തട്ടി​ക്കൊ​ണ്ടു​പോ​കൽ—അടിസ്ഥാന കാരണങ്ങൾ

തട്ടി​ക്കൊ​ണ്ടു​പോ​കൽ ഒരു ആധുനി​ക​കാല മഹാവ്യാ​ധി​യാ​യി മാറി​യി​രി​ക്കു​ന്നു. പക്ഷേ, അതു​പോ​ലെ തന്നെയാണ്‌ കൊല​പാ​തകം, ബലാത്സം​ഗം, മോഷണം, കുട്ടി​ക​ളോ​ടുള്ള ലൈം​ഗിക ദുഷ്‌പെ​രു​മാ​റ്റം എന്തിന്‌, വംശഹത്യ പോലും. രാത്രി​കാ​ല​ങ്ങ​ളിൽ വീടിനു വെളി​യി​ലി​റ​ങ്ങാൻ ആളുകൾ മിക്ക​പ്പോ​ഴും ഭയപ്പെ​ടുന്ന തരത്തിൽ ജീവിതം ഇത്ര അപകടം നിറഞ്ഞ​താ​യി തീർന്നി​രി​ക്കു​ന്നത്‌ എന്തു​കൊ​ണ്ടാണ്‌?

തട്ടി​ക്കൊ​ണ്ടു​പോ​ക​ലു​കൾ ഉൾപ്പെ​ടെ​യുള്ള കുറ്റകൃ​ത്യ​ങ്ങൾ ഒരു പകർച്ച​വ്യാ​ധി​പോ​ലെ പടർന്നു​പി​ടി​ക്കു​ന്ന​തി​ന്റെ അടിസ്ഥാന കാരണങ്ങൾ, മനുഷ്യ സമൂഹ​ത്തി​ലെ തന്നെ ആഴത്തിൽ വേരൂ​ന്നി​യി​ട്ടുള്ള ന്യൂന​ത​ക​ളു​മാ​യി ബന്ധപ്പെ​ട്ടു​കി​ട​ക്കു​ന്നു. ഏകദേശം 2,000 വർഷം മുമ്പ്‌ ബൈബിൾ ഈ അപകട​ക​ര​മായ കാലത്തെ കുറിച്ചു മുൻകൂ​ട്ടി പറഞ്ഞി​ട്ടു​ണ്ടാ​യി​രു​ന്നു എന്ന കാര്യം നിങ്ങൾക്ക്‌ അറിയാ​മാ​യി​രു​ന്നോ? ദയവായി, 2 തിമൊ​ഥെ​യൊസ്‌ 3:2-5 വരെയുള്ള വാക്യ​ങ്ങ​ളിൽ പറഞ്ഞി​രി​ക്കുന്ന കാര്യങ്ങൾ പരിചി​ന്തി​ക്കുക.

“മനുഷ്യർ സ്വസ്‌നേ​ഹി​ക​ളും ദ്രവ്യാ​ഗ്ര​ഹി​ക​ളും വമ്പു പറയു​ന്ന​വ​രും അഹങ്കാ​രി​ക​ളും ദൂഷക​ന്മാ​രും അമ്മയപ്പ​ന്മാ​രെ അനുസ​രി​ക്കാ​ത്ത​വ​രും നന്ദി​കെ​ട്ട​വ​രും അശുദ്ധ​രും വാത്സല്യ​മി​ല്ലാ​ത്ത​വ​രും ഇണങ്ങാ​ത്ത​വ​രും ഏഷണി​ക്കാ​രും അജി​തേ​ന്ദ്രി​യ​ന്മാ​രും ഉഗ്രന്മാ​രും സൽഗു​ണ​ദ്വേ​ഷി​ക​ളും ദ്രോ​ഹി​ക​ളും ധാർഷ്ട്യ​ക്കാ​രും നിഗളി​ക​ളു​മാ​യി ദൈവ​പ്രി​യ​മി​ല്ലാ​തെ ഭോഗ​പ്രി​യ​രാ​യി ഭക്തിയു​ടെ വേഷം ധരിച്ചു അതിന്റെ ശക്തി ത്യജി​ക്കു​ന്ന​വ​രു​മാ​യി​രി​ക്കും.”

