തട്ടി​ക്കൊ​ണ്ടു​പോ​കൽ—പരിഹാ​ര​മു​ണ്ടോ?

“തട്ടി​ക്കൊ​ണ്ടു​പോ​ക​ലു​കൾ കൊണ്ട്‌ രാഷ്‌ട്രം പൊറു​തി​മു​ട്ടി​യി​രി​ക്കു​ന്നു. മേലാൽ അത്‌ അനുവ​ദി​ച്ചു​കൊ​ടു​ക്കാ​നാ​വില്ല. ഈ തിന്മയ്‌ക്കെ​തി​രെ സമൂഹം ഒന്നടങ്കം പടവാ​ളേ​ന്തേ​ണ്ട​തുണ്ട്‌.” തട്ടി​ക്കൊ​ണ്ടു​പോ​ക​ലു​കൾ വ്യാപ​ക​മാ​യി​രി​ക്കുന്ന റഷ്യയി​ലെ ഒരു റിപ്പബ്ലി​ക്കായ ചെച്‌നി​യ​യിൽ നിന്ന്‌ അതു നിർമാർജനം ചെയ്യാ​മെന്നു വാഗ്‌ദാ​നം ചെയ്യവെ അവിടത്തെ പ്രധാ​ന​മ​ന്ത്രി പറഞ്ഞതാ​ണിത്‌.

തട്ടി​ക്കൊ​ണ്ടു​പോ​ക​ലു​കൾ നിർമാർജനം ചെയ്യു​മെ​ന്നോ? ലക്ഷ്യം നല്ലതു​തന്നെ. പക്ഷേ ചോദ്യ​മി​താണ്‌. എങ്ങനെ?

അതിനു​വേണ്ടി നടത്തി​വ​രുന്ന ശ്രമങ്ങൾ

കൊളം​ബി​യ​യിൽ, തട്ടി​ക്കൊ​ണ്ടു​പോ​കൽ എന്ന പ്രശ്‌നം കൈകാ​ര്യം ചെയ്യു​ന്ന​തി​നു വേണ്ടി മാത്രം അധികൃ​തർ 2,000 രഹസ്യ ഏജന്റു​മാ​രെ​യും 24 പബ്ലിക്‌ പ്രോ​സി​ക്യൂ​ട്ടർമാ​രെ​യും എന്തിന്‌, തട്ടി​ക്കൊ​ണ്ടു​പോ​കൽ വിരുദ്ധ പ്രവർത്ത​ന​ങ്ങൾക്കാ​യി ഒരു പ്രത്യേക കോ-ഓർഡി​നേ​റ്ററെ പോലും നിയമി​ച്ചി​രി​ക്കു​ന്നു. തട്ടി​ക്കൊ​ണ്ടു​പോ​ക​ലു​കൾ ധാരാ​ള​മാ​യി നടക്കുന്ന ബ്രസീ​ലി​ലെ റിയോ ഡി ജനീ​റോ​യിൽ അവയ്‌ക്കെ​തി​രെ ഒരു പൊതു​ജ​ന​മാർച്ച്‌ സംഘടി​പ്പി​ച്ച​പ്പോൾ പങ്കെടു​ത്തത്‌ ഏകദേശം 1,00,000 പേരാണ്‌. ഇനി, തട്ടി​ക്കൊ​ണ്ടു​പോ​ക്കു​കാ​രു​ടെ ബന്ധുക്കളെ തന്നെ തട്ടി​യെ​ടു​ത്തു​കൊണ്ട്‌ ബ്രസീ​ലി​ലെ​യും കൊളം​ബി​യ​യി​ലെ​യും അർധ​സൈ​നിക സംഘങ്ങൾ തിരി​ച്ച​ടി​ച്ചി​ട്ടുണ്ട്‌. ചില ഫിലി​പ്പീൻസു​കാ​രാ​ണെ​ങ്കിൽ, നീതി നടപ്പാ​ക്കു​ന്ന​തി​നു സ്വന്തമായ മാർഗങ്ങൾ അവലം​ബി​ച്ചി​രി​ക്കു​ന്നു. നിയമ​പ​ര​മായ കോടതി നടപടി കൂടാതെ, അവർ തട്ടി​ക്കൊ​ണ്ടു​പോ​കു​ന്ന​വരെ സ്വന്തം​നി​ല​യിൽ വധശി​ക്ഷ​യ്‌ക്കു വിധേ​യ​രാ​ക്കി​യി​ട്ടുണ്ട്‌!

