കാരേ​റ്റു​കാ​രും അവരുടെ സത്യാ​ന്വേ​ഷ​ണ​വും

“കൂലങ്ക​ഷ​മാ​യി [തിരു​വെ​ഴു​ത്തു​ക​ളിൽ] അന്വേ​ഷി​ക്കു​ക​യും എന്റെ അഭി​പ്രാ​യ​ത്തിൽ ആശ്രയി​ക്കാ​തി​രി​ക്കു​ക​യും ചെയ്യുക.” പൊ.യു. (പൊതു​യു​ഗം) എട്ടാം നൂറ്റാ​ണ്ടി​ലെ ഒരു കാരേറ്റു നേതാവു പറഞ്ഞതാണ്‌ ആ വാക്കുകൾ. ആരായി​രു​ന്നു കാരേ​റ്റു​കാർ? അവരുടെ മാതൃ​ക​യിൽനി​ന്നും മൂല്യ​വ​ത്തായ എന്തെങ്കി​ലും നമുക്കു പഠിക്കാ​നാ​വു​മോ? ഈ ചോദ്യ​ങ്ങൾക്ക്‌ ഉത്തരം ലഭിക്കാൻ നാം ചരി​ത്ര​ത്തിൽ പിന്നോട്ട്‌, കാരേറ്റു പ്രസ്ഥാ​ന​ത്തി​നി​ട​യാ​ക്കിയ ദീർഘ​നാൾ നീണ്ടു​നിന്ന ഒരു വിവാ​ദ​ത്തി​ലേക്ക്‌, പോകണം.

വിവാദം ആരംഭി​ച്ച​തെ​ങ്ങനെ?

പൊതു​യു​ഗ​ത്തി​നു മുമ്പുള്ള അവസാന യുഗങ്ങ​ളിൽ, യഹൂദ​മ​ത​ത്തി​ന​കത്ത്‌ ഒരു പുതിയ തത്ത്വശാ​സ്‌ത്രം വികാസം പ്രാപി​ച്ചു. സീനായ്‌ പർവത​ത്തിൽവെച്ച്‌ ദൈവം ലിഖി​ത​വും വാചികവുമായa രണ്ടു ന്യായ​പ്ര​മാ​ണങ്ങൾ കൊടു​ത്തു​വെന്ന ആശയമാ​യി​രു​ന്നു അത്‌. പൊ.യു. ഒന്നാം നൂറ്റാ​ണ്ടാ​യ​പ്പോ​ഴേ​ക്കും, പുതിയ പഠിപ്പി​ക്കൽ ഉയർത്തി​പ്പി​ടി​ച്ച​വ​രും അതിനെ നിരാ​ക​രി​ച്ച​വ​രും തമ്മിൽ ചൂടു​പി​ടിച്ച വാദ​പ്ര​തി​വാ​ദങ്ങൾ നടന്നു. പരീശ​ന്മാർ അതിനെ പിന്താ​ങ്ങു​ന്ന​വ​രും സദൂക്യ​രും എസ്സീനു​ക​ളും അതിനെ എതിർക്കു​ന്ന​വ​രു​മാ​യി​രു​ന്നു.

