പ്രകൃതി വിപത്തു​ക​ളും മനുഷ്യ​ന്റെ പങ്കും

ഒരു കാർ വേണ്ട വിധത്തിൽ സംരക്ഷി​ക്ക​പ്പെ​ടു​മ്പോൾ, അത്‌ സുരക്ഷി​ത​മായ യാത്ര​യ്‌ക്ക്‌ ഉപകരി​ക്കും. എന്നാൽ അത്‌ ദുരു​പ​യോ​ഗം ചെയ്യു​ക​യും വേണ്ട വിധത്തിൽ സംരക്ഷി​ക്കാ​തി​രി​ക്കു​ക​യും ചെയ്യു​ന്നെ​ങ്കിൽ അതിലെ യാത്ര അപകട​ക​ര​മാ​യി​രു​ന്നേ​ക്കാം. ചില വിധങ്ങ​ളിൽ നമ്മുടെ ഭൂഗ്ര​ഹ​വും ഇങ്ങനെ​ത​ന്നെ​യാണ്‌.

ഭൗമാ​ന്ത​രീ​ക്ഷ​ത്തി​ലും സമു​ദ്ര​ങ്ങ​ളി​ലും മനുഷ്യൻ വരുത്തി​യി​ട്ടുള്ള മാറ്റങ്ങൾ പ്രകൃതി വിപത്തു​ക​ളു​ടെ ആവൃത്തി​യും തീവ്ര​ത​യും വർധി​ക്കു​ന്ന​തിന്‌ ഇടയാ​ക്കി​യി​രി​ക്കു​ന്നെ​ന്നും അങ്ങനെ അവ നമ്മുടെ ഗ്രഹത്തെ അപകട​മേ​ഖ​ല​യാ​ക്കി മാറ്റി​യി​രി​ക്കു​ന്നെ​ന്നും പല ശാസ്‌ത്ര​ജ്ഞ​രും പറയുന്നു. ഭാവി​യി​ലെ കാര്യം അനിശ്ചി​ത​മാണ്‌. “നമുക്കുള്ള ഒരേ​യൊ​രു ഗ്രഹത്തെ നാം തോന്നു​ന്ന​തു​പോ​ലെ​യൊ​ക്കെ പരീക്ഷ​ണ​വി​ധേയം ആക്കി​ക്കൊ​ണ്ടി​രി​ക്കു​ക​യാണ്‌. അത്‌ എവി​ടെ​ച്ചെന്ന്‌ അവസാ​നി​ക്കു​മെന്നു നമുക്കു യാതൊ​രു നിശ്ചയ​വു​മില്ല” എന്ന്‌ കാലാ​വസ്ഥാ വ്യതി​യാ​ന​ത്തെ​ക്കു​റിച്ച്‌ സയൻസ്‌ മാസി​ക​യിൽ വന്ന ഒരു മുഖ​പ്ര​സം​ഗം പ്രസ്‌താ​വി​ക്കു​ക​യു​ണ്ടാ​യി.

മനുഷ്യ​ന്റെ കൈക​ടത്തൽ പ്രകൃതി വിപത്തു​ക​ളു​ടെ ആവൃത്തി​യെ​യും തീവ്ര​ത​യെ​യും ഏതു വിധത്തി​ലാ​യി​രി​ക്കാം സ്വാധീ​നി​ക്കു​ന്ന​തെന്നു കൂടുതൽ നന്നായി മനസ്സി​ലാ​ക്കു​ന്ന​തിന്‌, ഉൾപ്പെ​ട്ടി​രി​ക്കുന്ന അടിസ്ഥാ​ന​പ​ര​മായ പ്രാകൃ​തിക പ്രതി​ഭാ​സ​ങ്ങ​ളെ​ക്കു​റി​ച്ചു നാം കുറച്ചു കാര്യങ്ങൾ അറിഞ്ഞി​രി​ക്കേ​ണ്ട​തുണ്ട്‌. ഉദാഹ​ര​ണ​ത്തിന്‌, ചുഴലി​ക്കൊ​ടു​ങ്കാ​റ്റു​കൾ പോ​ലെ​യുള്ള ശക്തമായ കാറ്റുകൾ രൂപം​കൊ​ള്ളാൻ ഇടയാ​ക്കു​ന്നത്‌ എന്താണ്‌?

ഗ്രഹത്തി​ലെ താപസം​വാ​ഹ​കർ

ഭൂമി​യു​ടെ കാലാ​വസ്ഥാ സംവി​ധാ​നത്തെ ഉപമി​ച്ചി​രി​ക്കു​ന്നത്‌ സൗരോർജ​ത്തി​നു ഭേദഗതി വരുത്തി അതു വിതരണം ചെയ്യുന്ന ഒരു യന്ത്ര​ത്തോ​ടാണ്‌. സൂര്യന്റെ ചൂടി​ലേ​റെ​യും ലഭിക്കു​ന്നത്‌ ഉഷ്‌ണ​മേ​ഖ​ലാ​പ്ര​ദേ​ശ​ങ്ങൾക്കാണ്‌. ഇത്‌ താപനി​ല​യിൽ ഉണ്ടാക്കുന്ന അസന്തു​ലനം അന്തരീക്ഷ വായു​വിൽ ചലനങ്ങൾ സൃഷ്ടി​ക്കു​ന്നു.a ദിനം​തോ​റു​മുള്ള ഭൂമി​യു​ടെ ഭ്രമണം, ചലിച്ചു​കൊ​ണ്ടി​രി​ക്കുന്ന ഈർപ്പം കലർന്ന ഈ വായു​പി​ണ്ഡം ചുഴി​ക​ളാ​യി രൂപം​കൊ​ള്ളു​ന്ന​തിന്‌ ഇടയാ​ക്കു​ന്നു. ഇവയിൽ ചിലത്‌ ന്യൂന​മർദ മേഖലകൾ ആയിത്തീ​രു​ന്നു. ഈ ന്യൂന​മർദങ്ങൾ ശക്തമായ കാറ്റു​ക​ളാ​യി രൂപം​പ്രാ​പി​ച്ചേ​ക്കാം.