ദീർഘ​നാ​ളു​കൾക്കു മുമ്പു രേഖ​പ്പെ​ടു​ത്തിയ ഈ വാക്കുകൾ, ഇന്നത്തെ സാഹച​ര്യം വളരെ വ്യക്തമാ​യി വരച്ചു​കാ​ട്ടു​ന്നു എന്നതി​നോ​ടു നിങ്ങൾ യോജി​ച്ചേ​ക്കാം. മനുഷ്യ​സ​മൂ​ഹ​ത്തി​ന്റെ ന്യൂന​ത​ക​ളാ​കുന്ന വ്രണങ്ങൾ നമ്മുടെ ഈ നാളു​ക​ളിൽ എന്നത്തെ​ക്കാ​ളു​മ​ധി​കം പഴുത്ത്‌ വികൃ​ത​മായ ഒരു അവസ്ഥയി​ലാ​യി​രി​ക്കു​ന്നു. ശ്രദ്ധാർഹ​മാ​യി, മനുഷ്യ​ന്റെ അപലപ​നീയ പെരു​മാ​റ്റ​ങ്ങളെ കുറി​ച്ചുള്ള, മുകളിൽ കൊടു​ത്തി​രി​ക്കുന്ന ബൈബിൾ വർണന ആരംഭി​ക്കു​ന്നത്‌ ഈ വാക്കു​ക​ളോ​ടെ​യാണ്‌: “അന്ത്യകാ​ലത്തു ദുർഘ​ട​സ​മ​യങ്ങൾ വരും എന്നറിക.” (ചെരി​ച്ചെ​ഴു​തി​യി​രി​ക്കു​ന്നത്‌ ഞങ്ങൾ.) (2 തിമൊ​ഥെ​യൊസ്‌ 3:1) തട്ടി​ക്കൊ​ണ്ടു​പോ​ക​ലു​കൾ ഇത്രയ​ധി​കം പെരു​കാൻ ഇടയാ​ക്കിയ, സമൂഹ​ത്തി​ന്റെ മുഖ്യ ന്യൂന​ത​ക​ളിൽ മൂന്നെണ്ണം മാത്രം നമുക്കു പരിചി​ന്തി​ക്കാം.

നിയമം നടപ്പാ​ക്കു​ന്ന​തി​ലെ പ്രശ്‌ന​ങ്ങൾ

“ദുഷ്‌പ്ര​വൃ​ത്തി​ക്കുള്ള ശിക്ഷാ​വി​ധി തൽക്ഷണം നടക്കാ​യ്‌ക​കൊ​ണ്ടു മനുഷ്യർ ദോഷം ചെയ്‌വാൻ ധൈര്യ​പ്പെ​ടു​ന്നു.”—സഭാ​പ്ര​സം​ഗി 8:11.

കുറ്റകൃ​ത്യ​ങ്ങ​ളു​ടെ വ്യാപ​നത്തെ കൈകാ​ര്യം ചെയ്യു​ന്ന​തി​നുള്ള വിഭവ​ശേഷി മിക്ക പൊലീസ്‌ സേനകൾക്കും ഇല്ല. അതു​കൊ​ണ്ടു​തന്നെ, അനേകം രാജ്യ​ങ്ങ​ളിൽ തട്ടി​ക്കൊ​ണ്ടു​പോ​കൽ ഇഷ്ടം പോലെ പണം സമ്പാദി​ക്കാൻ കഴിയുന്ന ഒരു പരിപാ​ടി​യാ​യി മാറി​യി​രി​ക്കു​ന്നു. കൊളം​ബി​യ​യി​ലെ കാര്യ​മെ​ടു​ക്കുക. 1996-ൽ ആ രാജ്യത്ത്‌ തട്ടി​ക്കൊ​ണ്ടു​പോ​ക​ലു​കൾ നടത്തി​യ​വ​രിൽ വെറും രണ്ടു ശതമാ​ന​ത്തി​നെ​തി​രാ​യി മാത്ര​മാണ്‌ നിയമ​ന​ട​പ​ടി​കൾ കൈ​ക്കൊ​ണ്ടത്‌. 1997-ൽ മെക്‌സി​ക്കോ​യിൽ, ചുരു​ങ്ങി​യത്‌ 840 കോടി രൂപ​യെ​ങ്കി​ലും മോച​ന​മൂ​ല്യ​മാ​യി നൽക​പ്പെ​ട്ടി​ട്ടുണ്ട്‌. ഫിലി​പ്പീൻസി​ലാ​ണെ​ങ്കിൽ, ചില തട്ടി​ക്കൊ​ണ്ടു​പോ​ക്കു​കാർ ചെക്കായി പോലും മോച​ന​മൂ​ല്യം സ്വീക​രി​ച്ചി​രി​ക്കു​ന്നു.