ഈ വിവാദം കൊടു​മ്പി​രി​ക്കൊ​ണ്ടി​രി​ക്കു​മ്പോ​ഴാ​ണു നസ്രത്തി​ലെ യേശു വാഗ്‌ദത്ത മിശി​ഹാ​യാ​യി പ്രത്യ​ക്ഷ​പ്പെ​ടു​ന്നത്‌. (ദാനീ​യേൽ 9:24, 25; മത്തായി 2:1-6, 22, 23) യഹൂദ​ന്മാ​രി​ലെ പരസ്‌പ​ര​വി​രുദ്ധ ആശയഗ​തി​ക​ളുള്ള അത്തരം സകല കൂട്ടങ്ങ​ളു​മാ​യും യേശു ഏറ്റുമു​ട്ടി. അവരു​മാ​യി ന്യായ​വാ​ദം നടത്തവേ, തങ്ങളുടെ പാരമ്പ​ര്യം​നി​മി​ത്തം ദൈവ​വ​ച​നത്തെ അസാധു​വാ​ക്കു​ന്ന​തി​നെ​തി​രെ അവൻ സംസാ​രി​ച്ചു. (മത്തായി 15:3-9) മിശി​ഹാ​യ്‌ക്കു മാത്രം സാധി​ക്കു​ന്ന​വി​ധ​ത്തിൽ യേശു ആത്മീയ സത്യങ്ങൾ പഠിപ്പി​ക്കു​ക​യും ചെയ്‌തു. (യോഹ​ന്നാൻ 7:45, 46) മാത്രമല്ല, തങ്ങൾക്കു ദിവ്യ​പി​ന്തു​ണ​യു​ണ്ടെ​ന്നു​ള്ള​തി​ന്റെ തെളിവു നൽകി​യത്‌ യേശു​വി​ന്റെ അനുഗാ​മി​കൾ മാത്ര​മാണ്‌. അവർ ക്രിസ്‌ത്യാ​നി​കൾ എന്ന്‌ അറിയ​പ്പെ​ടു​ന്ന​വ​രാ​യി​ത്തീർന്നു.—പ്രവൃ​ത്തി​കൾ 11:26.

പൊ.യു. 70-ൽ യെരു​ശ​ലേം ദേവാ​ലയം നശിപ്പി​ക്ക​പ്പെ​ട്ട​പ്പോൾ, കുഴപ്പം കൂടാതെ അതിജീ​വിച്ച ഒരേ ഒരു മതവി​ഭാ​ഗം പരീശ​ന്മാ​രാ​യി​രു​ന്നു. ഇപ്പോൾ പൗരോ​ഹി​ത്യം, ബലികൾ, ആലയം എന്നിവ​യി​ല്ലാ​തെ പരീശ യഹൂദ​മ​ത​ത്തിന്‌ അവയ്‌ക്കെ​ല്ലാം പകരം മറ്റെ​ന്തെ​ങ്കി​ലും കണ്ടുപി​ടി​ക്ക​ണ​മാ​യി​രു​ന്നു. ലിഖിത ന്യായ​പ്ര​മാ​ണത്തെ മറിക​ട​ക്കാൻ പാരമ്പ​ര്യ​ത്തെ​യും വ്യാഖ്യാ​ന​ത്തെ​യും അനുവ​ദി​ച്ചു​കൊണ്ട്‌ അവർ അതു ചെയ്‌തു. ഇതു പുതിയ “വിശുദ്ധ ഗ്രന്ഥങ്ങൾ” എഴുത​പ്പെ​ടു​ന്ന​തി​നു വഴി​തെ​ളി​ച്ചു. അങ്ങനെ അതിന്റെ ആദ്യഫ​ല​മാ​യി​രു​ന്നു മിഷ്‌ന. അവരുടെ വാചിക ന്യായ​പ്ര​മാ​ണ​ത്തോ​ടു കൂട്ടി​ച്ചേർക്കാ​നുള്ള സംഗതി​ക​ളും അതിന്റെ വ്യാഖ്യാ​ന​ങ്ങ​ളു​മ​ട​ങ്ങുന്ന ഒന്നായി​രു​ന്നു അത്‌. പിന്നീട്‌, മറ്റ്‌ എഴുത്തു ശേഖരങ്ങൾ കൂട്ടി​ച്ചേർക്ക​പ്പെ​ടു​ക​യും അവ തൽമൂദ്‌ എന്നു വിളി​ക്ക​പ്പെ​ടു​ക​യും ചെയ്‌തു. അതേസ​മയം, വിശ്വാ​സ​ത്യാ​ഗി​ക​ളായ ക്രിസ്‌ത്യാ​നി​കൾ യേശു​വി​ന്റെ പഠിപ്പി​ക്ക​ലു​കൾക്കു വിപരീ​തം പ്രവർത്തി​ക്കാൻ തുടങ്ങി. രണ്ടു ഭിന്ന വിഭാ​ഗ​ങ്ങ​ളും ശക്തമായ മതവ്യ​വ​സ്ഥി​തി​ക്കു കാരണ​മാ​യി—ഒരു വശത്തു സഭാധി​കാ​ര​വും മറ്റേ വശത്തു റബ്ബിമാ​രു​ടെ അധികാ​ര​വും.