ഉഷ്‌ണ​മേ​ഖലാ കൊടു​ങ്കാ​റ്റു​ക​ളു​ടെ പൊതു​വായ സഞ്ചാര​പഥം നിരീ​ക്ഷി​ക്കു​ക​യാ​ണെ​ങ്കിൽ അവ ഭൂമധ്യ​രേ​ഖ​യിൽനി​ന്നു വടക്കോ​ട്ടോ തെക്കോ​ട്ടോ താപനില കുറഞ്ഞ പ്രദേ​ശ​ങ്ങ​ളി​ലേക്ക്‌ അകന്നു​പോ​കു​ന്ന​താ​യി നിങ്ങൾ മനസ്സി​ലാ​ക്കും. ഈ വിധത്തിൽ കൊടു​ങ്കാ​റ്റു​കൾ ഭീമൻ താപസം​വാ​ഹ​ക​രാ​യും വർത്തി​ക്കു​ന്നു. അങ്ങനെ അവ കാലാ​വ​സ്ഥയെ മയപ്പെ​ടു​ത്താൻ സഹായി​ക്കു​ന്നു. എന്നാൽ കാലാ​വസ്ഥാ യന്ത്രത്തി​ന്റെ “ബോയി​ലർ റൂം” ആയി കരുത​പ്പെ​ടുന്ന ഉഷ്‌ണ​മേ​ഖലാ സമു​ദ്ര​ത്തി​ന്റെ മുകൾത്ത​ട്ടി​ലെ താപനില ഏകദേശം 27 ഡിഗ്രി സെൽഷ്യ​സി​നു മീതെ​യാ​കു​മ്പോൾ ചുഴലി​ക്കൊ​ടു​ങ്കാ​റ്റു​ക​ളാ​യി രൂപം​പ്രാ​പി​ക്കു​ന്ന​തിന്‌ ആവശ്യ​മായ ഊർജം ഉഷ്‌ണ​മേ​ഖലാ കൊടു​ങ്കാ​റ്റു​കൾ ആർജി​ച്ചേ​ക്കാം.

1900 സെപ്‌റ്റം​ബർ 8-ാം തീയതി ഒരു ചുഴലി​ക്കൊ​ടു​ങ്കാറ്റ്‌, ടെക്‌സാ​സി​ലെ ദ്വീപ​ന​ഗ​ര​മായ ഗാൽവി​സ്റ്റെനെ ശക്തി​യോ​ടെ പ്രഹരി​ച്ചു. ആൾനാശം കണക്കി​ലെ​ടു​ക്കു​മ്പോൾ, ഐക്യ​നാ​ടു​ക​ളു​ടെ ചരി​ത്ര​ത്തി​ലെ ഏറ്റവും വലിയ പ്രകൃതി ദുരന്ത​മാ​യി​രു​ന്നു അത്‌. കൊടു​ങ്കാ​റ്റി​നൊ​പ്പം അലറി​പ്പാ​ഞ്ഞെ​ത്തിയ തിരമാ​ലകൾ ആ നഗരത്തിൽനിന്ന്‌ 6,000-ത്തിനും 8,000-ത്തിനും ഇടയ്‌ക്ക്‌ ആളുക​ളു​ടെ​യും സമീപ​പ്ര​ദേ​ശ​ങ്ങ​ളിൽനിന്ന്‌ 4,000-ത്തോളം പേരു​ടെ​യും ജീവ​നെ​ടു​ത്തു. അവ 3,600-ഓളം വീടു​കളെ നിലം​പ​രി​ചാ​ക്കി. വാസ്‌ത​വ​ത്തിൽ, ആ ദുരന്തം പ്രഹര​മേൽപ്പി​ക്കാത്ത ഒരൊറ്റ നിർമി​തി പോലും ഗാൽവി​സ്റ്റെ​നിൽ ഇല്ലായി​രു​ന്നു.

ഇക്കഴിഞ്ഞ വർഷങ്ങ​ളിൽ ശക്തമായ നിരവധി കൊടു​ങ്കാ​റ്റു​കൾ ഉണ്ടായ​താ​യി കഴിഞ്ഞ ലേഖന​ത്തിൽ നാം കണ്ടു. ആഗോ​ള​ത​പ​ന​വു​മാ​യി ഇതിനു ബന്ധമു​ണ്ടോ​യെന്നു ശാസ്‌ത്രജ്ഞർ പഠിച്ചു​കൊ​ണ്ടി​രി​ക്കു​ക​യാണ്‌. ഒരുപക്ഷേ ആഗോ​ള​ത​പനം കൊടു​ങ്കാറ്റ്‌ രൂപം​കൊ​ള്ളാൻ തക്കവണ്ണം കൂടുതൽ ഊർജം പ്രദാനം ചെയ്യു​ന്നു​ണ്ടാ​കാം. എന്നാൽ, കാലാ​വ​സ്ഥ​യു​ടെ താളം തെറ്റൽ ആഗോ​ള​ത​പ​ന​ത്തി​ന്റെ ലക്ഷണങ്ങ​ളിൽ ഒന്നുമാ​ത്രം ആയിരി​ക്കാം. ആഗോ​ള​ത​പ​ന​ത്തി​ന്റെ, വിപത്‌ക​ര​മാ​യി​ത്തീർന്നേ​ക്കാ​വുന്ന മറ്റൊരു ഭവിഷ്യത്ത്‌ ഇതി​നോ​ട​കം​തന്നെ തലപൊ​ക്കി​യി​ട്ടുണ്ട്‌.

ഉയരുന്ന സമു​ദ്ര​നി​ര​പ്പും വനനശീ​ക​ര​ണ​വും

“കഴിഞ്ഞ നൂറ്റാ​ണ്ടിൽ സമു​ദ്ര​ങ്ങ​ളി​ലെ ജലനി​ര​പ്പിൽ 10 മുതൽ 20 വരെ സെന്റി​മീ​റ്റർ [നാലു​മു​തൽ എട്ടുവരെ ഇഞ്ച്‌] വർധന ഉണ്ടാ​യെ​ന്നും അത്‌ ഇനിയും ഉയരു​മെ​ന്നും” സയൻസ്‌ മാസി​ക​യിൽ വന്ന ഒരു മുഖ​പ്ര​സം​ഗം പ്രസ്‌താ​വി​ച്ചു. ആഗോ​ള​ത​പ​ന​വു​മാ​യി ഇതിനു ബന്ധമു​ണ്ടാ​യി​രു​ന്നേ​ക്കാ​വു​ന്നത്‌ എങ്ങനെ​യാണ്‌? രണ്ടു സാധ്യ​ത​ക​ളി​ലേ​ക്കാ​ണു ഗവേഷകർ വിരൽചൂ​ണ്ടു​ന്നത്‌. ധ്രുവ​ങ്ങ​ളി​ലെ കരപ്ര​ദേ​ശ​ങ്ങളെ മൂടി​ക്കി​ട​ക്കുന്ന ഹിമവും ഹിമാ​നി​ക​ളും ഉരുകി സമു​ദ്ര​ജ​ല​വി​താ​നം ഉയരാ​നുള്ള സാധ്യ​ത​യാണ്‌ ഒന്ന്‌. താപീയ വികസ​ന​മാണ്‌ മറ്റേത്‌. സമു​ദ്ര​ങ്ങ​ളി​ലെ ചൂടു കൂടു​മ്പോൾ അവയുടെ വ്യാപ്‌തം വർധി​ക്കുന്ന പ്രക്രി​യ​യാണ്‌ ഇത്‌.

