മലിനീ​ക​ര​ണത്തെ നീക്കം ചെയ്യൽ—ഹൃദയ​ത്തിൽനി​ന്നും മനസ്സിൽനി​ന്നും

യഹോവ മനുഷ്യന്‌ അഴുക്കി​നോ​ടോ ക്രമരാ​ഹി​ത്യ​ത്തോ​ടോ ഉള്ള ഒരു വാഞ്‌ഛ നൽകി​യി​ട്ടില്ല. അവരുടെ ഗ്രഹഭ​വനം ശുചി​ത്വ​വും ക്രമവും അഴകും ഉള്ള ഒരു പറുദീ​സ​യാ​യി​രി​ക്കാ​നാ​ണു രൂപക​ല്‌പന ചെയ്യ​പ്പെ​ട്ടത്‌. അതു സുന്ദര​മ​ല്ലാത്ത ഒരു ചവററു​കൂ​ന​യാ​യി അധഃപ​തി​ക്കാൻ ദൈവം ഉദ്ദേശി​ച്ചി​രു​ന്നില്ല.—ഉല്‌പത്തി 2:8, 9.

എന്നുവ​രി​കി​ലും, ദിവ്യ​മാർഗ്ഗ​നിർദ്ദേശം തള്ളിക്ക​ള​ഞ്ഞ​തി​നു​ശേഷം മനുഷ്യർ തങ്ങളുടെ സ്വന്തം ലോക​ക്രമം പടുത്തു​യർത്താൻ തുടങ്ങി. ദിവ്യ​ജ്ഞാ​ന​ത്തി​ന്റെ ആനുകൂ​ല്യ​മി​ല്ലാ​ഞ്ഞ​തി​നാ​ലും അനുഭ​വ​പ​രി​ച​യ​ത്തി​ന്റെ കുറവി​നാ​ലും അവർ ശ്രമങ്ങ​ളി​ലൂ​ടെ​യും പരീക്ഷ​ണ​ങ്ങ​ളി​ലൂ​ടെ​യും പഠിക്കാൻ നിർബ​ന്ധി​ത​രാ​യി. മനുഷ്യർക്കു തങ്ങളേ​ത്തന്നെ വിജയ​ക​ര​മാ​യി ഭരിക്കാൻ കഴിയി​ല്ലെന്ന ബൈബിൾസ​ത്യ​ത്തെ ലൗകി​ക​ച​രി​ത്രം സ്ഥിരീ​ക​രി​ക്കു​ന്നു; ആയിര​ക്ക​ണ​ക്കി​നു വർഷങ്ങ​ളാ​യി “മനുഷ്യ​നു മനുഷ്യ​ന്റെ​മേൽ ദ്രോ​ഹ​ത്തി​നാ​യി അധികാര”മുണ്ടാ​യി​രു​ന്നു. (സഭാ​പ്ര​സം​ഗി 8:9; യിരെ​മ്യാ​വു 10:23) എല്ലാ രൂപങ്ങ​ളി​ലു​മുള്ള മലിനീ​ക​ര​ണ​ത്തി​ന്റെ ആധുനിക പ്രശ്‌നം, മമനു​ഷ്യ​ന്റെ ദുർഭ​ര​ണ​ത്തി​ന്റെ ഒരു പരിണ​ത​ഫ​ല​മാണ്‌.