തട്ടി​ക്കൊ​ണ്ടു​പോ​കു​ന്ന​വർക്കു വധശിക്ഷ നൽകാൻ ഗ്വാട്ടി​മാ​ല​യി​ലെ അധികൃ​തർ തീരു​മാ​ന​മെ​ടു​ത്തി​രി​ക്കു​ന്നു. ഈ കുറ്റകൃ​ത്യ​ത്തിന്‌ ഒരു അവസാനം കാണുക എന്ന ലക്ഷ്യത്തിൽ അവിടത്തെ പ്രസി​ഡന്റ്‌ സൈന്യ​ത്തെ പോലും ഉപയോ​ഗി​ക്കു​ക​യു​ണ്ടാ​യി. ഇറ്റലി​യിൽ, തട്ടി​ക്കൊ​ണ്ടു​പോ​ക​ലു​കൾ തടയു​ന്ന​തി​നു ഗവൺമെന്റ്‌ ശക്തമായ നടപടി​ക​ളാ​ണു സ്വീക​രി​ച്ചി​രി​ക്കു​ന്നത്‌. മോച​ന​മൂ​ല്യം കൊടു​ക്കു​ന്നതു നിയമ​വി​രു​ദ്ധ​മാ​ക്കുക, അതു നൽകു​ന്നതു തടയാ​നാ​യി ആളുക​ളു​ടെ പണവും വസ്‌തു​വ​ക​ക​ളു​മെ​ല്ലാം പിടി​ച്ചു​വെ​ക്കുക പോലു​ള്ളവ. ഈ നടപടി​കൾ, തട്ടി​ക്കൊ​ണ്ടു​പോ​ക​ലു​കൾ കുറയാൻ ഇടയാ​ക്കി​യി​ട്ടു​ണ്ടെന്ന്‌ ഇറ്റാലി​യൻ അധികൃ​തർ വീമ്പി​ള​ക്കു​ന്നു. വിമർശകർ പക്ഷേ പറയു​ന്നതു മറ്റൊ​ന്നാണ്‌. അത്തരം നടപടി​കൾ, തട്ടി​ക്കൊ​ണ്ടു​പോ​ക​ലു​കൾ രഹസ്യ​ത്തിൽ ഒത്തുതീർപ്പാ​ക്കാൻ കുടും​ബ​ങ്ങളെ പ്രേരി​പ്പി​ക്കു​ന്നു​വെ​ന്നും അതു​കൊ​ണ്ടാണ്‌ ഔദ്യോ​ഗി​ക​ക​ണ​ക്കു​ക​ളിൽ അതിന്റെ നിരക്കു കുറഞ്ഞ​താ​യി കാണ​പ്പെ​ടു​ന്നത്‌ എന്നും അവർ അഭി​പ്രാ​യ​പ്പെ​ടു​ന്നു. 1980-കൾ മുതൽ ഇറ്റലി​യിൽ തട്ടി​ക്കൊ​ണ്ടു​പോ​ക​ലു​കൾ വാസ്‌ത​വ​ത്തിൽ ഇരട്ടി​ക്കു​ക​യാണ്‌ ഉണ്ടായ​തെന്നു സ്വകാര്യ സുരക്ഷാ ഉപദേ​ഷ്ടാ​ക്കൾ കണക്കാ​ക്കു​ന്നു.

നിർദേ​ശങ്ങൾ അനവധി—പരിഹാ​രങ്ങൾ ചുരുക്കം

കുടും​ബ​ത്തി​ലൊ​രാൾ ബന്ദിയാ​ക്ക​പ്പെ​ടു​മ്പോൾ ശേഷമു​ള്ള​വ​രു​ടെ മനസ്സിൽ സാധാ​ര​ണ​ഗ​തി​യിൽ ഓടി​യെ​ത്തുന്ന ഒരേ​യൊ​രു പരിഹാര മാർഗം ഇതാണ്‌—മോച​ന​മൂ​ല്യം കൊടുത്ത്‌ കഴിയു​ന്ന​തും നേരത്തെ തങ്ങളുടെ പ്രിയ​പ്പെ​ട്ട​യാ​ളെ മോചി​പ്പി​ക്കുക. എന്നാൽ, ഭാരിച്ച മോച​ന​മൂ​ല്യം ഉടനടി നൽകുന്ന ഒരു കുടും​ബം, തട്ടി​ക്കൊ​ണ്ടു​പോ​കു​ന്ന​വരെ സംബന്ധി​ച്ചി​ട​ത്തോ​ളം അനായാ​സം കുടു​ക്കാൻ കഴിയുന്ന ഒരു ഇരയാ​ണെ​ന്നും അതു​കൊണ്ട്‌, അവർ രണ്ടാമ​തും വന്നേക്കാം എന്നും വിദഗ്‌ധർ മുന്നറി​യി​പ്പു നൽകുന്നു. അല്ലെങ്കിൽ, ബന്ദിയെ വിട്ടു​കൊ​ടു​ക്കു​ന്ന​തി​നു മുമ്പ്‌ അവർ വീണ്ടും മോച​ന​മൂ​ല്യം ആവശ്യ​പ്പെ​ട്ടേ​ക്കാം.