പസിഫി​ക്കി​ലെ ദ്വീപ​രാ​ജ്യ​മായ ടുവാ​ലു​വി​ലെ കൊച്ചു ദ്വീപു​കൾ സമു​ദ്ര​നി​രപ്പ്‌ ഉയരു​ന്ന​തി​ന്റെ ഫലങ്ങൾ ഇപ്പോൾത്തന്നെ അഭിമു​ഖീ​ക​രി​ച്ചു​കൊ​ണ്ടി​രി​ക്കു​ക​യാണ്‌. പവിഴ​ദ്വീ​പായ ഫൂനഫൂ​ട്ടി​യി​ലെ സമു​ദ്ര​നി​രപ്പ്‌ “കഴിഞ്ഞ ദശകത്തെ അപേക്ഷി​ച്ചു വർഷം​തോ​റും ശരാശരി 5.6 മില്ലി​മീ​റ്റർ” വർധി​ച്ചി​രി​ക്കു​ന്ന​താ​യി അവി​ടെ​നി​ന്നു ശേഖരിച്ച വിവരങ്ങൾ കാണി​ക്കു​ന്നു​വെന്ന്‌ സ്‌മി​ത്‌സോ​ണി​യൻ മാസിക പറയുന്നു.

നാട്ടിൻപു​റ​ങ്ങ​ളി​ലേ​ക്കുള്ള നഗര​പ്ര​ദേ​ശ​ങ്ങ​ളു​ടെ വ്യാപനം, ചേരി​പ്പ​ട്ട​ണ​ങ്ങ​ളു​ടെ എണ്ണത്തി​ലും പരിസ്ഥി​തി വിനാ​ശ​ത്തി​ന്റെ തോതി​ലും ഉള്ള വർധന എന്നിവ ജനസംഖ്യ വർധി​ക്കു​മ്പോൾ ലോക​ത്തി​ന്റെ പല ഭാഗങ്ങ​ളി​ലും സംഭവി​ക്കുന്ന കാര്യ​ങ്ങ​ളാണ്‌. ഈ സംഭവ​വി​കാ​സങ്ങൾ പ്രകൃതി ദുരന്ത​ങ്ങ​ളു​ടെ തീവ്രത വർധി​പ്പി​ച്ചേ​ക്കാം. ചില ഉദാഹ​ര​ണങ്ങൾ പരിചി​ന്തി​ക്കുക.

ഹെയ്‌റ്റി ഉയർന്ന ജനസം​ഖ്യ​യും വനനശീ​ക​ര​ണ​ത്തി​ന്റെ ചരി​ത്ര​വും ഉള്ള ഒരു ദ്വീപ​രാ​ഷ്‌ട്ര​മാണ്‌. അത്‌ സാമ്പത്തി​ക​മാ​യും രാഷ്‌ട്രീ​യ​മാ​യും സാമൂ​ഹി​ക​മാ​യും ഗുരു​ത​ര​മായ പ്രശ്‌നങ്ങൾ അനുഭ​വി​ക്കുന്ന ഒരു രാഷ്‌ട്ര​മാ​ണെ​ങ്കി​ലും വനനശീ​ക​ര​ണ​ത്തെ​ക്കാൾ ആ രാജ്യ​ത്തി​ന്റെ നിലനിൽപ്പി​നു ഭീഷണി ഉയർത്തുന്ന മറ്റൊ​ന്നു​മി​ല്ലെന്ന്‌ അടുത്ത​കാ​ലത്തെ ഒരു വാർത്താ റിപ്പോർട്ട്‌ പ്രസ്‌താ​വി​ക്കു​ക​യു​ണ്ടാ​യി. 2004-ൽ, കോരി​ച്ചൊ​രി​യുന്ന മഴയെ തുടർന്ന്‌ മണ്ണ്‌ കുത്തി​യൊ​ലി​ച്ചി​റങ്ങി ആയിര​ങ്ങളെ ജീവ​നോ​ടെ കുഴി​ച്ചു​മൂ​ടി​യ​പ്പോൾ ആ ഭീഷണി ദാരു​ണ​മായ വിധത്തിൽ തലപൊ​ക്കി.

“ആഗോ​ള​ത​പനം, അണക്കെ​ട്ടു​ക​ളു​ടെ നിർമാ​ണം, വനനശീ​ക​രണം, മരങ്ങൾ മുറിച്ചു തീയിട്ട ശേഷമുള്ള കൃഷി​ചെയ്യൽ” എന്നിവ​യി​ലേ​ക്കാണ്‌ ദക്ഷി​ണേ​ഷ്യ​യെ വേട്ടയാ​ടി​യി​ട്ടുള്ള പ്രകൃതി ദുരന്ത​ങ്ങ​ളു​ടെ ആക്കം വർധി​പ്പി​ക്കുന്ന ഘടകങ്ങ​ളെന്ന നിലയിൽ ടൈം ഏഷ്യ വിരൽചൂ​ണ്ടു​ന്നത്‌. ഇനിയും, വനനശീ​ക​ര​ണ​ത്തി​നു തികച്ചും വ്യത്യ​സ്‌ത​മായ മറ്റൊരു മുഖമുണ്ട്‌. അതിന്‌ മണ്ണിലെ ജലാംശം കൂടുതൽ വേഗത്തിൽ നഷ്ടപ്പെ​ടാൻ ഇടയാ​ക്കി​ക്കൊണ്ട്‌ വരൾച്ച​യു​ടെ രൂക്ഷത വർധി​പ്പി​ക്കാ​നും കഴിയും. ഇക്കഴിഞ്ഞ വർഷങ്ങ​ളിൽ, ഇന്തൊ​നീ​ഷ്യ​യി​ലും ബ്രസീ​ലി​ലും ഉണ്ടായ വരൾച്ചകൾ കാട്ടുതീ ഉണ്ടാകു​ന്ന​തിന്‌ ഇടയാ​ക്കി​യി​രി​ക്കു​ന്നു. മുമ്പ്‌ ഉണ്ടായി​ട്ടു​ള്ള​വ​യെ​ക്കാ​ളൊ​ക്കെ വിനാ​ശ​ക​മാ​യി​രുന്ന ആ അഗ്നിബാ​ധകൾ, ജലാംശം കാരണം സാധാ​ര​ണ​ഗ​തി​യിൽ തീ വിഴു​ങ്ങാത്ത കാടു​ക​ളെ​യാ​ണു ചുട്ടു​ചാ​മ്പ​ലാ​ക്കി​യത്‌. എന്നാൽ, രൂക്ഷമായ കാലാവസ്ഥ മാത്രമല്ല പ്രകൃ​തി​ദു​ര​ന്ത​ങ്ങൾക്ക്‌ ഇടയാ​ക്കു​ന്നത്‌. പല ദേശങ്ങ​ളും ഭൂമി​യു​ടെ ഉള്ളറയിൽ രൂപ​മെ​ടു​ക്കുന്ന വിപത്തു​കൾക്ക്‌ ഇരകളാണ്‌.

