ഭൂമി​യി​ലെ യേശു​വി​ന്റെ അവസാ​നത്തെ 40 ദിവസ​ങ്ങ​ളിൽനി​ന്നുള്ള പാഠങ്ങൾ

1-2. യേശു​വി​ന്റെ രണ്ടു ശിഷ്യ​ന്മാർ എമ്മാവൂ​സി​ലേക്കു നടന്നു​പോ​കു​മ്പോൾ എന്താണു സംഭവി​ച്ചത്‌?

തീയതി, എ.ഡി. 33 നീസാൻ 16. യേശു​വി​ന്റെ ശിഷ്യ​ന്മാർ ആകെ പേടി​ച്ചും സങ്കട​പ്പെ​ട്ടും തളർന്നി​രി​ക്കു​ക​യാണ്‌. അവരിൽ രണ്ടുപേർ ഇപ്പോൾ യരുശ​ലേ​മിൽനിന്ന്‌ എമ്മാവൂസ്‌ എന്ന ഗ്രാമ​ത്തി​ലേക്കു പോകു​ന്നു. ഏതാണ്ട്‌ 11 കിലോ​മീ​റ്റ​റുണ്ട്‌ ആ ഗ്രാമ​ത്തി​ലേക്ക്‌. അവർ വളരെ നിരാ​ശ​യോ​ടെ​യാണ്‌ നടന്നു​നീ​ങ്ങു​ന്നത്‌. കാരണം അവരുടെ നായക​നായ യേശു വധിക്ക​പ്പെട്ടു. പ്രതീ​ക്ഷ​ക​ളെ​ല്ലാം അതോടെ അസ്‌ത​മി​ച്ചു. മിശിഹ തങ്ങൾക്കു​വേണ്ടി ചെയ്യു​മെന്ന്‌ അവർ വിചാ​രി​ച്ച​തൊ​ന്നും സംഭവി​ച്ചില്ല. പക്ഷേ അവരുടെ ദുഃഖം സന്തോ​ഷ​ത്തി​നു വഴിമാ​റാൻ പോകു​ക​യാ​യി​രു​ന്നു.

² നടന്നു​പോ​കുന്ന വഴിക്ക്‌ ഒരു അപരി​ചി​തൻ അവരോ​ടൊ​പ്പം ചേർന്നു. യേശു​വി​നു സംഭവിച്ച കാര്യങ്ങൾ ആ ശിഷ്യ​ന്മാർ സങ്കട​ത്തോ​ടെ അദ്ദേഹ​ത്തോ​ടു വിവരി​ച്ചു. അവർ അതു പറഞ്ഞ്‌ കഴിഞ്ഞ​പ്പോൾ അപരി​ചി​ത​നായ ആ മനുഷ്യൻ ശിഷ്യ​ന്മാ​രോ​ടു ചില പ്രധാ​ന​പ്പെട്ട കാര്യങ്ങൾ പറയാൻതു​ടങ്ങി. അത്‌ അവർ ഒരിക്ക​ലും മറക്കി​ല്ലാ​യി​രു​ന്നു. “മോശ തുടങ്ങി എല്ലാ പ്രവാ​ച​ക​ന്മാ​രും” പറഞ്ഞ കാര്യങ്ങൾ ഉപയോ​ഗിച്ച്‌ മിശിഹ കഷ്ടത സഹിച്ച്‌ മരി​ക്കേ​ണ്ടത്‌ എന്തു​കൊ​ണ്ടാ​ണെന്ന്‌ അദ്ദേഹം വിശദീ​ക​രി​ച്ചു. ഈ മൂന്നു പുരു​ഷ​ന്മാ​രും എമ്മാവൂ​സിൽ എത്തിക്ക​ഴി​ഞ്ഞ​പ്പോൾ ആ അപരി​ചി​തൻ ശരിക്കും താൻ ആരാ​ണെന്ന്‌ അവർക്കു വെളി​പ്പെ​ടു​ത്തി​ക്കൊ​ടു​ത്തു. പുനരു​ത്ഥാ​ന​പ്പെട്ട യേശു ആയിരു​ന്നു അത്‌. തങ്ങളുടെ മിശിഹ ജീവ​നോ​ടെ​യു​ണ്ടെന്ന്‌ അറിഞ്ഞ​പ്പോൾ ആ ശിഷ്യ​ന്മാർക്കു​ണ്ടായ സന്തോഷം നമുക്ക്‌ ഊഹി​ക്കാ​വു​ന്ന​തി​നും അപ്പുറ​മാ​യി​രി​ക്കും!—ലൂക്കോ. 24:13-35.

3-4. (എ) യേശു​വി​ന്റെ ശിഷ്യ​ന്മാ​രിൽ എന്തു മാറ്റമാ​ണു​ണ്ടാ​യത്‌? (പ്രവൃ​ത്തി​കൾ 1:3) (ബി) ഈ ലേഖന​ത്തിൽ നമ്മൾ എന്തു പഠിക്കും?

³ ഭൂമി​യി​ലെ തന്റെ അവസാ​നത്തെ 40 ദിവസ​ങ്ങ​ളിൽ യേശു പല തവണ ശിഷ്യ​ന്മാർക്കു പ്രത്യ​ക്ഷ​നാ​യി.a (പ്രവൃ​ത്തി​കൾ 1:3 വായി​ക്കുക.) സങ്കട​പ്പെട്ട്‌ പേടി​ച്ചി​രുന്ന യേശു​വി​ന്റെ ശിഷ്യ​ന്മാർ ആ സമയം​കൊണ്ട്‌ സന്തോ​ഷ​ത്തോ​ടെ​യും ആത്മവി​ശ്വാ​സ​ത്തോ​ടെ​യും ധൈര്യ​ത്തോ​ടെ​യും ദൈവ​രാ​ജ്യ​ത്തെ​ക്കു​റിച്ച്‌ പ്രസം​ഗി​ക്കു​ന്ന​വ​രും പഠിപ്പി​ക്കു​ന്ന​വ​രും ആയിത്തീർന്നു.

