Neb nins sẽn zemsã baoobo
1 Moonegã tʋʋmd a Zezi sẽn kõ noor tɩ d maanã tõe n yɩɩ tʋʋm-toogo. A yeelame: “Yãmb sẽn kẽ tẽng ninga fãa, a sã n yaa tẽn-kãsenga bɩ tẽn-bila, bɩ y bao ned sẽn zemse.” (Mat. 10:11) La rũndã-rũndã nebã sẽn ka leb n zĩ yir n kaoosdẽ wã, d na n maana a wãn n bao neba sõma?
2 Vaees-y y moonegã zĩig n gese: Reng-y n vaees-y y moonegã zĩig n gese. Wakat bʋg la neba be yir n yɩɩda? B bee yɛ wĩntoogo? Rẽ yĩnga daar n be semenã pʋgẽ, bɩ wakat n be raarã pʋgẽ nebã sẽn sakd n deeg sãan nana n yɩɩd bɩ? D sã n maneg d koe-moonegã wakat tɩ zems ne tõnd moonegã zĩigẽ nebã vɩɩm la b yɛla, rẽ tõe n sõng-d lame tɩ d tʋʋmã wom biis wʋsgo.—1 Kor. 9:23, 26.
3 Koe-moondb wʋsg tõog n yãa neb b zagsẽ zaabr pĩnda. Wakat kãng tɩ neb kẽer yam gãandame tɩ b tõe n sak n kelge. Zĩis nins rẽ maaneg sẽn tõeyã, kaset kũun ne telefõnã zaabr me tõe n woma biis wʋsgo. Leebgã zĩisi, la zãmã wã zĩisẽ mooneg leb n yaa soay d sẽn tõe n tũnug ne n taas nebã koe-noogã.
4 Kiuug a yembre, tiging a ye pʋgẽ b sẽn da wa n wɩngd wʋsg ne koe-moonegã sasa, b seglame tɩ b tõe n kõ kasetã sibrã la hatã wĩnd-kaoorã baasgẽ, ne arb la arzũm zaabre. B leb n sigla kaset kũun ne telefõn la b maan segls tɩ b tõe n moon leebgã zĩisẽ. Segl-kãensã yãnga neb wʋsg tʋlsem ne koe-moonegã hal tɩ tigingã neb rɩk sard tɩ b na n kell n kẽnga taoor ne segls nins b sẽn zoe n maanã.
5 Modg-y ne lebg-n-tɩ-ges rãmbã maanego: Sã n yaa toog yãmb zĩigẽ wã tɩ y yã nebã yir y sã n wa lebg n na n tɩ ges-bã sasa, bɩ y modg tɩ y sã n kẽng a soab nengẽ fãa, baa yaa pipi kẽngrẽ wã, bɩ y zems taab n yãk wakat takɩ n lebg n wa ges-a. Rẽ poor bɩ y modg n sɩd kẽnge. (Mat. 5:37) Sã n zemsame menga, y tõe n kosa a soabã telefõn nimero. Rẽ leb n tõe n sõng-y lame tɩ y paam n sõs ne a soabã yɛsa.
6 Tõnd sã n modgd n baood neb nins sẽn zemsã la d lebgd n tʋgd n sõngd neb nins sẽn dat n bãng n paasã, yaa vẽeneg tɩ d na n paama a Zeova barka.—Yel. 21:5.