഒരു സ്വപ്‌നം

ഈ ലേഖന​ത്തി​ന്റെ ഇംഗ്ലീ​ഷി​ലുള്ള അന്തിമ​പ​കർപ്പ്‌ പ്രിന്റ്‌ ചെയ്‌തെ​ടു​ത്തതു 11 കടലാ​സു​ക​ളി​ലാ​യാണ്‌.a എന്നാൽ ലേഖനം തയ്യാറാ​ക്കി കൊണ്ടി​രുന്ന സമയത്ത്‌, അത്‌ ഏതാണ്ട്‌ 20 തവണ പ്രിന്റ്‌ ചെയ്യേ​ണ്ട​താ​യി വന്നു. അവസാനം, ലോക​മെ​മ്പാ​ടു​മുള്ള ഏകദേശം 80 പരിഭാ​ഷാ സംഘങ്ങൾക്ക്‌ ഇത്‌ അയച്ചു കൊടു​ത്തു. ഓരോ സംഘവും പരിഭാ​ഷ​യു​ടെ വിവിധ ഘട്ടങ്ങളി​ലാ​യി ഇതിന്റെ ആറു പകർപ്പു​ക​ളോ​ളം എടുക്കു​ക​യു​ണ്ടാ​യി. അങ്ങനെ ഈ ഒരൊറ്റ ലേഖന​ത്തി​നു മാത്രം 5,000-ത്തിലധി​കം കടലാ​സു​കൾ വേണ്ടി വന്നു. ഇതാകട്ടെ, ലേഖനം അച്ചടി​ശാ​ല​യിൽ എത്തുന്ന​തി​നു മുമ്പത്തെ കണക്കാണ്‌!

ഈ വസ്‌തു​തകൾ കമ്പ്യൂട്ടർ യുഗത്തി​ന്റെ പുലരി​യിൽ ചിലർ നടത്തിയ പ്രവച​ന​ങ്ങളെ കാറ്റിൽ പറത്തുന്നു—“കടലാ​സി​ല്ലാത്ത ഓഫീസ്‌” പടിവാ​തിൽക്കൽ ആയിരി​ക്കു​ന്നു എന്ന്‌ അന്നു ചിലർ പ്രവചി​ക്കു​ക​യു​ണ്ടാ​യി. ഇലക്‌​ട്രോ​ണിക്‌ വേർഡ്‌ പ്രോ​സ​സ്സിങ്‌ മെഷീ​നു​കൾ ഉപയോ​ഗിച്ച്‌ ‘എന്തി​ന്റെ​യെ​ങ്കി​ലും പകർപ്പ്‌ കടലാ​സിൽ എടുക്കുക എന്നുള്ളത്‌ ആ മെഷീ​നു​ക​ളു​ടെ ഒരു പ്രാകൃ​ത​മായ ഉപയോ​ഗ​മാ​യി​രു​ന്നെന്നു മാത്രമല്ല അവയുടെ പരമമായ ഉദ്ദേശ്യ​ത്തിന്‌ എതിരും കൂടി​യാ​യി​രു​ന്നു’ എന്നു ഫ്യുച്ച​റി​സ്റ്റായ ആൽവിൻ ടോഫ്‌ളർ ദ തേർഡ്‌ വേവ്‌ എന്ന തന്റെ പുസ്‌ത​ക​ത്തിൽ പറയു​ക​യു​ണ്ടാ​യി. രസകര​മെന്നു പറയട്ടെ, 1981-ൽ ഇന്റർനാ​ഷനൽ ബിസി​നസ്‌ മെഷീൻസ്‌ കോർപ്പ​റേഷൻ ആദ്യമാ​യി പേഴ്‌സനൽ കമ്പ്യൂ​ട്ട​റു​കൾ ഇറക്കി​യ​പ്പോൾ, അതോ​ടൊ​പ്പം ഒരു പ്രിന്റർ നൽകാ​തി​രി​ക്കാ​നാണ്‌ അവർ താത്‌പ​ര്യ​പ്പെ​ട്ടത്‌. ഒരുപക്ഷേ, കമ്പ്യൂട്ടർ ഉപയോ​ഗി​ക്കു​ന്ന​വർക്കു വിവരങ്ങൾ സ്‌ക്രീ​നിൽ നേരിട്ടു വായി​ക്കാ​നാ​കും കൂടുതൽ താത്‌പ​ര്യം എന്ന്‌ കമ്പനി​ക്കാർ കരുതി​ക്കാ​ണു​മെന്നു ചിലർ അവകാ​ശ​പ്പെ​ടു​ന്നു. ഏതായാ​ലും, ചില ആളുകൾ “കടലാ​സി​ല്ലാത്ത ഒരു പറുദീസ” ഭാവന​യിൽ കണ്ടു. അധികം താമസി​യാ​തെ കടലാസ്‌, കാഴ്‌ച​ബം​ഗ്ലാ​വു​ക​ളി​ലും പൊടി​പി​ടി​ച്ചി​രി​ക്കുന്ന റെക്കോർഡ്‌ സൂക്ഷിപ്പു മുറി​ക​ളി​ലും മാത്രം ഒതുങ്ങി​നിൽക്കുന്ന ഒന്നായി തീരു​മെ​ന്നും അവർ ധരിച്ചു.