⁴ യേശു​വി​ന്റെ ജീവി​ത​ത്തി​ലെ ആവേശ​ക​ര​മായ ഈ സമയ​ത്തെ​ക്കു​റിച്ച്‌ പഠിക്കു​ന്നതു നമുക്കും പ്രയോ​ജനം ചെയ്യും. ഈ ലേഖന​ത്തിൽ, അവസാ​നത്തെ 40 ദിവസം യേശു എങ്ങനെ​യാണ്‌ തന്റെ ശിഷ്യ​ന്മാ​രെ (1) പ്രോ​ത്സാ​ഹി​പ്പി​ച്ച​തെ​ന്നും (2) തിരു​വെ​ഴു​ത്തു​ക​ളെ​ക്കു​റിച്ച്‌ കൂടുതൽ മനസ്സി​ലാ​ക്കാൻ സഹായി​ച്ച​തെ​ന്നും (3) കൂടുതൽ ഉത്തരവാ​ദി​ത്വ​ങ്ങൾ ഏറ്റെടു​ക്കാൻ പരിശീ​ലി​പ്പി​ച്ച​തെ​ന്നും നമ്മൾ കാണും. കൂടാതെ, യേശു ചെയ്‌ത ഈ ഓരോ കാര്യ​വും നമുക്ക്‌ എങ്ങനെ അനുക​രി​ക്കാ​മെ​ന്നും നമ്മൾ പഠിക്കും.

മറ്റുള്ള​വരെ പ്രോ​ത്സാ​ഹി​പ്പി​ക്കുക

5. യേശു​വി​ന്റെ ശിഷ്യ​ന്മാർക്കു പ്രോ​ത്സാ​ഹനം ആവശ്യ​മാ​യി​രു​ന്നത്‌ എന്തു​കൊണ്ട്‌?

⁵ യേശു​വി​ന്റെ ശിഷ്യ​ന്മാർക്കു പ്രോ​ത്സാ​ഹനം ആവശ്യ​മാ​യി​രു​ന്നു. എന്തു​കൊണ്ട്‌? അവരിൽ ചിലർ യേശു​വി​നെ മുഴു​സ​മയം അനുഗ​മി​ക്കു​ന്ന​തി​നു​വേണ്ടി തങ്ങളുടെ വീടും കുടും​ബ​വും ബിസി​നെ​സ്സും എല്ലാം ഉപേക്ഷിച്ച്‌ വന്നവരാണ്‌. (മത്താ. 19:27) ഇനി മറ്റു ചിലരെ, യേശു​വി​ന്റെ ശിഷ്യ​ന്മാ​രാ​യ​തി​ന്റെ പേരിൽ സമൂഹം ഒറ്റപ്പെ​ടു​ത്തു​ക​യും ഒഴിവാ​ക്കു​ക​യും ചെയ്‌തി​രു​ന്നു. (യോഹ. 9:22) വരാനി​രുന്ന മിശിഹ യേശു ആണെന്നു വിശ്വ​സി​ച്ച​തു​കൊ​ണ്ടാണ്‌ അവർ ഈ ത്യാഗങ്ങൾ എല്ലാം ചെയ്യാൻ തയ്യാറാ​യത്‌. (മത്താ. 16:16) പക്ഷേ, യേശു വധിക്ക​പ്പെ​ട്ട​പ്പോൾ അവരുടെ പ്രതീ​ക്ഷ​ക​ളെ​ല്ലാം തകർന്നു; അവർ ആകെ നിരാ​ശ​യി​ലാ​യി.

6. പുനരു​ത്ഥാ​ന​പ്പെ​ട്ട​ശേഷം യേശു എന്താണു ചെയ്‌തത്‌?

⁶ ശിഷ്യ​ന്മാർ ദുഃഖി​ച്ചതു വിശ്വാ​സ​മി​ല്ലാ​ത്ത​തു​കൊ​ണ്ടല്ല എന്നു യേശു മനസ്സി​ലാ​ക്കി. പെട്ടെന്ന്‌ ഒരു നഷ്ടം ഉണ്ടാകു​മ്പോൾ ആർക്കും തോന്നാ​വുന്ന സ്വാഭാ​വി​ക​മായ ഒരു പ്രതി​ക​രണം മാത്ര​മാ​യി​രു​ന്നു അതെന്നു യേശു​വിന്‌ അറിയാ​മാ​യി​രു​ന്നു. അതു​കൊ​ണ്ടാണ്‌ പുനരു​ത്ഥാ​ന​പ്പെട്ട ആ ദിവസം​തന്നെ യേശു തന്റെ സുഹൃ​ത്തു​ക്കളെ പ്രോ​ത്സാ​ഹി​പ്പി​ക്കാൻ തുടങ്ങി​യത്‌. യേശു ആർക്കൊ​ക്കെ പ്രത്യ​ക്ഷ​നാ​യി? തന്റെ കല്ലറയു​ടെ അടുത്ത്‌ കരഞ്ഞു​കൊ​ണ്ടി​രുന്ന മഗ്‌ദ​ല​ക്കാ​രി മറിയ​യ്‌ക്കു യേശു പ്രത്യ​ക്ഷ​പ്പെട്ടു. (യോഹ. 20:11, 16) ഈ ലേഖന​ത്തി​ന്റെ തുടക്ക​ത്തിൽ പറഞ്ഞ ആ രണ്ടു ശിഷ്യ​ന്മാ​രു​ടെ അടുത്ത്‌ യേശു പ്രത്യ​ക്ഷ​നാ​യി. അതു​പോ​ലെ അപ്പോ​സ്‌ത​ല​നായ പത്രോ​സി​ന്റെ അടുത്തും യേശു വന്നു. (ലൂക്കോ. 24:34) യേശു​വി​ന്റെ മാതൃ​ക​യിൽനിന്ന്‌ നമുക്ക്‌ എന്തു പഠിക്കാം? അതു മനസ്സി​ലാ​ക്കാൻ, യേശു ആദ്യം പ്രത്യ​ക്ഷ​പ്പെ​ട്ട​പ്പോ​ഴു​ണ്ടായ സംഭവം നോക്കാം.