പുറജാ​തീ​യ റോമാ​യോ​ടും പിന്നീട്‌ “ക്രിസ്‌തീയ” റോമാ​യോ​ടു​മുള്ള യഹൂദ പോരാ​ട്ട​ങ്ങൾനി​മി​ത്തം, യഹൂദ​മ​ത​ത്തി​ന്റെ പ്രവർത്തന കേന്ദ്രം അവസാനം ബാബി​ലോ​നി​ലേക്കു മാറ്റി. അവി​ടെ​വെ​ച്ചാ​യി​രു​ന്നു തൽമൂദ്‌ എഴുത്തു​കൾ അവയുടെ ഏതാണ്ടു പൂർണ​രൂ​പ​ത്തിൽ എഡിറ്റു ചെയ്യ​പ്പെ​ട്ടത്‌. ദൈ​വേഷ്ടം കൂടുതൽ പൂർണ​മാ​യി വെളി​പ്പെ​ടു​ത്തു​ന്ന​താ​യി​രു​ന്നു തൽമൂദ്‌ എന്നു റബ്ബിമാർ അവകാ​ശ​പ്പെ​ട്ടി​രു​ന്നെ​ങ്കി​ലും, അനേകം യഹൂദ​ന്മാർക്കും റബ്ബിമാ​രു​ടെ കൂടി​ക്കൂ​ടി​വ​രുന്ന സ്വാധീ​നം അനുഭ​വ​പ്പെ​ടു​ക​യും തങ്ങൾക്കു മോശ​യി​ലൂ​ടെ​യും പ്രവാ​ച​ക​ന്മാ​രി​ലൂ​ടെ​യും നൽകപ്പെട്ട ദൈവ​വ​ച​ന​ത്തി​നാ​യി അതിയാ​യി ആഗ്രഹി​ക്കു​ക​യും ചെയ്‌തു.

പൊ.യു. എട്ടാം നൂറ്റാ​ണ്ടി​ന്റെ രണ്ടാം പകുതി​യിൽ, റബ്ബിമാ​രു​ടെ അധികാ​ര​ത്തെ​യും വാചിക ന്യായ​പ്ര​മാ​ണ​ത്തി​ലുള്ള അവരുടെ വിശ്വാ​സ​ത്തെ​യും എതിർത്ത ബാബി​ലോ​നി​ലെ യഹൂദ​ന്മാർ അനൻ ബെൻ ദാവീദ്‌ എന്ന ഒരു പണ്ഡിത നേതാ​വി​നോട്‌ അനുകൂല മനോ​ഭാ​വം പ്രകട​മാ​ക്കി. റബ്ബിമാ​രു​ടെ വ്യാഖ്യാ​ന​മോ തൽമൂ​ദോ എന്തു പറയു​ന്നു​വെന്നു നോക്കാ​തെ, സത്യമ​ത​ത്തി​ന്റെ ഏക ഉറവ്‌ എന്നനി​ല​യിൽ എബ്രായ തിരു​വെ​ഴു​ത്തു​കൾ മറ്റാരു​ടെ​യും നിയ​ന്ത്ര​ണ​മി​ല്ലാ​തെ പഠിക്കാൻ ഓരോ യഹൂദ​നും അവകാ​ശ​മു​ണ്ടെന്ന്‌ അദ്ദേഹം പ്രഖ്യാ​പി​ച്ചു. അനൻ ഇങ്ങനെ പഠിപ്പി​ച്ചു: “തോറ​യിൽ [ദൈവ​ത്തി​ന്റെ ലിഖിത ന്യായ​പ്ര​മാ​ണം] കൂലങ്ക​ഷ​മാ​യി അന്വേ​ഷി​ക്കു​ക​യും എന്റെ അഭി​പ്രാ​യ​ത്തിൽ ആശ്രയി​ക്കാ​തി​രി​ക്കു​ക​യും ചെയ്യുക.” തിരു​വെ​ഴു​ത്തി​ന്മേ​ലുള്ള ഈ ഊന്നൽനി​മി​ത്തം, അനന്റെ അനുഗാ​മി​കൾ ഖ്വരാ​യിം എന്ന്‌ അറിയ​പ്പെ​ടു​ന്ന​വ​രാ​യി​ത്തീർന്നു, “വായന​ക്കാർ” എന്ന അർഥമുള്ള ഒരു എബ്രായ പേരാ​ണത്‌.

