Bao-y waoogr ning sẽn yit Wẽnnaam nengẽ wã

1, 2. a) Hebre wã gom-bil ning b sẽn lebg tɩ “waoogrã” võor yaa bõe? b) Sogs-bʋs la d na n leok sõs-kãngã pʋgẽ?

YÃMB sã n wʋm tɩ b gomd “waoogr” wall “ziir” yelle, bõe n wat y yamẽ? Y tagsda bõn-naandsã sẽn be rasãnd to-to wã yell bɩ? (Yɩɩl 19:2) Sãnda tagsda nebã sẽn waoogd kẽer b sẽn tar arzɛk wʋsg yĩnga, b bãngr wall b sẽn tõog n maan bũmb ninsã yĩngã. Biiblã pʋgẽ, hebre wã gom-bil ning b sẽn lebg tɩ “waoogrã” bilgda bũmb zɩslem. Pĩnd wẽndẽ wã, b ra maanda ligdã ne sãnem wall wãnzuri. Ligd zɩslem la b ra get n bãng a yõodã sẽn ta zĩig ninga. Rẽ n so tɩ gom-biis nins sẽn bilgd bũmb zɩslmã tõe n bilg bũmb sẽn tar yõod wʋsgo, wall sẽn yaa kãsenga.

² Ninsaalbã wae n waoogda neb nins yʋy sẽn yi wã, wall sẽn tar-b naamã. La bõe la Wẽnnaam get n waoog neda? Yelbũn 22:4 yeta woto: “Sik-m-meng ne Zusoabã zoees biis yaa arzɛk ne waoogr la vɩɩm.” Karen-biig a Zak me yeela woto: “Sik-y yãmb mens Zusoabã taoore, la bãmb na zẽk yãmba.” (Zak 4:10) La waoogr ning sẽn yit a Zeova nengẽ wã yaa bõe? Bõe n tõe n kɩt tɩ d pa paam waoog-kãnga? La wãn to la d tõe n sõng neb a taab tɩ b paam-a?

3-5. Wãn to la a Zeova waoog tõndo?

³ Yɩɩl-gʋlsdã ra kɩsa sɩd t’a na n paama waoogr ning sẽn yit a Zeova nengẽ wã. (Karm-y Yɩɩl Sõamyã 73:23, 24.) La wãn to la a Zeova waoogd neb nins sẽn sakd-a wã? A maand-b-la lohorem la a ningd-b bark wʋsgo. Wala makre, a sõngd-b lame tɩ b bãngd a raabã, la a sak tɩ b yaa a zo-rãmba.—1 Kor. 2:7; Zak 4:8.

⁴ A Zeova kɩtame me tɩ d moond koe-noogã sẽn yaa zu-zẽkr bũmbã. (2 Kor. 4:1, 7) Sẽn paase, koe-moonegã wata ne ziiri. A Zeova yeela neb nins sẽn moond koɛɛgã tɩ pẽgd yẽ la nafd b taabã woto: “Mam waoogda neb nins sẽn waoogd maamã.” (1 Sãm. 2:30) Nin-kãens tara yʋ-noog a Zeova taoore, tɩ b tẽed-n-taasã me pẽgd-ba.—Yel. 11:16; 22:1.

⁵ Bark bʋs la neb nins sẽn tẽed a Zeova n tũud a sorã na n paame? Biiblã pʋlm-b-la woto: ‘A na n zẽka bãmb tɩ b soog tẽngã. B na n yãa nin-wẽns sãoongo.’ (Yɩɩl 37:34) Wẽnnaam nebã gũuda wakat ning a sẽn na n zẽk b zug n kɩt tɩ b vɩɩmd wakat sẽn kõn sa wã.—Yɩɩl 37:29.

“MAM KA REEGD WAOOGR NINSAALB NENGẼ YE”

6, 7. Bõe yĩng tɩ wʋsg pa tẽ tɩ yaa a Zezi la Mesi wã?

