നിങ്ങളു​ടെ കുട്ടി ബോർഡിങ്‌ സ്‌കൂ​ളിൽ പോക​ണ​മോ?

വികസ്വര രാജ്യ​ങ്ങ​ളി​ലൊ​ന്നി​ലുള്ള ഒരു ചെറിയ പട്ടണത്തി​ലാ​ണു നിങ്ങൾ താമസി​ക്കു​ന്ന​തെന്നു സങ്കൽപ്പി​ക്കുക. പ്രൈ​മറി സ്‌കൂ​ളിൽ പഠിക്കുന്ന പല കുട്ടികൾ നിങ്ങൾക്കുണ്ട്‌. എന്നാൽ 12-ാം വയസ്സിൽ അവർ സെക്കൻഡറി സ്‌കൂ​ളി​ലേക്കു കടക്കും. നിങ്ങളു​ടെ പ്രദേ​ശ​ത്തുള്ള സെക്കൻഡറി സ്‌കൂ​ളിൽ ഇടമില്ല. വേണ്ടത്ര സൗകര്യ​മില്ല. കഴിവുള്ള അധ്യാ​പ​ക​രും കുറവാണ്‌. സമരങ്ങൾ മൂലം ചില​പ്പോൾ സ്‌കൂ​ളു​കൾ ആഴ്‌ച​ക​ളോ​ളം, മാസങ്ങ​ളോ​ളം അടച്ചി​ടും.

നഗരത്തി​ലു​ള്ള ഒരു ബോർഡിങ്‌ സ്‌കൂ​ളി​നെ​ക്കു​റി​ച്ചു വിവരി​ക്കുന്ന ആകർഷ​ക​മായ ഒരു ലഘുപ​ത്രിക ഒരാൾ നിങ്ങളെ ഏൽപ്പി​ക്കു​ന്നു. സന്തോ​ഷ​മുള്ള, നന്നായി വസ്‌ത്ര​ധാ​രണം ചെയ്‌ത കുട്ടികൾ സുസജ്ജ​മായ ക്ലാസ്സ്‌ മുറി​ക​ളി​ലും പരീക്ഷ​ണ​ശാ​ല​ക​ളി​ലും ലൈ​ബ്ര​റി​ക​ളി​ലു​മി​രു​ന്നു പഠിക്കുന്ന ചിത്രങ്ങൾ നിങ്ങൾ കാണുന്നു. വിദ്യാർഥി​കൾ കമ്പ്യൂ​ട്ട​റു​കൾ ഉപയോ​ഗി​ക്കു​ന്നു. വൃത്തി​യുള്ള, ആകർഷ​ക​മായ ഡോർമി​റ്ററി മുറി​ക​ളിൽ അവർ വിശ്ര​മി​ക്കു​ന്നു. “തങ്ങളാൽ കഴിയു​ന്നത്ര ഉയർന്ന വിദ്യാ​ഭ്യാ​സ നിലവാ​രം നേടി​യെ​ടു​ക്കു”ന്നതിനു വിദ്യാർഥി​കളെ സഹായി​ക്കു​ക​യാ​ണു സ്‌കൂ​ളി​ന്റെ ലക്ഷ്യങ്ങ​ളി​ലൊന്ന്‌ എന്നു നിങ്ങൾ വായി​ക്കു​ന്നു. “സാധാ​ര​ണ​ഗ​തി​യിൽ വിനയം, മര്യാദ, മാതാ​പി​താ​ക്ക​ളോ​ടും മുതിർന്ന​വ​രോ​ടു​മുള്ള ആദരവ്‌, സഹകരണം, സഹിഷ്‌ണുത, ദയ, സത്യസന്ധത, സ്വഭാ​വ​ദാർഢ്യം എന്നീ ഗുണങ്ങൾക്ക്‌ ഊന്നൽ നൽകുന്ന കുടും​ബ​ത്തി​ലേ​തി​നോ​ടു സമാന​മായ ഒരു പെരു​മാറ്റ ചട്ടത്തോട്‌ ഓരോ വിദ്യാർഥി​യും പറ്റിനിൽക്കേ​ണ്ട​തുണ്ട്‌” എന്നും നിങ്ങൾ വായി​ക്കു​ന്നു.

“എന്റെ മാതാ​പി​താ​ക്കൾ എന്നെ ഏറ്റവും നല്ല സ്‌കൂ​ളിൽ പഠിക്കാൻ വിട്ടതു ജീവി​ത​ത്തി​ലേ​ക്കും വെച്ച്‌ ഏറ്റവും വലിയ പദവി​യാണ്‌” എന്നു സുസ്‌മേ​ര​വ​ദ​ന​നായ ഒരു കുട്ടി പറയു​ന്ന​താ​യി ഉദ്ധരി​ച്ചി​രി​ക്കു​ന്നു. “സ്‌കൂൾ വെല്ലു​വി​ളി നിറഞ്ഞ​തും ആവേശം പകരു​ന്ന​തു​മാണ്‌. ഇവിടം പഠനത്തി​നു പറ്റിയ​താണ്‌” എന്ന്‌ ഒരു പെൺകു​ട്ടി പറയുന്നു. അത്തര​മൊ​രു ബോർഡിങ്‌ സ്‌കൂ​ളിൽ മകനെ​യോ മകളെ​യോ നിങ്ങൾ അയയ്‌ക്കു​മോ?

വിദ്യാ​ഭ്യാ​സ​വും ആത്മീയ​ത​യും

കരുത​ലുള്ള എല്ലാ മാതാ​പി​താ​ക്ക​ളും തങ്ങളുടെ കുട്ടി​ക​ളു​ടെ ജീവി​ത​ത്തിൽ ഉറച്ച അസ്‌തി​വാ​ര​മി​ടാൻ ആഗ്രഹി​ക്കു​ന്നു. ആ ഉദ്ദേശ്യ​സാ​ക്ഷാ​ത്‌കാ​ര​ത്തി​നു സമ്പൂർണ​മായ, സമനി​ല​യുള്ള വിദ്യാ​ഭ്യാ​സം പ്രധാ​ന​മാണ്‌. ലൗകിക വിദ്യാ​ഭ്യാ​സം ഒട്ടുമി​ക്ക​പ്പോ​ഴും, ഭാവി​യിൽ തൊഴി​ല​വ​സ​ര​ങ്ങൾക്കുള്ള വാതാ​യ​നങ്ങൾ തുറന്നു​ത​രു​ന്നു. മാത്രമല്ല, സ്വന്തം കാര്യങ്ങൾ നോക്കി നടത്താ​നും തങ്ങളുടെ ഭാവി കുടും​ബ​ങ്ങൾക്കാ​യി കരുതാ​നും കഴിവുള്ള മുതിർന്ന​വ​രാ​യി വളർന്നു​വ​രാൻ അതു യുവജ​ന​ങ്ങളെ സഹായി​ക്കു​ക​യും ചെയ്യുന്നു.