7. മറിയ എന്തു ചെയ്യു​ന്ന​താണ്‌ യേശു കണ്ടത്‌, എന്തു ചെയ്യാൻ അതു യേശു​വി​നെ പ്രേരി​പ്പി​ച്ചു? (യോഹ​ന്നാൻ 20:11-16) (ചിത്ര​വും കാണുക.)

⁷ യോഹ​ന്നാൻ 20:11-16 വായി​ക്കുക. നീസാൻ 16-ാം തീയതി അതിരാ​വി​ലെ വിശ്വ​സ്‌ത​രായ കുറച്ച്‌ സ്‌ത്രീ​കൾ യേശു​വി​നെ അടക്കി​യി​രുന്ന സ്ഥലത്തേക്കു പോയി. (ലൂക്കോ. 24:1, 10) അവരിൽ ഒരാളാ​യി​രു​ന്നു മഗ്‌ദ​ല​ക്കാ​രി മറിയ. കല്ലറയു​ടെ അടുത്ത്‌ ചെന്ന​പ്പോൾ അതു ശൂന്യ​മാ​യി കിടക്കു​ന്നതു കണ്ട മറിയ പെട്ടെന്നു പോയി പത്രോ​സി​നെ​യും യോഹ​ന്നാ​നെ​യും വിവരം അറിയി​ച്ചു. അതു കേട്ടയു​ടനെ അവർ കല്ലറയു​ടെ അടു​ത്തേക്ക്‌ ഓടി. ഒപ്പം മറിയ​യും ചെന്നു. കല്ലറയിൽ യേശു​വി​ന്റെ ശരീരം ഇല്ലെന്നു ബോധ്യ​മാ​യ​പ്പോൾ അവർ തിരി​ച്ചു​പോ​യി. പക്ഷേ മറിയ കരഞ്ഞു​കൊണ്ട്‌ അവി​ടെ​ത്തന്നെ നിന്നു. ശരിക്കും യേശു അവിടെ ഉണ്ടായി​രു​ന്നെ​ങ്കി​ലും മറിയ അത്‌ അറിഞ്ഞില്ല. വിശ്വ​സ്‌ത​യായ ഈ സ്‌ത്രീ കരയു​ന്നതു യേശു നിരീ​ക്ഷി​ച്ചു; അവളെ ആശ്വസി​പ്പി​ക്കാൻ ആഗ്രഹി​ച്ചു. യേശു മറിയ​യ്‌ക്കു പ്രത്യ​ക്ഷ​നാ​യി. തുടർന്ന്‌ യേശു ചെയ്‌തതു ചെറി​യൊ​രു കാര്യ​മാ​യി​രു​ന്നെ​ങ്കി​ലും അത്‌ അവളെ വളരെ പ്രോ​ത്സാ​ഹി​പ്പി​ക്കു​ന്ന​താ​യി​രു​ന്നു. യേശു മറിയ​യോ​ടു സംസാ​രി​ച്ചു; അവൾക്കു പ്രധാ​ന​പ്പെട്ട ഒരു നിയമനം കൊടു​ക്കു​ക​യും ചെയ്‌തു. താൻ പുനരു​ത്ഥാ​ന​പ്പെട്ടു എന്ന സന്തോ​ഷ​വാർത്ത തന്റെ സഹോ​ദ​ര​ന്മാ​രെ അറിയി​ക്കുക എന്നതാ​യി​രു​ന്നു അത്‌.—യോഹ. 20:17, 18.

8. നമുക്ക്‌ എങ്ങനെ യേശു​വി​നെ അനുക​രി​ക്കാം?

⁸ നമുക്ക്‌ എങ്ങനെ യേശു​വി​നെ അനുക​രി​ക്കാം? യേശു​വി​നെ​പ്പോ​ലെ നമുക്കും, മറ്റുള്ള​വ​രു​ടെ വിഷമങ്ങൾ മനസ്സി​ലാ​ക്കാ​നും അവർക്ക്‌ എന്താണ്‌ തോന്നു​ന്ന​തെന്നു തിരി​ച്ച​റി​യാ​നും ആശ്വസി​പ്പി​ക്കുന്ന രീതി​യിൽ അവരോ​ടു സംസാ​രി​ക്കാ​നും ഒക്കെ ശ്രമി​ക്കാം. അങ്ങനെ ദൈവ​സേ​വ​ന​ത്തിൽ തുടരാൻ സഹോ​ദ​ര​ങ്ങളെ പ്രോ​ത്സാ​ഹി​പ്പി​ക്കു​മ്പോൾ നമ്മൾ യേശു​വി​നെ അനുക​രി​ക്കു​ക​യാണ്‌. ജോസ്‌ലിൻ എന്ന ഒരു സഹോ​ദ​രി​യു​ടെ അനുഭവം നോക്കാം. ഒരു അപകട​ത്തിൽ ജോസ്‌ലി​ന്റെ അനിയത്തി മരിച്ചു​പോ​യി. അവൾ പറയുന്നു: “മാസങ്ങ​ളോ​ളം ഞാൻ കടുത്ത ദുഃഖ​ത്തി​ലാ​ണ്ടു​പോ​യി.” അതു മനസ്സി​ലാ​ക്കിയ ഒരു സഹോ​ദ​ര​നും ഭാര്യ​യും ജോസ്‌ലി​നെ അവരുടെ വീട്ടി​ലേക്കു ക്ഷണിക്കു​ക​യും അവൾ പറഞ്ഞതു ശ്രദ്ധ​യോ​ടെ കേൾക്കു​ക​യും ചെയ്‌തു. എന്നിട്ട്‌ ദൈവ​ത്തി​ന്റെ കണ്ണിൽ അവൾ എത്ര വില​പ്പെ​ട്ട​വ​ളാ​ണെന്ന്‌ അവളെ ഓർമി​പ്പി​ച്ചു. ജോസ്‌ലിൻ പറയുന്നു: “ആർത്തി​ര​മ്പുന്ന ഒരു കടലിൽ മുങ്ങി​ത്താ​ണു​കൊ​ണ്ടി​രുന്ന എന്നെ ഒരു ലൈഫ്‌ബോ​ട്ടി​ലേക്കു വലിച്ചു​ക​യ​റ്റാൻ യഹോവ അവരെ ഉപയോ​ഗി​ച്ച​തു​പോ​ലെ എനിക്കു തോന്നി. യഹോ​വയെ സേവി​ക്കാ​നുള്ള ആഗ്രഹം വീണ്ടെ​ടു​ക്കാൻ അവർ എന്നെ സഹായി​ച്ചു.” നമുക്കും ഇതു​പോ​ലെ, മറ്റുള്ളവർ ഹൃദയം തുറക്കു​മ്പോൾ അതു ശ്രദ്ധിച്ച്‌ കേട്ടു​കൊ​ണ്ടും അവരോ​ടു ദയയോ​ടെ സംസാ​രി​ച്ചു​കൊ​ണ്ടും അവരെ പ്രോ​ത്സാ​ഹി​പ്പി​ക്കാം. അങ്ങനെ അവർക്കു ദൈവ​സേ​വ​ന​ത്തിൽ തുടരാൻ വേണ്ട ഊർജം പകരാം.—റോമ. 12:15.