കനത്ത മോച​ന​മൂ​ല്യം നൽകി​യ​തി​നു​ശേഷം ചില കുടും​ബ​ങ്ങൾക്കു തങ്ങളുടെ പ്രിയ​പ്പെ​ട്ട​യാൾ അതി​നെ​ല്ലാം മുമ്പേ മരണമ​ട​ഞ്ഞി​രു​ന്നു എന്ന പരുക്കൻ യാഥാർഥ്യ​ത്തെ അഭിമു​ഖീ​ക​രി​ക്കേണ്ടി വന്നിട്ടുണ്ട്‌. അതു​കൊണ്ട്‌, ബന്ദി ജീവ​നോ​ടി​രി​ക്കു​ന്നു എന്നതിനു മതിയായ തെളിവു ലഭിക്കാ​തെ മോച​ന​മൂ​ല്യം നൽകു​ക​യോ ഒത്തുതീർപ്പി​നു ശ്രമി​ക്കു​ക​യോ ചെയ്യരുത്‌ എന്നാണ്‌ വിദഗ്‌ധർ പറയു​ന്നത്‌. ഒരു മാർഗം, ബന്ദിക്കു മാത്രം ഉത്തരം പറയാൻ കഴിയുന്ന ഒരു ചോദ്യം ചോദി​ക്കുക എന്നതാണ്‌. ചില കുടും​ബങ്ങൾ, അടുത്ത​കാ​ലത്തെ ഒരു പത്രവും പിടി​ച്ചു​കൊ​ണ്ടി​രി​ക്കുന്ന ബന്ദിയു​ടെ ഫോട്ടോ ആവശ്യ​പ്പെ​ടാ​റുണ്ട്‌.

രക്ഷാ​പ്ര​വർത്ത​ന​ങ്ങളെ കുറി​ച്ചെന്ത്‌? മിക്ക​പ്പോ​ഴും അവയിൽ വലിയ അപകട​സാ​ധ്യ​തകൾ ഒളിഞ്ഞി​രി​പ്പുണ്ട്‌. “ലാറ്റിൻ അമേരി​ക്ക​യിൽ ബന്ദിക​ളാ​ക്ക​പ്പെ​ടു​ന്ന​വ​രിൽ എഴുപ​ത്തൊ​മ്പത്‌ ശതമാ​ന​വും രക്ഷാ​പ്ര​വർത്ത​ന​ങ്ങൾക്കി​ട​യിൽ കൊല്ല​പ്പെ​ടു​ന്നു” എന്ന്‌ തട്ടി​ക്കൊ​ണ്ടു​പോ​കൽ രംഗത്തെ ഒരു വിശകലന വിദഗ്‌ധ​നായ ബ്രൈയൻ ജെങ്കിൻസ്‌ പറയുന്നു. എന്നിരു​ന്നാ​ലും, ചില​പ്പോ​ഴെ​ല്ലാം രക്ഷപ്പെ​ടു​ത്തൽ ശ്രമങ്ങൾ ലക്ഷ്യം സാധി​ക്കാ​റുണ്ട്‌.