‘ഒരു ബോർഡിങ്‌ സ്‌കൂൾ ചില ധാർമിക മാർഗ​നിർദേ​ശങ്ങൾ സഹിതം നല്ല വിദ്യാ​ഭ്യാ​സം നൽകു​ന്നെ​ങ്കിൽ അതു പ്രയോ​ജ​ന​പ്പെ​ടു​ത്ത​രു​തോ?’ എന്നു നിങ്ങൾ ചോദി​ച്ചേ​ക്കാം. ആ ചോദ്യ​ത്തിന്‌ ഉത്തരം നൽകു​മ്പോൾ ക്രിസ്‌തീയ മാതാ​പി​താ​ക്കൾ പ്രാർഥ​നാ​പൂർവം, കുട്ടി​ക​ളു​ടെ ആത്മീയ ക്ഷേമം എന്ന മർമ​പ്ര​ധാ​ന​മായ ഘടക​ത്തെ​ക്കു​റി​ച്ചു പരിചി​ന്തി​ക്കേ​ണ്ട​താണ്‌. “ഒരു മനുഷ്യൻ സർവ്വ​ലോ​ക​വും നേടു​ക​യും തന്റെ ജീവനെ കളകയും ചെയ്‌താൽ അവന്നു എന്തു പ്രയോ​ജനം?” എന്ന്‌ യേശു​ക്രി​സ്‌തു ചോദി​ച്ചു. (മർക്കൊസ്‌ 8:36) തീർച്ച​യാ​യും അതു​കൊ​ണ്ടൊ​രു പ്രയോ​ജ​ന​വു​മില്ല. തന്നിമി​ത്തം, കുട്ടി​കളെ ബോർഡിങ്‌ സ്‌കൂ​ളിൽ അയയ്‌ക്കാൻ തീരു​മാ​നി​ക്കു​ന്ന​തി​നു​മുമ്പ്‌, അത്‌ അവരുടെ നിത്യ​ജീ​വന്റെ പ്രത്യാ​ശയെ എങ്ങനെ ബാധി​ക്കു​മെന്നു ക്രിസ്‌തീയ മാതാ​പി​താ​ക്കൾ പരിചി​ന്തി​ക്കേ​ണ്ട​താണ്‌.

മറ്റു വിദ്യാർഥി​ക​ളു​ടെ സ്വാധീ​നം

ചില ബോർഡിങ്‌ സ്‌കൂ​ളു​ക​ളിൽ മതിപ്പു​ള​വാ​ക്കുന്ന വിദ്യാ​ഭ്യാ​സ നിലവാ​രം ഉണ്ടായി​രു​ന്നേ​ക്കാം. എന്നാൽ, അത്തരം സ്‌കൂ​ളു​ക​ളിൽ പഠിക്കു​ന്ന​വ​രു​ടെ അല്ലെങ്കിൽ ഒരുപക്ഷേ അവയുടെ നടത്തി​പ്പു​കാ​രിൽ ചിലരു​ടെ​ത​ന്നെ​യും ധാർമിക നിലവാ​രങ്ങൾ സംബന്ധി​ച്ചെന്ത്‌? ഈ “അന്ത്യകാ​ലത്തു” ജീവി​ക്കുന്ന ആളുകൾ ഏതു തരക്കാ​രാ​യി​രി​ക്കും എന്നതി​നെ​ക്കു​റിച്ച്‌ പൗലൊസ്‌ അപ്പോ​സ്‌തലൻ ഇങ്ങനെ എഴുതി: “അന്ത്യകാ​ലത്തു ദുർഘ​ട​സ​മ​യങ്ങൾ വരും എന്നറിക. മനുഷ്യർ സ്വസ്‌നേ​ഹി​ക​ളും ദ്രവ്യാ​ഗ്ര​ഹി​ക​ളും വമ്പു പറയു​ന്ന​വ​രും അഹങ്കാ​രി​ക​ളും ദൂഷക​ന്മാ​രും അമ്മയപ്പ​ന്മാ​രെ അനുസ​രി​ക്കാ​ത്ത​വ​രും നന്ദി​കെ​ട്ട​വ​രും അശുദ്ധ​രും വാത്സല്യ​മി​ല്ലാ​ത്ത​വ​രും ഇണങ്ങാ​ത്ത​വ​രും ഏഷണി​ക്കാ​രും അജി​തേ​ന്ദ്രി​യ​ന്മാ​രും ഉഗ്രന്മാ​രും സൽഗു​ണ​ദ്വേ​ഷി​ക​ളും ദ്രോ​ഹി​ക​ളും ധാർഷ്ട്യ​ക്കാ​രും നിഗളി​ക​ളു​മാ​യി ദൈവ​പ്രി​യ​മി​ല്ലാ​തെ ഭോഗ​പ്രി​യ​രാ​യി ഭക്തിയു​ടെ വേഷം ധരിച്ചു അതിന്റെ ശക്തി ത്യജി​ക്കു​ന്ന​വ​രു​മാ​യി​രി​ക്കും. അങ്ങനെ​യു​ള്ള​വരെ വിട്ടൊ​ഴി​യുക.”—2 തിമൊ​ഥെ​യൊസ്‌ 3:1-5.

