Yãmb sʋgsgã leoore

◼ Bõe la b segd n tabl tigingã sɛb tablg zĩigẽ?

D tõe n paama kɩbay sẽn tɩ loe ne tigingã tʋʋma, sɛbã tablg zĩigẽ Rĩungã Roogẽ. B ka segd n tabl sebr ba a yembr sɛbã tablg zĩigẽ tɩ ka yel-gɛt taoor soabã n kõ sor ye.

Bũmb nins b sẽn nong n tabend sɛbã tablg zĩigẽ wakat fãa wã la woto: Tʋʋmdã tigisg la Wẽnnaam tʋʋmdã lekoll na-kẽndɩ la neb nins sẽn tar sõss b pʋsẽ wã yʋya, zãma sõasgã perzidã rãmb la Gũusg Gasgã karemdb yʋya, tigingã sebr zãmsg sul zĩis la b neb yʋya, sɛb sẽn wilgd tigims gĩnd yel-gɛtã gesg wakat la kɩbay a taab sẽn tɩ loe ne rẽ, kɩbay sẽn tɩ loe ne tigis-kãsems nins sẽn watã, la Rĩungã Roog pɩɩsg tʋʋmd na-kẽndre. Wakat ninga Sosiete wã kõta kãsem dãmbã sor tɩ b tabl lɛta kẽer bɩ sɛb a taab sɛbã tablg zĩigẽ. Kɩba-kãensã b sẽn wilg zugẽ wã sẽn yãk b toogo, kɩbar a to sã n wa, yaa kãsem dãmbã sull n dɩkd sard n wilg sã n zemsame tɩ b ning-a sɛbã tablg zĩigẽ.

Baa b sẽn tõe n togs koɛɛg tigisg wakat koɛɛg-koɛɛg tɩ kãadem sõasg la b na n kõ Rĩungã Roogẽ wã, b ka na n tabl kɩbar sẽn tɩ loe ne rẽ sɛbã tablg zĩigẽ ye. Leb n ka zems tɩ b tabl sɛb sẽn tar kɩbay sẽn tɩ loe ne pemsem kokr yɛl sɛbã tablg zĩigẽ ye, bala bõn-kãensã ka tɩ loe ne tigingã tʋʋm ye.—Ges-y yʋʋmd 1984, sẽoog kiuug rasem 15 Gũusg Gasgã (ne farende), seb-neng 15 pʋgẽ.

Sɛbã tablg zĩig segd n yaa kɛpɩ la sakd gesgo. A yalma segd n sekame, sẽn na yɩl n tõog n deeg kɩbay nins sẽn yaa tɩlae wã b sẽn wilg zugẽ wã. B segd n yãka tigissã tʋʋmd na-kẽndɩ sɛb nins wakat sẽn loogã, la kɩbay a taab nins tigingã neb sẽn mi sõma masã wã tao-tao sɛbã tablg zĩigẽ. Tigims sõor sẽn ta a yiib bɩ sẽn yɩɩd woto sã n tigimd taab Rĩung Ro-yɛng pʋgẽ, tiging fãa segd n tara a meng sɛb tablg zĩig sẽn welg toor vẽenega. D sagenda yel-gɛt taoor soabã bɩ ned a to a sẽn yãke, t’a gũusd n get sɛbã tablg zĩig wakat-wakate, n ges bũmb nins fãa b sẽn tabl be wã sã n zemsa ne wakatã, sã n segdame, la sɛbã tablg zĩig sã n yaa kɛpɩ.