അതു​കൊണ്ട്‌, തട്ടി​ക്കൊ​ണ്ടു​പോ​കൽ തടയു​ന്ന​തി​നെ കേന്ദ്രീ​ക​രി​ച്ചു​ള്ള​താണ്‌ പല പരിഹാ​ര​മാർഗ​ങ്ങ​ളും എന്നതിൽ ഒട്ടും അതിശ​യി​ക്കാ​നില്ല. ഈ ലക്ഷ്യത്തിൽ പ്രവർത്തി​ക്കു​ന്നതു ഗവൺമെന്റ്‌ അധികൃ​തർ മാത്രമല്ല. ബന്ദിയാ​ക്ക​പ്പെ​ടാ​തി​രി​ക്കാൻ എന്തെല്ലാം ചെയ്യണ​മെ​ന്നും ഓടി​ക്കൊ​ണ്ടി​രി​ക്കുന്ന കാറിൽ നിന്ന്‌ എങ്ങനെ പുറത്തു​ചാ​ടാ​മെ​ന്നും ബന്ദിയാ​ക്കു​ന്ന​വ​രു​ടെ ശ്രമങ്ങളെ വിഫല​മാ​ക്ക​ത്ത​ക്ക​രീ​തി​യിൽ മനശ്ശാ​സ്‌ത്ര​പ​ര​മാ​യി അവരെ എങ്ങനെ കടത്തി​വെ​ട്ടാ​മെ​ന്നു​മൊ​ക്കെ പത്രങ്ങൾ ആളുകളെ പഠിപ്പി​ക്കു​ന്നു. തട്ടി​ക്കൊ​ണ്ടു​പോ​കു​ന്നതു തടയാൻ സഹായി​ക്കുന്ന മാർഗ​ങ്ങളെ കുറിച്ച്‌ ആയോധന കലാ​കേ​ന്ദ്രങ്ങൾ കോഴ്‌സു​കൾ നടത്തുന്നു. ചില കമ്പനികൾ, കുട്ടി​ക​ളു​ടെ പല്ലിൽ ഘടിപ്പി​ക്കാൻ കഴിയുന്ന തരത്തി​ലുള്ള അൾട്രാ മൈ​ക്രോ​ട്രാൻസ്‌മി​റ്റ​റു​കൾ വിപണി​യി​ലി​റ​ക്കി​യി​രി​ക്കു​ന്നു. 6,00,000 രൂപ വില വരുന്ന ഇവ, കുട്ടി​കളെ തട്ടി​ക്കൊ​ണ്ടു​പോ​കുന്ന പക്ഷം അവരെ പിന്തു​ടർന്നു രക്ഷിക്കാൻ പൊലീ​സി​നെ സഹായി​ക്കു​ന്ന​തി​നു വേണ്ടി​യു​ള്ള​താണ്‌. ഇനി, കാർ നിർമാ​താ​ക്കൾ തട്ടി​ക്കൊ​ണ്ടു​പോ​കൽ സാധ്യ​മ​ല്ലാ​താ​ക്കുന്ന തരം സജ്ജീക​ര​ണ​ങ്ങ​ളോ​ടു കൂടിയ കാറുകൾ—അതിന്റെ വില താങ്ങാൻ കഴിവു​ള്ള​വർക്കു വേണ്ടി—നിർമി​ച്ചി​രി​ക്കു​ന്നു. ഇത്തരം കാറു​ക​ളിൽ, കണ്ണീർവാ​തകം പ്രയോ​ഗി​ക്കാ​നുള്ള സജ്ജീക​ര​ണ​ങ്ങ​ളും വെടി​വെ​ക്കാ​നുള്ള ദ്വാര​ങ്ങ​ളും വെടി​യു​ണ്ട​യേൽക്കാത്ത ജനാല​ക​ളും കീറലു​കൾ ഉണ്ടാക്കാൻ കഴിയാത്ത തരത്തി​ലുള്ള ടയറു​ക​ളും പിന്തു​ടർന്നു ചെല്ലുന്ന വാഹനം തെന്നി​പ്പോ​ക​ത്ത​ക്ക​വി​ധം റോഡി​ലേക്ക്‌ എണ്ണ ചീറ്റി​ക്കു​ന്ന​തി​നുള്ള സജ്ജീക​ര​ണ​ങ്ങ​ളും ഉണ്ട്‌.

സമ്പന്നരായ ചിലർ അംഗര​ക്ഷ​കരെ നിയമി​ക്കു​ന്നു. എന്നിരു​ന്നാ​ലും, മെക്‌സി​ക്കോ​യി​ലെ സാഹച​ര്യ​ത്തെ കുറിച്ചു സുരക്ഷാ വിദഗ്‌ധ​നായ ഫ്രാൻസി​സ്‌കോ ഗോ​മെസ്‌ ലെർമാ ഇങ്ങനെ പറയുന്നു: ‘അംഗര​ക്ഷ​കരെ നിയമി​ച്ച​തു​കൊണ്ട്‌ യാതൊ​രു പ്രയോ​ജ​ന​വു​മില്ല. കാരണം, അതു ശ്രദ്ധയാ​കർഷി​ക്കു​മെന്നു മാത്രമല്ല ചില​പ്പോൾ അവർതന്നെ തട്ടി​ക്കൊ​ണ്ടു​പോ​കു​ന്ന​വ​രു​മാ​യി കൈ​കോർത്തു പ്രവർത്തി​ക്കാ​നും മതി.’