ധാർമി​ക​വും ആത്മീയ​വു​മായ ഈ അധഃപ​തനം ആഗോ​ള​മാണ്‌. ബൈബിൾ തത്ത്വങ്ങ​ള​നു​സ​രി​ച്ചു ജീവി​ക്കുന്ന കാര്യ​ത്തിൽ അതു യഹോ​വ​യു​ടെ സാക്ഷി​കൾക്കു വെല്ലു​വി​ളി​യു​യർത്തു​ന്നു. സ്‌കൂ​ളി​ലെ ലൗകിക സുഹൃ​ത്തു​ക്ക​ളോ​ടൊ​പ്പ​മുള്ള പരിമി​ത​മായ സഹവാ​സം​പോ​ലും തങ്ങളുടെ ആത്മീയ​ത​യിൽ ശക്തമായ പ്രതി​കൂല സ്വാധീ​നം ചെലു​ത്തു​ന്ന​താ​യി ദിവസേന വീട്ടിൽനി​ന്നു സ്‌കൂ​ളിൽ പോയി വരുന്ന കുട്ടികൾ കണ്ടെത്തു​ന്നു. മാതാ​പി​താ​ക്ക​ളിൽനി​ന്നുള്ള അനുദിന പിന്തു​ണ​യും ബുദ്ധ്യു​പ​ദേ​ശ​വും പ്രോ​ത്സാ​ഹ​ന​വും ലഭിക്കു​ന്നെ​ങ്കി​ലും അത്തരം സ്വാധീ​നത്തെ ചെറു​ത്തു​നിൽക്കു​ന്ന​തി​നു സാക്ഷി​ക്കു​ട്ടി​കൾ പെടാ​പ്പാ​ടു​പെ​ടു​ന്നു എന്നുവ​രാം.

ആ സ്ഥിതിക്ക്‌, വീട്ടിൽനി​ന്ന​കലെ, ബോർഡിങ്‌ സ്‌കൂ​ളിൽ അയയ്‌ക്കുന്ന കുട്ടി​ക​ളു​ടെ അവസ്ഥ​യെ​ന്താണ്‌? സ്‌നേ​ഹ​നി​ധി​ക​ളായ മാതാ​പി​താ​ക്ക​ളു​ടെ ക്രമമായ ആത്മീയ പിന്തുണ ലഭിക്കാ​തെ അവർ ഒറ്റപ്പെ​ടു​ന്നു. 24 മണിക്കൂ​റും സഹപാ​ഠി​ക​ളോ​ടൊ​ത്തു കഴിയു​ന്ന​തു​കൊണ്ട്‌, മറ്റു കുട്ടി​ക​ളോട്‌ അനുരൂ​പ​പ്പെ​ടു​ന്ന​തി​നുള്ള സമ്മർദം അവരുടെ കൊച്ചു മനസ്സു​ക​ളി​ലും ഹൃദയ​ങ്ങ​ളി​ലും ശക്തമായ സ്വാധീ​നം ചെലു​ത്താ​നുള്ള സാധ്യത വീട്ടിൽ താമസി​ക്കുന്ന കുട്ടി​കൾക്കു​ള്ള​തി​നെ​ക്കാൾ ഏറെയാണ്‌. “ഒരു ബോർഡിങ്‌ സ്‌കൂൾ വിദ്യാർഥി ധാർമി​ക​മാ​യി പ്രഭാ​തം​മു​തൽ പ്രദോ​ഷം​വരെ അപകട​ത്തി​ലാ​ണു കഴിയു​ന്നത്‌” എന്ന്‌ ഒരു വിദ്യാർഥി പറയുന്നു.

“വഴി​തെ​റ​റി​ക്ക​പ്പെ​ട​രുത്‌. മോശ​മായ സഹവാ​സങ്ങൾ പ്രയോ​ജ​ന​പ്ര​ദ​മായ ശീലങ്ങളെ പാഴാ​ക്കു​ന്നു” എന്ന്‌ പൗലൊസ്‌ എഴുതി. (1 കൊരി​ന്ത്യർ 15:33, NW) ദൈവത്തെ സേവി​ക്കാത്ത കുട്ടി​ക​ളോ​ടൊ​പ്പം തങ്ങളുടെ കുട്ടികൾ സദാ സഹവസി​ക്കു​ന്നെ​ങ്കി​ലും അവർക്കത്‌ ആത്മീയ​മാ​യി യാതൊ​രു ഹാനി​യും വരുത്തു​ക​യി​ല്ലെന്നു ചിന്തി​ക്ക​ത്ത​ക്ക​വണ്ണം ക്രിസ്‌തീയ മാതാ​പി​താ​ക്കൾ വഴി​തെ​റ്റി​ക്ക​പ്പെ​ട​രുത്‌. കാലാ​ന്ത​ര​ത്തിൽ, ദൈവ​ഭ​ക്തി​യുള്ള കുട്ടികൾ ക്രിസ്‌തീയ മൂല്യ​ങ്ങ​ളി​ലുള്ള പ്രിയം നഷ്ടപ്പെട്ട്‌ ആത്മീയ കാര്യ​ങ്ങ​ളോ​ടുള്ള വിലമ​തി​പ്പെ​ല്ലാം കളഞ്ഞു​കു​ളി​ച്ചേ​ക്കാം. കുട്ടികൾ ബോർഡിങ്‌ സ്‌കൂ​ളിൽനി​ന്നു പോന്നു​ക​ഴി​ഞ്ഞേ ചില​പ്പോ​ഴൊ​ക്കെ മാതാ​പി​താ​ക്കൾക്ക്‌ അതു വ്യക്തമാ​കു​ക​യു​ള്ളൂ. അപ്പോ​ഴേ​ക്കും കാര്യങ്ങൾ നേരേ​യാ​ക്കാ​നാ​വാ​ത്ത​വി​ധം വളരെ വൈകി​യി​രി​ക്കും.

അതിനു പറ്റിയ ഉദാഹ​ര​ണ​മാ​ണു ക്ലെമൻറി​ന്റേത്‌. അവൻ വിവരി​ക്കു​ന്നു: “ബോർഡിങ്‌ സ്‌കൂ​ളിൽ പോകു​ന്ന​തി​നു മുമ്പ്‌ എനിക്കു സത്യ​ത്തോ​ടു പ്രതി​പ​ത്തി​യു​ണ്ടാ​യി​രു​ന്നു, സഹോ​ദ​ര​ങ്ങ​ളോ​ടൊ​പ്പം വയൽസേ​വ​ന​ത്തി​നും പോയി​രു​ന്നു. ഞങ്ങളുടെ കുടുംബ ബൈബി​ള​ധ്യ​യ​ന​ത്തി​ലും സഭാപു​സ്‌ത​കാ​ധ്യ​യ​ന​ത്തി​ലും പങ്കെടു​ക്കു​ന്നതു ഞാൻ പ്രത്യേ​കി​ച്ചും ആസ്വദി​ച്ചി​രു​ന്നു. എന്നാൽ, 14-ാം വയസ്സിൽ ബോർഡിങ്‌ സ്‌കൂ​ളിൽ പോയ​തോ​ടെ ഞാൻ സത്യം പൂർണ​മാ​യി കൈ​വെ​ടി​ഞ്ഞു. ബോർഡിങ്‌ സ്‌കൂ​ളിൽ താമസിച്ച അഞ്ചു വർഷക്കാ​ലത്ത്‌ ഒരിക്കൽപ്പോ​ലും ഞാൻ യോഗ​ങ്ങ​ളിൽ ഹാജരാ​യില്ല. മോശ​മായ കൂട്ടു​കെട്ടു നിമിത്തം ഞാൻ മയക്കു​മ​രു​ന്നി​ലും പുകവ​ലി​യി​ലും അമിത മദ്യപാ​ന​ത്തി​ലും ഏർപ്പെട്ടു.”