ദൈവ​ത്തി​ന്റെ വീക്ഷണം സ്വീക​രി​ക്കൽ

ദൈവത്തെ പ്രസാ​ദി​പ്പി​ക്കാൻ ആഗ്രഹി​ക്കുന്ന ആളുകൾ ശുചി​ത്വം സംബന്ധിച്ച സ്രഷ്ടാ​വി​ന്റെ നിലവാ​ര​ങ്ങ​ള​നു​സ​രി​ച്ചു ജീവി​ക്കാൻ കഠിന​മാ​യി ശ്രമി​ക്കു​ന്നു. അങ്ങനെ, 1991-ന്റെ മദ്ധ്യത്തിൽ ചെക്കോ​സ്ലൊ​വാ​ക്യ​യി​ലെ പ്രാഗിൽ ഒരു സാർവ്വ​ദേ​ശീയ കൺ​വെൻ​ഷൻ നടത്താൻ തീരു​മാ​നി​ച്ച​പ്പോൾ യഹോ​വ​യു​ടെ സാക്ഷികൾ ഒരു പ്രശ്‌നത്തെ അഭിമു​ഖീ​ക​രി​ച്ചു.a ഏതാണ്ട്‌ 75,000 പേർ ഹാജരാ​കു​മാ​യി​രു​ന്നു, സ്‌ട്രാ​ഹോഫ്‌ സ്‌റേ​റ​ഡി​യ​ത്തിൽ അത്രയും വരുന്ന ഒരു ജനക്കൂ​ട്ടത്തെ സുഖ​പ്ര​ദ​മാ​യി ഇരുത്താൻ കഴിയു​മാ​യി​രു​ന്നു. പക്ഷേ സ്‌റേ​റ​ഡി​യം അഞ്ചു വർഷ​ത്തേക്ക്‌ ഉപയോ​ഗി​ച്ചി​രു​ന്നില്ല. നന്നാക്കാ​തെ കിടന്ന​തി​നാൽ അതു ശീതോ​ഷ്‌ണ​സ്ഥി​തി​ക്കി​ര​യാ​യി വൃത്തി​കെ​ട്ട​താ​യി​ത്തീർന്നു. ഏകദേശം 1,500 യഹോ​വ​യു​ടെ സാക്ഷികൾ 65,000-ലധികം മണിക്കൂ​റു​കൾ ചെലവ​ഴി​ച്ചു​കൊണ്ട്‌ അതിന്റെ ജീർണ്ണോ​ത്താ​രണം നടത്തു​ക​യും പെയിൻറ്‌ ചെയ്യു​ക​യും ചെയ്‌തു. കൺ​വെൻ​ഷൻ സമയമാ​യ​പ്പൊ​ഴേ​ക്കും ഈ ശുദ്ധീ​ക​ര​ണ​പ്ര​വർത്തനം സ്‌റേ​റ​ഡി​യത്തെ സത്യ​ദൈ​വ​മായ യഹോ​വയെ ആരാധി​ക്കു​ന്ന​തി​നു യോഗ്യ​മായ ഒരു സ്ഥലമാ​ക്കി​ത്തീർത്തു.

ശുചി​ത്വ​ത്തെ​യും ക്രമ​ത്തെ​യും ലോകം ഒട്ടും വിലമ​തി​ക്കാ​ത്ത​പ്പോൾ, വ്യത്യ​സ്‌ത​രാ​യി​രി​ക്കാൻ യഹോ​വ​യു​ടെ സാക്ഷി​കളെ പ്രേരി​പ്പി​ക്കു​ന്നത്‌ എന്താണ്‌? സ്വാർത്ഥത, പരിഗ​ണ​ന​യി​ല്ലായ്‌മ, അത്യാ​ഗ്രഹം, സ്‌നേ​ഹ​രാ​ഹി​ത്യം, എന്നിങ്ങ​നെ​യുള്ള ചീത്ത ശീലങ്ങളെ ക്രിസ്‌ത്യാ​നി​കൾ നീക്കം ചെയ്യണ​മെന്ന ബൈബിൾ ബുദ്ധ്യു​പ​ദേ​ശ​ത്തോ​ടുള്ള വിലമി​തപ്പ്‌. “നിങ്ങൾ പഴയ മനുഷ്യ​നെ അവന്റെ പ്രവൃ​ത്തി​ക​ളോ​ടു​കൂ​ടെ ഉരിഞ്ഞു​ക​ള​യുക” എന്നാണു ബൈബിൾ പറയു​ന്നത്‌. “തന്നെ സൃഷ്ടി​ച്ച​വന്റെ പ്രതി​മ​പ്ര​കാ​രം പരിജ്ഞാ​ന​ത്തി​ന്നാ​യി പുതുക്കം പ്രാപി​ക്കുന്ന പുതിയ മനുഷ്യ​നെ” അതിനു പകരം സ്ഥാപി​ക്കുക. ശുചി​ത്വം, ക്രമം, സൗന്ദര്യം എന്നിവ​യോ​ടുള്ള ഇഷ്ടം സ്വഭാ​വ​മാ​യി​രി​ക്കുന്ന ഒരു വ്യക്തി​ത്വ​ത്തിൽ മലിനീ​ക​ര​ണ​പ്ര​വ​ണ​ത​കൾക്ക്‌ ഇടമില്ല.—കൊ​ലൊ​സ്സ്യർ 3:9, 10; 2 കൊരി​ന്ത്യർ 7:1; ഫിലി​പ്പി​യർ 4:8; തീത്തൊസ്‌ 2:14.