⁶ Bũmb tõe n kɩtame tɩ d pa paam waoogr ning sẽn yit a Zeova nengẽ wã bɩ? N-ye. Bũmb a ye yaa d sã n getẽ tɩ neb nins sẽn pa tũud a Zeova wã tagsg tara yõod wʋsgo. Wala makre, tʋm-tʋmd a Zã goma a Zezi wakatẽ zʋɩf-rãmbã taoor dãmb kẽer yelle, n yeel woto: “Kãsem-dãmbã neb wʋsg me tẽe bãmba. La bãmb sẽn zoet Fariziẽ-dãmbã yĩnga, b ka kɩs bãmb kaset ye, tɩ b ra wa yiis bãmb karengã pʋg ye. Tɩ bõe, bãmb nonga nebã waoogr n yɩɩd Wẽnnaam dẽndã.” (Zã 12:42, 43) Kãsem-dãmb kãensã sã n da pa ges tɩ fariziẽ-rãmbã tagsg tara yõod wʋsg n são.

⁷ A Zezi wilga bũmb ning sẽn kɩt tɩ neb wʋsg pa tẽ tɩ yẽ la Mesi wã. (Karm-y Zã 5:39-44.) Israyɛll nebã ra sɩng n gũuda Mesi wã na maan yʋʋm kobse. A Zezi sẽn wa n sɩng a koe-moonegã, tõe tɩ kẽer da tika a Daniɛll bãngr-gomdã n bãng tɩ yaa wakat kãng la Kiristã na n sɩng a tʋʋmdã. Sẽn deng rẽ, a Zãmbatiis sẽn wa n sɩng a koe-moonegã, wʋsg ra “dat n bãnga yẽ sã n yaa Kirist bɩ a ka Kiristã.” (Luk 3:15) La Mesi wã sẽn wa wã, gʋlsdbã pa tẽ-a ye. Bõe yĩnga? A Zezi wilga bũmb ning sẽn kɩt tɩ b ka tẽ-a wã. A sok-b-la woto: “Yãmb na n yɩɩ wãn n tẽ, yãmb sẽn deegd waoogr taab nengẽ n ka baood waoogr sẽn yit Wẽnnaam nengẽ?”

8, 9. Bõe n tõe n kɩt tɩ d wa getẽ tɩ ninsaalbã waoogr yõod yɩɩda waoogr ning sẽn yit Wẽnnaam nengẽ wã? Rɩk-y makre.

⁸ Sẽn na yɩl n bãng sẽn tõe n sɩng to-to tɩ ned wa getẽ tɩ ninsaalbã waoogr tara yõod n yɩɩd waoogr ning sẽn yit Wẽnnaam nengẽ wã, d na n maka waoogrã ne vẽenem. Yʋngo, sa-gãnã pita ne ãdse. Tõe tɩ y tẽra y sẽn zoe n nak n ges sa-gãnã n yã ãds wʋsg tɩ yɩ-y noogo. “Ãdsã vẽenem” gesg sɩd tara yamleoogo. (1 Kor. 15:40, 41) La galʋ-tẽns kẽer pʋsẽ, ãdsã gesg ka yamleoog ye. Bug-rãmbã sẽn yaa wʋsgã kɩtame tɩ d pa tõe n yã-b sõma ye. Yaa bugum nins sẽn be soayã zutã, ɛstaad-rãmbã pʋsẽ la rotẽ wã pãng n yɩɩd ãdsã vẽenem bɩ? Ayo. Yaa galʋ-tẽnsã bug-rãmb sẽn pẽ tõndã yĩnga. D sã n dat n ges ãdsã vẽenem sõma, rẽnda d kẽng zĩig sẽn zãr ne galʋ-tẽnsã bug-rãmbã.