അധ്യാ​പ​ക​രു​ടെ സ്വാധീ​നം

ധാർമി​ക​ച്യു​തി​യുള്ള, അധികാ​ര​സ്ഥാ​നങ്ങൾ ദുരു​പ​യോ​ഗം ചെയ്യുന്ന അധ്യാ​പകർ ഏതു സ്‌കൂ​ളി​ലും ഉണ്ടായി​രു​ന്നേ​ക്കാം. ചിലർ ക്രൂര​രും നിർദ​യ​രു​മാണ്‌. മറ്റു ചിലർ വിദ്യാർഥി​കളെ ലൈം​ഗി​ക​മാ​യി ചൂഷണം ചെയ്യുന്നു. ബോർഡിങ്‌ സ്‌കൂ​ളു​ക​ളിൽ അത്തരം അധ്യാ​പ​ക​രു​ടെ നടപടി​കൾ റിപ്പോർട്ടു ചെയ്യ​പ്പെ​ടാ​തെ പോകാ​നാ​ണു സാധ്യത.

എങ്കിലും, മിക്ക അധ്യാ​പ​ക​രും വിദ്യാർഥി​കളെ സമൂഹ​ത്തി​ലെ ഫലപ്ര​ദ​രായ അംഗങ്ങ​ളാ​യി​ത്തീ​രാൻ, ചുറ്റു​മുള്ള ലോക​വു​മാ​യി പൊരു​ത്ത​പ്പെ​ടാൻ, അനുരൂ​പ​പ്പെ​ടാൻ പരിശീ​ലി​പ്പി​ക്കു​ന്നു. എന്നാൽ സാക്ഷി​ക്കു​ട്ടി​കളെ സംബന്ധി​ച്ചി​ട​ത്തോ​ളം ഇവി​ടെ​യും പ്രശ്‌നം ഒളിഞ്ഞു​കി​ട​ക്കു​ന്നു. ലൗകിക മൂല്യങ്ങൾ ക്രിസ്‌തീയ തത്ത്വങ്ങ​ളു​മാ​യി എല്ലായ്‌പോ​ഴും ഒത്തു​പോ​കു​ന്നില്ല. അധ്യാ​പകർ വിദ്യാർഥി​കളെ ലോക​ത്തോ​ടു പൊരു​ത്ത​പ്പെ​ടാൻ പ്രോ​ത്സാ​ഹി​പ്പി​ക്കു​ന്നു. എന്നാൽ, തന്റെ അനുഗാ​മി​കൾ ‘ലോക​ത്തി​ന്റെ ഭാഗമല്ലാ’തിരി​ക്കു​മെ​ന്നാണ്‌ യേശു പറഞ്ഞത്‌.—യോഹ​ന്നാൻ 17:16, NW.

കുട്ടികൾ ബൈബിൾ തത്ത്വങ്ങൾ പിൻപ​റ്റു​മ്പോൾ പ്രശ്‌നങ്ങൾ പൊന്തി​വ​രു​ന്നെ​ങ്കി​ലോ? കുട്ടികൾ സ്‌കൂ​ളിൽ ദിവസ​വും പോയി വരുക​യാ​ണെ​ങ്കിൽ അവർക്ക്‌ അത്തരം കാര്യങ്ങൾ മാതാ​പി​താ​ക്ക​ളു​മാ​യി ചർച്ച​ചെ​യ്യാം. പടിപ​ടി​യാ​യി, കുട്ടി​കൾക്കു മാർഗ​നിർദേശം നൽകാ​നോ അധ്യാ​പ​ക​രോ​ടു സംസാ​രി​ക്കാ​നോ മാതാ​പി​താ​ക്കൾക്കു കഴിയും. തന്നിമി​ത്തം, പ്രശ്‌ന​ങ്ങ​ളും തെറ്റി​ദ്ധാ​ര​ണ​ക​ളും പെട്ടെ​ന്നു​തന്നെ പരിഹ​രി​ക്ക​പ്പെ​ടു​ന്നു.

ബോർഡിങ്‌ സ്‌കൂ​ളിൽ സംഗതി അതല്ല. അത്തരം കുട്ടികൾ സദാ അധ്യാ​പ​ക​രു​ടെ നിയ​ന്ത്ര​ണ​ത്തി​ലാണ്‌. ക്രിസ്‌തീയ തത്ത്വങ്ങൾക്കു​വേണ്ടി കുട്ടികൾ ഒരു നിലപാ​ടു സ്വീക​രി​ക്കു​ന്നു​വെ​ങ്കിൽ മാതാ​പി​താ​ക്ക​ളിൽനി​ന്നുള്ള അനുദിന പിന്തുണ കൂടാതെ അവർ അതു ചെയ്യേ​ണ്ട​തുണ്ട്‌. ചില​പ്പോ​ഴൊ​ക്കെ അത്തരം സാഹച​ര്യ​ങ്ങ​ളിൽ ദൈവ​ത്തോ​ടു വിശ്വ​സ്‌തത പുലർത്താൻ കുട്ടി​കൾക്കു കഴിഞ്ഞി​ട്ടുണ്ട്‌. എന്നാൽ ഒട്ടുമി​ക്ക​പ്പോ​ഴും അവർക്ക​തി​നു കഴിയു​ന്നില്ല. ഒരു കുട്ടി അധ്യാ​പ​കന്റെ ഇഷ്ടത്തിനു വഴങ്ങാ​നുള്ള സാധ്യ​ത​യുണ്ട്‌.

