Bõe la Wẽnnaam maan yãmb yĩnga?

Vɛrse kãngã naaga Biiblã vɛrse nins nebã sẽn mi n yɩɩdã. Nebã tagsdame tɩ vɛrse kae “n kʋmsd zood ning sẽn be Wẽnnaam ne ãdem-biisã sʋkã, la a wilgd fãagrã sẽn na n tũ ne bũmb ningã sõma, n ta yãoã ye.” Rẽ n so tɩ tẽns wʋsg pʋsẽ, b wae n gomda Zã 3:16 yell tigiss sasa, wall b gʋlsd a goamã n tabend mobila, lalse, pa rẽ bɩ zĩis a taab nebã sẽn tõe n yã.

Wõnda sẽn maand-b woto wã kɩsa sɩd tɩ Wẽnnaam nong-b lame, la t’a na n kõ-b-la vɩɩm sẽn pa satã. La yãmb yẽ? Wãn to la Wẽnnaam nonglmã nafd yãmba? Y tagsdame tɩ bõe la Wẽnnaam maan tɩ wilgdẽ t’a nonga yãmba?

“WẼNNAAM NONGA DŨNIYÔ

Neb wʋsg sak n deegame tɩ yaa Wẽnnaam n naan saasã, tẽngã, ninsaalbã la bũmba fãa. Bõn-vɩɩlɩ wã sẽn naan sõma to-to wã me wilgda vẽeneg tɩ yaa yam-kãseng soab n tags n naan-ba. Sẽn paase, neb wʋsg pʋʋsda Wẽnnaam bark daar ne a to fãa, a sẽn kõ-b vɩɩmã yĩnga. B leb n sak n deegame tɩ yaa yẽ n kõt-b bũmb nins fãa sẽn yaa tɩlae ne b vɩɩmã. Wala makre, pemsmã, koomã, rɩɩbã. Yẽ n kɩt me tɩ sẽoog la sɩpaolg beẽ.

Segdame tɩ d pʋʋs Wẽnnaam bark woto fãa yĩnga, bala sɩd yaa yẽ n naan tõndo, la a get d yelle. (Yɩɩl Sõamyã 104:10-28; 145:15, 16; Tʋʋma 4:24) D sã n bʋgs bũmb nins fãa Wẽnnaam sẽn maand sẽn na yɩl tɩ d tõog n vɩɩmdã zugu, d bãngdame t’a sɩd nonga tõndo. Tʋm-tʋmd a Poll goma rẽ yell n yeel woto: “[Wẽnnaam] n kõt fãa vɩɩm la vʋʋsem la bũmb fãa.” La a paas tɩ “yaa bãmb pʋgẽ la tõnd tar vɩɩm la kẽnde, la belem.”—Tʋʋma 17:25, 28.

La Wẽnnaam sẽn wilgd tõnd a nonglem to-to wã pa tek a sẽn get tõnd vɩɩmã yellã bal ye. A waooga tõndo, n naan-d tɩ d tõe n bao n bãng-a, la a wilgd tõnd d sẽn tõe n bãng-a to-to. (Luk 11:28) Woto kɩtame tɩ wẽn-sakdbã fãa tõe n wa paam n lebg Wẽnnaam zakã neba, rat n yeel t’a “kamba.”—Rom dãmba 8:19-21.

Wa Zã 3:16 sẽn yetã, Wẽnnaam wilgame me t’a nonga tõndo, n tʋm a biig a Zezi tẽngã zug t’a wa wilg tõnd a Ba a Wẽnnaam sẽn yaa a soabã, la a sak n ki tõnd yĩnga. La neb wʋsg pa wʋmd bũmb ning sẽn kɩt tɩ yɩ tɩlae t’a Zezi ki ãdem-biisã yĩngã võor ye. B pa mi a Zezi kũumã sẽn wilgd to-to tɩ Wẽnnaam nonga tõndã ye.