കാരേ​റ്റു​കാ​രും റബ്ബിമാ​രും ഏറ്റുമു​ട്ടു​ന്നു

റബ്ബി വൃത്തങ്ങ​ളിൽ അമ്പരപ്പി​നി​ട​യാ​ക്കിയ ചില കാരേറ്റു പഠിപ്പി​ക്ക​ലു​കൾ എന്തെല്ലാ​മാണ്‌? ഇറച്ചി​യും പാലും ഒരുമി​ച്ചു കഴിക്കു​ന്നതു റബ്ബിമാർ വിലക്കി​യി​രു​ന്നു. അവർ ഇത്‌ അവതരി​പ്പി​ച്ചത്‌ “ആട്ടിൻകു​ട്ടി​യെ തള്ളയുടെ പാലിൽ പാകം ചെയ്യരുത്‌” എന്നു പറയുന്ന പുറപ്പാ​ടു 23:19 സംബന്ധിച്ച വാചിക ന്യായ​പ്ര​മാ​ണ​ത്തി​ന്റെ വിശദീ​ക​രണം എന്നനി​ല​യി​ലാ​യി​രു​ന്നു. എന്നാൽ അതേസ​മയം, ഈ വാക്യം അത്‌ എന്തു പറയു​ന്നു​വോ അത്രയേ അർഥമാ​ക്കു​ന്നു​ള്ളു—കൂടു​ത​ലു​മല്ല, കുറച്ചു​മല്ല—എന്നായി​രു​ന്നു കാരേ​റ്റു​കാർ പഠിപ്പി​ച്ചത്‌. റബ്ബിമാ​രു​ടെ നിബന്ധ​നകൾ മനുഷ്യ​രു​ടെ കണ്ടുപി​ടി​ത്ത​ങ്ങ​ളാ​യി​രു​ന്നു​വെന്ന്‌ അവർ വാദിച്ചു.

ആവർത്ത​ന​പു​സ്‌തകം 6:8, 9 സംബന്ധി​ച്ചുള്ള അവരുടെ വ്യാഖ്യാ​ന​പ്ര​കാ​രം, തിരു​വെ​ഴുത്ത്‌ പതിച്ചി​ട്ടുള്ള നെറ്റിപ്പട്ട (Tefillin) ധരിച്ചു​കൊ​ണ്ടു​വേണം യഹൂദ പുരു​ഷ​ന്മാർ പ്രാർഥി​ക്കേ​ണ്ട​തെ​ന്നും ഒരു ചെറിയ തുകൽച്ചു​രുൾ (mezuzah) ഓരോ കട്ടിള​യി​ലും വെക്കണ​മെ​ന്നു​മുള്ള കാഴ്‌ച​പ്പാ​ടു റബ്ബിമാർ വെച്ചു​പു​ലർത്തി.b ആലങ്കാ​രി​ക​വും പ്രതീ​കാ​ത്മ​ക​വു​മായ അർഥമുള്ള വാക്യ​ങ്ങ​ളാ​യി മാത്രമേ കാരേ​റ്റു​കാർ ഈ വാക്യ​ങ്ങളെ കണ്ടുള്ളൂ, അതു​കൊണ്ട്‌ അവർ റബ്ബിമാ​രു​ടെ അത്തരം നിബന്ധ​ന​കളെ തള്ളിക്ക​ളഞ്ഞു.

മറ്റു സംഗതി​ക​ളിൽ കാരേ​റ്റു​കാർ റബ്ബിമാ​രെ​ക്കാൾ കൂടുതൽ നിബന്ധ​നകൾ ഉള്ളവരാ​യി​രു​ന്നു. ഉദാഹ​ര​ണ​ത്തിന്‌, “ശബ്ബത്തു​നാ​ളിൽ നിങ്ങളു​ടെ വാസസ്ഥ​ല​ങ്ങ​ളിൽ എങ്ങും തീ കത്തിക്ക​രു​തു” എന്നു പറയുന്ന പുറപ്പാ​ടു 35:3 സംബന്ധിച്ച അവരുടെ കാഴ്‌ച​പ്പാ​ടു പരിചി​ന്തി​ക്കുക. ശബത്തിനു മുമ്പു കത്തിച്ച​താ​ണെ​ങ്കിൽപ്പോ​ലും ഒരു വിളക്കോ പ്രകാ​ശ​മോ എരിഞ്ഞു​കൊ​ണ്ടി​രി​ക്കുന്ന അവസ്ഥയിൽ നിറു​ത്തു​ന്നത്‌ കാരേ​റ്റു​കാർ വിലക്കി.