ഭൂമി ആടിയു​ല​യു​മ്പോൾ

ഭൂവൽക്കം വ്യത്യസ്‌ത വലുപ്പ​ത്തി​ലുള്ള ഫലകങ്ങ​ളാൽ നിർമി​ത​മാണ്‌. ഈ ഫലകങ്ങൾ പരസ്‌പരം അകലു​ക​യോ അടുക്കു​ക​യോ ഉരസി​നീ​ങ്ങു​ക​യോ ഒക്കെ ചെയ്യുന്നു. വാസ്‌ത​വ​ത്തിൽ, വർഷം​തോ​റും ലക്ഷക്കണ​ക്കി​നു ഭൂകമ്പങ്ങൾ ഉണ്ടാക​ത്ത​ക്ക​വി​ധം ഭൂവൽക്ക​ത്തി​ലെ ഫലകങ്ങ​ളു​ടെ സ്ഥാന​ഭ്രം​ശം അത്രയ​ധി​ക​മാണ്‌. ഈ ഭൂകമ്പ​ങ്ങ​ളിൽ പലതും ശ്രദ്ധി​ക്ക​പ്പെ​ടാ​തെ പോകു​ന്നു.

ഭൂകമ്പ​ങ്ങ​ളു​ടെ ഏകദേശം 90 ശതമാ​ന​വും ഫലകങ്ങ​ളു​ടെ വിളു​മ്പി​ലുള്ള വിള്ളലു​ക​ളി​ലാണ്‌ ഉണ്ടാകു​ന്ന​തെന്നു പറയ​പ്പെ​ടു​ന്നു. അപൂർവ​മാ​യി​ട്ടാ​ണെ​ങ്കി​ലും ചില​പ്പോ​ഴൊ​ക്കെ വളരെ വിനാ​ശ​ക​മായ ഭൂകമ്പങ്ങൾ ഫലകങ്ങൾക്കു​ള്ളി​ലും സംഭവി​ക്കാ​റുണ്ട്‌. ചരി​ത്ര​ത്തിൽ രേഖ​പ്പെ​ടു​ത്തി​യി​ട്ടു​ള്ള​തിൽവെച്ച്‌ ഏറ്റവു​മ​ധി​കം മരണം വിതച്ച ഭൂകമ്പം 1556-ൽ ചൈന​യി​ലെ മൂന്നു പ്രവി​ശ്യ​കളെ കശക്കി​യെ​റിഞ്ഞ ഭൂകമ്പ​മാ​ണെന്നു കണക്കുകൾ കാണി​ക്കു​ന്നു. സാധ്യ​ത​യ​നു​സ​രിച്ച്‌ 8,30,000 പേരാണ്‌ അന്നു മരണത്തി​നു കീഴട​ങ്ങി​യത്‌!

ഭൂകമ്പ​ങ്ങ​ളെ തുടർന്ന്‌ മാരക​മായ മറ്റു ദുരന്ത​ങ്ങ​ളും ഉണ്ടാകാം. ഉദാഹ​ര​ണ​ത്തിന്‌, 1755 നവംബർ 1-ന്‌ ഒരു ഭൂകമ്പം 2,75,000 പേർ പാർക്കുന്ന പോർച്ചു​ഗ​ലി​ലെ ലിസ്‌ബൺ നഗരത്തെ തകർത്തു​ത​രി​പ്പ​ണ​മാ​ക്കി. എന്നാൽ അവിടം​കൊ​ണ്ടു തീർന്നില്ല. ഭൂകമ്പത്തെ തുടർന്ന്‌ തീപി​ടി​ത്ത​ങ്ങ​ളും കടലാ​ക്ര​മ​ണ​വും ഉണ്ടായി. അടുത്തുള്ള അറ്റ്‌ലാ​ന്റിക്‌ സമു​ദ്ര​ത്തിൽനിന്ന്‌ അലറി​പ്പാ​ഞ്ഞെ​ത്തിയ രാക്ഷസ​ത്തി​ര​മാ​ലകൾ തീരങ്ങളെ വിഴുങ്ങി. അവയ്‌ക്ക്‌ 15 മീറ്റർ വരെ ഉയരം ഉണ്ടായി​രു​ന്ന​താ​യി കണക്കാ​ക്ക​പ്പെ​ടു​ന്നു. ഭൂകമ്പ​വും അഗ്നിനാ​വു​ക​ളും കൊല​യാ​ളി​ത്തി​ര​മാ​ല​ക​ളും ചേർന്ന്‌ ആ നഗരത്തി​ലെ 60,000-ത്തിലധി​കം പേരെ കൊ​ന്നൊ​ടു​ക്കി.

എന്നാൽ, ഇവി​ടെ​യും വിപത്തു​ക​ളു​ടെ വ്യാപ്‌തി ഒരു പരിധി​വരെ മനുഷ്യ​രു​ടെ പ്രവർത്ത​ന​ങ്ങളെ ആശ്രയി​ച്ചി​രി​ക്കു​ന്നു. വിപത്‌സാ​ധ്യ​ത​യേ​റിയ പ്രദേ​ശ​ങ്ങ​ളി​ലെ വർധിച്ച ജനസാ​ന്ദ്ര​ത​യാണ്‌ ഒരു ഘടകം. “ലോക​ത്തി​ലെ വൻനഗ​ര​ങ്ങ​ളിൽ പകുതി​യോ​ള​വും ഇപ്പോൾ ഭൂകമ്പ​സാ​ധ്യ​ത​യുള്ള മേഖല​ക​ളി​ലാ​ണു സ്ഥിതി​ചെ​യ്യു​ന്നത്‌” എന്ന്‌ ഗ്രന്ഥകാ​ര​നായ ആൻഡ്രൂ റോബിൻസൺ പറയുന്നു. കെട്ടി​ടങ്ങൾ—അവ നിർമി​ക്കാൻ ഉപയോ​ഗി​ക്കുന്ന പദാർഥ​ങ്ങ​ളും ഘടനയു​ടെ ഗുണനി​ല​വാ​ര​വും—ആണ്‌ മറ്റൊരു ഘടകം. “ഭൂകമ്പങ്ങൾ ആളുകളെ കൊല്ലു​ന്നില്ല; കെട്ടി​ട​ങ്ങ​ളാ​ണു കൊല്ലു​ന്നത്‌” എന്ന പഴമൊ​ഴി ഒട്ടുമി​ക്ക​പ്പോ​ഴും ശരി​യെന്നു തെളി​യു​ക​യാണ്‌. എന്നാൽ ഭൂകമ്പത്തെ പ്രതി​രോ​ധി​ക്കുന്ന തരത്തി​ലുള്ള കെട്ടി​ടങ്ങൾ പണിയാ​നുള്ള സാമ്പത്തിക ശേഷി​യി​ല്ലാ​ത്തവർ എന്തു ചെയ്യാ​നാണ്‌?