സ്വാത​ന്ത്ര്യ​ത്തി​ന്മേ​ലുള്ള വിലക്കു​കൾ

വിദ്യാർഥി​ക​ളു​ടെ ഇഷ്ടപ്ര​കാ​രം വരാനും പോകാ​നും കഴിയുന്ന കോ​ളെ​ജു​ക​ളിൽനി​ന്നു വ്യത്യ​സ്‌ത​മാ​യി, ബോർഡിങ്‌ സ്‌കൂൾ കുട്ടി​ക​ളു​ടെ സ്വാത​ന്ത്ര്യ​ത്തി​ന്മേൽ വിലക്കു​കൾ ഏർപ്പെ​ടു​ത്തു​ന്നു. ഞായറാഴ്‌ച ഒഴികെ സ്‌കൂൾ വളപ്പിനു വെളി​യിൽ പോകാൻ മിക്ക സ്‌കൂ​ളു​ക​ളി​ലും വിദ്യാർഥി​കൾക്ക്‌ അനുവാ​ദ​മില്ല, ചില സ്‌കൂ​ളു​കൾ അതു​പോ​ലും അനുവ​ദി​ക്കു​ന്നില്ല. ബോർഡിങ്‌ സ്‌കൂൾ വിദ്യാർഥി​നി​യായ 11 വയസ്സുള്ള ഏറൂ ഇങ്ങനെ പറയുന്നു: “സ്‌കൂൾ അധികാ​രി​കൾ ഞങ്ങളെ ഒരിക്ക​ലും യോഗ​ങ്ങൾക്കു പോകാൻ അനുവ​ദി​ക്കു​ക​യില്ല, വയൽസേ​വ​ന​ത്തി​ന്റെ കാര്യം ഒട്ടു പറയു​ക​യും വേണ്ട. സ്‌കൂ​ളി​നു​ള്ളിൽ കത്തോ​ലി​ക്കർക്കും മുസ്ലീം​കൾക്കും മാത്രം മതശു​ശ്രൂ​ഷ​ക​ളുണ്ട്‌. മുഴു കുട്ടി​ക​ളും ഒന്നുകിൽ ആ രണ്ടു മതങ്ങളി​ലൊ​ന്നു സ്വീക​രി​ക്കണം അല്ലെങ്കിൽ അധ്യാ​പ​ക​രു​ടെ​യും വിദ്യാർഥി​ക​ളു​ടെ​യും ശക്തമായ എതിർപ്പി​നെ നേരി​ടണം. വിദ്യാർഥി​കൾ ദേശീ​യ​ഗാ​ന​വും പള്ളിക​ളി​ലെ സ്‌തോ​ത്ര​ഗീ​ത​വും പാടാൻ നിർബ​ന്ധി​ത​രാ​കു​ന്നു.”

അത്തര​മൊ​രു സ്‌കൂ​ളിൽ മാതാ​പി​താ​ക്കൾ കുട്ടി​കളെ ചേർക്കു​മ്പോൾ അവർ കുട്ടി​കൾക്ക്‌ എന്തു സന്ദേശ​മാ​ണു കൈമാ​റു​ന്നത്‌? ആരാധ​ന​യ്‌ക്കാ​യി കൂടി​വ​രുക, ശിഷ്യ​രാ​ക്കൽ വേലയിൽ പങ്കുപ​റ്റുക എന്നിവ​യെ​ക്കാൾ—ദൈവ​ത്തോ​ടുള്ള നിർമലത കാത്തു​കൊ​ള്ളു​ന്ന​തി​നെ​ക്കാ​ളും—ഏറെ പ്രധാ​ന​മാ​ണു ലൗകിക വിദ്യാ​ഭ്യാ​സം എന്നായി​രി​ക്കും ആ സന്ദേശം.—മത്തായി 24:14; 28:19, 20; 2 കൊരി​ന്ത്യർ 6:14-18; എബ്രായർ 10:24, 25.

ചില ബോർഡിങ്‌ സ്‌കൂ​ളു​ക​ളിൽ സാക്ഷി​ക​ളായ വിദ്യാർഥി​കൾക്ക്‌ ഒരു വിധത്തിൽ ബൈബിൾ ഒരുമിച്ച്‌ പഠിക്കാൻ കഴിയു​ന്നു. എന്നാൽ മിക്ക​പ്പോ​ഴും ഇതും ദുഷ്‌ക​ര​മാണ്‌. 16 വയസ്സുള്ള ബ്ലസ്സിങ്‌, താൻ താമസി​ക്കുന്ന ബോർഡിങ്‌ സ്‌കൂ​ളി​നെ​ക്കു​റിച്ച്‌ ഇങ്ങനെ പറയുന്നു: “ദിവസേന ക്രിസ്‌ത്യാ​നി​കൾ എന്നു പറയ​പ്പെ​ടു​ന്നവർ പ്രാർഥി​ക്കാൻ കൂടി​വ​രും. അധ്യയനം നടത്താൻ അനുവ​ദി​ക്ക​ണ​മെന്നു ഞങ്ങൾ അവരോ​ടു കേണ​പേ​ക്ഷി​ക്കും. എന്നാൽ ഞങ്ങളുടെ സ്ഥാപനം നിയമാം​ഗീ​കാ​ര​മു​ള്ള​ത​ല്ലെന്നു മുതിർന്ന വിദ്യാർഥി​കൾ ഞങ്ങളോ​ടു പറയും. എന്നിട്ട്‌, അവരോ​ടൊ​പ്പം പ്രാർഥി​ക്കാൻ ഞങ്ങളു​ടെ​മേൽ അവർ സമ്മർദം ചെലു​ത്തും. നിരസി​ക്കു​ന്ന​പക്ഷം ഞങ്ങളെ ശിക്ഷി​ക്കു​ക​യാ​യി. അധ്യാ​പ​ക​രോ​ടു പരാതി പറയു​ന്നതു പ്രശ്‌ന​ങ്ങളെ വീണ്ടും വഷളാ​ക്കു​കയേ ഉള്ളൂ. വായിൽ വരുന്ന​പോ​ലെ അവർ ഞങ്ങളെ ചീത്തവി​ളി​ക്കും, എന്നിട്ട്‌ മുതിർന്ന കുട്ടി​ക​ളോ​ടു ഞങ്ങളെ ശിക്ഷി​ക്കാൻ പറയും.”