⁹ Woto me, ninsaalbã waoogr tõe n kɩtame tɩ d pa neẽ tɩ waoogr ning sẽn yit a Zeova nengẽ wã tara yõod wʋsg ye. Neb wʋsg sẽn pa sakd koe-noogã yaa b sẽn zoet b zo-rãmb la b roagdb sẽn na n tags bũmb ningã. Baa neb sẽn dɩk b mens n kõ a Zeova tõe n wa maanda yɩɩr wʋsg ne bũmb ning nebã taabã sẽn na n yeel bãmb zugã. Wala makre, bi-bɩɩg tõe n wa segd n moona koɛɛgã zĩig neb wʋsg sẽn mi-a, la b yaool n pa mi t’a yaa a Zeova Kaset soab ye. Rẽ yĩnga a na n zoee rabeem n pa moon be bɩ? Makr a to yaa kiris-ned sẽn na n yãk bũmb n dat n maan a Zeova tũudmã pʋgẽ, tɩ neb yaand-a. A na n kelga nin-kãens sẽn pa nand a Zeova tʋʋmdã n bas a sẽn dat n maan bũmb ningã bɩ? La kiris-ned sã n maan yel-wẽn-kãseng yẽ? A na n solga a yel-wẽndã, a sẽn zoet b na n wa reeg tʋʋm nins a sẽn tar tigingã pʋgẽ wã, wall a sẽn pa rat n sãam a roagdbã la a zo-rãmbã sũy yĩng bɩ? A sã n neẽ tɩ zood ning a sẽn tar ne a Zeova wã yõod yɩɩda bũmb fãa, a na n “boola Wẽnnaam tẽedbã kãsem-dãmb” tɩ b sõng-a.—Karm-y Zak 5:14-16.

10. a) D sã n maand yɩɩr wʋsg ne d taabã sẽn na n yeel bũmb ning tõnd zugã, tõe n waa ne bõe? b) D sã n yaa sik-m-mens rãmba, d tõe n kɩsa sɩd ne bõe?

¹⁰ Tõe tɩ d maanda modgr n tũud Kiristã sõma, tɩ d tẽed-n-taag wae n pelgd a pʋg n kõt-d saglse. D sã n wuk d meng wall d maan yɩɩr wʋsg ne nebã sẽn get-d to-to wã, pa rẽ bɩ d bao padems n pa kelg a saglsã, pa na n naf-d ye. Mams-y yãmb sẽn na n naag y tẽed-n-taas n tʋmdẽ me. Y na n maanda laas-laase, n tagsdẽ tɩ baa y sã n tʋm sõma pa yãmb y ye la b na n pẽg bɩ? Y sã n wa tar zu-loe-kãensã buud bɩ y tẽeg tɩ “sik-m-meng soab na n paama waoogre.”—Yel. 29:23.

11. Ned sã n pẽg-do, d tagsg segd n yɩɩ wãna, la bõe yĩnga?

¹¹ Kãsem-dãmbã ne sẽn dat-b n lebg kãsem-dãmbã me segd n gũusame n da bao “nebã waoogr ye.” (1 Tɩm. 3:1; 1 Tes. 2:6) Saam-biig sã n tõog n maan bũmb sõma tɩ b pẽg-a, a manesem segd n yɩɩ wãna? Yaa vẽeneg t’a pa na n maan wa rĩm a Sayull n me bũmb a meng waoogr yĩng ye. (1 Sãm. 15:12) La a segd n tagsame tɩ yẽ sẽn tõog n maan bũmb ningã tũu ne a Zeova sõngre, la tɩ sẽn na yɩl n tõog n maan a buud nin-daare, a Zeova barkã ne a sõngrã yaa tɩlae. (1 Pɩɛ. 4:11) B sã n pẽg-do, yaa tõnd sẽn na n tags to-to wã n wilgd d sã n nonga ninsaalb waoogre, bɩ sã n yaa waoogr ning sẽn yit Wẽnnaam nengẽ wã la d rata.—Yel. 27:21.

“YÃMB DAT N MAANA YÃMB BA RATEM”

12. Bõe yĩng tɩ zʋɩf-rãmb kẽer pa kelg a Zezi koɛɛgã?

¹² Bũmb a to sẽn tõe n kɩt tɩ d kong waoogr ning sẽn yit a Zeova nengẽ wã yaa yĩngã ratem-wẽnsã. Ratem kãens tõe n kɩtame tɩ d pa kelgd sɩdã baa bilf ye. (Karm-y Zã 8:43-47.) A Zezi ra yeela zʋɩf-rãmb kẽer tɩ yaa b sẽn dat n maan b ba a Sʋɩtãan ratmã yĩng la b sẽn pa kelgd yẽ koɛɛgã.