അനിയ​ന്ത്രി​ത​മാ​യി മലിനീ​ക​രണം നടത്തു​ക​യോ ഗവൺമെൻറു​കൾ നിർമ്മി​ക്കുന്ന മലിനീ​ക​ര​ണ​വി​രുദ്ധ നിയമ​ങ്ങളെ ലംഘി​ച്ചു​കൊണ്ട്‌ അവയെ അവഗണി​ക്കു​ക​യോ ചെയ്യാതെ ക്രിസ്‌ത്യാ​നി​കൾ മലിനീ​ക​രണം സംബന്ധി​ച്ചു ബോധ​മു​ള്ള​വ​രാ​യി​രി​ക്ക​ണ​മെന്നു പുതിയ വ്യക്തി​ത്വം ആവശ്യ​പ്പെ​ടു​ന്നു. സാധനങ്ങൾ ചിതറി​ക്കി​ട​ക്കാൻ ഇടയാ​ക്കും​വി​ധം ഉപയോ​ഗ​മി​ല്ലാ​ത്ത​താ​യി എറിഞ്ഞു​ക​ള​യുന്ന, അലസ മനോ​ഭാ​വം ഒഴിവാ​ക്കാൻ അത്‌ അവരെ സഹായി​ക്കും. മററു​ള്ള​വ​രു​ടെ വസ്‌തു​വി​നോ​ടു ബഹുമാ​ന​മു​ണ്ടാ​യി​രി​ക്കാൻ പ്രോ​ത്സാ​ഹി​പ്പി​ക്കു​ന്ന​തി​നാൽ അതു കുത്തി​വ​ര​ക്കുന്ന സ്വഭാ​വത്തെ ആശയവി​നി​മ​യ​മാർഗ്ഗ​മാ​യോ നിർദ്ദോ​ഷ​ക​ര​മായ തമാശ​യാ​യോ മറെറാ​രു കലാരൂ​പ​മാ​യോ ഉപയോ​ഗി​ക്കു​ന്ന​തി​നെ തടയുന്നു. ഭവനങ്ങ​ളും, കാറു​ക​ളും, വസ്‌ത്ര​ങ്ങ​ളും, ശരീര​ങ്ങ​ളും വൃത്തി​യു​ള്ള​താ​യി സൂക്ഷി​ക്കാൻ അത്‌ ആവശ്യ​പ്പെ​ടു​ന്നു.—യാക്കോബ്‌ 1:21 താരത​മ്യം ചെയ്യുക.

ഈ പുതിയ വ്യക്തി​ത്വം ധരിക്കാൻ വിസമ്മ​തി​ക്കുന്ന ആളുക​ളു​ടെ കാര്യ​ത്തിൽ ദൈവം തന്റെ വരാൻപോ​കുന്ന പറുദീ​സ​യി​ലെ ജീവി​ത​ത്തിൽനിന്ന്‌ അവരെ തടയു​ന്ന​തി​നു ദൈവത്തെ കുററ​പ്പെ​ടു​ത്താൻ കഴിയു​മോ? ഒരിക്ക​ലു​മില്ല. മലിന​പ്പെ​ടു​ത്തു​ന്ന​തി​നുള്ള പ്രവണ​തകൾ ഹൃദയ​ത്തി​ലോ മനസ്സി​ലോ പിന്നെ​യും ഒളിഞ്ഞു​കി​ട​ക്കുന്ന ഏതൊ​രാ​ളും ഭൗമ​ഗ്ര​ഹ​ത്തി​ന്റെ പുനഃ​സ്ഥാ​പിത പറുദീ​സാ​തു​ല്യ മനോ​ഹാ​രി​തക്കു ഭീഷണി​യാ​കു​ക​യും ആ അവസ്ഥ നിലനിർത്താൻ ആഗ്രഹി​ക്കു​ന്ന​വരെ ദുഃഖ​ത്തി​ലാ​ഴ്‌ത്തു​ക​യും ചെയ്യും. “ഭൂമിയെ നശിപ്പി​ക്കു​ന്ന​വരെ നശിപ്പി​പ്പാ​നുള്ള” ദൈവ​ത്തി​ന്റെ തീരു​മാ​നം നീതി​നി​ഷ്‌ഠ​വും സ്‌നേ​ഹ​നിർഭ​ര​വു​മാണ്‌.—വെളി​പ്പാ​ടു 11:18; 21:8.