വ്യത്യ​സ്‌ത​രാ​യി നില​കൊ​ള്ളൽ

ബോർഡിങ്‌ സ്‌കൂ​ളിൽ പഠിക്കുന്ന വിദ്യാർഥി​കൾ യഹോ​വ​യു​ടെ സാക്ഷി​ക​ളാ​ണെന്നു വ്യക്തമാ​കു​മ്പോൾ അതു​കൊ​ണ്ടു പ്രയോ​ജ​ന​മു​ണ്ടാ​യേ​ക്കാം. സാക്ഷി​ക​ളു​ടെ വിശ്വാ​സ​ത്തി​നെ​തി​രായ, നിർബ​ന്ധിത വ്യാജ​മ​ത​പ​രി​പാ​ടി​ക​ളിൽ പങ്കെടു​ക്കു​ന്ന​തിൽനി​ന്നു സ്‌കൂൾ അധികാ​രി​കൾ സാക്ഷി​കളെ ഒഴിച്ചു​നിർത്തി​യേ​ക്കാം. ആരോ​ഗ്യാ​വ​ഹ​മ​ല്ലാത്ത പരിപാ​ടി​ക​ളി​ലും സംഭാ​ഷ​ണ​ങ്ങ​ളി​ലും അവരെ ഉൾപ്പെ​ടു​ത്താൻ ശ്രമി​ക്കു​ന്ന​തിൽനി​ന്നു സഹപാ​ഠി​കൾ ഒഴിഞ്ഞു​നി​ന്നേ​ക്കാം. സഹപാ​ഠി​കൾക്കും അധ്യാ​പ​കർക്കും സാക്ഷ്യം നൽകു​ന്ന​തി​നുള്ള അവസരം ലഭി​ച്ചേ​ക്കാം. കൂടാതെ, ക്രിസ്‌തീയ തത്ത്വങ്ങൾക്ക​നു​സൃ​ത​മാ​യി ജീവി​ക്കു​ന്നവർ കൊടിയ ദുഷ്‌പ്ര​വൃ​ത്തി​യി​ലേർപ്പെ​ടു​ന്നു​വെന്നു സംശയി​ക്കാ​നുള്ള സാധ്യ​ത​യും കുറവാണ്‌. ചില​പ്പോ​ഴൊ​ക്കെ അവർ അധ്യാ​പ​ക​രു​ടെ​യും സഹപാ​ഠി​ക​ളു​ടെ​യും ആദരവു നേടി​യെ​ടു​ക്കു​ന്നു.

എങ്കിലും, കാര്യങ്ങൾ എല്ലായ്‌പോ​ഴും അങ്ങനെ​യാ​യി​രി​ക്ക​ണ​മെ​ന്നില്ല. വ്യത്യ​സ്‌ത​നാ​യി നില​കൊ​ള്ളു​ന്നതു മിക്ക​പ്പോ​ഴും ഒരു ചെറു​പ്പ​ക്കാ​രനെ പീഡന​ത്തി​നും വിദ്യാർഥി​ക​ളു​ടെ​യും അധ്യാ​പ​ക​രു​ടെ​യും പരിഹാ​സ​ത്തി​നും പാത്ര​മാ​ക്കു​ന്നു. ബോർഡിങ്‌ സ്‌കൂ​ളിൽ പഠിക്കുന്ന, 15 വയസ്സുള്ള യിങ്ക എന്ന ആൺകുട്ടി ഇങ്ങനെ പറയുന്നു: “സ്‌കൂ​ളിൽ നിങ്ങൾ യഹോ​വ​യു​ടെ സാക്ഷി​ക​ളി​ലൊ​രാ​ളാ​ണെന്ന്‌ അറിയ​പ്പെ​ടു​ന്നെ​ങ്കിൽ അതോടെ നിങ്ങൾ പരിഹാ​സ​പാ​ത്ര​മാ​കു​ന്നു. നമ്മുടെ ആത്മീയ​വും ധാർമി​ക​വു​മായ നിലപാ​ടി​നെ​ക്കു​റിച്ച്‌ അറിയാ​വു​ന്ന​തു​കൊണ്ട്‌ അവർ നമ്മെ കുടു​ക്കി​ലാ​ക്കാൻ ശ്രമി​ക്കു​ന്നു.”

മാതാ​പി​താ​ക്ക​ളു​ടെ ഉത്തരവാ​ദി​ത്വം

കുട്ടി​കളെ യഹോ​വ​യു​ടെ സമർപ്പിത ദാസരാ​ക്കാ​നുള്ള വേല ഉചിത​മാ​യും ഒരധ്യാ​പ​ക​നോ സ്‌കൂ​ളി​നോ കോ​ളെ​ജി​നോ ഏറ്റെടു​ക്കാൻ കഴിയു​ക​യില്ല. അതവരു​ടെ ജോലി​യു​മല്ല ഉത്തരവാ​ദി​ത്വ​വു​മല്ല. കുട്ടി​ക​ളു​ടെ ആത്മീയ ആവശ്യ​ങ്ങൾക്കു​വേണ്ട കരുതൽ ചെയ്യേ​ണ്ടതു മാതാ​പി​താ​ക്ക​ളാ​ണെന്നു ദൈവ​വ​ചനം നിർദേ​ശി​ക്കു​ന്നു. “പിതാ​ക്കൻമാ​രേ, നിങ്ങളു​ടെ മക്കളെ കോപി​പ്പി​ക്കാ​തെ കർത്താ​വി​ന്റെ ബാലശി​ക്ഷ​യി​ലും പത്ഥ്യോ​പ​ദേ​ശ​ത്തി​ലും പോററി വളർത്തു​വിൻ” എന്നു പൗലൊസ്‌ എഴുതി. (എഫെസ്യർ 6:4) കുട്ടികൾ വീട്ടിൽനി​ന്ന​കലെ, മാസത്തിൽ ഒന്നോ രണ്ടോ തവണമാ​ത്രം സന്ദർശി​ക്കാൻ അനുവാ​ദ​മുള്ള ബോർഡിങ്‌ സ്‌കൂ​ളി​ലാ​ണെ​ങ്കിൽ മാതാ​പി​താ​ക്കൾക്ക്‌ ആ ദിവ്യ ബുദ്ധ്യു​പ​ദേശം എങ്ങനെ ബാധക​മാ​ക്കാൻ കഴിയും?

സാഹച​ര്യ​ങ്ങൾ വളരെ​യ​ധി​കം വ്യത്യാ​സ​പ്പെ​ട്ടി​രി​ക്കു​ന്നെ​ങ്കി​ലും ക്രിസ്‌തീയ മാതാ​പി​താ​ക്കൾ ഈ നിശ്വസ്‌ത പ്രസ്‌താ​വ​ന​യ്‌ക്കു ചേർച്ച​യിൽ കാര്യങ്ങൾ ചെയ്യാൻ കിണഞ്ഞു പരി​ശ്ര​മി​ക്കു​ന്നു: “തനിക്കു​ള്ള​വർക്കും പ്രത്യേ​കം സ്വന്തകു​ടും​ബ​ക്കാർക്കും വേണ്ടി കരുതാ​ത്തവൻ വിശ്വാ​സം തള്ളിക്ക​ളഞ്ഞു അവിശ്വാ​സി​യെ​ക്കാൾ അധമനാ​യി​രി​ക്കു​ന്നു.”—1 തിമൊ​ഥെ​യൊസ്‌ 5:8.