‘A KÕ A BIIG SẼN KA TO’

Ãdem-biisã fãa yaa kiidba. Sɩd me, b bẽedame, n kʋʋndẽ la b kiidẽ. La pa woto la Wẽnnaam da rat ye. A naana a Ãdem ne a Hawa n da rat tɩ b vɩɩmd wakat sẽn kõn sa arzãn pʋgẽ, tẽngã zugu. La bũmb la b ra segd n maane. B ra segd n saka Wẽnnaam. Bala Wẽnnaam yeelame tɩ b sã n pa sak yẽ, b na n kiime. (Sɩngre 2:17) La a Ãdem kɩɩsa Wẽnnaam n ki, tɩ yɩ sabab t’a yagensã me kiidẽ. Tʋm-tʋmd a Poll goma rẽ yell n yeel woto: “Rao a yembr n wa ne yel-wẽnã dũniyã tɩ kũum wa yel-wẽnã yĩnga. Rẽ n kɩt tɩ kũum yõkd nebã fãa, fãa sẽn maand yel-wẽnã yĩnga.”—Rom dãmba 5:12.

La Wẽnnaam “nonga tɩrlem.” (Yɩɩl Sõamyã 37:28) Baa a sẽn da pa tõe n bas a Ãdem taal a sẽn kɩɩs ne yamleoogã yĩngã, a pa kao ãdem-biisã fãa bʋʋd a Ãdem beegrã yĩnga, tɩ b na n nams la b ki wakat fãa yĩng ye. A tũu noor ning sẽn yeel tɩ ‘ned na n yao a vɩɩm, vɩɩm yĩngã’ n kao bʋʋdã tɩ zemse, tɩ neb nins sẽn na n sak yẽ wã wa paam vɩɩm sẽn kõn sa. (Yikri 21:23) La wãn to la d tõe n lebs n paam vɩɩm ning buud a Ãdem sẽn bõnã? Ned sẽn zems zãng n da segd n ki, n dol vɩɩm sẽn zems zãng ning a Ãdem sẽn bõnã.

A Ãdem yageng baa a ye da pa tõe n ki n yao yaood ning b sẽn da baoodã ye. La a Zezi tõog n maana rẽ. (Yɩɩl Sõamyã 49:7-10) A Zezi sẽn pa rog ne yel-wẽndã, a ra zemsa zãng wa a Ãdem sẽn da yaa to-to nand t’a beegã. Dẽnd a sẽn sak n ki wã yɩɩ rondo, sẽn na n fãag ãdem-biisã yel-wẽnã yembdẽ. A sẽn maan woto wã, a kɩtame t’a Ãdem ne a Hawa yagensã na n wa paam n zems zãng wa a Ãdem sẽn da yaa to-to sɩngrẽ wã. (Rom dãmba 3:23, 24; 6:23) Rẽ yĩnga bũmb bee tõnd sẽn segd n maan n dɩ nonglem kãngã sẽn pa tar mak-n-taagã yõod bɩ?

“NED NING FÃA SẼN TẼED BÃMBA”

D sã n lebs n tẽeg Zã 3:16 goamã, d mikdame tɩ b yeelame tɩ ‘ned ning fãa sẽn tẽed [a Zezi] kõn sãam ye, la a na paam vɩɩm sẽn ka sɛta.’ Woto wilgdame tɩ ned sã n dat vɩɩm sẽn pa satã, a segd n maana bũmbu. D sã n dat “vɩɩm sẽn ka sɛtã,” rẽndame tɩ d tẽe a Zezi la d sak-a.