തട്ടി​ക്കൊ​ണ്ടു​പോ​കൽ അത്യന്തം സങ്കീർണ​മായ, ആഴത്തിൽ വേരോ​ടി​യി​ട്ടുള്ള ഒരു പ്രശ്‌ന​മാ​യ​തി​നാൽ മനുഷ്യൻ എത്ര ശ്രമി​ച്ചാ​ലും അത്‌ ഇല്ലാതാ​ക്കാൻ കഴിയു​മെന്നു തോന്നു​ന്നില്ല. അതി​ന്റെ​യർഥം, ഒരു യഥാർഥ പരിഹാ​രം ഇല്ല എന്നാണോ?

ഒരു പരിഹാ​ര​മുണ്ട്‌

മനുഷ്യൻ അഭിമു​ഖീ​ക​രി​ക്കുന്ന ഇത്തരം എല്ലാ പ്രശ്‌ന​ങ്ങൾക്കു​മുള്ള ഒരേ​യൊ​രു യഥാർഥ പരിഹാ​ര​ത്തി​ലേക്ക്‌ ഈ മാസിക ആവർത്തി​ച്ചാ​വർത്തി​ച്ചു ശ്രദ്ധ ക്ഷണിച്ചി​ട്ടുണ്ട്‌. “നിന്റെ രാജ്യം വരേണമേ; നിന്റെ ഇഷ്ടം സ്വർഗ്ഗ​ത്തി​ലെ​പ്പോ​ലെ ഭൂമി​യി​ലും ആകേണമേ” എന്നു തന്റെ അനുഗാ​മി​കളെ പ്രാർഥി​ക്കാൻ പഠിപ്പി​ച്ച​പ്പോൾ, ദൈവ പുത്ര​നായ യേശു​ക്രി​സ്‌തു ആ പരിഹാ​ര​ത്തി​ലേ​ക്കാ​ണു വിരൽചൂ​ണ്ടി​യത്‌.—മത്തായി 6:10.

വ്യക്തമാ​യും, ഭൂമി​യി​ലെ വൈവി​ധ്യ​മാർന്ന മനുഷ്യ​സ​മൂ​ഹ​ത്തി​ന്റെ കാര്യങ്ങൾ നോക്കി​ന​ട​ത്താൻ നീതി​നി​ഷ്‌ഠ​മായ ഒരു ലോക​ഗ​വൺമെന്റ്‌ സ്ഥാപി​ത​മാ​കേ​ണ്ട​തുണ്ട്‌. അതേ, യേശു പറഞ്ഞ ആ ദൈവ​രാ​ജ്യം. അത്തര​മൊ​രു ഗവൺമെന്റ്‌ സ്ഥാപി​ക്കാൻ മനുഷ്യർക്കു സാധി​ച്ചി​ട്ടി​ല്ലാ​ത്ത​തി​നാൽ, അതിനു​വേണ്ടി നാം നമ്മുടെ സ്രഷ്ടാ​വായ യഹോ​വ​യാം ദൈവ​ത്തി​ലേക്കു നോക്കു​ന്ന​താണ്‌ ബുദ്ധി​പൂർവ​ക​മായ സംഗതി. അവന്റെ ഉദ്ദേശ്യം അതുത​ന്നെ​യാണ്‌ എന്ന്‌ അവന്റെ വചനമായ ബൈബിൾ പറയുന്നു.—സങ്കീർത്തനം 83:18.

പ്രവാ​ച​ക​നാ​യ ദാനീ​യേൽ ഈ വാക്കു​ക​ളിൽ യഹോ​വ​യു​ടെ ഉദ്ദേശ്യം രേഖ​പ്പെ​ടു​ത്തി: “ഈ രാജാ​ക്ക​ന്മാ​രു​ടെ കാലത്തു സ്വർഗ്ഗ​സ്ഥ​നായ ദൈവം ഒരുനാ​ളും നശിച്ചു​പോ​കാത്ത ഒരു രാജത്വം സ്ഥാപി​ക്കും;  . . അതു ഈ രാജത്വ​ങ്ങളെ ഒക്കെയും തകർത്തു നശിപ്പി​ക്ക​യും എന്നേക്കും നിലനി​ല്‌ക്ക​യും ചെയ്യും.” (ദാനീ​യേൽ 2:44) തട്ടി​ക്കൊ​ണ്ടു​പോ​കൽ ഉൾപ്പെ​ടെ​യുള്ള എല്ലാ കുറ്റകൃ​ത്യ​ങ്ങ​ളും എന്നെ​ന്നേ​ക്കു​മാ​യി അവസാ​നി​പ്പി​ക്കാൻ, ദൈവ​ത്തി​ന്റെ ഗവൺമെന്റ്‌ ക്രമാ​നു​ഗ​ത​മായ വിധത്തിൽ നടപടി​കൾ സ്വീക​രി​ക്കു​ന്നത്‌ എങ്ങനെ​യെന്നു ബൈബിൾ വിശദീ​ക​രി​ക്കു​ന്നു.