തിരു​വെ​ഴു​ത്തു​കൾ മനസ്സി​ലാ​ക്കാൻ സഹായി​ക്കു​ക

9. ശിഷ്യ​ന്മാർക്ക്‌ ഏതു കാര്യ​ത്തിൽ ബുദ്ധി​മു​ട്ടു തോന്നി, യേശു അവരെ എങ്ങനെ​യാ​ണു സഹായി​ച്ചത്‌?

⁹ യേശു​വി​ന്റെ ശിഷ്യ​ന്മാർ ദൈവ​വ​ചനം വിശ്വ​സി​ക്കു​ക​യും അതനു​സ​രിച്ച്‌ ജീവി​ക്കാൻ പരമാ​വധി ശ്രമി​ക്കു​ക​യും ചെയ്‌തി​രു​ന്നു. (യോഹ. 17:6) പക്ഷേ ദണ്ഡനസ്‌തം​ഭ​ത്തിൽ കിടന്ന്‌ ഒരു കുറ്റവാ​ളി​യെ​പ്പോ​ലെ യേശു മരിച്ചത്‌ എന്തു​കൊ​ണ്ടാ​ണെന്ന്‌ അവർക്കു മനസ്സി​ലാ​യില്ല. അവരുടെ ഉള്ളിൽ സംശയ​ങ്ങ​ളു​ണ്ടാ​യത്‌ അവർക്കു വിശ്വാ​സ​മോ യഹോ​വ​യോ​ടു സ്‌നേ​ഹ​മോ ഇല്ലാഞ്ഞി​ട്ടല്ല, പകരം തിരു​വെ​ഴു​ത്തു​കൾ ശരിക്കും മനസ്സി​ലാ​കാ​ഞ്ഞി​ട്ടാണ്‌ എന്നു യേശു തിരി​ച്ച​റി​ഞ്ഞു. (ലൂക്കോ. 9:44, 45; യോഹ. 20:9) അതു​കൊണ്ട്‌, തിരു​വെ​ഴു​ത്തു​ക​ളിൽനിന്ന്‌ വായിച്ച കാര്യ​ങ്ങ​ളു​ടെ അർഥം ശരിക്കും മനസ്സി​ലാ​ക്കാൻ യേശു അവരെ സഹായി​ച്ചു. എമ്മാവൂ​സി​ലേക്കു പോയി​ക്കൊ​ണ്ടി​രുന്ന രണ്ടു ശിഷ്യ​ന്മാർക്കു പ്രത്യ​ക്ഷ​പ്പെ​ട്ട​പ്പോൾ യേശു അത്‌ എങ്ങനെ​യാണ്‌ ചെയ്‌ത​തെന്നു നമുക്കു നോക്കാം.

10. താൻ ശരിക്കും മിശി​ഹ​ത​ന്നെ​യാ​ണെന്നു മനസ്സി​ലാ​ക്കാൻ യേശു ശിഷ്യ​ന്മാ​രെ സഹായി​ച്ചത്‌ എങ്ങനെ​യാണ്‌? (ലൂക്കോസ്‌ 24:18-27)

¹⁰ ലൂക്കോസ്‌ 24:18-27 വായി​ക്കുക. നിങ്ങൾ ഒരു കാര്യം ശ്രദ്ധി​ച്ചോ? താൻ ആരാ​ണെന്നു യേശു പെട്ടെ​ന്നു​തന്നെ അവരോ​ടു പറഞ്ഞില്ല. പകരം അവരോ​ടു ചോദ്യ​ങ്ങൾ ചോദി​ക്കു​ക​യാണ്‌ ചെയ്‌തത്‌. എന്തു​കൊ​ണ്ടാണ്‌? അവർ അവരുടെ ഉള്ളിലു​ള്ളതു തുറന്നു​പ​റ​യാൻ യേശു ആഗ്രഹി​ച്ചി​രി​ക്കാം. ചോദ്യ​ങ്ങൾ ചോദി​ച്ച​പ്പോൾ അവർ അതുതന്നെ ചെയ്‌തു. യേശു റോമാ​ക്കാ​രു​ടെ കൈയിൽനിന്ന്‌ ഇസ്രാ​യേ​ലി​നെ വിടു​വി​ക്കു​മെന്ന്‌ അവർ പ്രതീ​ക്ഷി​ച്ചി​രു​ന്ന​താ​യി അവർ പറഞ്ഞു. അവർ ഉള്ളിലു​ള്ള​തെ​ല്ലാം തുറന്നു​പ​റഞ്ഞ്‌ കഴിഞ്ഞ​പ്പോൾ യേശു തിരു​വെ​ഴു​ത്തു​കൾ ഉപയോ​ഗി​ച്ചു​കൊണ്ട്‌ പ്രവച​നങ്ങൾ നിറ​വേ​റി​യത്‌ എങ്ങനെ​യാ​ണെന്നു മനസ്സി​ലാ​ക്കാൻ അവരെ സഹായി​ച്ചു.b ആ വൈകു​ന്നേ​രം​തന്നെ യേശു മറ്റു ശിഷ്യ​ന്മാർക്കും പ്രത്യ​ക്ഷ​നാ​യി; ഇതേ സത്യങ്ങൾ അവരോ​ടും പറഞ്ഞു. (ലൂക്കോ. 24:33-48) ഈ വിവര​ണ​ത്തിൽനിന്ന്‌ നമുക്ക്‌ എന്തു പഠിക്കാം?

