നിയമിത സമയത്തോടു പറ്റിനിൽക്കൽ, ആനുപാതികമായിവിഭജിക്കൽ

മുഖ്യ ഊന്നൽ പഠിപ്പിക്കലിന്റെ ഗുണനിലവാരത്തിനാണു നൽകേണ്ടതെങ്കിലും സമയത്തിനും ശ്രദ്ധ കൊടുക്കണം. നമ്മുടെ യോഗങ്ങൾ തുടങ്ങുന്നതിനും അവസാനിക്കുന്നതിനും നിശ്ചിത സമയം പട്ടികപ്പെടുത്തിയിട്ടുണ്ട്‌. ഈ സമയത്തോട്‌ പറ്റിനിൽക്കാൻ കഴിയണമെങ്കിൽ, പരിപാടിയിൽ പങ്കെടുക്കുന്ന എല്ലാവരുടെയും സഹകരണം ആവശ്യമാണ്‌.

ബൈബിൾ കാലങ്ങളിൽ, ജീവിതത്തെ സംബന്ധിച്ച ആളുകളുടെ വീക്ഷണം ഇന്നു മിക്കയിടങ്ങളിലും ഉള്ള ആളുകളുടേതിൽനിന്നു വ്യത്യസ്‌തമായിരുന്നു. സമയം സൂചിപ്പിക്കാൻ ‘ഏകദേശം ഒമ്പതാംമണി നേരം’ അല്ലെങ്കിൽ “ഏകദേശം പത്താംമണി നേരം” തുടങ്ങിയ, ഏകദേശ സമയം കാണിക്കുന്ന പദപ്രയോഗങ്ങൾ ആണ്‌ ഉപയോഗിച്ചിരുന്നത്‌. (മത്താ. 27:46; യോഹ. 1:39) ദൈനംദിന പ്രവർത്തനങ്ങളുടെ കാര്യത്തിൽ കൃത്യസമയം പാലിക്കേണ്ടതിന്റെ ആവശ്യം സാധാരണഗതിയിൽ നേരിട്ടിരുന്നില്ല. ഇന്നും ലോകത്തിന്റെ ചില ഭാഗങ്ങളിൽ സമയത്തിന്റെ കാര്യത്തിൽ സമാനമായ ഒരു വീക്ഷണമാണ്‌ ഉള്ളത്‌.

എന്നാൽ, നാട്ടുനടപ്പോ വ്യക്തിപരമായ ഇഷ്ടാനിഷ്ടങ്ങളോ സമയത്തിന്റെ കാര്യത്തിൽ കുറെയൊക്കെ അയവുള്ളവരായിരിക്കാൻ ആളുകളെ പ്രേരിപ്പിച്ചേക്കാമെങ്കിലും അതിന്‌ ഉചിതമായ ശ്രദ്ധ നൽകാൻ പഠിക്കുന്നത്‌ വളരെ പ്രയോജനം ചെയ്യും. ഒരു പരിപാടിയുടെ ഭാഗങ്ങൾ പലർക്കു നിയമിച്ചുകൊടുത്തിട്ടുള്ളപ്പോൾ ഓരോ ഭാഗത്തിനും അനുവദിച്ചിരിക്കുന്ന സമയത്തോടു പറ്റിനിൽക്കുന്നതിൽ ശ്രദ്ധ വേണം. “സകലവും ഉചിതമായും ക്രമമായും നടക്കട്ടെ” എന്ന തത്ത്വം നമ്മുടെ യോഗനിയമനങ്ങളുടെ സമയപാലനത്തിന്റെ കാര്യത്തിൽ നന്നായി ബാധകമാക്കാൻ കഴിയും.​—1 കൊരി. 14:⁠39ബി.