ശരിയായ വിദ്യാ​ഭ്യാ​സം അത്യാ​വ​ശ്യം

തട്ടി​ക്കൊ​ണ്ടു​പോ​കൽ എന്ന പ്രശ്‌നം പരിഹ​രി​ക്കു​ന്ന​തിന്‌ ആളുക​ളിൽ ഈടുറ്റ മൂല്യങ്ങൾ ഉൾന​ടേ​ണ്ടത്‌ അനിവാ​ര്യ​മാ​ണെന്നു നിങ്ങൾ തീർച്ച​യാ​യും സമ്മതി​ക്കും. ഉദാഹ​ര​ണ​ത്തിന്‌, ബൈബി​ളിൽ കാണ​പ്പെ​ടുന്ന ഈ ബുദ്ധി​യു​പ​ദേശം എല്ലാവ​രും ബാധക​മാ​ക്കു​ക​യാ​ണെ​ങ്കിൽ അത്‌ മനുഷ്യ സമൂഹ​ത്തിൽ എന്തു ഫലമു​ള​വാ​ക്കും എന്നു പരിചി​ന്തി​ക്കുക: “നിങ്ങളു​ടെ നടപ്പു ദ്രവ്യാ​ഗ്ര​ഹ​മി​ല്ലാ​ത്ത​താ​യി​രി​ക്കട്ടെ; ഉള്ളതു​കൊ​ണ്ടു തൃപ്‌തി​പ്പെ​ടു​വിൻ.” (എബ്രായർ 13:5) “അന്യോ​ന്യം സ്‌നേ​ഹി​ക്കു​ന്നതു അല്ലാതെ ആരോ​ടും ഒന്നും കടമ്പെ​ട്ടി​രി​ക്ക​രു​തു.”—റോമർ 13:8.

ഭൂമി​യി​ലു​ട​നീ​ളം 230-ലധികം രാജ്യ​ങ്ങ​ളി​ലാ​യി യഹോ​വ​യു​ടെ സാക്ഷികൾ നടത്തുന്ന വിദ്യാ​ഭ്യാ​സ പരിപാ​ടി​യെ കുറിച്ചു പരിചി​ന്തി​ക്കു​മ്പോൾ, അത്തരം ബുദ്ധി​യു​പ​ദേ​ശങ്ങൾ ജീവി​ത​ത്തിൽ ബാധക​മാ​ക്കി​യാ​ലു​ണ്ടാ​കുന്ന ഫലത്തെ​ക്കു​റിച്ച്‌ നിങ്ങൾക്ക്‌ ഒരു ചിത്രം ലഭിക്കും. മുമ്പ്‌, അത്യാർത്തി​പി​ടി​ച്ച​വ​രോ അപകട​കാ​രി​ക​ളായ കുറ്റവാ​ളി​ക​ളോ ആയിരുന്ന പലരി​ലും ഈ പരിപാ​ടി ആരോ​ഗ്യാ​വ​ഹ​മായ സ്വാധീ​നം ചെലു​ത്തി​യി​രി​ക്കു​ന്നു. നേരത്തെ തട്ടി​ക്കൊ​ണ്ടു​പോ​ക​ലു​കൾ നടത്തി​യി​രുന്ന ഒരാൾ ഇങ്ങനെ പറഞ്ഞു: “ദൈവത്തെ പ്രസാ​ദി​പ്പി​ക്ക​ണ​മെ​ങ്കിൽ എന്റെ പഴയ വ്യക്തി​ത്വം ഉരിഞ്ഞു​ക​ള​ഞ്ഞിട്ട്‌ പുതി​യതു ധരി​ക്കേ​ണ്ട​തു​ണ്ടെന്ന്‌ കാല​ക്ര​മ​ത്തിൽ ഞാൻ തിരി​ച്ച​റി​ഞ്ഞു, സൗമ്യ​വും ക്രിസ്‌തു യേശു​വി​ന്റേ​തി​നോ​ടു സമാന​വു​മായ ഒരു വ്യക്തി​ത്വം.”

എങ്കിലും, ഒരു മികച്ച വിദ്യാ​ഭ്യാ​സ പരിപാ​ടി​ക്കു പോലും എല്ലാ കുറ്റവാ​ളി​ക​ളെ​യും, ഒരുപക്ഷേ ഭൂരി​പ​ക്ഷ​ത്തെ​യും, നേരെ​യാ​ക്കി​യെ​ടു​ക്കാൻ കഴിയില്ല. മാറ്റം വരുത്താൻ വിസമ്മ​തി​ക്കു​ന്ന​വർക്ക്‌ എന്താണു സംഭവി​ക്കുക?