വിശേ​ഷി​ച്ചും അനന്റെ മരണ​ശേഷം, കാരേറ്റു നേതാ​ക്ക​ന്മാർ ചില നിബന്ധ​ന​ക​ളു​ടെ കാഠി​ന്യ​ത്തെ​യും സ്വഭാ​വ​ത്തെ​യും സംബന്ധി​ച്ചു കൂടെ​ക്കൂ​ടെ വിയോ​ജി​പ്പു പ്രകടി​പ്പി​ച്ചു. തന്നെയു​മല്ല, അവയുടെ സന്ദേശം എല്ലായ്‌പോ​ഴും വ്യക്തമാ​യി​രു​ന്നു​മില്ല. കാരേ​റ്റു​കാർക്ക്‌ ഐക്യ​മു​ണ്ടാ​യി​രു​ന്നില്ല, കാരണം അവർ ഏതെങ്കി​ലും ഒരു ഒറ്റ നേതാ​വി​നെ അംഗീ​ക​രി​ച്ചി​രു​ന്നില്ല. എന്തു​കൊ​ണ്ടെ​ന്നാൽ റബ്ബിമാ​രു​ടെ അധികാ​ര​ശൈ​ലി​യിൽനി​ന്നു വിപരീ​ത​മാ​യി, തിരു​വെ​ഴു​ത്തു​ക​ളു​ടെ വ്യക്തി​പ​ര​മായ വായന​യ്‌ക്കും വ്യാഖ്യാ​ന​ത്തി​നും അവർ ഊന്നൽ കൊടു​ത്തു. എന്നിട്ടും, കാരേറ്റു പ്രസ്ഥാ​ന​ത്തി​നു ജനപ്രീ​തി ലഭിച്ചു​കൊ​ണ്ടി​രു​ന്നു. ബാബി​ലോ​ന്യ യഹൂദ സമുദാ​യ​ത്തി​ന​പ്പു​റ​ത്തേക്ക്‌ അതിന്റെ സ്വാധീ​നം വളരു​ക​യും മധ്യപൂർവ​ദേ​ശ​ത്തു​ട​നീ​ളം അതു വ്യാപി​ക്കു​ക​യും ചെയ്‌തു. യെരു​ശ​ലേ​മിൽ ഒരു വൻകിട കാരേറ്റു കേന്ദ്രം സ്ഥാപി​ക്ക​പ്പെ​ടു​ക​പോ​ലു​മു​ണ്ടാ​യി.

പൊ.യു. ഒമ്പതും പത്തും നൂറ്റാ​ണ്ടു​ക​ളിൽ, കാരേറ്റു പണ്ഡിത​ന്മാർ എബ്രായ ഭാഷയു​ടെ പുതു​ക്കിയ പഠനത്തിൽ കാര്യ​മായ അവഗാഹം നേടു​ക​യും ഒരുതരം സുവർണ​യു​ഗം ആസ്വദി​ക്കു​ക​യും ചെയ്‌തി​രു​ന്നു. ലിഖിത എബ്രായ തിരു​വെ​ഴു​ത്തു പാഠ​ത്തെ​യാണ്‌ അവർ വിശു​ദ്ധ​മാ​യി കരുതി​യത്‌, അല്ലാതെ വാചി​ക​മാ​യി ലഭിച്ച പാരമ്പ​ര്യ​ത്തെയല്ല. ചില കാരേ​റ്റു​കാർ എബ്രായ തിരു​വെ​ഴു​ത്തു​ക​ളു​ടെ വിദഗ്‌ധ പകർപ്പെ​ഴു​ത്തു​കാർ ആയിത്തീർന്നു. വാസ്‌ത​വ​ത്തിൽ, പ്രസ്‌തുത വിഷയ​ത്തിൽ കാരേ​റ്റു​കാർ കാട്ടിയ താത്‌പ​ര്യ​മാ​യി​രു​ന്നു എല്ലാ യഹൂദ​ന്മാ​രു​ടെ​യി​ട​യി​ലും തിരു​വെ​ഴു​ത്തു സംബന്ധിച്ച മാസ​രെ​റ്റിക്‌ പഠനത്തി​നു കാരണ​മാ​യത്‌. അതുമു​ഖാ​ന്തരം ലഭ്യമാ​യ​തോ, കൂടുതൽ കൃത്യ​ത​യു​ള്ള​താ​യി സൂക്ഷി​ക്ക​പ്പെട്ട ഇന്നത്തെ ഒരു ബൈബിൾ പാഠവും.