കടലാ​സി​ല്ലാത്ത ഓഫീസ്‌—വാഗ്‌ദാ​ന​ങ്ങ​ളും യാഥാർഥ്യ​വും

കടലാ​സി​ല്ലാത്ത ഓഫീസ്‌ എന്ന സ്വപ്‌നം സാക്ഷാ​ത്‌ക​രി​ക്കാൻ സഹായ​ക​മാ​കു​മെന്നു കരുതിയ അതേ യന്ത്രമാണ്‌ ഇപ്പോൾ കടലാസ്‌ കൂമ്പാ​ര​ത്തിൽ നമ്മെ പൂഴ്‌ത്തി​ക്ക​ള​യു​ന്നത്‌ എന്നതാണു യാഥാർഥ്യം. സമീപ​വർഷ​ങ്ങ​ളിൽ കടലാ​സി​ന്റെ മൊത്ത​ത്തി​ലുള്ള ഉപയോ​ഗം വർദ്ധി​ച്ചി​ട്ടുണ്ട്‌ എന്നു ചിലർ കണക്കാ​ക്കു​ന്നു. ഇന്റർനാ​ഷണൽ ഡേറ്റാ കോർപ്പ​റേ​ഷ​നി​ലെ വിശകലന വിദഗ്‌ധ​നായ സ്‌കോട്ട്‌ മക്രീഡി പറയുന്നു: “ഓഫീ​സു​കൾ യന്ത്രവ​ത്‌ക​രി​ച്ചതു വഴി കടലാ​സു​കൾ കൂമ്പാ​രം​കൂ​ട്ടാ​നുള്ള നമ്മുടെ പ്രാപ്‌തി കൂടു​ക​യാ​ണു ചെയ്‌തത്‌. ഇതാകട്ടെ, പ്രതി​വർഷം 25 ശതമാ​ന​ത്തി​ല​ധി​കം എന്ന നിരക്കിൽ വർധി​ക്കു​ക​യാ​ണു താനും.” പേഴ്‌സനൽ കമ്പ്യൂ​ട്ട​റു​കൾ, പ്രിന്റ​റു​കൾ, ഫാക്‌സ്‌ മെഷീ​നു​കൾ, ഇ-മെയ്‌ൽ, പകർപ്പെ​ടു​ക്കു​ന്ന​തി​നുള്ള മെഷീ​നു​കൾ, ഇന്റർനെറ്റ്‌ എന്നിവ, അനേകം ആളുകൾ ദിവസ​വും കൈകാ​ര്യം ചെയ്യു​ക​യും പ്രിന്റ്‌ ചെയ്യു​ക​യും ചെയ്യുന്ന വിവര​ങ്ങ​ളു​ടെ അളവ്‌ വളരെ​യ​ധി​കം വർധി​പ്പി​ച്ചി​രി​ക്കു​ന്നു. കാപ്പ്‌ വെൻച്വർസ്‌ ഇൻകോർപ്പ​റേ​റ്റഡ്‌ പറയു​ന്ന​പ്ര​കാ​രം, 1998-ൽ ലോക​വ്യാ​പ​ക​മാ​യി 21.8 കോടി പ്രിന്റ​റു​കൾ, 6.9 കോടി ഫാക്‌സ്‌ മെഷീ​നു​കൾ, പ്രിന്റു ചെയ്യാ​നും സ്‌കാൻ ചെയ്യാ​നും പകർപ്പെ​ടു​ക്കാ​നും ഉള്ള സൗകര്യം ഒത്തു​ചേർന്ന 2.2 കോടി മെഷീ​നു​കൾ, 1.6 കോടി സ്‌കാ​ന​റു​കൾ, പകർപ്പെ​ടു​ക്കു​ന്ന​തി​നുള്ള 1.2 കോടി മെഷീ​നു​കൾ എന്നിവ ഉപയോ​ഗ​ത്തി​ലു​ണ്ടാ​യി​രു​ന്നു.

1990-ൽ പ്രസി​ദ്ധീ​ക​രിച്ച പവർഷി​ഫ്‌റ്റ്‌ എന്ന തന്റെ പുസ്‌ത​ക​ത്തിൽ ടോഫ്‌ളർ, ഐക്യ​നാ​ടു​കൾ ഓരോ വർഷവും ഒരുല​ക്ഷ​ത്തി​മു​പ്പ​തി​നാ​യി​രം കോടി ഡോക്യു​മെ​ന്റു​കൾ ഉത്‌പാ​ദി​പ്പി​ക്കു​ന്നു എന്നു കണക്കാ​ക്കു​ക​യു​ണ്ടാ​യി. അതായത്‌ ഗ്രാന്റ്‌ കാന്യോൺ 107 തവണ പൊതി​യാൻ ആവശ്യ​മായ അത്രയും ഡോക്യു​മെ​ന്റു​കൾ! റിപ്പോർട്ടു​കൾ സൂചി​പ്പി​ക്കു​ന്നത്‌, ഇങ്ങനെ പ്രിന്റു​ചെ​യ്‌തു കൂട്ടുന്ന കടലാ​സു​ക​ളു​ടെ എണ്ണം കൂടി​ക്കൊ​ണ്ടേ​യി​രി​ക്കു​ന്നു എന്നാണ്‌. 1995 ആയപ്പോ​ഴേ​ക്കും ഐക്യ​നാ​ടു​കൾ പ്രതി​ദി​നം ഏകദേശം നാലു ലക്ഷം​കോ​ടി ഡോക്യു​മെ​ന്റു​കൾ ഉത്‌പാ​ദി​പ്പി​ക്കു​ന്നു​ണ്ടാ​യി​രു​ന്നു എന്നാണ്‌ ഒരു പ്രസി​ദ്ധീ​ക​രണം പറയു​ന്നത്‌. അതായത്‌, 270 കിലോ​മീ​റ്റർ നീളമുള്ള ഒരു ഫയൽവ​ലിപ്പ്‌ ദിവസേന നിറയ്‌ക്കാൻ മതിയാ​കുന്ന അത്രയും ഡോക്യു​മെ​ന്റു​കൾ! 2000-ാം ആണ്ട്‌ ആയാൽ പോലും ഈ അവസ്ഥയ്‌ക്കു മാറ്റം സംഭവി​ക്കും എന്നതിനു കാര്യ​മായ തെളി​വൊ​ന്നു​മില്ല. മിക്ക വിവര​ങ്ങ​ളും ഇപ്പോ​ഴും കടലാ​സി​ലൂ​ടെ തന്നെയാ​ണു കൈമാ​റ്റം ചെയ്യ​പ്പെ​ടു​ന്നത്‌.