La tõe tɩ y sok y meng woto: ‘Sak a Zezi rat n yeelame tɩ bõe? A Zezi pa yeel tɩ “ned ning fãa sẽn tẽed yẽ” na n paama vɩɩm sẽn ka sɛtã la?’ Yaa sɩd tɩ tẽeb yaa tɩlae. La Biiblã wilgame tɩ tẽ a Zezi pa rat n yeel tɩ sak n deeg bal t’a beeme ye. Ned sã n dat n paam Wẽnnaam zoodo, a pa segd n tẽed bal t’a Zezi yaa fãagd ye. Rẽndame me t’a maan a sẽn tõe fãa n tũ a Zezi sẽn wilg tõnd bũmb ninsã. Ned sã n yeel t’a tẽedame n yaool n pa wilgd rẽ ne a tʋʋmã, a tẽebã yaa faoore. Biiblã yeta woto: “Tẽeb sã n ka naag ne tʋʋma a yaa kɩɩnga.” (Zak 2:26, Kãab-paalgã Koe-noogo) Sẽn paase, ned sẽn tẽed a Zezi segd n wilgda rẽ a vɩɩmã nens fãa pʋgẽ.

Tʋm-tʋmd a Poll bilga rẽ võore, n yeel woto: “Kirist nonglem n so tõndo, tõnd sẽn mi sɩd tɩ yembre, [rat n yeel t’a Zezi] n ki nebã fãa yĩnga. . . . Bãmb kii nebã fãa yĩnga, tɩ neb nins sẽn vɩ wã kõn vɩ b mens yĩng yɛs ye, la b na vɩ sẽn ki-a bãmb yĩng n yaool n vʋʋgã yĩnga.” (2 Korẽnt dãmba 5:14, 15) Sẽn na yɩl n wilg tɩ d sũur sɩd nooma ne a Zezi maoongã, d segd n toeemame. D pa le segd n vɩɩmd d meng yĩng ye. D segd n vɩɩmda sẽn ki-a tõnd yĩngã yĩnga, rat n yeel t’a Zezi. Woto baoodame tɩ d lʋɩɩs a Zezi raabã taoore. Bũmb nins sẽn tar yõod ne-dã, d yam-yãkr toor-toorã, la d sẽn maand fãa segd n wilgame t’a Zezi tũub n pak tõnd n yɩɩda. La neb nins sẽn tẽed a Zezi la b wilgd rẽ ne b tʋʋmã keoor na n yɩɩ bõe?

A SOAB “KÕN SÃAM YE, LA A NA PAAM VƖƖM SẼN KA SƐTA”

Zã 3:16 yaoolem goamã wilgda keoor ning Wẽnnaam sẽn pʋlem neb nins sẽn tẽed rondã la b tũud a noyã. Wẽnnaam yeelame tɩ b “kõn sãame,” la tɩ b “na paam vɩɩm sẽn ka sɛta.” La sẽn tẽed-bã fãa keoor pa na n yɩ yembr ye.

A Zezi pʋlmame tɩ neb kẽer na n tɩ vɩɩmda wakat sẽn kõn sa saasẽ. A wilga a tʋm-tʋmdbã vẽeneg t’a rabda saasẽ n na n tɩ maneg zĩig n bĩng-ba. (Zã 14:2, 3; Filip rãmba 3:20, 21) Sẽn na n vʋʋg-b n kẽng saasẽ wã na n tɩ “yɩɩ Wẽnnaam ne Kirist maan-kʋʋdba, bãmb na n dɩɩ naam ne bãmb yʋʋm tusri.”—Wilgri 20:6.