11-12. (എ) യേശു ബൈബിൾസ​ത്യ​ങ്ങൾ പഠിപ്പിച്ച വിധത്തിൽനിന്ന്‌ നമുക്ക്‌ എന്തു പഠിക്കാം? (ചിത്ര​ങ്ങ​ളും കാണുക.) (ബി) ബൈബിൾ പഠിപ്പിച്ച ആൾ നോർട്ടെയെ സഹായി​ച്ചത്‌ എങ്ങനെ​യാണ്‌?

¹¹ നമുക്ക്‌ എങ്ങനെ യേശു​വി​നെ അനുക​രി​ക്കാം? ആദ്യം, ബൈബിൾവി​ദ്യാർഥി​കളെ പഠിപ്പി​ക്കു​മ്പോൾ അവരുടെ ഉള്ളിലു​ള്ളതു മനസ്സി​ലാ​ക്കാൻ ഉചിത​മായ ചോദ്യ​ങ്ങൾ ചോദി​ക്കുക. (സുഭാ. 20:5) അവരുടെ പ്രശ്‌നം മനസ്സി​ലാ​യാൽ ആ സാഹച​ര്യ​ത്തി​നു പറ്റുന്ന തിരു​വെ​ഴു​ത്തു​കൾ എങ്ങനെ കണ്ടുപി​ടി​ക്കാ​മെന്നു കാണി​ച്ചു​കൊ​ടു​ക്കുക. അടുത്ത​താ​യി ഈ വാക്യ​ങ്ങ​ള​നു​സ​രിച്ച്‌ എന്തു ചെയ്യണ​മെന്നു പറഞ്ഞു​കൊ​ടു​ക്കാൻ ആയിരി​ക്കും നമുക്കു തോന്നു​ന്നത്‌. പക്ഷേ അങ്ങനെ ചെയ്യു​ന്ന​തി​നു പകരം, ആ വാക്യ​ങ്ങ​ളെ​ക്കു​റിച്ച്‌ ചോദ്യ​ങ്ങൾ ചോദി​ക്കുക. വായിച്ച ഭാഗത്തെ ആശയം എന്താ​ണെ​ന്നും അതിനു ചേർച്ച​യിൽ എങ്ങനെ തീരു​മാ​ന​മെ​ടു​ക്കാ​മെ​ന്നും ചിന്തി​ക്കാൻ അവരെ സഹായി​ക്കുക. നമുക്ക്‌ ഇപ്പോൾ ഘാനയി​ലുള്ള നോർട്ടെ സഹോ​ദ​രന്റെ അനുഭവം നോക്കാം.

¹² പതിനാ​റു വയസ്സു​ള്ള​പ്പോ​ഴാ​ണു നോർട്ടെ ബൈബിൾ പഠിക്കാൻ തുടങ്ങി​യത്‌. പെട്ടെ​ന്നു​തന്നെ കുടും​ബാം​ഗങ്ങൾ അതിനെ എതിർത്തു. എന്നാൽ ബൈബിൾപ​ഠനം തുടരാൻ നോർട്ടെയെ എന്താണു സഹായി​ച്ചത്‌? അവനെ ബൈബിൾ പഠിപ്പി​ച്ചി​രുന്ന സഹോ​ദരൻ മത്തായി 10-ാം അധ്യായം ഉപയോ​ഗിച്ച്‌ സത്യ​ക്രി​സ്‌ത്യാ​നി​കൾക്ക്‌ ഉപദ്രവം നേരി​ടേ​ണ്ടി​വ​രു​മെന്ന്‌ വിശദീ​ക​രി​ച്ചു​കൊ​ടു​ത്തി​ട്ടു​ണ്ടാ​യി​രു​ന്നു. “അതു​കൊണ്ട്‌ എതിർപ്പു​കൾ ഉണ്ടായ​പ്പോൾ ഞാൻ കണ്ടെത്തി​യതു സത്യം​ത​ന്നെ​യാ​ണെന്ന്‌ എനിക്കു ബോധ്യ​പ്പെട്ടു” എന്നു നോർട്ടെ പറയുന്നു. അതു​പോ​ലെ വിശ്വാ​സ​ങ്ങ​ളെ​ക്കു​റിച്ച്‌ കുടും​ബാം​ഗ​ങ്ങ​ളോ​ടു സംസാ​രി​ക്കു​മ്പോൾ ജാഗ്ര​ത​യും അതേസ​മയം ആദരവും കാണി​ക്കേ​ണ്ട​തി​നെ​ക്കു​റിച്ച്‌ മത്തായി 10:16 എന്താണു പറയു​ന്ന​തെന്നു ചിന്തി​ക്കാൻ അദ്ദേഹം നോർട്ടെയെ സഹായി​ച്ചു. സ്‌നാ​ന​പ്പെട്ട്‌ കഴിഞ്ഞ്‌ മുൻനി​ര​സേ​വനം ചെയ്യാൻ നോർട്ടെ ആഗ്രഹി​ച്ചു. പക്ഷേ യൂണി​വേ​ഴ്‌സി​റ്റി​യിൽ പോയി പഠിക്കാ​നാണ്‌ അപ്പൻ അവനോ​ടു പറഞ്ഞത്‌. ആ സാഹച​ര്യ​ത്തിൽ എന്തു ചെയ്യണ​മെന്നു പറഞ്ഞു​കൊ​ടു​ക്കു​ന്ന​തി​നു പകരം ബൈബിൾവാ​ക്യ​ങ്ങ​ളെ​ക്കു​റിച്ച്‌ ചിന്തി​ക്കാ​നും ശരിയായ തീരു​മാ​നങ്ങൾ എടുക്കാ​നും അവനെ സഹായി​ക്കുന്ന ചില ചോദ്യ​ങ്ങൾ ബൈബിൾ അധ്യാ​പകൻ ചോദി​ച്ചു. എന്തായി​രു​ന്നു ഫലം? മുഴു​സ​മ​യ​സേ​വനം തിര​ഞ്ഞെ​ടു​ക്കാൻ നോർട്ടെ തീരു​മാ​നി​ച്ചു. പക്ഷേ അപ്പൻ അവനെ വീട്ടിൽനിന്ന്‌ ഇറക്കി​വി​ട്ടു. തന്റെ ജീവി​ത​ത്തി​ലു​ണ്ടായ ഈ സംഭവ​ങ്ങ​ളെ​ക്കു​റിച്ച്‌ നോർട്ടെ​യ്‌ക്ക്‌ എന്താണു തോന്നു​ന്നത്‌? നോർട്ടെ പറയുന്നു: “ശരിയായ തീരു​മാ​ന​മാണ്‌ ഞാൻ എടുത്ത​തെന്ന്‌ എനിക്ക്‌ ഉറപ്പുണ്ട്‌.” തിരു​വെ​ഴു​ത്തു​ക​ളെ​ക്കു​റിച്ച്‌ ആഴത്തിൽ ചിന്തി​ക്കാൻ മറ്റുള്ള​വരെ സഹായി​ക്കു​ന്ന​തി​നു നമ്മളും സമയ​മെ​ടു​ക്കു​ന്നെ​ങ്കിൽ അവരുടെ വിശ്വാ​സ​വും ദൈവ​സേ​വ​ന​ത്തിൽ തുടരാ​നുള്ള ആഗ്രഹ​വും ശക്തമാ​ക്കാൻ നമുക്കു കഴിയും.—എഫെ. 3:16-19.