അഗ്നിപർവ​തങ്ങൾ—സൃഷ്ടി​യി​ലും സംഹാ​ര​ത്തി​ലും

“നിങ്ങൾ ഈ വാക്കുകൾ വായി​ക്കുന്ന സമയത്ത്‌ 20 അഗ്നിപർവ​ത​ങ്ങ​ളെ​ങ്കി​ലും പൊട്ടി​ത്തെ​റി​ക്കു​ന്നു​ണ്ടാ​കാം” എന്ന്‌ ഐക്യ​നാ​ടു​ക​ളി​ലെ സ്‌മി​ത്‌സോ​ണി​യൻ ഇൻസ്റ്റി​റ്റ്യൂ​ട്ടി​ന്റെ ഒരു റിപ്പോർട്ട്‌ പറയുന്നു. പൊതു​വേ പറഞ്ഞാൽ, ഭൂകമ്പ​ങ്ങ​ളും അഗ്നിപർവ​ത​ങ്ങ​ളും സമാന​മായ സ്ഥാനങ്ങ​ളി​ലാണ്‌ ഉണ്ടാകു​ന്ന​തെന്നു ഫലകചലന സിദ്ധാന്തം പറയുന്നു. വിള്ളലു​കൾ പ്രത്യേ​കി​ച്ചും കടൽത്ത​റ​യി​ലെ വിള്ളലു​കൾ, ബഹിരാ​വ​ര​ണ​ത്തിൽനിന്ന്‌ (mantle) ദ്രവശില പുറ​ത്തേക്കു വരുന്ന ഭൂവൽക്ക​ത്തി​ലെ വിടവു​കൾ, ഒരു ഫലകം മറ്റൊ​ന്നിന്‌ അടിയി​ലേക്കു താഴ്‌ന്നു​പോ​കുന്ന മേഖലകൾ (സബ്‌ഡ​ക്‌ഷൻ സോണു​കൾ) എന്നിവ​യാണ്‌ ആ സ്ഥാനങ്ങൾ.

സബ്‌ഡ​ക്‌ഷൻ സോണു​ക​ളിൽ നടക്കുന്ന അഗ്നിപർവത പ്രവർത്ത​ന​മാണ്‌ ആളുകൾക്ക്‌ ഏറ്റവും വലിയ ഭീഷണി ഉയർത്തു​ന്നത്‌. അവയുടെ സ്‌ഫോ​ടന നിരക്ക്‌ കൂടു​ത​ലാണ്‌ എന്നതും ജനവാ​സ​മുള്ള പ്രദേ​ശ​ങ്ങൾക്ക്‌ അരികെ അവ ഉണ്ടാകു​ന്നു എന്നതു​മാ​ണു കാരണം. അഗ്നിവ​ളയം എന്നു വിളി​ക്ക​പ്പെ​ടുന്ന പസിഫിക്‌ റിമ്മിൽ അത്തരം നൂറു​ക​ണ​ക്കിന്‌ അഗ്നിപർവ​ത​ങ്ങ​ളുണ്ട്‌. ചെറിയ ഒരു സംഖ്യ, ഫലകങ്ങ​ളു​ടെ അതിരു​ക​ളിൽനിന്ന്‌ അകലെ​യുള്ള ഉഷ്‌ണ​സ്ഥാ​ന​ങ്ങ​ളി​ലും (hot spots) കാണ​പ്പെ​ടു​ന്നു. ഹവായ്‌ ദ്വീപു​കൾ, ഏസോർസ്‌, ഗാലപ​ഗോസ്‌ ദ്വീപു​കൾ, സൊ​സൈറ്റി ദ്വീപു​കൾ ഇവയെ​ല്ലാം ഉഷ്‌ണ​സ്ഥാ​ന​ങ്ങ​ളി​ലെ അഗ്നിപർവത പ്രവർത്ത​ന​ത്തി​ന്റെ ഫലമായി ഉണ്ടായ​താ​ണെന്നു കരുത​പ്പെ​ടു​ന്നു.

വാസ്‌ത​വ​ത്തിൽ, അഗ്നിപർവ​തങ്ങൾ ഭൗമച​രി​ത്ര​ത്തിൽ സുദീർഘ​വും ക്രിയാ​ത്മ​ക​വു​മായ ഒരു പങ്കു വഹിച്ചി​ട്ടുണ്ട്‌. ഒരു യൂണി​വേ​ഴ്‌സി​റ്റി വെബ്‌ സൈറ്റ്‌ പറയു​ന്ന​ത​നു​സ​രിച്ച്‌ “എല്ലാ ഭൂഖണ്ഡ​ങ്ങ​ളു​ടെ​യും കടൽത്ത​ട്ടു​ക​ളു​ടെ​യും 90 ശതമാനം അഗ്നിപർവത പ്രവർത്ത​ന​ത്തി​ന്റെ സംഭാ​വ​ന​യാണ്‌.” എന്നാൽ, ചില സ്‌ഫോ​ട​നങ്ങൾ അങ്ങേയറ്റം രൗദ്ര​ഭാ​വം കൈ​ക്കൊ​ള്ളു​ന്നത്‌ എന്തു​കൊ​ണ്ടാണ്‌?