മറ്റെ​ന്തെ​ങ്കി​ലും ഉപാധി​ക​ളു​ണ്ടോ?

രണ്ടി​ലൊ​രു തീരു​മാ​നം—ബോർഡിങ്‌ സ്‌കൂൾ അല്ലെങ്കിൽ സൗകര്യ​ങ്ങൾ കുറവായ പ്രാ​ദേ​ശിക സ്‌കൂൾ—മാത്രമേ തങ്ങളുടെ മുന്നി​ലു​ള്ളൂ എങ്കിൽ മാതാ​പി​താ​ക്കൾ എന്തു ചെയ്യണം? അത്തരം സാഹച​ര്യ​ത്തിൽ ചിലർ, കുട്ടി​കളെ പ്രാ​ദേ​ശിക സ്‌കൂ​ളിൽ വിടു​ന്ന​തി​നൊ​പ്പം അവർക്കു​വേണ്ടി ട്യൂഷ​നും ഏർപ്പാടു ചെയ്യുന്നു. മറ്റു ചിലർ സ്വയം കുട്ടി​കൾക്കു ട്യൂഷൻ കൊടു​ക്കാൻ സമയം നീക്കി​വ​യ്‌ക്കു​ന്നു.

ചില​പ്പോ​ഴെ​ല്ലാം, സെക്കൻഡറി സ്‌കൂ​ളിൽ പ്രവേ​ശി​ക്കാൻ കുട്ടി​കൾക്കു പ്രായ​മാ​കു​ന്ന​തി​നു വളരെ മുമ്പു​തന്നെ മാതാ​പി​താ​ക്കൾ അതിനു​വേണ്ടി ആസൂ​ത്രണം ചെയ്യുന്നു. നിങ്ങൾക്കു കൊച്ചു കുട്ടി​ക​ളു​ണ്ടെ​ങ്കി​ലോ ഒരു കുടും​ബം വളർത്തി​യെ​ടു​ക്കാൻ ഉദ്ദേശ്യ​മു​ണ്ടെ​ങ്കി​ലോ നിങ്ങളു​ടെ പ്രദേ​ശത്തു സൗകര്യ​മുള്ള സെക്കൻഡറി സ്‌കൂൾ ഉണ്ടോ എന്നു പരി​ശോ​ധി​ക്കാ​വു​ന്ന​താണ്‌. ഇല്ലാത്ത​പക്ഷം, സ്‌കൂൾ ഉള്ള സ്ഥലത്തേക്കു മാറി താമസി​ക്കു​ന്നത്‌ ഉചിത​മാ​യി​രി​ക്കും.

മാതാ​പി​താ​ക്കൾക്കു നന്നായി അറിവു​ള്ള​തു​പോ​ലെ, ഒരു കുട്ടി​യിൽ യഹോ​വ​യോ​ടുള്ള സ്‌നേഹം നട്ടുവ​ളർത്തു​ന്ന​തി​നു വൈദ​ഗ്‌ധ്യ​വും ക്ഷമയും വളരെ​യ​ധി​കം സമയവും ആവശ്യ​മാണ്‌. ഒരു കുട്ടി വീട്ടിൽ താമസി​ക്കു​മ്പോൾ അതു പ്രയാ​സ​ക​ര​മാ​യി​രി​ക്കെ വീട്ടിൽനി​ന്ന​കലെ താമസി​ക്കു​ന്ന​പക്ഷം അത്‌ എത്രമാ​ത്രം ദുഷ്‌ക​ര​മാ​യി​രി​ക്കും! കുട്ടി​യു​ടെ നിത്യ​ജീ​വൻ ഉൾപ്പെ​ട്ടി​രി​ക്കു​ന്ന​തു​കൊണ്ട്‌, കുട്ടിയെ ഒരു ബോർഡിങ്‌ സ്‌കൂ​ളിൽ അയയ്‌ക്കു​ന്നതു തക്ക മൂല്യ​മുള്ള കാര്യ​മാ​ണോ എന്നു മാതാ​പി​താ​ക്കൾ സഗൗരവം, പ്രാർഥ​നാ​പൂർവം തീരു​മാ​നി​ക്കേ​ണ്ട​തുണ്ട്‌. ബോർഡിങ്‌ സ്‌കൂൾ വിദ്യാ​ഭ്യാ​സ​ത്തി​നു​വേണ്ടി ഒരു കുട്ടി​യു​ടെ ആത്മീയ താത്‌പ​ര്യ​ങ്ങൾ ബലിക​ഴി​ക്കു​ന്നത്‌ എത്ര ദീർഘ​ദൃ​ഷ്ടി​യി​ല്ലാ​യ്‌മ​യാ​യി​രി​ക്കും! വിലകു​റഞ്ഞ ഒരു ആഭരണ​ത്തി​നു​വേണ്ടി ആളിക്ക​ത്തുന്ന വീട്ടി​ലേക്ക്‌ ഓടി​ക്ക​യ​റു​ന്ന​തു​പോ​ലെ​യാ​ണത്‌, അഗ്നിക്കി​ര​യാ​കു​ക​യാ​യി​രി​ക്കും ഫലം.

“വിവേ​ക​മു​ള്ളവൻ അനർത്ഥം കണ്ടു ഒളിച്ചു കൊള്ളു​ന്നു; അല്‌പ​ബു​ദ്ധി​ക​ളോ നേരെ ചെന്നു ചേത​പ്പെ​ടു​ന്നു” എന്നു ദൈവ​വ​ചനം പറയുന്നു. (സദൃശ​വാ​ക്യ​ങ്ങൾ 22:3) മോശ​മായ ഒരു സാഹച​ര്യ​ത്തെ പിന്നീടു തിരു​ത്തു​ന്ന​തി​നു പകരം അതുണ്ടാ​കാ​തെ സൂക്ഷി​ക്കു​ന്ന​താണ്‌ ഏറെ മെച്ചം. അതു​കൊണ്ട്‌, ‘എന്റെ കുട്ടി ബോർഡിങ്‌ സ്‌കൂ​ളിൽ പോക​ണ​മോ?’ എന്നു നിങ്ങൾ സ്വയം ചോദി​ക്കു​ന്നു​ണ്ടെ​ങ്കിൽ അതേക്കു​റി​ച്ചു ചിന്തി​ക്കു​ന്നതു ജ്ഞാനപൂർവ​ക​മാ​യി​രി​ക്കും.