ഇതിനു പുറമേ, വേലി തന്നെ വിളവു തിന്നു​ന്നത്‌ അതായത്‌, നിയമം നടപ്പി​ലാ​ക്കാൻ ബാധ്യ​സ്ഥ​രാ​യവർ തന്നെ അഴിമതി കാണി​ക്കു​ന്നത്‌, കുറ്റകൃ​ത്യ​ങ്ങൾക്ക്‌ എതി​രെ​യുള്ള പോരാ​ട്ട​ത്തി​നു ചില​പ്പോ​ഴൊ​ക്കെ വിലങ്ങു​ത​ടി​യാ​യി​ത്തീ​രു​ന്നു. മെക്‌സി​ക്കോ, കൊളം​ബിയ, മുൻ സോവി​യറ്റ്‌ റിപ്പബ്ലി​ക്കു​കൾ എന്നിവി​ട​ങ്ങ​ളിൽ തട്ടി​ക്കൊ​ണ്ടു​പോ​ക​ലിന്‌ എതിരെ പ്രവർത്തി​ക്കു​ന്ന​തിൽ പ്രസിദ്ധി നേടി​യി​രി​ക്കുന്ന സംഘങ്ങ​ളു​ടെ തലവന്മാർ തന്നെ അതു ചെയ്യു​ന്ന​താ​യി ആരോ​പ​ണ​മുണ്ട്‌. ഫിലി​പ്പീൻസിൽ നടക്കുന്ന തട്ടി​ക്കൊ​ണ്ടു​പോ​ക​ലു​ക​ളു​ടെ 52 ശതമാ​ന​ത്തി​ലും ഉദ്യോ​ഗ​ത്തി​ലി​രി​ക്കു​ന്ന​വ​രോ വിരമി​ച്ച​വ​രോ ആയ പൊലീസ്‌ ഉദ്യോ​ഗ​സ്ഥ​ന്മാർ അല്ലെങ്കിൽ പട്ടാള​ക്കാർ ഉൾപ്പെ​ട്ടി​രി​ക്കു​ന്ന​താ​യി ഔദ്യോ​ഗിക കണക്കുകൾ കാണി​ക്കു​ന്നു​വെന്ന്‌ ഫിലി​പ്പീൻ സെനറ്റി​ന്റെ പ്രസി​ഡ​ന്റായ ബ്ലാസ്‌ ഓപ്ലെ പറഞ്ഞതാ​യി ഏഷ്യാ​വീക്ക്‌ എന്ന മാസിക റിപ്പോർട്ടു ചെയ്യുന്നു. മെക്‌സി​ക്കോ​യി​ലെ ഒരു കുപ്ര​സിദ്ധ തട്ടി​ക്കൊ​ണ്ടു​പോ​ക്കു​കാ​രന്‌, “മുൻസി​പ്പൽ, സംസ്ഥാന, കേന്ദ്ര പൊലീസ്‌ ഉദ്യോ​ഗ​സ്ഥർക്കും പ്രോ​സി​ക്യൂ​ട്ടർമാർക്കും നൽകുന്ന കൈക്കൂ​ലി​യാ​കുന്ന സിമന്റ്‌ കൊണ്ട്‌ ഉറപ്പിച്ച, ഔദ്യോ​ഗിക സംരക്ഷ​ണ​മാ​കുന്ന മതിൽ” അഭയം നൽകി​യി​രു​ന്ന​താ​യി പറയ​പ്പെ​ടു​ന്നു.

ദാരി​ദ്ര്യ​വും സാമൂ​ഹിക അനീതി​യും

“പിന്നെ​യും ഞാൻ സൂര്യന്നു കീഴെ നടക്കുന്ന പീഡന​ങ്ങ​ളെ​യെ​ല്ലാം കണ്ടു; പീഡി​ത​ന്മാർ കണ്ണുനീ​രൊ​ഴു​ക്കു​ന്നു; അവർക്കു ആശ്വാ​സ​പ്രദൻ ഇല്ല; അവരെ പീഡി​പ്പി​ക്കു​ന്ന​വ​രു​ടെ കയ്യാൽ അവർ ബലാല്‌ക്കാ​രം അനുഭ​വി​ക്കു​ന്നു; എന്നിട്ടും ആശ്വാ​സ​പ്രദൻ അവർക്കില്ല.”—സഭാ​പ്ര​സം​ഗി 4:1.