ഭൂമി​യു​ടെ ചുട്ടു​പ​ഴുത്ത ഉള്ളറയിൽനി​ന്നു ദ്രവശില പുറത്തു​ചാ​ടു​ന്ന​തോ​ടെ​യാണ്‌ സ്‌ഫോ​ട​ന​ത്തി​ന്റെ തുടക്കം. ചില അഗ്നിപർവ​ത​ങ്ങ​ളിൽനി​ന്നു ലാവ സാവധാ​ന​മാ​ണു പുറത്തു ചാടു​ന്നത്‌, അതു​കൊ​ണ്ടു​തന്നെ അത്‌ കുത്തി​യൊ​ഴു​കി​ച്ചെന്ന്‌ ആളുകളെ അവർ പ്രതീ​ക്ഷി​ക്കാത്ത നേരത്തു വിഴു​ങ്ങി​ക്ക​ള​യു​ന്നില്ല. എന്നാൽ മറ്റുചി​ലത്‌ ഒരു അണു​ബോം​ബി​നെ​ക്കാൾ ശക്തി​യോ​ടെ​യാ​ണു പൊട്ടി​ത്തെ​റി​ക്കു​ന്നത്‌! അഗ്നിപർവ​തങ്ങൾ പൊട്ടി​ത്തെ​റി​ക്കാൻ ഇടയാ​ക്കുന്ന ദ്രവപ​ദാർഥ​ങ്ങ​ളു​ടെ ചേരു​വ​യും അവയുടെ കൊഴുത്ത്‌ ഒട്ടുന്ന ഘടനയും ആ പദാർഥ​ങ്ങ​ളിൽ അലിഞ്ഞു​ചേർന്നി​രി​ക്കുന്ന വാതക​ങ്ങ​ളു​ടെ​യും തിളച്ചു​മ​റി​യുന്ന ജലത്തി​ന്റെ​യും അളവു​മാണ്‌ ഇതു നിർണ​യി​ക്കുന്ന ഘടകങ്ങൾ. ദ്രവശില ഉപരി​ത​ല​ത്തോട്‌ അടുക്കു​മ്പോൾ അതിലുള്ള വെള്ളവും വാതക​വും ദ്രുത​ഗ​തി​യിൽ വികസി​ക്കു​ന്നു. ദ്രവശി​ല​യു​ടെ ചേരുവ അനു​യോ​ജ്യ​മാ​ണെ​ങ്കിൽ, സോഡാ​ക്കു​പ്പി തുറക്കു​മ്പോൾ അതിലുള്ള സോഡാ ശക്തി​യോ​ടെ പുറ​ത്തേക്കു ചീറ്റു​ന്ന​തു​പോ​ലെ​യാ​യി​രി​ക്കും അഗ്നിപർവത മുഖത്തു​നി​ന്നു ദ്രവശില പുറ​ത്തേക്ക്‌ ഒഴുകു​ന്നത്‌.

സന്തോ​ഷ​ക​ര​മെന്നു പറയട്ടെ, അഗ്നിപർവ​തങ്ങൾ പലപ്പോ​ഴും പൊട്ടി​ത്തെ​റി​ക്കു​ന്ന​തി​നു മുമ്പ്‌ ‘അപായ​മണി’ മുഴക്കാ​റുണ്ട്‌. 1902-ൽ പൊട്ടി​ത്തെ​റിച്ച, മൗണ്ട്‌ പെലേ​യു​ടെ കാര്യ​ത്തിൽ അതു സത്യമാ​യി​രു​ന്നു. കരീബി​യൻ ദ്വീപായ മാർട്ടി​നി​ക്കിൽ സ്ഥിതി​ചെ​യ്യുന്ന ആ പർവതം ചാരം തുപ്പു​ന്നു​ണ്ടാ​യി​രു​ന്നു. സ്‌ഫോ​ട​ന​ത്തി​ന്റെ ലക്ഷണങ്ങൾ ആളുകളെ രോഗാ​തു​ര​രാ​ക്കി, നഗരം ഭീതി​യു​ടെ പിടി​യി​ല​മർന്നു. കടകൾ മിക്കതും ദിവസ​ങ്ങ​ളാ​യി അടഞ്ഞു​കി​ട​ക്കു​ക​യാ​യി​രു​ന്നു. ഇതൊ​ക്കെ​യാ​ണെ​ങ്കി​ലും, സമീപ​ത്തുള്ള സെന്റ്‌ പിയറിൽ തെര​ഞ്ഞെ​ടുപ്പ്‌ നടക്കാൻ പോകു​ക​യാ​യി​രു​ന്ന​തി​നാൽ നഗരത്തിൽത്തന്നെ തങ്ങാൻ രാഷ്‌ട്രീ​യ​ക്കാർ ആളുകളെ പ്രോ​ത്സാ​ഹി​പ്പി​ച്ചു.

മേയ്‌ 8-ന്‌ യേശു​വി​ന്റെ സ്വർഗാ​രോ​ഹ​ണ​ത്തി​രു​ന്നാൾ ആയിരു​ന്നു. അഗ്നിപർവ​ത​ത്തി​ന്റെ നീരാ​ളി​ക്കൈ​ക​ളിൽനി​ന്നു തങ്ങളെ വിടു​വി​ക്ക​ണ​മേ​യെന്ന്‌ പ്രാർഥി​ക്കാ​നാ​യി അനേക​രും കത്തോ​ലി​ക്കാ കത്തീ​ഡ്ര​ലി​ലേക്കു പോയി. അന്നു രാവിലെ 8 മണിയാ​കാ​റാ​യ​പ്പോൾ ചാരവും അഗ്നിപർവ​ത​ശി​ല​ക​ളും ചുട്ടു​പ​ഴുത്ത വാതക​ങ്ങ​ളും തുപ്പി​യെ​റി​ഞ്ഞു​കൊണ്ട്‌ മൗണ്ട്‌ പെലേ പൊട്ടി​ത്തെ​റി​ച്ചു. പർവത​ത്തി​ന്റെ ഉള്ളറയിൽനി​ന്നു പുറത്തു​വന്ന ഈ പദാർഥ​ങ്ങ​ളു​ടെ താപനില 200 മുതൽ 500 വരെ ഡിഗ്രി സെൽഷ്യസ്‌ ആയിരു​ന്നു. ഭൂമിയെ പൊതി​ഞ്ഞു കിടന്ന മരണത്തി​ന്റെ കരി​മേഘം പർവത​ച്ചെ​രി​വു​ക​ളി​ലൂ​ടെ അതി​വേഗം ഒഴുകി​യി​റങ്ങി നഗരത്തെ വിഴുങ്ങി. 30,000-ത്തോളം പേർ അന്നു മരണത്തി​നു കീഴടങ്ങി. കൂടാതെ, അത്‌ പള്ളിമണി ഉരുക്കി​ക്ക​ള​യു​ക​യും തുറമു​ഖത്തെ കപ്പലു​കളെ അഗ്നിക്കി​ര​യാ​ക്കു​ക​യും ചെയ്‌തു. 20-ാം നൂറ്റാ​ണ്ടിൽ ഏറ്റവു​മ​ധി​കം മരണം വിതച്ച അഗ്നിപർവത സ്‌ഫോ​ട​ന​മാ​യി​രു​ന്നു അത്‌. എങ്കിലും, മുന്നറി​യി​പ്പിൻ സൂചന​കൾക്കു ചെവി​കൊ​ടു​ത്തി​രു​ന്നെ​ങ്കിൽ അത്രയ​ധി​കം ആളുകളെ മരണം തട്ടി​യെ​ടു​ക്കി​ല്ലാ​യി​രു​ന്നു.

പ്രകൃതി വിപത്തു​കൾ കൂടു​ത​ലാ​യി ആഞ്ഞടി​ക്കു​മോ?