കടലാ​സി​ന്റെ ഉപയോ​ഗം തുടരു​ന്ന​തി​ന്റെ കാരണം

ഇലക്‌​ട്രോ​ണിക്‌ ഉപകര​ണങ്ങൾ കടലാ​സി​ന്റെ ഉപയോ​ഗം​തന്നെ ഇല്ലാതാ​ക്കി​ത്തീർക്കും എന്ന പ്രവചനം ഫലിക്കാ​തെ പോയ​തി​ന്റെ കാരണം എന്തായി​രി​ക്കാം? അന്താരാ​ഷ്‌ട്ര കടലാസ്‌ കമ്പനി​യു​ടെ ഊഹം ഇതാണ്‌: “കീ ബോർഡിൽ ഏതാനും തവണ വിരൽ അമർത്തി​യി​ട്ടു വിവരങ്ങൾ വായി​ക്കാൻ ആളുകൾക്കു താത്‌പ​ര്യ​മില്ല. മറിച്ച്‌, അവർക്കു വിവരങ്ങൾ കൈയിൽ തന്നെ കിട്ടണം. അവ അവർക്ക്‌ സ്‌പർശി​ക്കാൻ കഴിയണം, ചുരു​ട്ടാ​നും അറ്റം മടക്കി​വെ​ക്കാ​നും കഴിയണം. മാത്രമല്ല, ഫാക്‌സ്‌ ചെയ്യാ​നും പകർപ്പെ​ടു​ക്കാ​നും ആവശ്യം വരു​മ്പോ​ഴൊ​ക്കെ എടുത്തു​നോ​ക്കാ​നും പാകത്തിന്‌ ആയിരി​ക്കു​ക​യും വേണം. ഇനി, ചിലർക്ക്‌ അവയുടെ മാർജി​നു​ക​ളിൽ കുത്തി​ക്കു​റി​ക്കണം അല്ലെങ്കിൽ അവ പെട്ടെന്ന്‌ കാണാൻ പാകത്തിന്‌ ഫ്രിഡ്‌ജി​ന്റെ കതകിൽ ഒട്ടിച്ചു വെക്കണം. എല്ലാറ്റി​ലും ഉപരി, അവർക്ക്‌ അവ പ്രിന്റു ചെയ്‌ത്‌ എടുക്കണം—നൊടി​യി​ട​യിൽ, യാതൊ​രു ന്യൂന​ത​യും ഇല്ലാതെ, ആരും കൊതി​ച്ചു പോകുന്ന വർണങ്ങ​ളിൽ.”

കടലാ​സിന്‌ അതി​ന്റേ​തായ മേന്മകൾ ഉണ്ടെന്ന കാര്യം സമ്മതിച്ചേ മതിയാ​വൂ. കൊണ്ടു​ന​ട​ക്കാൻ എളുപ്പം, തുച്ഛമായ വില, ഈടു​നിൽക്കും, പഴയ വിവരങ്ങൾ സൂക്ഷിച്ചു വെക്കാൻ എളുപ്പം, പിന്നെ, പുനഃ​സം​സ്‌ക​ര​ണ​ത്തി​ലൂ​ടെ അതു വീണ്ടും ഉപയോ​ഗ​പ്പെ​ടു​ത്തു​ക​യും ചെയ്യാം. വിവരങ്ങൾ കടലാ​സിൽ വായി​ക്കുക വളരെ എളുപ്പ​മാണ്‌. നിങ്ങൾ ഏതു പേജാണു വായി​ക്കു​ന്നത്‌, ഇനി എത്ര പേജു കൂടി വായി​ക്കാ​നുണ്ട്‌ എന്നൊക്കെ എളുപ്പം തിട്ട​പ്പെ​ടു​ത്താൻ കഴിയും. ഓഫീ​സി​ലേക്ക്‌ ആവശ്യ​മുള്ള സാധനങ്ങൾ വിൽക്കുന്ന ഒരു കമ്പനി​യു​ടെ പ്രതി​നി​ധി​യായ ഡാൻ കോക്ക്‌സ്‌ ഇങ്ങനെ അഭി​പ്രാ​യ​പ്പെ​ടു​ന്നു: “ആളുകൾ കടലാ​സി​നെ അത്രയ്‌ക്കങ്ങു സ്‌നേ​ഹി​ച്ചു​പോ​യി​രി​ക്കു​ന്നു. അവർക്ക്‌ അത്‌ എപ്പോ​ഴും കൈയിൽ വേണം.” അരി​സോണ ഡിപ്പാർട്ട്‌മെന്റ്‌ ഓഫ്‌ ലൈ​ബ്ര​റീസ്‌, ആർ​ക്കൈ​വ്‌സ്‌ ആൻഡ്‌ പബ്ലിക്‌ റെക്കോർഡ്‌സി​ലെ റെക്കോർഡ്‌സ്‌ വിശകലന വിദഗ്‌ധ​നായ ജെറി മാലെറി ഇപ്രകാ​രം പറയുന്നു: “കടലാ​സി​ല്ലാത്ത ഓഫീസ്‌ ഒരു യാഥാർഥ്യ​മാ​ക്കി തീർക്കാൻ ആളുകൾ ശ്രമി​ക്കു​ന്നതു ഞങ്ങൾ കണ്ടിട്ടുണ്ട്‌. പക്ഷേ, ഞങ്ങൾ കണ്ടിട്ടുള്ള ആയിര​ക്ക​ണ​ക്കി​നു കമ്പ്യൂ​ട്ട​റു​കൾക്കെ​ല്ലാം ഒരു പൊതു​സ്വ​ഭാ​വ​മുണ്ട്‌: അവ ചുരു​ങ്ങി​യത്‌ ഒരു പ്രിന്റ​റു​മാ​യിട്ട്‌ എങ്കിലും ബന്ധിപ്പി​ച്ചി​ട്ടു​ണ്ടാ​വും.”

