D bao neb nins sẽn sɩd rat n kelgã
1. Wãn to la d tõe n wilg d mi-beoog ne d sẽn paam zu-noog n moond koɛɛgã?
1 A Zezi koe-moonegã sasa, a gilgame n moon koe-noogã n bels sik-m-mens rãmbã. (Ezai 61:1, 2) D sẽn tʋmd Kiristã yʋʋr yĩng rũndã-rũndã wã, d tara zu-noog n na n dɩk a togs-n-taar n bao neb nins sẽn sɩd rat n kelg koɛɛgã ne d sũy fãa wã d moonegã zĩigẽ.—Mat. 10:11; 2 Kor. 5:20.
2. Bõe la a Poll ra maand tɩ wilgdẽ t’a ra pa moond zĩ-yɛnga, la rẽ woma bi-bʋse?
2 D ra moon zĩ-yɛng ye: Tʋm-tʋmd a Poll ra nong n kẽnda karen-doogẽ wã n moond zʋɩf rãmbã la bu-zẽmsã. (Tʋʋ. 14:1) Filip tẽngã pʋgẽ, yẽ ne a Sɩlas kẽnga zĩig b sẽn ‘tagsd tɩ yaa pʋʋsg zĩig’ n na n tɩ bao nebã n moone. La b moona pagb be, t’a ye yʋʋr sẽn boond t’a Lidi sak sɩdã.—Tʋʋ. 16:12-15.
3. Zak-zak moonegã toor sẽn ka be, zĩ-bʋs me la d tõe n moone?
3 Zak-zak moonegã toog sẽn ka be, d tõe n moonda neb nins sẽn be gaar dãmbẽ wã, park rãmbẽ wã, tʋʋmã zĩisẽ wã, soayã noyã, koosmã zĩisẽ wã la zĩis a taabã. Sẽn paase d tõe n tũnuga ne telefõn bɩ lɛta n moon neb nins sẽn be zĩis nins b sẽn pa sakd tɩ ned kẽ nana wã. D sã n gũusd n get yɛlã sẽn yaa to-to d moonegã zĩigẽ wã la d toeemd zĩis nins d sẽn moondã, na n kɩtame tɩ d tʋm “Zusoabã tʋʋmd wʋsgo.”—1 Kor. 15:58.
4. D tigingã mooneg zĩig sã n pa waoogẽ, bõe la d tõe n maane?
4 Koe-moondb wʋsg basa b tigims n kẽng tigims a taab sẽn be b tẽngã pʋgẽ bɩ tẽng a to, tɩ kɩt tɩ b paam n moon koɛɛgã n paase. Sãnda me zãmsa buud-gom-zẽng sẽn na yɩl n moond tẽns a taabã neb sẽn be bãmb tẽngẽ wã.
5. Yaa sasa bʋg la d vɩya, la bõe la d segd n modg n maane?
5 Tõnd fãa segd n ninga d yamẽ tɩ d moonegã zĩig yaa dũniyã gilli. (Mat. 9:37; 13:38) Sẽn mik tɩ d vɩɩ dũni kãng saab wakatã yĩnga, tõnd ned kam fãa segd n gesa a yɛlã, a arzɛkã la a pãngã sẽn yaa to-to, sẽn na yɩl n moon koɛɛgã n paase. A Zeova wilga vẽeneg tɩ d sã n lʋɩɩsd Rĩungã taoore, a na n ninga modgr ning d sẽn maand n na n moon koɛɛgã n paasã barka.—Mat. 6:33.