ഇന്ന്‌ അനേക​രും സാമ്പത്തി​ക​വും സാമൂ​ഹി​ക​വു​മാ​യി വളരെ ദയനീ​യ​മായ ഒരു ചുറ്റു​പാ​ടി​ലാ​ണു കഴിയു​ന്നത്‌. മിക്ക​പ്പോ​ഴും, ഇങ്ങനെ​യു​ള്ള​വ​രാണ്‌ തട്ടി​ക്കൊ​ണ്ടു​പോ​ക​ലു​കൾ നടത്താ​റു​ള്ള​തും. ഇന്നത്തെ ലോക​ത്തിൽ പണക്കാ​രും പാവ​പ്പെ​ട്ട​വ​രും തമ്മിലുള്ള വിടവ്‌ വർധി​ച്ചു​കൊ​ണ്ടേ​യി​രി​ക്കു​ന്ന​തിനാ​ലും സത്യസ​ന്ധ​മായ മാർഗ​ത്തി​ലൂ​ടെ പണം സമ്പാദി​ക്കു​ന്നതു പ്രയാ​സ​മാ​യി​രി​ക്കു​ന്ന​തി​നാ​ലും തട്ടി​ക്കൊ​ണ്ടു​പോ​കൽ ഒരു പ്രലോ​ഭ​ന​മാ​യി തുടരുക തന്നെ ചെയ്യും. അടിച്ച​മർത്തൽ ഉള്ളിട​ത്തോ​ളം കാലം, തങ്ങളുടെ ദുസ്സഹ​മായ ചുറ്റു​പാ​ടി​ലേക്കു ശ്രദ്ധ ക്ഷണിക്കാ​നും അതി​നോ​ടു പകരം വീട്ടാ​നു​മുള്ള ഒരു ഉപാധി​യാ​യി അവർ തട്ടി​ക്കൊ​ണ്ടു​പോ​ക​ലു​കൾ നടത്തും.

അത്യാർത്തി​യും സ്‌നേ​ഹ​മി​ല്ലാ​യ്‌മ​യും

“ദ്രവ്യാ​ഗ്രഹം സകലവിധ ദോഷ​ത്തി​ന്നും മൂലമ​ല്ലോ.” (1 തിമൊ​ഥെ​യൊസ്‌ 6:10) “അധർമ്മം പെരു​കു​ന്ന​തു​കൊ​ണ്ടു അനേക​രു​ടെ സ്‌നേഹം തണുത്തു​പോ​കും.”—മത്തായി 24:12.

ചരി​ത്ര​ത്തി​ലു​ട​നീ​ളം, പണസ്‌നേഹം ആളുക​ളെ​ക്കൊണ്ട്‌ അതിനീ​ച​മായ പ്രവൃ​ത്തി​കൾ ചെയ്യി​ച്ചി​ട്ടുണ്ട്‌. മനുഷ്യ​ന്റെ ഹൃദയ​വേ​ദ​ന​യും ദുഃഖ​വും നിരാ​ശ​യും മുത​ലെ​ടു​ത്തു പണമു​ണ്ടാ​ക്കുന്ന കാര്യ​ത്തിൽ മറ്റേ​തെ​ങ്കി​ലും കുറ്റകൃ​ത്യം തട്ടി​ക്കൊ​ണ്ടു​പോ​ക​ലി​ന്റെ ഒപ്പമെ​ത്തു​മോ​യെന്നു സംശയ​മാണ്‌. മുൻപ​രി​ച​യ​മി​ല്ലാത്ത ഒരു വ്യക്തി​യോ​ടു മൃഗീ​യ​മാ​യി പെരു​മാ​റാ​നും അയാളെ ക്രൂര​മാ​യി പീഡി​പ്പി​ക്കാ​നും അയാളു​ടെ കുടും​ബത്തെ ആഴ്‌ച​ക​ളോ​ള​മോ മാസങ്ങ​ളോ​ള​മോ ചില​പ്പോൾ വർഷങ്ങ​ളോ​ളം പോലു​മോ നീണ്ടു​നിൽക്കുന്ന ഒരു അഗ്നിപ​രീ​ക്ഷ​യി​ലൂ​ടെ വലിച്ചി​ഴ​യ്‌ക്കാ​നും അനേക​രെ​യും പ്രേരി​പ്പി​ക്കു​ന്നത്‌ അത്യാർത്തി അഥവാ പണസ്‌നേ​ഹ​മാണ്‌.