ഇനി, പഴയ ശീലങ്ങൾ അത്ര​വേഗം ഉപേക്ഷി​ക്കാൻ പറ്റില്ല എന്ന വസ്‌തു​ത​യു​മുണ്ട്‌. ഇന്നത്തെ ബിസി​ന​സു​കാ​രെ​ല്ലാം ആദ്യം വായന പഠിച്ചത്‌ അച്ചടിച്ച താളുകൾ ഉപയോ​ഗി​ച്ചാണ്‌. ഇപ്പോ​ഴാ​കട്ടെ, മൗസിൽ ഒന്നു വിരൽ അമർത്തി​യാൽ ഒരു ഡോക്യു​മെ​ന്റോ ഇ-മെയി​ലോ നിഷ്‌പ്ര​യാ​സം പ്രിന്റു ചെയ്‌തെ​ടു​ക്കാൻ കഴിയും. അതു പിന്നീട്‌, സൗകര്യം പോലെ എവി​ടെ​വെച്ചു വേണ​മെ​ങ്കി​ലും വായി​ക്കാ​വു​ന്നതേ ഉള്ളൂ. മിക്ക കമ്പ്യൂ​ട്ട​റു​ക​ളും സൗകര്യ​പ്ര​ദ​മാ​യി വെക്കാൻ പറ്റാത്ത ഇടങ്ങളിൽ—കിടക്ക​യി​ലോ ബാത്‌ട​ബ്ബി​ലോ ബീച്ചി​ലോ എവി​ടെ​യാ​ണെ​ങ്കി​ലും ശരി—പ്രിന്റു ചെയ്‌തെ​ടുത്ത കടലാ​സു​കൾ കൊണ്ടു​പോ​കാൻ കഴിയും!

ഇനി, മറ്റൊരു ഘടകം പരിചി​ന്തി​ക്കുക. മുമ്പൊ​ക്കെ അച്ചടി​യിൽ വൈദ​ഗ്‌ധ്യം നേടി​യ​വർക്കു മാത്രം ഉണ്ടാക്കാൻ കഴിഞ്ഞി​രുന്ന തരത്തി​ലുള്ള ഡോക്യു​മെ​ന്റു​കൾ ഇപ്പോൾ കമ്പ്യൂ​ട്ട​റു​കൾ ഉപയോ​ഗി​ച്ചു നിഷ്‌പ്ര​യാ​സം തയ്യാറാ​ക്കാൻ കഴിയും. എന്തി​ന്റെ​യെ​ങ്കി​ലും മുഴു വർണ കോപ്പി​കൾ, ആദ്യപ​കർപ്പു​കൾ, റിപ്പോർട്ടു​കൾ എന്നിവ​യിൽ തുടങ്ങി സചിത്ര പ്രദർശ​നങ്ങൾ, ചാർട്ടു​കൾ, ഗ്രാഫു​കൾ, ബിസി​നസ്‌ കാർഡു​കൾ, പോസ്റ്റ്‌ കാർഡു​കൾ വരെയു​ള്ളവ വളരെ എളുപ്പ​ത്തിൽ ഉണ്ടാക്കി​യെ​ടു​ക്കാൻ കഴിയും. മാത്രമല്ല, ഇത്തരം വൈവി​ധ്യ​മാർന്ന കാര്യങ്ങൾ ചെയ്യാ​നുള്ള സൗകര്യം കമ്പ്യൂ​ട്ട​റിൽ ഉള്ളപ്പോൾ അവ ഉപയോ​ഗ​പ്പെ​ടു​ത്തി പരീക്ഷ​ണങ്ങൾ നടത്താ​നും ആളുകൾ ചായ്‌വു കാട്ടും. അങ്ങനെ, ഒരു ഡോക്യു​മെന്റ്‌ പ്രിന്റു ചെയ്‌തെ​ടു​ത്തു കഴിയു​മ്പോ​ഴാ​കും അതിന്റെ ഡി​സൈ​നും ലിപി​യു​ടെ ആകാര​വും ഒന്നു മാറ്റി​യാൽ കൊള്ളാം എന്നു തോന്നുക. ഉടനെ വേറൊ​ന്നു പ്രിന്റു ചെയ്യു​ക​യാ​യി. അതു കൈയിൽ കിട്ടു​മ്പോ​ഴാണ്‌, അതു കുറച്ചു കൂടി ഭംഗി​യാ​ക്കി​യെ​ടു​ക്കാൻ തോന്നുക. എന്തി​നേറെ പറയുന്നു, പ്രിന്റു ചെയ്‌ത കടലാ​സു​കൾ കുമി​ഞ്ഞു​കൂ​ടു​ക​യാ​യി!

ഇങ്ങനെ ഒരു അവസ്ഥാ​വി​ശേഷം ഉടലെ​ടു​ക്കു​ന്ന​തിൽ ഇന്റർനെ​റ്റും ഒരു പങ്കു വഹിച്ചി​ട്ടുണ്ട്‌. അന്തമി​ല്ലാത്ത വിവര​ങ്ങ​ളു​ടെ ലോക​ത്തി​ലേ​ക്കാണ്‌ അത്‌ ഒരുവനെ കൂട്ടി​ക്കൊ​ണ്ടു പോകുക.b ഇന്റർനെറ്റ്‌ ഉപയോ​ഗി​ക്കു​ന്നവർ തങ്ങളുടെ ഗവേഷ​ണ​ഫ​ലങ്ങൾ മിക്ക​പ്പോ​ഴും കടലാ​സിൽ പ്രിന്റു ചെയ്‌ത്‌ എടുക്കാ​റുണ്ട്‌. ഇതു തീർച്ച​യാ​യും കടലാ​സി​ന്റെ ഉപയോ​ഗം വർധി​ക്കു​ന്ന​തിന്‌ ഇടയാ​ക്കു​ന്നു.

അവഗണി​ക്കാൻ പാടി​ല്ലാത്ത മറ്റൊരു വസ്‌തുത കൂടി​യുണ്ട്‌. സമീപ കാലങ്ങ​ളിൽ കമ്പ്യൂട്ടർ സോഫ്‌റ്റു​വെ​യ​റു​ക​ളു​ടെ​യും സാമ​ഗ്രി​ക​ളു​ടെ​യും ഒരു കുത്തൊ​ഴു​ക്കു തന്നെ ഉണ്ടായി​രി​ക്കു​ക​യാണ്‌. ഇതുമൂ​ലം ഇവയുടെ പ്രവർത്ത​ന​രീ​തി​കൾ വിശദീ​ക​രി​ക്കുന്ന പുസ്‌ത​ക​ങ്ങ​ളു​ടെ ആവശ്യ​വും വർധി​ച്ചി​രി​ക്കു​ന്നു. കമ്പ്യൂ​ട്ട​റു​ക​ളു​ടെ വൻപ്ര​ചാ​രം കമ്പ്യൂട്ടർ മാന്യു​വെ​ലു​ക​ളു​ടെ​യും മാസി​ക​ക​ളു​ടെ​യും ഒരു പ്രളയ​ത്തി​നു തന്നെ ഇടയാ​ക്കി​യി​രി​ക്കു​ക​യാണ്‌.