[28-ാം പേജിലെ ചിത്രം]

ബോർഡിങ്‌ സ്‌കൂ​ളി​നെ​പ്പ​റ്റി​യുള്ള സാക്ഷി​ക്കു​ട്ടി​ക​ളു​ടെ അഭി​പ്രാ​യം

“ബോർഡിങ്‌ സ്‌കൂ​ളിൽ സാക്ഷി​ക്കു​ട്ടി​കൾക്ക്‌ ആത്മീയ സഹവാ​സ​മില്ല. വളരെ​യ​ധി​കം വിദ്വേ​ഷം​പൂണ്ട, തെറ്റു ചെയ്യാൻ വളരെ​യ​ധി​കം സമ്മർദ​മുള്ള അന്തരീ​ക്ഷ​മാ​ണത്‌.”—11 വയസ്സു​മു​തൽ 14 വയസ്സു​വരെ ബോർഡിങ്‌ സ്‌കൂ​ളിൽ താമസിച്ച റോട്ടി​മി.

“ക്രിസ്‌തീയ യോഗ​ങ്ങൾക്കു ഹാജരാ​കുക വളരെ​യ​ധി​കം ദുഷ്‌ക​ര​മാ​യി​രു​ന്നു. ഞായറാഴ്‌ച മാത്രമേ എനിക്കു ഹാജരാ​കാൻ കഴിഞ്ഞി​രു​ന്നു​ള്ളൂ. മറ്റു കുട്ടികൾ നിരനി​ര​യാ​യി പള്ളിയി​ലേക്കു പോകു​മ്പോൾ പമ്മിപ്പമ്മി പുറത്തു​ക​ട​ക്കേ​ണ്ടി​യി​രു​ന്നു. എനിക്ക്‌ ഒരിക്ക​ലും സന്തോഷം തോന്നി​യില്ല. കാരണം വീട്ടി​ലാ​യി​രു​ന്ന​പ്പോൾ എല്ലാ സഭാ​യോ​ഗ​ങ്ങൾക്കും ഞാൻ ഹാജരാ​കുക പതിവാ​യി​രു​ന്നു. മാത്രമല്ല, ശനിയാ​ഴ്‌ച​ക​ളി​ലും ഞായറാ​ഴ്‌ച​ക​ളി​ലും ഞാൻ വയൽസേ​വ​ന​ത്തി​നും പോയി​രു​ന്നു. ബോർഡിങ്‌ സ്‌കൂ​ളി​ലെ ജീവിതം പരിപു​ഷ്ടി​പ്പെ​ടു​ത്തുന്ന അനുഭ​വ​മാ​യി​രു​ന്നില്ല. എനിക്കു വളരെ കാര്യങ്ങൾ നഷ്ടമായി.”—സ്‌കൂ​ളി​ലെ പള്ളിശു​ശ്രൂ​ഷ​ക​ളിൽ പങ്കെടു​ക്കാൻ വിസ്സമ്മ​തി​ച്ച​തു​കൊണ്ട്‌ നിരന്തരം അധ്യാ​പ​ക​രു​ടെ അടി കൊണ്ടി​രുന്ന എസ്ഥർ.

“സഹപാ​ഠി​ക​ളോ​ടു സാക്ഷ്യം പറയു​ന്നതു ബോർഡിങ്‌ സ്‌കൂ​ളിൽ എളുപ്പ​മാ​യി​രു​ന്നില്ല. വ്യത്യ​സ്‌ത​യാ​യി നില​കൊ​ള്ളുക എളുപ്പമല്ല. കൂട്ട​ത്തോ​ടു ചേരാൻ ഞാൻ ആഗ്രഹി​ച്ചു. യോഗ​ങ്ങൾക്കു പോകു​ക​യും വയൽസേ​വ​ന​ത്തിൽ ഏർപ്പെ​ടു​ക​യും ചെയ്‌തി​രു​ന്നെ​ങ്കിൽ ഞാൻ ഒരുപക്ഷേ കൂടുതൽ ധൈര്യ​ശാ​ലി​യാ​കു​മാ​യി​രു​ന്നു. എന്നാൽ അവധി​ക്കാ​ലത്ത്‌, വർഷത്തിൽ വെറും മൂന്നു തവണ മാത്രമേ എനിക്ക​തി​നു കഴിഞ്ഞു​ള്ളൂ. കരിന്തി​രി പെട്ടെന്ന്‌ അണഞ്ഞു​പോ​കും. സ്‌കൂ​ളി​ലെ കാര്യ​വും അതുത​ന്നെ​യാ​യി​രു​ന്നു.”—11 വയസ്സു​മു​തൽ 16 വയസ്സു​വരെ ബോർഡിങ്‌ സ്‌കൂ​ളിൽ പഠിച്ച ലാറ.

“ഇപ്പോൾ ബോർഡിങ്‌ സ്‌കൂ​ളിൽ അല്ലാത്ത​തി​നാൽ യോഗ​ങ്ങൾക്കു ഹാജരാ​കാ​നും വയൽസേ​വ​ന​ത്തിൽ പങ്കെടു​ക്കാ​നും കുടും​ബ​ത്തി​ലെ മറ്റംഗ​ങ്ങ​ളോ​ടൊ​പ്പം ദിനവാ​ക്യം ചർച്ച​ചെ​യ്യാ​നും എനിക്കു കഴിയു​ന്നുണ്ട്‌. അതിൽ ഞാൻ സന്തോ​ഷ​വ​തി​യാണ്‌. സ്‌കൂ​ളിൽ താമസി​ക്കു​ന്ന​തു​കൊ​ണ്ടു ചില നേട്ടങ്ങൾ ഉണ്ടായി​രു​ന്നെ​ങ്കി​ലും യഹോ​വ​യു​മാ​യുള്ള എന്റെ ബന്ധത്തോ​ളം പ്രാമു​ഖ്യ​മുള്ള മറ്റൊ​ന്നു​മില്ല.”—ബോർഡിങ്‌ സ്‌കൂ​ളിൽനി​ന്നു വീട്ടി​ലേക്കു തന്നെ കൊണ്ടു​പോ​കേ​ണ്ട​തി​ന്റെ കാരണങ്ങൾ പിതാ​വി​നെ ബോധ്യ​പ്പെ​ടു​ത്തിയ നവോമി.