സജീവ പങ്കാളി​ത്തം?

എന്നിരു​ന്നാ​ലും ക്രിസ്‌ത്യാ​നി​കൾ മലിനീ​ക​ര​ണ​വി​രുദ്ധ നടപടി​കളെ അല്ലെങ്കിൽ ശുദ്ധീ​കരണ നടപടി​കളെ സജീവ​മാ​യി പ്രോ​ത്സാ​ഹി​പ്പി​ക്കേണ്ട ആവശ്യ​മു​ണ്ടെന്ന്‌ ഇത്‌ അർത്ഥമാ​ക്കു​ന്നു​ണ്ടോ?

മലിനീ​ക​ര​ണം ആരോ​ഗ്യ​ത്തി​നും പൊതു​സു​ര​ക്ഷി​ത​ത്വ​ത്തി​നും ഹാനി​ക​ര​മാ​ണെന്നു വ്യക്തമാണ്‌. യഹോവ ഇസ്ര​യേ​ല്യർക്കു കൊടുത്ത നിയമ​ങ്ങ​ളിൽനി​ന്നു നമുക്കു കാണാൻ കഴിയു​ന്ന​തു​പോ​ലെ, ഇത്തരം കാര്യ​ങ്ങ​ളിൽ യഹോ​വക്ക്‌ ഉചിത​മായ താത്‌പ​ര്യ​മുണ്ട്‌. (പുറപ്പാട്‌ 21:28-34; ആവർത്തനം 22:8; 23:12-14) എന്നാൽ പൊതു​സു​ര​ക്ഷി​ത​ത്വ​കാ​ര്യ​ങ്ങ​ളിൽ മററു​ള്ള​വരെ പക്ഷത്തു​ചേർക്കാൻ അവിടുന്ന്‌ ഒരിക്ക​ലും നിർദ്ദേ​ശി​ച്ചില്ല; ഒന്നാം നൂററാ​ണ്ടി​ലെ ക്രിസ്‌ത്യാ​നി​ക​ളോ​ടും അങ്ങനെ ചെയ്യാൻ ആവശ്യ​പ്പെ​ട്ടില്ല.

ഇന്ന്‌, പരിസ്ഥി​തി​വി​ഷ​യ​ങ്ങൾക്ക്‌ അനായാ​സേന രാഷ്‌ട്രീയ പ്രശ്‌ന​ങ്ങ​ളാ​യി മാറാൻ കഴിയും. വാസ്‌ത​വ​ത്തിൽ, പ്രത്യേ​കി​ച്ചും പരിസ്ഥി​തി​പ്ര​ശ്‌നങ്ങൾ പരിഹ​രി​ക്കുക എന്ന ഉദ്ദേശ്യ​ത്തിൽ ചില രാഷ്‌ട്രീയ പാർട്ടി​കൾ രൂപവൽക്ക​രി​ക്ക​പ്പെ​ട്ടി​ട്ടുണ്ട്‌. രാഷ്‌ട്രീയ ചേരി​ക​ളിൽ പക്ഷംപി​ടി​ക്കാൻ സ്വയം അനുവ​ദി​ക്കുന്ന ഒരു ക്രിസ്‌ത്യാ​നി മേലാൽ രാഷ്‌ട്രീ​യ​മാ​യി നിഷ്‌പ​ക്ഷനല്ല. യേശു തന്റെ ശിഷ്യർക്കു​വേണ്ടി “ഞാൻ ലൌകി​ക​ന​ല്ലാ​ത്ത​തു​പോ​ലെ അവരും ലൌകി​കൻമാ​രല്ല” എന്ന തത്ത്വം സ്ഥാപിച്ചു. ഈ വ്യവസ്ഥയെ അവഗണി​ക്കുന്ന ഒരു ക്രിസ്‌ത്യാ​നി “നശിച്ചു​പോ​കു​ന്ന​വ​രായ ഈ ലോക​ത്തി​ന്റെ പ്രഭു​ക്കൻമാ​രോ”ടൊപ്പം അണിനി​ര​ക്കു​ന്ന​തി​ന്റെ അപകട​ത്തി​ലാ​കു​ക​യാ​യി​രി​ക്കും.—യോഹ​ന്നാൻ 17:16; 1 കൊരി​ന്ത്യർ 2:6.