എന്നിരു​ന്നാ​ലും, ഒരു കമ്പ്യൂട്ടർ സ്‌ക്രീ​നിൽ നിന്ന്‌—പഴയതരം സ്‌ക്രീ​നു​ക​ളാ​ണെ​ങ്കിൽ പ്രത്യേ​കി​ച്ചും—നേരിട്ടു വായി​ക്കു​ന്ന​തിന്‌ അതി​ന്റേ​തായ കുഴപ്പങ്ങൾ ഉണ്ട്‌ എന്നു സമ്മതി​ക്കേ​ണ്ടി​യി​രി​ക്കു​ന്നു. കമ്പ്യൂട്ടർ ഉപയോ​ഗി​ക്കു​ന്ന​വ​രിൽ ചിലർ കണ്ണു വേദനയെ കുറിച്ചു പരാതി പറയാ​റുണ്ട്‌. എങ്ങനെ​യാ​ണെ​ങ്കി​ലും പഴയതരം സ്‌ക്രീ​നു​ക​ളു​ടെ റെസല്യൂ​ഷൻ ഇപ്പോ​ഴു​ള്ള​തി​ലും പതിന്മ​ടങ്ങു വർധി​പ്പി​ച്ചാ​ലെ ദൃശ്യ​വി​വ​രങ്ങൾ ഏറ്റവും മികച്ച​വ​യാ​കൂ.

ഇനി ചിലർക്കാ​ണെ​ങ്കിൽ, കാര്യങ്ങൾ കടലാ​സിൽ പ്രിന്റു​ചെ​യ്‌തു ലഭിക്കു​മ്പോൾ അവയ്‌ക്കു വളരെ​യ​ധി​കം ഗൗരവ​വും പ്രാധാ​ന്യ​വും കൈവ​രു​ന്ന​താ​യി അനുഭ​വ​പ്പെ​ടു​ന്നു. മാത്രമല്ല, സ്‌ക്രീ​നിൽ നിന്നു വായി​ക്കു​ന്ന​തി​നെ​ക്കാൾ കൂടുതൽ അടിയ​ന്തി​ര​താ​ബോ​ധ​ത്തോ​ടെ അവർ കടലാ​സി​ലു​ള്ള​തി​നെ വീക്ഷി​ക്കു​ന്നു. പ്രിന്റു ചെയ്‌തെ​ടുത്ത ഒരു ഡോക്യു​മെന്റ്‌ വാസ്‌ത​വ​ത്തിൽ ഒരുവന്റെ പ്രയത്‌ന​ത്തി​നും ജോലി​ക്കും ഒരു മൂർത്ത​ഭാ​വം നൽകുന്നു. മാത്രമല്ല, ഒരുവന്റെ മേലധി​കാ​രി​ക്കോ ഇടപാ​ടു​കാ​ര​നോ ഒരു ഇല​ക്ട്രോ​ണിക്‌ സന്ദേശം അയയ്‌ക്കു​ന്ന​തി​നു പകരം അതു കടലാ​സിൽ പ്രിന്റു ചെയ്‌തു നൽകു​മ്പോൾ അദ്ദേഹം അതി​നോ​ടു വേഗത്തിൽ പ്രതി​ക​രി​ക്കാ​നും അതിനു കൂടുതൽ ശ്രദ്ധ കൊടു​ക്കാ​നും ചായ്‌വു കാട്ടി​യേ​ക്കാം.

ഇനി, കമ്പ്യൂട്ടർ ഉപയോ​ഗി​ക്കുന്ന അനേകർക്കും പൊതു​വെ ഉള്ള ഒരു ഭയം തങ്ങൾ സംഭരി​ച്ചു​വെ​ച്ചി​രി​ക്കുന്ന വിവരങ്ങൾ ഏതെങ്കി​ലും കാരണ​വ​ശാൽ നഷ്ടപ്പെ​ടു​മോ എന്നതാണ്‌. മിക്ക​പ്പോ​ഴും അത്തരം ഭയത്തിന്‌ അടിസ്ഥാ​ന​മു​ണ്ടു​താ​നും, അതിവി​ക​സി​ത​മായ അനേകം ബാക്ക്‌-അപ്പ്‌ സംവി​ധാ​ന​ങ്ങ​ളൊ​ക്കെ ഇന്നു നിലവി​ലു​ണ്ടെ​ങ്കി​ലും. വൈദ്യു​ത പ്രവാ​ഹ​ത്തി​ലെ പെട്ടെ​ന്നുള്ള ഒരു വർധന​വോ ഡിസ്‌ക്‌ തകരാ​റോ അതുമ​ല്ലെ​ങ്കിൽ കീ ബോർഡിൽ വിരൽ അമർത്തു​ന്ന​തി​നി​ട​യിൽ സംഭവിച്ച ഒരു പാകപ്പി​ഴ​യോ, ഇതിൽ ഏതെങ്കി​ലും ഒന്നു മതി അനേകം മണിക്കൂർ നേരത്തെ പരി​ശ്രമം പാഴാ​യി​പ്പോ​കാൻ. വിവരങ്ങൾ കടലാ​സിൽ എഴുതി സൂക്ഷി​ക്കു​ന്ന​താ​ണു കൂടുതൽ സുരക്ഷി​തം എന്നു മിക്കവ​രും കരുതു​ന്ന​തിൽ തെല്ലും അതിശ​യ​മില്ല. രസകര​മെന്നു പറയട്ടെ, അമ്ലം കലരാത്ത കടലാ​സിൽ എഴുതി​യി​രി​ക്കുന്ന വിവര​ങ്ങൾക്കു 200 മുതൽ 300 വരെ വർഷം ആയുസ്സു​ള്ള​പ്പോൾ കമ്പ്യൂ​ട്ട​റിൽ സൂക്ഷി​ച്ചി​രി​ക്കുന്ന വിവരങ്ങൾ താരത​മ്യേന തീരെ ചെറിയ കാലം മാത്രമേ അതുപടി വായി​ച്ചെ​ടു​ക്കാ​നാ​കൂ എന്നു ചില വിദഗ്‌ധർ അവകാ​ശ​പ്പെ​ടു​ന്നു. ഇല​ക്ട്രോ​ണിക്‌ വിവരങ്ങൾ പെട്ടെ​ന്നൊ​ന്നും നശിക്കില്ല എന്നതു സത്യമാണ്‌. എന്നാൽ ഇപ്പോൾ, നോക്കി​നിൽക്കു​ന്ന​നേരം കൊണ്ടാ​ണു സാങ്കേ​തിക വിദ്യ പുരോ​ഗ​മി​ക്കു​ന്നത്‌. താരത​മ്യേന പഴഞ്ചനായ ഹാർഡ്‌വെ​യ​റു​ക​ളും സോഫ്‌റ്റ്‌വെ​യ​റു​ക​ളും ഉപയോ​ഗ​ത്തിൽ നിന്ന്‌ അപ്രത്യ​ക്ഷ​മാ​യി കൊണ്ടി​രി​ക്കവെ, അത്തരത്തി​ലു​ള്ളവ ഉപയോ​ഗി​ച്ചു ശേഖരിച്ച വിവരങ്ങൾ വായി​ച്ചെ​ടു​ക്കുക എന്നത്‌ കൂടുതൽ കൂടുതൽ ബുദ്ധി​മു​ട്ടാ​യി​ത്തീർന്നേ​ക്കാം.