ശീഘ്ര വളർച്ച​യു​ടെ ഈ കാലഘ​ട്ട​ത്തിൽ, കാരേറ്റു യഹൂദ​മതം മറ്റു യഹൂദർക്കി​ട​യിൽ പരസ്യ​മായ മിഷന​റി​വേ​ല​യിൽ ഏർപ്പെട്ടു. ഇതു റബ്ബിമാ​രു​ടെ യഹൂദ​മ​ത​ത്തി​നു നേരേ വ്യക്തമായ വെല്ലു​വി​ളി ഉയർത്തി.

റബ്ബിമാർ പ്രതി​ക​രി​ച്ച​തെ​ങ്ങനെ?

തന്ത്രപ​ര​മാ​യി വളച്ചു​പ​റ​യ​ലും സാഹച​ര്യാ​ധി​ഷ്‌ഠിത പഠിപ്പി​ക്ക​ലും സഹിതം ഒരു ഉഗ്രവാ​ഗ്‌പോ​രാ​ട്ട​മാ​യി​രു​ന്നു റബ്ബിമാ​രു​ടെ പ്രത്യാ​ക്ര​മണം. അനന്റെ ആക്രമ​ണ​ത്തെ​ത്തു​ടർന്നുള്ള നൂറ്റാ​ണ്ടിൽ, റബ്ബിമാ​രു​ടെ യഹൂദ​മതം കാരേ​റ്റു​കാ​രു​ടെ പല രീതി​ക​ളും സ്വീക​രി​ച്ചു. തിരു​വെ​ഴു​ത്തു​കൾ ഉദ്ധരി​ക്കു​ന്ന​തി​ലും അവരുടെ പ്രഭാ​ഷ​ണ​ക​ല​യി​ലെ കാരേറ്റു ശൈലി​യും രീതി​യും കൂട്ടി​യി​ണ​ക്കു​ന്ന​തി​ലും റബ്ബിമാർ കൂടുതൽ പ്രാവീ​ണ്യ​മു​ള്ള​വ​രാ​യി​ത്തീർന്നു.

കാരേ​റ്റു​കാ​രു​മാ​യുള്ള ഈ വാഗ്‌പോ​രാ​ട്ട​ത്തി​ന്റെ അനി​ഷേധ്യ നേതാ​വാ​യി​രു​ന്നു സഡിയാ ബെൻ ജോസഫ്‌. ഇദ്ദേഹം പൊ.യു. പത്താം നൂറ്റാ​ണ്ടി​ന്റെ ആദ്യ പകുതി​യിൽ ബാബി​ലോ​നിൽ യഹൂദ സമുദാ​യ​ത്തി​ന്റെ തലവനാ​യി​ത്തീർന്നു. സഡിയാ​യു​ടെ മഹത്‌കൃ​തി​യായ ദ ബുക്ക്‌ ഓഫ്‌ ബിലീ​ഫ്‌സ്‌ ആൻഡ്‌ ഒപ്പീനി​യൻസ്‌ ഇംഗ്ലീ​ഷി​ലേക്കു പരിഭാ​ഷ​പ്പെ​ടു​ത്തിയ സാംയെൽ റോസൻബ്ലാറ്റ്‌ അതിന്റെ ആമുഖ​ത്തിൽ ഇങ്ങനെ പറഞ്ഞു: “അദ്ദേഹ​ത്തി​ന്റെ നാളിൽ . . . തൽമൂദ്‌ സംബന്ധിച്ച്‌ അദ്ദേഹം പണ്ഡിത​നാ​യി​രു​ന്നെ​ങ്കി​ലും, യഹൂദ പാരമ്പ​ര്യ​ത്തി​ന്റെ ഈ ഉറവിനെ [സഡിയാ] താരത​മ്യേന കാര്യ​മാ​യി ഉപയോ​ഗി​ക്കു​ന്നില്ല, ലിഖിത ന്യായ​പ്ര​മാ​ണ​ത്തെ​മാ​ത്രം സാധു​വാ​യി കരുതി​യി​രുന്ന കാരേ​റ്റു​കാ​രെ അവരു​ടെ​തന്നെ ആയുധം​കൊണ്ട്‌ തോൽപ്പി​ക്കു​ക​യെന്ന അദ്ദേഹ​ത്തി​ന്റെ ആഗ്രഹ​മാ​യി​രു​ന്നു അതിനു കാരണ​മെന്നു വ്യക്തമാണ്‌.”