കഴിഞ്ഞ ദശകത്തിൽ ഭൂഘട​ന​യു​ടെ ഭൗതിക മാറ്റങ്ങ​ളോ​ടും കാലാ​വ​സ്ഥ​യോ​ടും ബന്ധപ്പെട്ട വിപത്തു​ക​ളിൽ 60 ശതമാ​ന​ത്തി​ലേറെ വർധന​യു​ണ്ടാ​യെന്ന്‌ റെഡ്‌​ക്രോസ്‌, റെഡ്‌ ക്രെസന്റ്‌ സൊ​സൈ​റ്റി​ക​ളു​ടെ അന്താരാ​ഷ്‌ട്ര ഫെഡ​റേഷൻ അവരുടെ ലോക വിപത്ത്‌ റിപ്പോർട്ട്‌ 2004-ൽ (ഇംഗ്ലീഷ്‌) പറയുന്നു. “ഇത്‌ ദീർഘ​കാല പ്രവണ​ത​കളെ പ്രതി​ഫ​ലി​പ്പി​ക്കു​ന്നു” എന്ന്‌ ഡിസംബർ 26-ന്‌ ഇന്ത്യൻ മഹാസ​മു​ദ്ര​ത്തിൽ വിനാ​ശ​കാ​രി​ക​ളായ രാക്ഷസ​ത്തി​ര​മാ​ലകൾ രൂപം​കൊ​ള്ളു​ന്ന​തി​നു മുമ്പു പ്രസി​ദ്ധീ​ക​രിച്ച ആ റിപ്പോർട്ട്‌ പറയുന്നു. വിപത്‌സാ​ധ്യത കൂടു​ത​ലുള്ള പ്രദേ​ശ​ങ്ങ​ളി​ലെ ജനസംഖ്യ ഇനിയും ഉയർന്നു​കൊ​ണ്ടി​രി​ക്കു​ക​യും വനങ്ങൾ തുടർന്നും വെട്ടി​വെ​ളു​പ്പി​ക്കു​ക​യും ആണെങ്കിൽ തീർച്ച​യാ​യും പ്രതീ​ക്ഷ​യ്‌ക്ക്‌ ഒട്ടും​തന്നെ വകയില്ല.

കൂടാതെ, പല വ്യവസാ​യ​വ​ത്‌കൃത രാജ്യ​ങ്ങ​ളും അന്തരീ​ക്ഷ​ത്തി​ലേക്കു കൂടുതൽ ഹരിത​ഗൃഹ വാതകങ്ങൾ പുറന്ത​ള്ളി​ക്കൊ​ണ്ടി​രി​ക്കു​ക​യാണ്‌. സയൻസ്‌ മാസി​ക​യിൽ വന്ന ഒരു മുഖ​പ്ര​സം​ഗം പറയു​ന്ന​ത​നു​സ​രിച്ച്‌, ഉത്സർജി​ക്ക​പ്പെ​ടുന്ന ഈ വാതക​ങ്ങ​ളു​ടെ അളവു കുറയ്‌ക്കാ​നുള്ള ശ്രമങ്ങൾ നീട്ടി​വെ​ക്കു​ന്നത്‌ “രോഗ​ബാധ ഉണ്ടാകു​മ്പോൾത്തന്നെ മരുന്നു കഴിക്കാ​തി​രി​ക്കു​ന്നതു പോ​ലെ​യാണ്‌. പിന്നീട്‌ വലിയ വില ഒടു​ക്കേ​ണ്ടി​വ​രു​മെന്ന്‌ ഉറപ്പാണ്‌.” ഒടു​ക്കേ​ണ്ടി​വ​രുന്ന വലിയ വിലയി​ലേക്കു വിരൽ ചൂണ്ടി​ക്കൊണ്ട്‌ വിപത്തു​ക​ളു​ടെ രൂക്ഷത കുറയ്‌ക്കു​ന്ന​തി​നെ പറ്റിയുള്ള ഒരു കനേഡി​യൻ റിപ്പോർട്ട്‌ ഇങ്ങനെ പ്രസ്‌താ​വി​ച്ചു: “സാർവ​ദേ​ശീയ [മനുഷ്യ]സമുദാ​യം കൈകാ​ര്യം ചെയ്‌തി​ട്ടു​ള്ള​തിൽവെച്ച്‌ ഏറ്റവും വ്യാപ​ക​വും അങ്ങേയറ്റം സ്വാധീ​നം ചെലു​ത്തു​ന്ന​തു​മായ പാരി​സ്ഥി​തിക പ്രശ്‌ന​മാണ്‌ കാലാ​വസ്ഥാ വ്യതി​യാ​നം.”

എന്നിരു​ന്നാ​ലും, സാർവ​ദേ​ശീയ മനുഷ്യ​സ​മു​ദാ​യ​ത്തിന്‌ ഇപ്പോൾ മനുഷ്യ​ന്റെ പ്രവർത്ത​നങ്ങൾ ആഗോ​ള​ത​പ​ന​ത്തിന്‌ ഇടയാ​ക്കു​ന്നു​ണ്ടോ​യെന്ന കാര്യ​ത്തിൽപ്പോ​ലും യോജി​ക്കാ​നാ​കു​ന്നില്ല. അപ്പോൾപ്പി​ന്നെ അത്‌ എങ്ങനെ നിയ​ന്ത്രി​ക്കാം എന്നതിന്റെ കാര്യം പറയാ​നു​ണ്ടോ? ഈ സ്ഥിതി​വി​ശേഷം ബൈബിൾ ചൂണ്ടി​ക്കാ​ണി​ക്കുന്ന പിൻവ​രുന്ന വസ്‌തുത മനസ്സി​ലേക്കു കൊണ്ടു​വ​രു​ന്നു: ‘മനുഷ്യ​ന്നു തന്റെ കാലടി​കളെ നേരെ ആക്കുന്നതു സ്വാധീ​നമല്ല.’ (യിരെ​മ്യാ​വു 10:23) എന്നിരു​ന്നാ​ലും, നാം അടുത്ത ലേഖന​ത്തിൽ കാണാൻ പോകു​ന്ന​തു​പോ​ലെ സാഹച​ര്യം ആശയറ്റതല്ല. മനുഷ്യ​സ​മൂ​ഹ​ത്തി​ലെ പ്രക്ഷുബ്ധ സാഹച​ര്യ​ങ്ങൾ ഉൾപ്പെ​ടെ​യുള്ള ഇന്നത്തെ കഷ്ടപ്പാ​ടു​കൾ, അവയിൽനി​ന്നെ​ല്ലാ​മുള്ള മോചനം ആസന്നമാണ്‌ എന്നതിന്റെ കൂടു​ത​ലായ തെളി​വാണ്‌. (g05 7/22)

[അടിക്കു​റിപ്പ്‌]

[6-ാം പേജിലെ ചതുരം/ചിത്രം]