13, 14. a) Neb sã n gomd wakat yɛnga, d maanda wãna? b) Bõe la d tikd n yãk d sẽn na n kelg a soabã?

¹³ Wakat ninga, d kelgda bũmb ning tõnd sẽn dat n wʋmã bala. (2 Pɩɛ. 3:5) A Zeova sẽn naan-d to-to wã kɩtame tɩ d tõe n pa kelg bʋʋr kẽer ye. Bas-y karengã bilfu, n maag y yĩng n kelg bũmb toor-toor dãamd y sẽn wʋmdã. Tõe tɩ nand tɩ y maag-y y yĩng n kelgã, y ra pa wʋmd kẽer ye. Bõe yĩnga? Bala baa tʋbã sẽn tõe n wʋm bũmb toor-toor rãamdã, yaa bõn-yɛng bal la y kelgda. Neb sã n gomd wakat yɛnga, yaa toog tɩ y wʋm b fãa goamã võore. Bãngdbã wilgame tɩ ned pa tõe n kelg neb a yiib wakat yɛng ye. Woto rat n yeelame tɩ neb a yiib sã n gomd ne yãmb wakat yɛnga, y segd n yãka y sẽn na n kelg a soabã. A Zezi wakatẽ zʋɩf-rãmbã ra rat n maana b ba a Sʋɩtãan ratem. Yaa rẽ la b sẽn pa kelg a Zezi wã.

¹⁴ Biiblã wilgame tɩ “yam” la “yalemd” fãa ratame tɩ tõnd kelg-ba. (Yel. 9:1-5, 13-17) La yaa tõnd n yãkd d sẽn na n kelg a soaba. Rẽ bee ne tõnd sẽn dat n maan a soab ratmã. D sã n yaa a Zezi piisi, d na n kelg-a lame la d tũ-a. (Zã 10:16, 27) A yeelame t’a karen-biisã “yaa sɩdã rẽnda.” (Zã 18:37) “Bãmb ka mi sãamb koees ye.” (Zã 10:5) Sẽn tũud-b a Zezi ne sik-m-mengã paamda waoogr ning sẽn yit Wẽnnaam nengẽ wã.—Yel. 3:13, 16; 8:1, 18.

“MAM NAMSGÃ YAA YÃMB WAOOGRE”

15. Bõe yĩng t’a Poll yeel tɩ yẽ namsgã yaa Efɛɛz kiris-nebã “waoogre”?

¹⁵ Wãn to la d tõe n sõng neb a taab tɩ b paam waoogr ning sẽn yit Wẽnnaam nengẽ wã? Bũmb a ye yaa d sẽn na n tõog toog a Zeova tũudmã pʋgẽ. A Poll gʋlsa Efɛɛz kiris-nebã n yeel-b woto: “Mam kota yãmb me tɩ y keng y mens n da boog y raood mam sẽn paamd namsg yãmb yĩngã yĩng ye. Mam namsgã yaa yãmb waoogre.” (Ef. 3:13) Bõe yĩng t’a Poll yeel tɩ yẽ namsgã yaa Efɛɛz kiris-nebã “waoogre”? Baa a Poll sẽn seg zu-loees wʋsgã, a kell n sõnga a tẽed-n-taasã tigingã pʋgẽ. Rẽ sõng-b lame tɩ b bãng tɩ bũmb ning sẽn tar yõod n yɩɩd ne kiris-neda, yaa Wẽnnaam daabã maanego. A Poll sã n da bas a tʋʋmdã zu-loeesã yĩnga, saam-biisã ra tõe n tagsame tɩ bãmb ne a Zeova zoodã, koe-moonegã la b tẽebã yõod pa waoog ye. A mak-sõngã kɩtame t’a tẽed-n-taasã bãng tɩ paam n yɩ Kiristã karen-biig tara yõod wʋsgo, tɩ sek d na sak namsg buud fãa rẽ yĩnga.