സഡിയാ​യു​ടെ കാലടി​കൾ പിൻപ​റ്റി​ക്കൊണ്ട്‌, റബ്ബിമാ​രു​ടെ യഹൂദ​മതം അവസാനം സ്വാധീ​നം നേടി​യെ​ടു​ത്തു. കാരേ​റ്റു​കാ​രു​ടെ വാദഗ​തി​കളെ നിർവീ​ര്യ​മാ​ക്കാ​നാ​വും​വി​ധം വേണ്ടവണ്ണം അനുരൂ​പ​പ്പെ​ട്ടു​കൊ​ണ്ടാണ്‌ അവർ ഇതു നേടി​യത്‌. അവസാന പ്രഹരം ഏൽപ്പി​ച്ചത്‌ 12-ാം നൂറ്റാ​ണ്ടി​ലെ പ്രശസ്‌ത തൽമൂദ്‌ പണ്ഡിത​നായ മോസസ്‌ മൈ​മോ​നി​ഡസ്‌ ആയിരു​ന്നു. ഈജി​പ്‌തിൽ തന്നോ​ടൊ​പ്പം താമസി​ച്ചി​രുന്ന കാരേ​റ്റു​കാ​രോ​ടുള്ള അദ്ദേഹ​ത്തി​ന്റെ സഹിഷ്‌ണു​താ മനോ​ഭാ​വ​വും തന്റെ കരുത്തുറ്റ പണ്ഡി​തോ​ചിത ശൈലി​യും നിമിത്തം അദ്ദേഹം അവരുടെ പ്രശംസ പിടി​ച്ചു​പ​റ്റു​ക​യും അവരു​ടെ​തന്നെ നേതൃ​ത്വ​സ്ഥാ​നത്തെ ദുർബ​ല​പ്പെ​ടു​ത്തു​ക​യും ചെയ്‌തു.

കാരേറ്റു പ്രസ്ഥാ​ന​ത്തി​നു ഗതി​വേഗം നഷ്ടപ്പെ​ടു​ന്നു

ഇപ്പോൾ ഐക്യ​വും ആസൂ​ത്രി​ത​മായ പ്രതി​രോ​ധ​വും ഇല്ലാതാ​യ​തോ​ടെ കാരേറ്റു പ്രസ്ഥാ​ന​ത്തി​നു ഗതി​വേ​ഗ​വും അനുഗാ​മി​ക​ളും നഷ്ടമായി. കാലം കടന്നു​പോ​യ​പ്പോൾ, കാരേ​റ്റു​കാർ തങ്ങളുടെ കാഴ്‌ച​പ്പാ​ടു​ക​ളും തത്ത്വങ്ങ​ളും അയവു​ള്ള​താ​ക്കി. കാരേറ്റു പ്രസ്ഥാ​ന​ത്തെ​ക്കു​റി​ച്ചു ഗ്രന്ഥം രചിച്ചി​ട്ടുള്ള ലീയാൻ നീമോയ്‌ എഴുതു​ന്നു: “താത്ത്വി​ക​മാ​യി തൽമൂദ്‌ നിരോ​ധ​ന​ത്തിൻ കീഴി​ലാ​യി​രു​ന്നെ​ങ്കി​ലും, കാരേ​റ്റു​കാ​രു​ടെ നിയമ​ത്തി​ന്റെ​യും ആചാര​ത്തി​ന്റെ​യും നടത്തി​പ്പിൽ തൽമൂ​ദിൽനി​ന്നുള്ള അനേകം വിവരങ്ങൾ രഹസ്യ​മാ​യി ഉൾപ്പെ​ടു​ത്തി​യി​രു​ന്നു.” അടിസ്ഥാ​ന​പ​ര​മാ​യി, കാരേ​റ്റു​കാർക്ക്‌ ആരംഭ​ത്തി​ലു​ണ്ടാ​യി​രുന്ന ഉദ്ദേശ്യം നഷ്ടമാ​വു​ക​യും ഏതാണ്ടു റബ്ബിമാ​രു​ടെ യഹൂദ​മ​തം​പോ​ലെ​തന്നെ ആയിത്തീ​രു​ക​യും ചെയ്‌തു.