കടലാ​സി​ല്ലാ​ത്ത ഓഫീസ്‌ എന്ന സ്വപ്‌നം സാക്ഷാ​ത്‌ക​രി​ക്ക​പ്പെ​ടു​മോ എന്ന കാര്യം കാത്തി​രു​ന്നു കാണേ​ണ്ടി​യി​രി​ക്കു​ന്നു. എന്നാൽ ഒന്നു വ്യക്തമാണ്‌, മാർക്ക്‌ ട്വെയ്‌നി​ന്റെ ശൈലി​യിൽ പറഞ്ഞാൽ, കടലാ​സി​ന്റെ അന്ത്യത്തെ കുറി​ച്ചുള്ള ഇപ്പോ​ഴത്തെ റിപ്പോർട്ടു​കൾ ഒരുപക്ഷേ വേണ്ടതി​ലേറെ ഊതി​പെ​രു​പ്പി​ച്ചി​രി​ക്കു​ന്ന​വ​യാണ്‌.

വൃക്ഷങ്ങളെ മുഴുവൻ നാം വെട്ടി​മു​ടി​ക്കു​മോ?

ഒരു വൃക്ഷത്തിൽ നിന്ന്‌ എത്ര ഷീറ്റ്‌ കടലാ​സു​കൾ ഉണ്ടാക്കാൻ സാധി​ക്കും? കടലാസ്‌ ഷീറ്റു​ക​ളു​ടെ എണ്ണം പല ഘടകങ്ങളെ—വൃക്ഷത്തി​ന്റെ വലിപ്പം, തരം എന്നിവയെ മാത്രമല്ല ഉത്‌പാ​ദി​പ്പി​ക്ക​പ്പെ​ടേണ്ട കടലാ​സി​ന്റെ തരം, കനം എന്നിവ​യെ​യും—ആശ്രയി​ച്ചി​രി​ക്കു​ന്നു.എങ്കിലും സാധാ​ര​ണ​ഗ​തി​യിൽ കടലാസ്‌ ഉണ്ടാക്കാൻ ഉപയോ​ഗി​ക്കുന്ന ഒരു വൃക്ഷത്തിൽ നിന്ന്‌, എഴുതാൻ അല്ലെങ്കിൽ പ്രിന്റു ചെയ്യാൻ ഉപയോ​ഗി​ക്കുന്ന തരത്തി​ലുള്ള ഏതാണ്ട്‌ 12,000 കടലാ​സു​കൾ ഉത്‌പാ​ദി​പ്പി​ക്കാൻ കഴിയും. അങ്ങനെ​യാ​ണെ​ങ്കിൽ പോലും, കടലാ​സി​ന്റെ ഇപ്പോ​ഴുള്ള ഭീമമായ ഉപയോ​ഗം നമ്മുടെ കണ്മുമ്പിൽ കൊണ്ടു​വ​രുന്ന ഭീതി​ജ​ന​ക​മായ ഒരു ചിത്ര​മുണ്ട്‌. മുമ്പ്‌ വനമാ​യി​രുന്ന സ്ഥലങ്ങൾ, തരിശാ​യി കിടക്കു​ന്ന​തി​ന്റെ ഹൃദയ​ഭേ​ദ​ക​മായ ചിത്രം. നാം വാസ്‌ത​വ​ത്തിൽ ഒരു പാരി​സ്ഥി​തിക പ്രതി​സ​ന്ധി​യി​ലേക്കു കൂപ്പു​കു​ത്തു​ക​യാ​ണോ?