‘മനുഷ്യ​രാ​കുന്ന സമ്മാന​ങ്ങ​ളാ​യി​ത്തീ​രാൻ’ സഹോ​ദ​ര​ന്മാ​രെ പരിശീ​ലി​പ്പി​ക്കുക

13. പ്രസം​ഗ​പ്ര​വർത്തനം തുടർന്നും നടക്കു​മെന്ന്‌ ഉറപ്പു​വ​രു​ത്താൻ യേശു എന്താണു ചെയ്‌തത്‌? (എഫെസ്യർ 4:8)

¹³ ഭൂമി​യി​ലാ​യി​രി​ക്കെ പിതാവ്‌ തന്നെ ഏൽപ്പിച്ച ജോലി യേശു ഏറ്റവും നന്നായി ചെയ്‌തു. (യോഹ. 17:4) എന്നാൽ, ‘കാര്യങ്ങൾ ശരിയാ​യി ചെയ്യണ​മെ​ങ്കിൽ താൻതന്നെ അതു ചെയ്യണം’ എന്ന ചിന്ത യേശു​വിന്‌ ഉണ്ടായി​രു​ന്നില്ല. മൂന്നര വർഷക്കാ​ലത്തെ ശുശ്രൂ​ഷ​യു​ടെ സമയത്ത്‌ യേശു മറ്റുള്ള​വരെ പരിശീ​ലി​പ്പി​ച്ചു. സ്വർഗ​ത്തി​ലേക്കു പോകു​ന്ന​തി​നു മുമ്പ്‌ തന്റെ ശിഷ്യ​ന്മാ​രെ പ്രധാ​ന​പ്പെട്ട ചില ഉത്തരവാ​ദി​ത്വ​ങ്ങ​ളും യേശു ഏൽപ്പിച്ചു. യഹോ​വ​യു​ടെ വിലപ്പെട്ട ആടുകളെ പരിപാ​ലി​ക്കാ​നും പ്രസം​ഗ​പ​ഠി​പ്പി​ക്കൽ പ്രവർത്ത​ന​ത്തിൽ നേതൃ​ത്വം എടുക്കാ​നും ആയിരു​ന്നു അത്‌. യേശു ഇത്രയും വലിയ ഉത്തരവാ​ദി​ത്വം ഏൽപ്പി​ച്ച​വ​രു​ടെ കൂട്ടത്തിൽ 20-കളിലാ​യി​രു​ന്ന​വർപോ​ലും ഉണ്ടായി​രു​ന്നി​രി​ക്കണം. (എഫെസ്യർ 4:8 വായി​ക്കുക.) ഭൂമി​യി​ലെ തന്റെ അവസാ​നത്തെ 40 ദിവസം, വിശ്വ​സ്‌ത​രും കഠിനാ​ധ്വാ​നി​ക​ളും ആയ ഈ പുരു​ഷ​ന്മാ​രെ ‘മനുഷ്യ​രാ​കുന്ന സമ്മാന​ങ്ങ​ളാ​യി​ത്തീ​രാൻ’ യേശു പരിശീ​ലി​പ്പി​ച്ചത്‌ എങ്ങനെ​യാണ്‌?

14. ഭൂമി​യി​ലെ അവസാ​നത്തെ 40 ദിവസം യേശു തന്റെ ശിഷ്യ​ന്മാ​രെ എന്താണു പഠിപ്പി​ച്ചത്‌? (ചിത്ര​വും കാണുക.)