നിയമിത സമയത്തോടു പറ്റിനിൽക്കാവുന്ന വിധം. അതിനുള്ള താക്കോൽ തയ്യാറാകലാണ്‌. സാധാരണഗതിയിൽ, നിയമിത സമയത്തോടു പറ്റിനിൽക്കുന്ന കാര്യത്തിൽ ബുദ്ധിമുട്ട്‌ ഉണ്ടാകുന്നത്‌ വേണ്ടത്ര തയ്യാറാകാത്ത പ്രസംഗകർക്കാണ്‌. അവർ അമിത ആത്മവിശ്വാസം ഉള്ളവരായിരിക്കാം. അല്ലെങ്കിൽ അവർ പ്രത്യേകിച്ച്‌ കാരണമൊന്നും ഇല്ലാതെ തയ്യാറാകൽ അവസാന നിമിഷത്തേക്കു മാറ്റിവെച്ചേക്കാം. നിയമനത്തോടുള്ള വിലമതിപ്പും നന്നായി തയ്യാറാകാനുള്ള മനസ്സൊരുക്കവും ആണ്‌ ശരിയായ സമയപാലനത്തിനുള്ള ഏറ്റവും അടിസ്ഥാന ഘടകങ്ങൾ.

വായനാ നിയമനമാണോ നിങ്ങൾക്കുള്ളത്‌? ആദ്യംതന്നെ ഒഴുക്ക്‌, നിറുത്തൽ, മുഖ്യ പദങ്ങൾ ഊന്നിപ്പറയൽ, മുഖ്യ ആശയങ്ങൾ ഊന്നിപ്പറയൽ തുടങ്ങിയവയെ കുറിച്ചു ചർച്ച ചെയ്യുന്ന 4 മുതൽ 7 വരെയുള്ള പാഠങ്ങൾ പുനരവലോകനം ചെയ്യുക. തുടർന്ന്‌, നിങ്ങൾക്കു നിയമിച്ചു തന്നിരിക്കുന്ന വിവരങ്ങൾ ഉറക്കെ വായിക്കവേ ആ ബുദ്ധിയുപദേശം ബാധകമാക്കുക. സമയം ക്രമപ്പെടുത്തുക. നിയമിത സമയത്തിനുള്ളിൽ തീർക്കുന്നതിന്‌ നിങ്ങൾ കൂടുതൽ വേഗത്തിൽ വായിക്കേണ്ടതുണ്ടോ? പ്രാധാന്യം കുറഞ്ഞ ഭാഗങ്ങളിൽ വായനയുടെ വേഗം വർധിപ്പിക്കുക. എന്നാൽ, മുഖ്യ ആശയങ്ങൾക്ക്‌ ഊന്നൽ നൽകാനായി നിറുത്തുകയും വേഗം കുറയ്‌ക്കുകയും ചെയ്‌തുകൊണ്ടിരിക്കുക. പലയാവർത്തി പരിശീലിക്കുക. ഒഴുക്ക്‌ മെച്ചപ്പെടുമ്പോൾ സമയം ക്രമീകരിക്കുക കൂടുതൽ എളുപ്പമായിത്തീരും.

നിങ്ങൾ നോട്ട്‌ ഉപയോഗിച്ച്‌ പ്രസംഗം നടത്തുകയായിരിക്കുമോ? നിയമിത സമയത്തോടു പറ്റിനിൽക്കുന്നതിന്‌ നിങ്ങളുടെ നോട്ട്‌ ഏതാണ്ടൊരു വായനാപ്രസംഗ നോട്ടുപോലെ വളരെ വിപുലമായിരിക്കേണ്ടതില്ല. 25-ാം പാഠത്തിലൂടെ നിങ്ങൾ മെച്ചപ്പെട്ട ഒരു മാർഗം പഠിച്ചു. ഈ അഞ്ചു പോയിന്റുകൾ മനസ്സിൽ പിടിക്കുക: (1) നല്ല വിവരങ്ങൾ തയ്യാറാകുക, എന്നാൽ വിവരങ്ങൾ അധികമായി പോകരുത്‌. (2) മുഖ്യ ആശയങ്ങൾ വ്യക്തമായി മനസ്സിൽ പിടിക്കുക. എന്നാൽ വാചകങ്ങൾ അപ്പാടെ മനഃപാഠമാക്കരുത്‌. (3) പ്രസംഗത്തിന്റെ ഓരോ ഭാഗത്തിനും നിങ്ങൾ എത്രമാത്രം സമയം ഉപയോഗിക്കാൻ ഉദ്ദേശിക്കുന്നുവെന്ന്‌ അല്ലെങ്കിൽ ചില പോയിന്റുകളിൽ എത്തുമ്പോൾ എത്രമാത്രം സമയം പിന്നിട്ടിരിക്കണമെന്ന്‌ നിങ്ങളുടെ ബാഹ്യരേഖയിൽ രേഖപ്പെടുത്തുക. (4) തയ്യാറാകുന്ന സമയത്ത്‌, സമയം കൂടുതൽ എടുക്കുന്നതായി കണ്ടെത്തുന്ന പക്ഷം വിട്ടുകളയാനാകുന്ന വിശദാംശങ്ങൾ ഏവയെന്നു നോക്കിവെക്കുക. (5) അവതരണം പരിശീലിക്കുക.