യേശു തന്റെ നാളിലെ സകല സാമൂ​ഹിക പ്രശ്‌ന​ങ്ങ​ളും പരിഹ​രി​ക്കാൻ ശ്രമി​ച്ചില്ല; അങ്ങനെ ചെയ്യാൻ അവിടു​ന്നു തന്റെ ശിഷ്യൻമാ​രോ​ടും പറഞ്ഞില്ല. അവരോ​ടുള്ള അവിടു​ത്തെ കല്‌പന ഇതായി​രു​ന്നു: “സ്‌നാനം കഴിപ്പി​ച്ചും ഞാൻ നിങ്ങ​ളോ​ടു കല്‌പി​ച്ചതു ഒക്കെയും പ്രമാ​ണി​പ്പാൻ തക്കവണ്ണം ഉപദേ​ശി​ച്ചും​കൊ​ണ്ടു സകലജാ​തി​ക​ളെ​യും ശിഷ്യ​രാ​ക്കി​ക്കൊൾവിൻ.” പരിസ്ഥി​തി നയങ്ങ​ളെ​പ്പ​ററി അവിടുന്ന്‌ അവരോ​ടു കല്‌പി​ച്ചില്ല.—മത്തായി 28:19, 20.

ഒരു ക്രിസ്‌ത്യാ​നി​യു​ടെ ജീവി​ത​ത്തിൽ മുൻഗ​ണ​ന​യു​ണ്ടാ​യി​രി​ക്കേ​ണ്ടത്‌ എന്തിനാ​ണെന്നു വിശദീ​ക​രി​ച്ചു​കൊ​ണ്ടു ക്രിസ്‌തു പറഞ്ഞു: “മുമ്പെ അവന്റെ രാജ്യ​വും നീതി​യും അന്വേ​ഷി​പ്പിൻ.” (മത്തായി 6:33) മിശി​ഹൈ​ക​രാ​ജ്യം മുഖേന യഹോവ തന്റെ നീതി​യുള്ള തത്ത്വങ്ങൾ ആഗോ​ള​ത​ല​ത്തിൽ നടപ്പി​ലാ​ക്കു​മ്പോൾ എല്ലാവ​രെ​യും തൃപ്‌തി​പ്പെ​ടു​ത്തി​ക്കൊ​ണ്ടു പരിസ്ഥി​തി​പ്ര​ശ്‌നങ്ങൾ സ്ഥിരമാ​യി പരിഹ​രി​ക്ക​പ്പെ​ടും.

അങ്ങനെ, യഹോ​വ​യു​ടെ സാക്ഷികൾ ഒരു സന്തുലി​ത​മായ നിലപാ​ടു സ്വീക​രി​ക്കു​ന്നു. റോമർ 13:1-7-ന്റെ വീക്ഷണ​ത്തിൽ പരിസ്ഥി​തി​യെ ക്രമ​പ്പെ​ടു​ത്തുന്ന ഗവൺമെൻറ്‌നി​യ​മങ്ങൾ ബോധ​പൂർവ്വം അനുസ​രി​ക്ക​ണ​മെ​ന്നതു നിർബ​ന്ധ​മാണ്‌. കൂടാതെ, അയൽക്കാ​രോ​ടുള്ള ദൈവി​ക​മായ സ്‌നേഹം അന്യരു​ടെ വസ്‌തു​ക്കളെ—പൊതു​വാ​യാ​ലും സ്വകാ​ര്യ​മാ​യാ​ലും—അവ വിരൂ​പ​മാ​ക്കാ​തെ​യും വിവേ​ച​നാ​ര​ഹി​ത​മാ​യി ഉച്ഛിഷ്ടങ്ങൾ എറിഞ്ഞു​ക​ള​യാ​തെ​യും, മാനി​ക്കാൻ അവരെ പ്രേരി​പ്പി​ക്കു​ന്നു. എന്നാൽ ലൗകിക ശുദ്ധീ​ക​ര​ണ​ന​ട​പ​ടി​കൾക്കു നേതൃ​ത്വം നൽകാൻ അവരോ​ടു വ്യക്തമാ​യി നിർദ്ദേ​ശി​ക്കു​ന്നില്ല. അവർ ഉചിത​മാ​യി ദൈവ​രാ​ജ്യ​സ​ന്ദേ​ശ​ത്തി​ന്റെ പ്രസം​ഗത്തെ ഒന്നാമതു വെച്ചി​രി​ക്കു​ന്നു, അത്യന്തം നിലനി​ല്‌ക്കുന്ന നൻമ ചെയ്യാ​നുള്ള മാർഗ്ഗം ഇതാ​ണെന്നു തിരി​ച്ച​റി​ഞ്ഞു​കൊ​ണ്ടു​തന്നെ.