മാനു​ഷി​ക മൂല്യ​ങ്ങ​ളെ​യൊ​ക്കെ കാറ്റിൽ പറത്തുന്ന, പണത്തിന്റെ ഭാഷ മാത്രം മനസ്സി​ലാ​കുന്ന ഒരു സമൂഹ​ത്തിന്‌ എന്തോ കാര്യ​മായ തകരാ​റുണ്ട്‌ എന്നതു വ്യക്തം. ഇത്തര​മൊ​രു സമൂഹം, എല്ലാത്തരം കുറ്റകൃ​ത്യ​ങ്ങൾക്കും—തട്ടി​ക്കൊ​ണ്ടു​പോ​കൽ ഉൾപ്പെടെ—പറ്റിയ ഒരു വിളനി​ല​മാ​യി വർത്തി​ക്കും എന്നതും തർക്കമറ്റ സംഗതി​യാണ്‌.

അതി​ന്റെ​യർഥം, “അന്ത്യനാ​ളു​കൾ” എന്നു ബൈബിൾ വിളി​ക്കുന്ന ഒരു കാലത്താ​ണു നാം ജീവി​ക്കു​ന്നത്‌ എന്നാണോ? അങ്ങനെ​യാ​ണെ​ങ്കിൽ, അത്‌ ഈ ഭൂമി​ക്കും നമുക്കും എന്തർഥ​മാ​ക്കും? തട്ടി​ക്കൊ​ണ്ടു​പോ​ക​ലു​കൾ ഉൾപ്പെടെ മനുഷ്യ​വർഗം ഇന്ന്‌ അഭിമു​ഖീ​ക​രി​ക്കുന്ന ഭയാന​ക​മായ പ്രശ്‌ന​ങ്ങൾക്ക്‌ ഒരു പരിഹാ​ര​മു​ണ്ടോ?

[8-ാം പേജിലെ ചതുരം/ചിത്രം]

പുത്തരിയല്ല

പൊ.യു.മു. 15-ാം നൂറ്റാ​ണ്ടിൽ തന്നെ, മോ​ശൈക ന്യായ​പ്ര​മാ​ണ​ത്തിൽ തട്ടി​ക്കൊ​ണ്ടു​പോ​ക്കു​കാർക്കു വധശിക്ഷ കൽപ്പി​ച്ചി​രു​ന്നു. (ആവർത്ത​ന​പു​സ്‌തകം 24:7) പൊ.യു.മു. ഒന്നാം നൂറ്റാ​ണ്ടിൽ ജൂലി​യസ്‌ സീസറെ മോച​ന​മൂ​ല്യ​ത്തി​നു വേണ്ടി തട്ടി​ക്കൊ​ണ്ടു​പോ​കു​ക​യു​ണ്ടാ​യി. അതു​പോ​ലെ, പൊ.യു. 12-ാം നൂറ്റാ​ണ്ടിൽ ഇംഗ്ലണ്ടി​ലെ രാജാ​വാ​യി​രുന്ന റിച്ചാർഡ്‌ ഒന്നാമ​നും—സിംഹ​ഹൃ​ദയൻ എന്നർഥം വരുന്ന ലയൺഹാർട്ടഡ്‌ എന്നും അദ്ദേഹ​ത്തി​നു പേരുണ്ട്‌—ബന്ദിയാ​ക്ക​പ്പെട്ടു. മോച​ന​മൂ​ല്യം നൽകിയ കാര്യ​ത്തിൽ ഇങ്കകളെ കടത്തി​വെ​ട്ടാൻ ഇതുവരെ ആരുമു​ണ്ടാ​യി​ട്ടില്ല. 1533-ൽ, ബന്ദിയാ​ക്ക​പ്പെട്ട അറ്റാഹു​വാൽപ എന്ന തങ്ങളുടെ തലവനെ വിട്ടു​കി​ട്ടു​ന്ന​തിന്‌ ഫ്രാൻസി​സ്‌കോ പിസാ​റൊ എന്ന സ്‌പാ​നീഷ്‌ ജേതാ​വിന്‌ 24 ടൺ സ്വർണ​വും വെള്ളി​യു​മാണ്‌ അവർ നൽകി​യത്‌. എന്നിട്ടും, സ്‌പാ​നീഷ്‌ ജേതാക്കൾ അദ്ദേഹത്തെ കഴുത്തു​ഞെ​രി​ച്ചു കൊന്നു.

[9-ാം പേജിലെ ചിത്രം]

പൊലീസ്‌ ജാഗ്രത പുലർത്തി​യി​ട്ടും തട്ടി​ക്കൊ​ണ്ടു​പോ​ക​ലു​കൾ വ്യാപ​ക​മാണ്‌