എന്നാൽ ഈ കാര്യത്തെ പ്രതി അത്ര ഉത്‌ക​ണ്‌ഠ​പ്പെ​ടേണ്ട കാര്യ​മൊ​ന്നു​മില്ല എന്നാണു കടലാസ്‌ നിർമാ​താ​ക്കൾ പറയു​ന്നത്‌. അതിനു കാരണ​മാ​യി അവർ ചൂണ്ടി​ക്കാ​ണി​ക്കുന്ന ഒരു വസ്‌തുത ഇതാണ്‌: കടലാ​സി​ന്റെ ഒരു നല്ല പങ്കും—ചില രാജ്യ​ങ്ങ​ളിൽ 50 ശതമാ​ന​ത്തോ​ളം പോലും—ഇപ്പോൾ ഉത്‌പാ​ദി​പ്പി​ക്ക​പ്പെ​ടു​ന്നത്‌ തടിയ​റ​പ്പു​മി​ല്ലു​ക​ളി​ലെ പാഴ്‌വ​സ്‌തു​ക്ക​ളായ ചെത്തു​പൂ​ളു​ക​ളിൽ നിന്നാണ്‌. കടലാസ്‌ നിർമി​ക്കാൻ ഇവ ഉപയോ​ഗി​ക്കു​ന്നി​ല്ലെ​ങ്കിൽ പിന്നെ അതു നിലം നികത്താൻ മാത്രമേ കൊള്ളു​ക​യു​ള്ളു. അതു മാത്രമല്ല, ചെത്തു​പൂ​ളു​കൾ അഴുകാൻ തുടങ്ങു​മ്പോൾ അവ മീതേൻ എന്ന വാതകം പുറന്ത​ള്ളു​ന്നു. ഒരു ഹരിത​ഗൃ​ഹ​വാ​ത​ക​മായ ഇത്‌ ആഗോ​ള​ത​പ​ന​ത്തിന്‌ ഇടയാ​ക്കി​യേ​ക്കാം. അതു​കൊണ്ട്‌ കടലാസ്‌ നിർമാ​ണം മൂലം ഈ പാഴ്‌വ​സ്‌തു ഒരു നല്ല രീതി​യിൽ ഉപയോ​ഗി​ക്ക​പ്പെ​ടു​ക​യാണ്‌. എന്നാൽ, കടലാസ്‌ വ്യവസാ​യം മലിനീ​ക​ര​ണ​ത്തി​ലും വനനശീ​ക​ര​ണ​ത്തി​ലു​മാ​ണു കലാശി​ക്കു​ന്നത്‌ എന്നു പരിസ്ഥി​തി-ഉപഭോ​ക്‌തൃ സംഘങ്ങൾ തിരി​ച്ച​ടി​ക്കു​ന്നു. അവരുടെ വാദം, കടലാസ്‌ നിർമി​ക്കാൻ ഉപയോ​ഗി​ക്കുന്ന ഇന്ധനങ്ങൾ ഹരിത​ഗൃ​ഹ​വാ​ത​കങ്ങൾ ഉത്‌പാ​ദി​പ്പി​ക്കു​ന്നു എന്നാണ്‌! അതു​പോ​ലെ, ഉപയോ​ഗ​ശൂ​ന്യ​മായ കടലാ​സു​കൾ അഴുകു​മ്പോ​ഴും കൂടുതൽ ഹരിത​ഗൃ​ഹ​വാ​ത​കങ്ങൾ പുറന്ത​ള്ള​പ്പെ​ടു​ന്നു എന്നും അവർ ചൂണ്ടി​ക്കാ​ട്ടു​ന്നു.

എന്നിരു​ന്നാ​ലും, പ്രകൃതി വിഭവങ്ങൾ കാലി​യാ​ക്കാ​തെ തന്നെ ആവശ്യ​ത്തി​നുള്ള കടലാസ്‌ ഉത്‌പാ​ദി​പ്പി​ക്കാൻ സാധി​ക്കും എന്ന നിഗമ​ന​ത്തി​ലാണ്‌ വേൾഡ്‌ ബിസി​നസ്‌ കൗൺസിൽ ഫോർ സസ്റ്റെയ്‌ന​ബിൾ ഡെവല​പ്പ്‌മെന്റ്‌ നടത്തിയ ഒരു പഠനം ചെന്നെ​ത്തി​യത്‌. അതിന്റെ ഒരു കാരണം ഇതാണ്‌. വെട്ടി​ക്ക​ള​ഞ്ഞാ​ലും വൃക്ഷങ്ങൾ വീണ്ടും നട്ടുവ​ളർത്താ​വു​ന്ന​താണ്‌, അതു​പോ​ലെ കടലാ​സാ​ണെ​ങ്കിൽ പുനരു​പ​യോ​ഗ​യോ​ഗ്യ​വു​മാണ്‌. എന്നാൽ പോലും, “കടലാസ്‌ പരിവൃ​ത്തി​യിൽ—വൃക്ഷങ്ങൾ വെട്ടി​യി​ടൽ, പൾപ്പി​ന്റെ​യും കടലാ​സി​ന്റെ​യും നിർമാ​ണം, കടലാ​സി​ന്റെ ഉപയോ​ഗം, കടലാസ്‌ പുനഃ​സം​സ്‌ക​രി​ക്കൽ, ഊർജം പുനഃ​സ്ഥാ​പി​ക്കൽ, അവസാനം ഉപയോ​ഗ​ശൂ​ന്യ​മായ കടലാസ്‌ പുറന്തള്ളൽ—ഉൾപ്പെ​ട്ടി​രി​ക്കുന്ന ഓരോ ഘട്ടത്തി​ലെ​യും വ്യാവ​സാ​യിക നടപടി​ക്ര​മ​ങ്ങൾക്കു കൂടു​ത​ലായ വ്യതി​യാ​നങ്ങൾ വരു​ത്തേ​ണ്ട​തുണ്ട്‌” എന്ന്‌ ആ പഠനം നടത്തി​യവർ ഊന്നി​പ്പ​റ​യു​ക​യു​ണ്ടാ​യി. ആദായ​ക​ര​മാ​യും പരിസ്ഥി​തിക്ക്‌ ഹാനി തട്ടാത്ത വിധത്തി​ലും പൾപ്പ്‌ ഉണ്ടാക്കു​ന്ന​തിന്‌ കടലാസ്‌ വ്യവസാ​യം ഇപ്പോൾ കൂടുതൽ മെച്ചപ്പെട്ട മാർഗങ്ങൾ തേടി​ക്കൊ​ണ്ടി​രി​ക്കു​ക​യാണ്‌. ഉദാഹ​ര​ണ​ത്തിന്‌, വളരെ വേഗം വളരുന്ന മരങ്ങൾ, ഗോത​മ്പി​ന്റെ കച്ചി, ചോളം, ചണം എന്നിവ​യിൽ നിന്നു പൾപ്പ്‌ ഉണ്ടാക്കി​യെ​ടു​ക്കാൻ അവർ ശ്രമിച്ചു കൊണ്ടി​രി​ക്കു​ന്നു. എന്നാൽ ഇത്തരം മാർഗങ്ങൾ എത്ര​ത്തോ​ളം പ്രയോ​ഗ​ത്തിൽ വരുത്തു​മെ​ന്നും അവ എത്രമാ​ത്രം ഫലപ്ര​ദ​മാ​കു​മെ​ന്നും കാത്തി​രു​ന്നു കാണേ​ണ്ടി​യി​രി​ക്കു​ന്നു.