16. Bõe n paam a Poll Listr tẽngã pʋgẽ?

¹⁶ Tags-y-yã a Poll yẽesmã la a sũ-marã sẽn naf a tẽed-n-taasã to-to wã. Tʋʋm 14:19, 20 yeta woto: “Zʋɩf-rãmb yii Ãntios ne Ikoniyom n wa rãmb nebã tɩ b lob a Poll kuga. La bãmb sẽn tẽed t’a kiime, bãmb vuuga yẽnda n yiis [Listr] tẽngã pʋga. La karen-biisã gũbga a Polle, la yẽ yikame n leb n kẽ tẽngã pʋgẽ. La vẽkembeoogo, a Poll ne a Barnabas yiime n kẽng Dɛrbe.” Mams-y n ges-y rẽ sẽn yɩ toog to-to wã! B loba a Poll kug n da tẽed t’a kiime. La vẽkembeoogã, a kẽna nao n kẽng kilo 100 zĩigẽ.

17, 18. a) Tõe tɩ wãn to la a Tɩmote bãng bũmb ning sẽn paam a Poll Listr tẽngã? b) Wãn to la a Poll sẽn tõog toogã naf a Tɩmote?

¹⁷ Rẽ yĩnga a Tɩmote zĩnda “karen-biis” nins sẽn tɩbs a Pollã sʋk bɩ? Tõe t’a naag-b lame, la Tʋʋm sebrã pa wilg rẽ ye. La a Tɩmote ra mii bũmb ning sẽn paam a Pollã. A Poll lɛtr a yiib-n-soab ning a sẽn tool-a wã pʋgẽ, a yeela woto: “Fo ra bãnga koɛɛg ning mam sẽn zãms nebã ne m yel-manesmã.” Pa bũmb ning sẽn paam a Poll Listr tẽngã bal la a Tɩmote ra mi ye. A ra miime me tɩ zʋɩf-rãmbã rig-a lame n yiis Ãntiose, la tɩ b bao n na n lob-a-la kug Ikoniyom me.—2 Tɩm. 3:10, 11; Tʋʋ. 13:50; 14:5, 19.

¹⁸ A Tɩmote sẽn da yaa bi-bɩɩg wakat kãngã yã a Poll sẽn tõog toog zu-loe-kãens pʋsẽ to-to wã. A Poll mak-sõngã segd n nafa a Tɩmote wʋsgo. Rẽ n so t’a sẽn wa n lebg n wa Listrã t’a Tɩmote kõta mak-sõngo, n tar “yʋ-noog ba-biis nins sẽn be Listr ne Ikoniyommã sʋka.” (Tʋʋ. 16:1, 2) Kaoosg zugẽ, b wa n tõog n kõ-a-la tʋʋm-kãsemse.—Fil. 2:19, 20; 1 Tɩm. 1:3.

19. Wãn to la tõnd sũ-marã nafd d taabã?

¹⁹ D sã n ket n maand Wẽnnaam daabã ne sũ-mare, tõe n nafa d taabã. Sẽn yɩɩd fãa, tõe n sõnga kom-bɩɩs wʋsg tɩ bãmb me wa tõog n lebg wẽn-tũudb sẽn tar yẽesem. Kom-bɩɩsã kelgda tõnd sẽn gomd ne nebã to-to koe-moonegã sasa wã, la b geta d manesem sẽn yaa to-to zu-loees sasa wã me, n dɩkd yam. A Poll yeelame tɩ yẽ saka toog buud fãa, sẽn na yɩl n sõng a taabã tɩ b wa paam vɩɩm sẽn ka sɛtã.—2 Tɩm. 2:10.

20. Bõe yĩng tɩ d segd n ket n baood waoogr ning sẽn yit Wẽnnaam nengẽ wã?

²⁰ Rẽ yĩnga pa segd tɩ d ket n “baood waoogr sẽn yit Wẽnnaam nengẽ” sɩda? (Zã 5:44; 7:18) Segdame! (Karm-y Rom dãmb 2:6, 7.) A Zeova bĩnga “vɩɩm sẽn ka sɛtã neb nins sẽn . . . baood waoogrã” yĩnga. Sẽn paase, d “sẽn maand neer ne sũ-marã,” sõngda d taabã tɩ b bãmb me kell n tall tẽeb n na n wa paam vɩɩm sẽn pa sɛtã. Woto yĩnga, bɩ d kell n bao waoogr ning sẽn yit Wẽnnaam nengẽ wã ne d sũurã fãa.