പ്രസംഗം പരിശീലിക്കേണ്ടതു പ്രധാനമാണ്‌. പരിശീലിക്കുമ്പോൾ, പ്രസംഗത്തിന്റെ ഓരോ ഭാഗത്തിനും എത്ര സമയം എടുക്കുന്നുവെന്നു നിരീക്ഷിക്കുക. മുഴു പ്രസംഗവും നിയമിത സമയത്തിനുള്ളിൽ തീർക്കാൻ കഴിയുന്നതുവരെ അതു വീണ്ടും വീണ്ടും പരിശീലിക്കുക. വളരെയേറെ വിവരങ്ങൾ കുത്തിത്തിരുകാൻ ശ്രമിക്കരുത്‌. സദസ്സിന്റെ മുമ്പാകെ പ്രസംഗം അവതരിപ്പിക്കുമ്പോൾ വീട്ടിലിരുന്നു പരിശീലിക്കുമ്പോഴത്തേതിലും അൽപ്പം കൂടെ സമയം എടുത്തേക്കാം എന്നതിനാൽ അതുകൂടി കണക്കാക്കി വേണം തയ്യാറാകാൻ.

പ്രസംഗം ആനുപാതികമായി വിഭജിക്കൽ. നിയമിത സമയത്തോടു പറ്റിനിൽക്കുന്നത്‌ പ്രസംഗത്തിന്റെ ശരിയായ വിഭജനവുമായി അടുത്തു ബന്ധപ്പെട്ടിരിക്കുന്നു. സമയത്തിന്റെ സിംഹഭാഗവും പ്രസംഗത്തിന്റെ ഉടൽ അവതരിപ്പിക്കാൻ വേണ്ടിയാണു ചെലവഴിക്കേണ്ടത്‌. മുഖ്യ പോയിന്റുകൾ അവിടെയാണ്‌ ഉള്ളത്‌. മുഖവുരയ്‌ക്ക്‌, 38-ാം പാഠത്തിൽ ചർച്ച ചെയ്‌തിരിക്കുന്ന മൂന്നു ലക്ഷ്യങ്ങൾ കൈവരിക്കാൻ ആവശ്യമായത്ര ദൈർഘ്യമേ ഉണ്ടാകാവൂ. 39-ാം പാഠത്തിൽ ചർച്ച ചെയ്‌തിരിക്കുന്ന വിവരങ്ങൾക്കു ചേർച്ചയിൽ ഫലപ്രദമായ ഒരു ഉപസംഹാരം അവതരിപ്പിക്കാൻ സമയം തികയാതെ വരുമാറ്‌ ഉടലിന്റെ ദൈർഘ്യം കൂടിപ്പോകാനും പാടില്ല.

നിയമിത സമയത്തോടു പറ്റിനിൽക്കാനുള്ള നിങ്ങളുടെ ശ്രമങ്ങൾ മെച്ചപ്പെട്ട ഒരു പ്രസംഗം നടത്താൻ നിങ്ങളെ സഹായിക്കും. കൂടാതെ പരിപാടിയിൽ പങ്കുള്ള മറ്റുള്ളവരോടും മുഴു സഭയോടു തന്നെയും ഉള്ള നിങ്ങളുടെ ആദരവിനെ അതു പ്രതിഫലിപ്പിക്കുകയും ചെയ്യും.