ദുഷ്‌പ്ര​വൃ​ത്തി​ക്കാർ നശിപ്പി​ക്ക​പ്പെ​ടും

മനഃപൂർവം തെറ്റു​ചെ​യ്യു​ന്ന​വർക്കു ദൈവ​രാ​ജ്യ​ത്തി​ന്റെ പ്രജക​ളാ​യി​രി​ക്കാൻ കഴിയില്ല. ബൈബിൾ ഇങ്ങനെ പറയുന്നു: “അന്യായം ചെയ്യു​ന്നവർ ദൈവ​രാ​ജ്യം അവകാ​ശ​മാ​ക്കു​ക​യില്ല എന്നു അറിയു​ന്നി​ല്ല​യോ? നിങ്ങ​ളെ​ത്തന്നേ വഞ്ചിക്കാ​തി​രി​പ്പിൻ; ദുർന്ന​ട​പ്പു​കാർ, . . . അത്യാ​ഗ്ര​ഹി​കൾ, . . . പിടി​ച്ചു​പ​റി​ക്കാർ എന്നിവർ ദൈവ​രാ​ജ്യം അവകാ​ശ​മാ​ക്കു​ക​യില്ല.” (1 കൊരി​ന്ത്യർ 6:9, 10) “നേരു​ള്ളവർ ദേശത്തു [“ഭൂമി​യിൽ,” NW] വസിക്കും . . . എന്നാൽ ദുഷ്ടന്മാർ ദേശത്തു​നി​ന്നു [“ഭൂമി​യിൽനി​ന്നു,” NW] ഛേദി​ക്ക​പ്പെ​ടും.”—സദൃശ​വാ​ക്യ​ങ്ങൾ 2:21, 22.

പുരാതന നാളു​ക​ളി​ലെ ദൈവ​ത്തി​ന്റെ ന്യായ​പ്ര​മാ​ണം, മാനസാ​ന്ത​ര​പ്പെ​ടാത്ത ഒരു തട്ടി​ക്കൊ​ണ്ടു​പോ​ക്കു​കാ​രനു മരണശിക്ഷ ആയിരു​ന്നു വിധി​ച്ചി​രു​ന്നത്‌. (ആവർത്ത​ന​പു​സ്‌തകം 24:7) തട്ടി​ക്കൊ​ണ്ടു​പോ​ക​ലു​കൾ നടത്തു​ന്ന​വരെ പോലുള്ള അത്യാർത്തി പിടിച്ച വ്യക്തി​കൾക്ക്‌ ദൈവ​രാ​ജ്യ​ത്തിൽ യാതൊ​രു സ്ഥാനവു​മു​ണ്ടാ​യി​രി​ക്കില്ല. ഇന്നത്തെ കുറ്റവാ​ളി​കൾക്ക്‌ മനുഷ്യ​രു​ടെ നീതി​വ്യ​വ​സ്ഥയെ വെട്ടി​ക്കാൻ കഴി​ഞ്ഞേ​ക്കാം. പക്ഷേ, ദൈവ​ത്തി​ന്റെ നീതി​യിൽ നിന്നു ഒളി​ച്ചോ​ടാൻ അവർക്കു കഴിയില്ല. യഹോ​വ​യു​ടെ നീതി​നി​ഷ്‌ഠ​മായ രാജ്യ​ഭ​ര​ണ​ത്തിൻ കീഴിൽ ജീവിതം ആസ്വദി​ക്ക​ണ​മെ​ങ്കിൽ, ദുഷ്‌പ്ര​വൃ​ത്തി​ക്കാ​രെ​ല്ലാ​വ​രും തങ്ങളുടെ പാത നേരെ​യാ​ക്കി​യേ തീരൂ.