ഒരു ചോള​വ​യ​ലിൽ അഗ്നിപർവതം മുളച്ച​പ്പോൾ

വർഷം 1943. മെക്‌സി​ക്കോ​യി​ലെ ഒരു ചോള കർഷകൻ തന്റെ വയലിൽ ചോള​ത്തി​നു പുറമെ മറ്റൊ​ന്നു​കൂ​ടെ വളർന്നു​വ​രു​ന്നതു കണ്ടു. വയലിൽ ആയിരി​ക്കെ നിലത്തു വിള്ളലു​കൾ പ്രത്യ​ക്ഷ​പ്പെ​ടു​ന്നത്‌ അദ്ദേഹ​ത്തി​ന്റെ ശ്രദ്ധയിൽപ്പെട്ടു. പിറ്റേ​ന്നാ​യ​പ്പോ​ഴേ​ക്കും വിള്ളലു​കൾ ഒരു ചെറിയ അഗ്നിപർവ​ത​മാ​യി മാറി​യി​രു​ന്നു. പിറ്റേ ആഴ്‌ച​യിൽ കോണാ​കൃ​തി​യി​ലുള്ള ആ കുന്ന്‌ 150 മീറ്റർ ഉയരം പ്രാപി​ച്ചു. ഒരു വർഷം കഴിഞ്ഞ​പ്പോൾ അതിന്റെ ഉയരം 360 മീറ്റർ ആയി. ഒടുവിൽ അത്‌ 430 മീറ്റർ ഉയരത്തി​ലെത്തി. സമു​ദ്ര​നി​ര​പ്പിൽനി​ന്നുള്ള അതിന്റെ ഉയരം 2,775 മീറ്ററാണ്‌. പാരി​കൂ​ട്ടിൻ എന്നു പേരുള്ള ആ ജ്വാലാ​മു​ഖി 1952-ൽ പെട്ടെന്നു സുഷു​പ്‌തി​യി​ലാ​ണ്ടു. പിന്നെ അത്‌ പൊട്ടി​ത്തെ​റി​ച്ചി​ട്ടേ​യില്ല.

[കടപ്പാട്‌]

U. S. Geological Survey/Photo by R. E. Wilcox

[8-ാം പേജിലെ ചതുരം/ചിത്രം]

ദൈവം ജനതകളെ വിപത്തിൽനി​ന്നു രക്ഷിച്ച​പ്പോൾ

പ്രകൃതി വിപത്തു​ക​ളു​ടെ ഒരു രൂപമാണ്‌ ക്ഷാമം. രേഖ​പ്പെ​ടു​ത്തി​യി​രി​ക്കുന്ന ആദ്യകാല ക്ഷാമങ്ങ​ളി​ലൊന്ന്‌ പുരാതന ഈജി​പ്‌തി​ലാണ്‌ ഉണ്ടായത്‌. യാക്കോ​ബി​ന്റെ അഥവാ ഇസ്രാ​യേ​ലി​ന്റെ മകനായ യോ​സേ​ഫി​ന്റെ കാലത്താണ്‌ അവിടെ ക്ഷാമമു​ണ്ടാ​യത്‌. ഏഴു കൊല്ലം നീണ്ടു​നിന്ന ആ ക്ഷാമം ഈജി​പ്‌തി​നെ​യും കനാ​നെ​യും മറ്റു ദേശങ്ങ​ളെ​യും ബാധിച്ചു. എന്നാൽ ആളുകൾ കൂട്ട​ത്തോ​ടെ പട്ടിണി കിടക്കാൻ അത്‌ ഇടയാ​ക്കി​യില്ല. എന്തു​കൊ​ണ്ടെ​ന്നാൽ ക്ഷാമം ഉണ്ടാകു​ന്ന​തിന്‌ ഏഴു വർഷം മുമ്പു​തന്നെ യഹോ​വ​യാം ദൈവം അതേക്കു​റി​ച്ചു മുന്നറി​യി​പ്പു നൽകി​യി​രു​ന്നു. ക്ഷാമത്തി​നു മുമ്പുള്ള ആ വർഷങ്ങൾ ഈജി​പ്‌തിൽ സമൃദ്ധി​യു​ടെ കാലമാ​യി​രി​ക്കു​മെ​ന്നും യഹോവ വെളി​പ്പെ​ടു​ത്തി. ദൈവ​ത്തി​ന്റെ ഇടപെ​ട​ലി​ലൂ​ടെ പ്രധാ​ന​മ​ന്ത്രി​യും ഭക്ഷ്യ കാര്യ​വി​ചാ​ര​ക​നും ആയിത്തീർന്നി​രുന്ന ദൈവ​ഭ​ക്ത​നായ യോ​സേ​ഫി​ന്റെ നേതൃ​ത്വ​ത്തിൽ ഈജി​പ്‌തു​കാർ ‘അളപ്പാൻ കഴിയാ​ത്തത്ര’ ധാന്യം സംഭരി​ച്ചു​വെച്ചു. അങ്ങനെ ഈജി​പ്‌തിന്‌, അവി​ടെ​യു​ള്ള​വരെ മാത്രമല്ല, യോ​സേ​ഫി​ന്റെ കുടും​ബം ഉൾപ്പെടെ ‘സകല​ദേ​ശ​ക്കാ​രെ​യും’ തീറ്റി​പ്പോ​റ്റാൻ കഴിഞ്ഞു.—ഉല്‌പത്തി 41:49, 57; 47:11, 12.

[7-ാം പേജിലെ ചിത്രങ്ങൾ]

ഹെയ്‌റ്റി 2004 വെള്ളം​ക​യ​റിയ തെരു​വു​ക​ളി​ലൂ​ടെ ആൺകു​ട്ടി​കൾ കുടി​വെള്ളം ചുമന്നു​കൊ​ണ്ടു​പോ​കു​ന്നു. കനത്ത വനനശീ​ക​രണം വൻതോ​തിൽ മണ്ണ്‌ കുത്തി​യൊ​ലി​ച്ചി​റ​ങ്ങു​ന്ന​തിന്‌ ഇടയാക്കി

[കടപ്പാട്‌]

പശ്ചാത്തലം: Sophia Pris/EPA/Sipa Press; ഉൾച്ചിത്രം: Carl Juste/Miami Herald/Sipa Press

[9-ാം പേജിലെ ചിത്രം]

പല രാഷ്‌ട്ര​ങ്ങ​ളും അന്തരീ​ക്ഷ​ത്തി​ലേക്കു ഹരിത​ഗൃഹ വാതകങ്ങൾ പുറന്ത​ള്ളി​ക്കൊ​ണ്ടി​രി​ക്കു​ക​യാണ്‌

[കടപ്പാട്‌]

© Mark Henley/Panos Pictures