¹⁴ യേശു തന്റെ ശിഷ്യ​ന്മാ​രെ സഹായി​ക്കു​ന്ന​തിന്‌ അവർക്കു സ്‌നേ​ഹ​ത്തോ​ടെ ഉപദേ​ശങ്ങൾ കൊടു​ത്തു. ഉദാഹ​ര​ണ​ത്തിന്‌, ചില ശിഷ്യ​ന്മാർക്കു സംശയി​ക്കാ​നുള്ള പ്രവണ​ത​യു​ള്ള​താ​യി കണ്ടപ്പോൾ യേശു അവരെ തിരുത്തി. (ലൂക്കോ. 24:25-27; യോഹ. 20:27) ജോലി​യെ​ക്കാ​ളും വളരെ പ്രധാ​ന​പ്പെ​ട്ട​താണ്‌ യഹോ​വ​യു​ടെ ആടുകളെ പരിപാ​ലി​ക്കാ​നുള്ള ഉത്തരവാ​ദി​ത്വ​മെന്നു യേശു അവരെ ഓർമി​പ്പി​ച്ചു. (യോഹ. 21:15) യഹോ​വ​യു​ടെ സേവന​ത്തിൽ മറ്റുള്ള​വർക്കു കിട്ടുന്ന ഉത്തരവാ​ദി​ത്വ​ങ്ങൾ കണ്ട്‌ നമ്മൾ അസ്വസ്ഥ​രാ​ക​രു​തെ​ന്നും യേശു അവരോ​ടു പറഞ്ഞു. (യോഹ. 21:20-22) അതു​പോ​ലെ ദൈവ​രാ​ജ്യ​ത്തെ​ക്കു​റിച്ച്‌ അവർക്കു​ണ്ടാ​യി​രുന്ന തെറ്റായ ചില ചിന്തകൾ യേശു തിരു​ത്തു​ക​യും സന്തോ​ഷ​വാർത്ത പ്രസം​ഗി​ക്കു​ന്ന​തിൽ ശ്രദ്ധി​ക്കാൻ അവരെ സഹായി​ക്കു​ക​യും ചെയ്‌തു. (പ്രവൃ. 1:6-8) യേശു​വിൽനിന്ന്‌ മൂപ്പന്മാർക്ക്‌ എന്തു പഠിക്കാം?

15-16. (എ) മൂപ്പന്മാർക്ക്‌ ഏതെല്ലാം വിധങ്ങ​ളിൽ യേശു​വി​നെ അനുക​രി​ക്കാം? (ബി) ഒരു മൂപ്പനിൽനിന്ന്‌ കിട്ടിയ ബുദ്ധി​യു​പ​ദേശം പാട്രി​ക്കിന്‌ എങ്ങനെ​യാ​ണു പ്രയോ​ജനം ചെയ്‌തത്‌?

¹⁵ മൂപ്പന്മാർക്ക്‌ എങ്ങനെ യേശു​വി​നെ അനുക​രി​ക്കാം? കൂടുതൽ ഉത്തരവാ​ദി​ത്വ​ങ്ങൾ ഏറ്റെടു​ക്കാൻ അവർ സഹോ​ദ​ര​ന്മാ​രെ പരിശീ​ലി​പ്പി​ക്കു​ക​യും സഹായി​ക്കു​ക​യും വേണം. അതിൽ ചെറു​പ്പ​ക്കാ​രും ഉൾപ്പെ​ടും.c തങ്ങൾ പരിശീ​ലനം കൊടു​ക്കു​ന്ന​വർക്ക്‌ ഒരു തെറ്റും പറ്റി​ല്ലെന്നു മൂപ്പന്മാർ ചിന്തി​ക്ക​രുത്‌. ചില​പ്പോൾ ചെറു​പ്പ​ക്കാ​രായ സഹോ​ദ​ര​ന്മാർക്കു ചില ഉപദേ​ശങ്ങൾ കൊടു​ക്കേ​ണ്ടി​വ​ന്നേ​ക്കാം. അങ്ങനെ​യാ​കു​മ്പോൾ അനുഭ​വ​പ​രി​ചയം നേടാ​നും, താഴ്‌മ​യും വിശ്വ​സ്‌ത​ത​യും മറ്റുള്ള​വരെ സേവി​ക്കാ​നുള്ള മനസ്സൊ​രു​ക്ക​വും ഒക്കെ വളർത്തി​യെ​ടു​ക്കാ​നും അവർക്കു കഴിയും.—1 തിമൊ. 3:1; 2 തിമൊ. 2:2; 1 പത്രോ. 5:5.

¹⁶ ഇത്തരത്തിൽ ഒരു ബുദ്ധി​യു​പ​ദേശം കിട്ടിയ പാട്രിക്‌ സഹോ​ദ​രന്റെ അനുഭവം നോക്കാം. സഹോ​ദ​രി​മാ​രോ​ടു​പോ​ലും പരുഷ​മാ​യി സംസാ​രി​ക്കു​ക​യും ദയയി​ല്ലാ​തെ ഇടപെ​ടു​ക​യും ചെയ്യുന്ന ഒരു രീതി സഹോ​ദ​ര​നു​ണ്ടാ​യി​രു​ന്നു. ഇതു മനസ്സി​ലാ​ക്കിയ പക്വത​യുള്ള ഒരു മൂപ്പൻ പാട്രി​ക്കി​നു ദയയോ​ടെ​യും എന്നാൽ വ്യക്തമാ​യും തിരുത്തൽ കൊടു​ത്തു. പാട്രിക്‌ പറയുന്നു: “സഹോ​ദരൻ അതു പറഞ്ഞു​ത​ന്ന​തിൽ എനിക്ക്‌ ഒരുപാ​ടു നന്ദിയുണ്ട്‌. ദൈവ​സേ​വ​ന​ത്തിൽ ഞാൻ ആഗ്രഹിച്ച എന്തെങ്കി​ലും നിയമ​ന​ങ്ങ​ളും ഉത്തരവാ​ദി​ത്വ​ങ്ങ​ളും ഒക്കെ മറ്റുള്ള​വർക്കു കിട്ടു​ന്നതു കാണു​മ്പോൾ എനിക്കു സങ്കടം തോന്നു​മാ​യി​രു​ന്നു. എന്നാൽ എന്തെങ്കി​ലും നിയമ​ന​ങ്ങ​ളി​ലല്ല പകരം സഹോ​ദ​ര​ങ്ങളെ താഴ്‌മ​യോ​ടെ സേവി​ക്കു​ന്ന​തി​ലാ​ണു ശ്രദ്ധി​ക്കേ​ണ്ട​തെന്നു മനസ്സി​ലാ​ക്കാൻ സഹോ​ദരൻ തന്ന ഉപദേശം എന്നെ സഹായി​ച്ചു.” കിട്ടിയ ഉപദേശം അനുസ​രി​ച്ച​തു​കൊണ്ട്‌ 23 വയസ്സു​ള്ള​പ്പോൾത്തന്നെ പാട്രിക്‌ ഒരു മൂപ്പനാ​യി​ത്തീർന്നു.—സുഭാ. 27:9.