ഇസ്രാ​യേ​ലിൽ ഏതാണ്ട്‌ 25,000 കാരേ​റ്റു​കാർ ഇപ്പോ​ഴു​മുണ്ട്‌. വേറെ ഏതാനും ആയിര​ങ്ങളെ മറ്റു സമുദാ​യ​ങ്ങ​ളി​ലും കാണാ​വു​ന്ന​താണ്‌, വിശേ​ഷി​ച്ചും റഷ്യ, ഐക്യ​നാ​ടു​കൾ എന്നിവി​ട​ങ്ങ​ളിൽ. എന്നിരു​ന്നാ​ലും, അവർക്കെ​ല്ലാം സ്വന്തം വാചിക പാരമ്പ​ര്യ​ങ്ങൾ ഉള്ളതി​നാൽ, ആദിമ കാരേ​റ്റു​കാ​രിൽനിന്ന്‌ അവർക്കു വ്യത്യാ​സ​മുണ്ട്‌.

കാരേ​റ്റു​കാ​രു​ടെ ചരി​ത്ര​ത്തിൽനി​ന്നു നമുക്ക്‌ എന്തു പഠിക്കാ​നാ​വും? ‘ദൈവ​വ​ച​നത്തെ പാരമ്പ​ര്യ​ത്താൽ അസാധു​വാ​ക്കു’ന്നതു ഗുരു​ത​ര​മായ ഒരു തെറ്റാണ്‌ എന്നതു​തന്നെ. (മത്തായി 15:6, NW) മനുഷ്യ​രു​ടെ ഭാര​മേ​റിയ പാരമ്പ​ര്യ​ങ്ങ​ളിൽനി​ന്നു സ്വത​ന്ത്ര​മാ​കാൻ തിരു​വെ​ഴു​ത്തു​കൾ സംബന്ധി​ച്ചുള്ള സൂക്ഷ്‌മ പരിജ്ഞാ​നം ആവശ്യ​മാണ്‌. (യോഹ​ന്നാൻ 8:31, 32; 2 തിമൊ​ഥെ​യൊസ്‌ 3:16, 17) അതേ, ദൈ​വേഷ്ടം അറിയാ​നും പ്രവർത്തി​ക്കാ​നും ആഗ്രഹി​ക്കു​ന്നവർ മനുഷ്യ പാരമ്പ​ര്യ​ങ്ങ​ളിൽ ആശ്രയി​ക്കു​ന്നില്ല. പകരം, അവർ ശുഷ്‌കാ​ന്തി​യോ​ടെ ബൈബി​ളിൽ തിരയു​ക​യും ദൈവ​ത്തി​ന്റെ നിശ്വസ്‌ത വചനത്തി​ലെ പ്രയോ​ജ​ന​പ്ര​ദ​മായ പ്രബോ​ധനം ബാധക​മാ​ക്കു​ക​യും ചെയ്യുന്നു.

[അടിക്കു​റി​പ്പു​കൾ]

[30-ാം പേജിലെ ചിത്രം]

ഒരു കൂട്ടം കാരേ​റ്റു​കാർ

[കടപ്പാട]

From the book The Jewish Encyclopedia, 1910