[അടിക്കു​റി​പ്പു​കൾ]

[27-ാം പേജിലെ ചതുരം]

ഓഫീസിൽ കടലാ​സി​ന്റെ പാഴ്‌ചെ​ലവു കുറയ്‌ക്കാൻ കഴിയുന്ന വിധം

✔ പ്രിന്റു ചെയ്യുന്ന കടലാ​സു​ക​ളു​ടെ എണ്ണം എത്രയും കുറയ്‌ക്കാ​മോ അത്രയും കുറയ്‌ക്കുക. ഡോക്യു​മെ​ന്റു​കൾ സ്‌ക്രീ​നിൽ തന്നെ വായിച്ചു തിരു​ത്ത​ലു​കൾ വരുത്താൻ ശ്രമി​ക്കുക. അങ്ങനെ​യാ​കു​മ്പോൾ പ്രിന്റു ചെയ്‌ത്‌ എടുക്കുന്ന കടലാ​സു​ക​ളു​ടെ​യും ആദ്യപ​കർപ്പു​ക​ളു​ടെ​യും എണ്ണം പരമാ​വധി കുറയ്‌ക്കാൻ കഴിയും.

✔ വലിയ ഡോക്യു​മെ​ന്റു​കൾ ആണെങ്കിൽ, വായന​യ്‌ക്ക്‌ തടസ്സം സൃഷ്ടി​ക്കാത്ത വിധം, ലിപി​ക​ളു​ടെ വലിപ്പം കുറയ്‌ക്കുക.

✔ ഓൺ ചെയ്യു​മ്പോ​ഴോ എന്തെങ്കി​ലും പ്രിന്റു ചെയ്യാൻ ആരംഭി​ക്കു​മ്പോ​ഴോ നിങ്ങളു​ടെ പ്രിന്റർ ഒരു ബാനർ പേജോ പരീക്ഷ​ണാ​ടി​സ്ഥാ​ന​ത്തിൽ ഒരു പേജോ പ്രിന്റ്‌ ചെയ്യു​ന്നു​ണ്ടെ​ങ്കിൽ, ഈ സംവി​ധാ​നം പ്രവർത്ത​ന​ക്ഷ​മ​മ​ല്ലാ​താ​ക്കി തീർക്കുക.

✔ ഉപയോ​ഗം കഴിഞ്ഞ കടലാസ്‌ പുനഃ​സം​സ്‌ക​രി​ക്കാൻ ശ്രദ്ധി​ക്കുക.

✔ ഒരു വശം മാത്രം പ്രിന്റു ചെയ്‌ത കടലാ​സു​കൾ പുനഃ​സം​സ്‌ക​രി​ക്കു​ന്ന​തി​നു മുമ്പ്‌, അവ പിന്നീട്‌ ആദ്യപ​കർപ്പു​കൾ പ്രിന്റു ചെയ്യാ​നും അതുമി​തും ഒക്കെ കുത്തി​ക്കു​റി​ക്കാ​നും ഉപയോ​ഗ​പ്പെ​ടു​ത്തുക.

✔ സാധ്യ​മാ​കു​മ്പോൾ എല്ലാം, കടലാ​സി​ന്റെ ഇരുപു​റ​വും പ്രിന്റു ചെയ്യാൻ ശ്രമി​ക്കുക.

✔ ഡോക്യു​മെ​ന്റു​കൾ പ്രിന്റു ചെയ്യു​മ്പോൾ, ഓഫീ​സി​ലുള്ള ഓരോ​രു​ത്തർക്കും ഓരോ പ്രതി വീതം ഉണ്ടാക്കു​ന്ന​തി​നു പകരം അവ കൈമാ​റാൻ ശ്രമി​ക്കുക.

✔ ഫാക്‌സ്‌ സന്ദേശങ്ങൾ അയയ്‌ക്കു​മ്പോൾ അവ കടലാ​സിൽ പ്രിന്റു ചെയ്യാതെ നേരിട്ട്‌ കമ്പ്യൂ​ട്ട​റി​ലേക്ക്‌ അയയ്‌ക്കാൻ ശ്രമി​ക്കുക. എന്നാൽ കടലാ​സിൽ ഫാക്‌സ്‌ ചെയ്യേണ്ടി വരു​മ്പോൾ, കടലാസ്‌ ലാഭി​ക്കു​ന്ന​തി​നു വേണ്ടി കവർ ഷീറ്റ്‌ ഉപയോ​ഗി​ക്കാ​തി​രി​ക്കുക.

✔ ഇ-മെയിൽ സന്ദേശങ്ങൾ അനാവ​ശ്യ​മാ​യി പ്രിന്റു ചെയ്യു​ന്നത്‌ ഒഴിവാ​ക്കുക.

[24-ാം പേജിലെ ചിത്രം]

കടലാസില്ലാത്ത ഓഫീസ്‌ എന്ന സ്വപ്‌നം സാക്ഷാ​ത്‌ക​രി​ക്കാൻ സഹായ​ക​മാ​കു​മെന്നു കരുതിയ അതേ യന്ത്രമാണ്‌ ഇപ്പോൾ കടലാസ്‌ കൂമ്പാ​ര​ത്തിൽ നമ്മെ പൂഴ്‌ത്തി​ക്ക​ള​ഞ്ഞി​രി​ക്കു​ന്നത്‌ എന്നു ചിലർ വാദി​ക്കു​ന്നു

[26-ാം പേജിലെ ചിത്രം]

ചിലപ്പോഴൊക്കെ, കമ്പ്യൂട്ടർ സ്‌ക്രീ​നിൽ നിന്നു നേരിട്ടു വായി​ക്കു​ന്ന​തി​നെ​ക്കാൾ എളുപ്പം പ്രിന്റു ചെയ്‌ത ഒരു കടലാ​സിൽ നിന്നു വായി​ക്കു​ന്ന​താണ്‌