17. തന്റെ ശിഷ്യ​ന്മാ​രിൽ വിശ്വാ​സ​മു​ണ്ടെന്നു യേശു എങ്ങനെ​യാണ്‌ കാണി​ച്ചത്‌?

¹⁷ യേശു ശിഷ്യ​ന്മാർക്കു പ്രസം​ഗി​ക്കാ​നും പഠിപ്പി​ക്കാ​നും ഉള്ള ഉത്തരവാ​ദി​ത്വം കൊടു​ത്തു. (മത്തായി 28:20-ലെ “അവരെ പഠിപ്പി​ക്കുക” എന്ന പഠനക്കു​റി​പ്പു കാണുക.) ഈ വലിയ ഉത്തരവാ​ദി​ത്വം ചെയ്യാ​നുള്ള പ്രാപ്‌തി​യൊ​ന്നും തങ്ങൾക്കി​ല്ലെന്നു ശിഷ്യ​ന്മാർക്കു തോന്നി​ക്കാ​ണും. പക്ഷേ യേശു​വിന്‌ അക്കാര്യ​ത്തിൽ ഒരു സംശയ​വും ഇല്ലായി​രു​ന്നു. അവർക്ക്‌ അതിനു കഴിയു​മെന്നു യേശു അവരോ​ടു പറയു​ക​യും ചെയ്‌തു. “പിതാവ്‌ എന്നെ അയച്ചതു​പോ​ലെ ഞാനും നിങ്ങളെ അയയ്‌ക്കു​ന്നു” എന്നു യേശു പറഞ്ഞു.—യോഹ. 20:21.

18. മൂപ്പന്മാർക്ക്‌ എങ്ങനെ യേശു​വി​നെ അനുക​രി​ക്കാം?

¹⁸ മൂപ്പന്മാർക്ക്‌ എങ്ങനെ യേശു​വി​നെ അനുക​രി​ക്കാം? അനുഭ​വ​പ​രി​ച​യ​മുള്ള മൂപ്പന്മാർ ചില ഉത്തരവാ​ദി​ത്വ​ങ്ങൾ മറ്റുള്ള​വരെ ഏൽപ്പി​ച്ചു​കൊണ്ട്‌ അവരെ പരിശീ​ലി​പ്പി​ക്കും. (ഫിലി. 2:19-22) ഉദാഹ​ര​ണ​ത്തിന്‌, രാജ്യ​ഹാ​ളി​ന്റെ ക്ലീനി​ങ്ങി​ലും അറ്റകു​റ്റ​പ്പ​ണി​ക​ളി​ലും ഒക്കെ ചെറു​പ്പ​ക്കാ​രെ ഉൾപ്പെ​ടു​ത്താൻ മൂപ്പന്മാർക്കാ​കും. ഒരു സഹോ​ദ​രനെ ഒരു ജോലി ഏൽപ്പിച്ച്‌ കഴിഞ്ഞാൽ അദ്ദേഹ​ത്തി​നു വേണ്ട പരിശീ​ലനം കൊടു​ക്കാ​നും എന്നിട്ട്‌ അദ്ദേഹം അതു നന്നായി ചെയ്യു​മെന്നു വിശ്വ​സി​ക്കാ​നും അവർക്കു കഴിയും. പുതിയ മൂപ്പനായ മാത്യു സഹോ​ദ​രന്‌ അനുഭ​വ​പ​രി​ച​യ​മുള്ള മൂപ്പന്മാർ പല കാര്യ​ങ്ങ​ളി​ലും പരിശീ​ലനം കൊടു​ത്തു. അദ്ദേഹ​ത്തിന്‌ അതെല്ലാം ചെയ്യാൻ പറ്റു​മെന്ന്‌ അവർ വിശ്വ​സി​ക്കു​ക​യും ചെയ്‌തു. അതിനെ വിലമ​തി​ച്ചു​കൊണ്ട്‌ മാത്യു സഹോ​ദരൻ പറയുന്നു: “ഞാൻ പല തെറ്റു​ക​ളും വരുത്തി. പക്ഷേ ഒരാൾ കാര്യങ്ങൾ പഠി​ച്ചെ​ടു​ക്കു​മ്പോൾ തെറ്റുകൾ സ്വാഭാ​വി​ക​മാ​ണെന്ന്‌ മറ്റു മൂപ്പന്മാർ മനസ്സി​ലാ​ക്കി. ആ തെറ്റു​ക​ളിൽനിന്ന്‌ പഠിക്കാ​നും മെച്ച​പ്പെ​ടാ​നും അവർ എന്നെ സഹായി​ച്ചു.”d

19. നമുക്ക്‌ എന്തു ചെയ്യാൻ ശ്രമി​ക്കാം?

¹⁹ ഭൂമി​യി​ലെ തന്റെ അവസാ​നത്തെ 40 ദിവസം യേശു മറ്റുള്ള​വരെ പ്രോ​ത്സാ​ഹി​പ്പി​ക്കു​ക​യും പഠിപ്പി​ക്കു​ക​യും പരിശീ​ലി​പ്പി​ക്കു​ക​യും ചെയ്‌തു. നമുക്കും യേശു ചെയ്‌ത​തു​പോ​ലെ​തന്നെ ചെയ്യാൻ ശ്രമി​ക്കാം. (1 പത്രോ. 2:21) അതിന്‌ യേശു ഉറപ്പാ​യും നമ്മളെ സഹായി​ക്കും. കാരണം “വ്യവസ്ഥി​തി​യു​ടെ അവസാ​ന​കാ​ലം​വരെ എന്നും ഞാൻ നിങ്ങളു​ടെ​കൂ​ടെ​യുണ്ട്‌” എന്ന്‌ യേശു നമുക്കു വാക്കു തന്നിട്ടുണ്ട്‌.—മത്താ. 28:20.