ഒരു ആത്മീയ ശുദ്ധീ​ക​ര​ണം

രക്തം ചിന്തി​ക്കൊ​ണ്ടോ അധാർമ്മി​ക​മായ ജീവി​ത​രീ​തി സ്വീക​രി​ച്ചു​കൊ​ണ്ടോ പാവന​മായ കാര്യ​ങ്ങ​ളോട്‌ അനാദരം കാട്ടി​ക്കൊ​ണ്ടോ പുരാതന ഇസ്ര​യേ​ല്യർ ഭൂമിയെ മലിന​പ്പെ​ടു​ത്തു​ന്ന​തി​ന്റെ പരിണ​ത​ഫ​ല​ങ്ങ​ളെ​ക്കു​റിച്ച്‌ അവർക്ക്‌ ആവർത്തി​ച്ചു മുന്നറി​യി​പ്പു നൽകി​യി​രു​ന്നു. (സംഖ്യാ​പു​സ്‌തകം 35:33; യിരെ​മ്യാ​വു 3:1, 2; മലാഖി 1:7, 8) ശ്രദ്ധാർഹ​മാ​യി, ഈ ആത്മീയ മലിനീ​ക​ര​ണ​ത്തി​നാണ്‌ അവർ കുററം വിധി​ക്ക​പ്പെ​ട്ടത്‌, അല്ലാതെ ഏതെങ്കി​ലും ഭൗതിക മലിനീ​ക​ര​ണ​ത്തി​നല്ല—അതു സംബന്ധി​ച്ചും അവർ കുററ​ക്കാ​രാ​യി​രു​ന്നി​രി​ക്കാം.b

അതു​കൊണ്ട്‌, ആത്മീയ മലിനീ​ക​ര​ണത്തെ അഥവാ അശുദ്ധി​യെ ആണ്‌ ഒരു ക്രിസ്‌ത്യാ​നി ഒന്നാമ​താ​യി ഒഴിവാ​ക്കാൻ കഠിന​ശ്രമം ചെയ്യു​ന്നത്‌. ഇത്‌ അയാൾ ചെയ്യു​ന്നതു മലിനീ​ക​ര​ണ​ത്തി​നുള്ള ചായ്‌വു​കളെ ഹൃദയ​ത്തിൽനി​ന്നും മനസ്സിൽനി​ന്നും പിഴു​തു​ക​ള​യുന്ന “പുതിയ വ്യക്തി​ത്വം” ധരിക്കു​ന്ന​തി​നാ​ലാണ്‌. തങ്ങളുടെ അണികൾക്കു​ള്ളിൽ മതപര​വും ധാർമ്മി​ക​വു​മായ ശുദ്ധി​യും അതോ​ടൊ​പ്പം ശ്രദ്ധേ​യ​മായ ശാരീ​രിക ശുദ്ധി​യും നേടുന്ന ഈ ആത്മീയ ശുദ്ധീ​ക​ര​ണ​ത്തിൽനി​ന്നു 40 ലക്ഷത്തി​ല​ധി​കം യഹോ​വ​യു​ടെ സാക്ഷികൾ പ്രയോ​ജനം അനുഭ​വി​ക്കു​ന്നുണ്ട്‌.—എഫേസ്യർ 4:22-24, NW.

ഇപ്പോൾ ഒരു ആത്മീയ ശുദ്ധീ​കരണ പ്രസ്ഥാ​ന​ത്തി​ന്റെ കാലമാണ്‌. അതിനു​ശേഷം ഭൂവ്യാ​പ​ക​മായ ഒരു ഭൗതിക ശുദ്ധീ​കരണ പ്രസ്ഥാനം നടക്കു​ക​യും നമ്മുടെ ഗൃഹം അർഹി​ക്കുന്ന മലിനീ​ക​ര​ണ​വി​മു​ക്ത​മായ ഒരു പരിസ്ഥി​തി നൽകി​ക്കൊണ്ട്‌ അതിനെ ഒരു ചവററു​കൂ​ന​യാ​കു​ന്ന​തിൽനി​ന്നു രക്ഷിക്കു​ക​യും ചെയ്യും.—സഭാ​പ്ര​സം​ഗി 3:1.

[അടിക്കു​റി​പ്പു​കൾ]