Yaa kiris-neb sõor bilf bal n na n tɩ vɩɩmd saasẽ. Sɩd me, a Zezi yeela woto: “Da zoe-y rabeem ye, wubr pa zemb bũmbu, tɩ nooma y Ba tɩ b kõ yãmb b Rĩungu.” (Luk 12:32, Sebr Sõngo) ‘Wubr pa zemb bũmbã’ yaa neb a wãna? Wilgr 14:1, 4 leokda woto: “Mam gesame, la haya! Pe-bilã, [rat n yeel t’a Zezi Kirist sẽn vʋʋg n be saasẽ wã] yalsa tãng ning sẽn boond tɩ Siõ wã [rat n yeel tɩ saasẽ] zugu, la neb tus koabg la tus pis-naas la a naas sẽn tar Pe-bilã yʋʋr la bãmb Ba yʋʋr sẽn gʋls bãmb dĩyã bee ne bãmba. . . . B raa bãmb n yiis nebã sʋka, tɩ b yɩ wa dẽenem biis Wẽnnaam ne Pe-bilã yĩnga.” D sã n tẽeg tɩ dũniyã nebã yaa milyaar-dãmba, tɩ sẽn na n kẽng-b saasẽ wã yaa neb 144000, d sɩd tõe n yeelame tɩ b pa zem bũmb ye. Biiblã yeelame tɩ nin-kãensã na n yɩɩ rĩm-dãmba. Woto yĩnga, ãnd dãmb la b na n sooge?

A Zezi goma sull a to yelle, n wilg tɩ bãmb me na n dɩɩ Rĩungã nafa. Zã 10:16 pʋgẽ wã, a yeela woto: “Mam tara piis a taab sẽn nan ka be yãg-kãngã pʋgẽ ye. Yaa tɩlae tɩ mam wa ne bãmba. Bãmb na n wʋma mam koɛɛga, la a na yɩ yãgr a yembre, la pe-kɩɩm a yembre.” Wẽnnaam pʋlma nin-kãensã tɩ b na n wa vɩɩmda wakat sẽn kõn sa tẽngã zugu, wa sẽn da na n yɩ to-to ne a Ãdem la a Hawa wã. La bõe yĩng tɩ d tõe n yeel tɩ yaa tẽngã zug la b na n vɩɩmde?

Biiblã vɛrse rãmb wʋsg wilgdame tɩ arzãnã na n yɩɩ tẽngã zugu. Lak-y y Biiblã n karem vɛrse kãensã tɩ y na bãnge. Ad-ba: Yɩɩl Sõamyã 37:9-11; 46:9, 10; 72:7, 8, 16; Ezai 35:5, 6; 65:21-23; Matɩe 5:5; Zã 5:28, 29; Wilgr 21:4. Vɛrse kãensã wilgdame tɩ zabã, komã, bãasã la kũum pa na n le wa zĩnd ye. B wilgdame me tɩ wakat n wat tɩ nin-tɩrsã na n me b zags n zĩnd b pʋsẽ, n tall b toorẽ pʋto, la tɩ b na n wuba b kambã laafɩ la bãan pʋgẽ.a Rẽ yĩnga woto pa noom-y sɩda? Bʋʋm wʋsg n kɩt tɩ d tõe n tẽ tɩ vɛrse kãensã goamã sɩd na n pidsame.

WẼNNAAM MAANA BŨMB WƲSG ÃDEM-BIISÃ YĨNGA

Y sã n maag y yĩng n bʋgs bũmb ning Wẽnnaam sẽn maan yãmb la ãdem-biisã fãa yĩngã, y mikdame t’a sẽn zoe n maanã waooga. Wala makre, a naana tõndo, n kõ-d yam, laafɩ la bũmb nins fãa sẽn yaa tɩlae ne d vɩɩmã. Sẽn yɩɩd fãa, wala Zã 3:16 sẽn yeelã, Wẽnnaam sẽn sak t’a Zezi ki tɩ yɩ rond tõnd yĩngã yɩɩ sabab tɩ d tõe n wa paam bark sẽn ka mak-n-taaga.

Vẽenega, d sã n wa paam n na n vɩɩmd ne laafɩ la bãan wakat fãa yĩng tɩ bãase, kom wall kũum kae-yã, d sɩd na n paama sũ-noog la bark toor-toor a taaba. La y na paam bark kãensã bɩ y kõn paam-bã bee ne yãmba. Dẽnd segdame tɩ y sok y meng woto: Bõe la mam maand Wẽnnaam yĩnga?