കുറ്റകൃ​ത്യ​ങ്ങൾക്ക്‌ ഇടയാ​ക്കുന്ന സാഹച​ര്യ​ങ്ങൾ ഉണ്ടായി​രി​ക്കു​ന്നി​ട​ത്തോ​ളം കാലം, കുറ്റകൃ​ത്യ​ങ്ങ​ളും ഉണ്ടായി​രി​ക്കും എന്നതു വ്യക്തമാണ്‌. എന്നാൽ, ദൈവ​രാ​ജ്യം അതിന്‌ അനുവ​ദി​ക്കില്ല. കാരണം ബൈബിൾ ഇങ്ങനെ വാഗ്‌ദാ​നം ചെയ്യുന്നു: “ആ രാജത്വം . . . ഈ രാജത്വ​ങ്ങളെ ഒക്കെയും തകർത്തു നശിപ്പി​ക്കും.” ദുഷ്‌പ്ര​വൃ​ത്തി​ക്കാ​രും അതിൽ ഉൾപ്പെ​ടും. ദൈവ​ത്തി​ന്റെ രാജ്യം എന്നേക്കും നിലനിൽക്കും എന്നു പ്രവചനം തുടർന്നു പറയുന്നു. (ദാനീ​യേൽ 2:44) സംഭവി​ക്കാ​നി​രി​ക്കുന്ന മാറ്റങ്ങളെ കുറിച്ച്‌ ഒന്നു സങ്കൽപ്പി​ച്ചു നോക്കൂ!

നീതി​നി​ഷ്‌ഠ​മായ ഒരു പുതിയ ലോകം

ബൈബി​ളി​ലെ മറ്റൊരു പ്രവചനം പരിചി​ന്തി​ക്കുക. പിൻവ​രുന്ന വാക്കു​ക​ളിൽ അതു ഭാവിയെ കുറിച്ച്‌ മനോ​ഹ​ര​മാ​യി ഇങ്ങനെ വർണി​ക്കു​ന്നു: “അവർ വീടു​കളെ പണിതു പാർക്കും; അവർ മുന്തി​രി​ത്തോ​ട്ട​ങ്ങളെ ഉണ്ടാക്കി അവയിലെ ഫലം അനുഭ​വി​ക്കും. അവർ പണിക, മറെറാ​രു​ത്തൻ പാർക്ക എന്നു വരിക​യില്ല; അവർ നടുക, മറെറാ​രു​ത്തൻ തിന്നുക എന്നും വരിക​യില്ല; എന്റെ ജനത്തിന്റെ ആയുസ്സു വൃക്ഷത്തി​ന്റെ ആയുസ്സു​പോ​ലെ ആകും; എന്റെ വൃതന്മാർ തന്നേ തങ്ങളുടെ അദ്ധ്വാ​ന​ഫലം അനുഭ​വി​ക്കും.”—യെശയ്യാ​വു 65:21, 22.

ദൈവ​രാ​ജ്യം ഈ മുഴു​ഗ്ര​ഹ​ത്തി​ന്റെ​യും മുഖച്ഛായ മാറ്റും. അന്നു ജീവി​ച്ചി​രി​ക്കുന്ന എല്ലാവർക്കും സംതൃ​പ്‌തി​ദാ​യ​ക​മായ ജോലി​യി​ലും ആരോ​ഗ്യാ​വ​ഹ​മായ വിനോ​ദ​ങ്ങ​ളി​ലും ഏർപ്പെ​ട്ടു​കൊ​ണ്ടു തങ്ങളുടെ നൈസർഗിക പ്രാപ്‌തി​കൾ വികസി​പ്പി​ച്ചെ​ടു​ക്കു​ന്ന​തി​നും അങ്ങനെ ജീവിതം പൂർണ​മാ​യി ആസ്വദി​ക്കു​ന്ന​തി​നും കഴിയും. ആരും തന്റെ അയൽക്കാ​രനെ തട്ടി​ക്കൊ​ണ്ടു​പോ​കു​ന്ന​തി​നെ കുറിച്ച്‌ ആലോ​ചി​ക്കുക പോലും ചെയ്യാത്ത തരം അവസ്ഥക​ളാ​യി​രി​ക്കും ലോക​മെ​മ്പാ​ടും ഉണ്ടായി​രി​ക്കുക. സമ്പൂർണ സുരക്ഷി​ത​ത്വ​ബോ​ധം അന്ന്‌ ഉണ്ടായി​രി​ക്കും. (മീഖാ 4:4) തട്ടി​ക്കൊ​ണ്ടു​പോ​കൽ ഇന്ന്‌ ഗോള​വ്യാ​പ​ക​മായ ഒരു ഭീഷണി ആണെങ്കിൽ, ദൈവ​രാ​ജ്യ​ത്തിൻ കീഴിൽ അത്‌ ചരി​ത്ര​ത്തി​ലെ കേവലം ഒരു അടഞ്ഞ അധ്യാ​യ​മാ​യി മാറും, ആരും അതേക്കു​റിച്ച്‌ ഓർക്കുക പോലും ഇല്ല.—യെശയ്യാ​വു 65:17.

[10-ാം പേജിലെ ചിത്രം]

“ആരും അവരെ ഭയപ്പെ​ടു​ത്തു​ക​യില്ല.”—മീഖാ 4:4