D wilg d mi-beoog ne Wẽnnaam, a kũun-kãsengã yĩnga

1. Bõe yĩng tɩ d segd n sɩd tall mi-beoog ne a Zeova?

¹ A Zeova kõo tõnd “kũun sõma” wʋsgo, la a sẽn kõo a Biigã tɩ yɩ rondã la kãseng n yɩɩda. (Zak 1:17) Rẽ kɩtame tɩ nebã tõe n paam bark wʋsgo, wala makre, b yel-wẽna sugri. (Ef. 1:7) Rondã leb n kɩtame tɩ d rat n wilg d mi-beoog wakat fãa. A Zezi kũumã tẽegr sasa, d rɩkda sẽk n bʋgsd kũun kãngã sẽn ka to wã zugu.

2. Wãn to la tõnd ne d zakã neb tõe n wilgd d mi-beoog n paase rõndã yĩnga?

² D tall mi-beoog n paase: Sẽn na yɩl n sõng d zakã neb tɩ b tall mi-beoog rondã yĩng n paase, nand t’a Zezi kũumã tẽegr sẽn na n yɩ tʋʋlg kiuug rasem 30 wã ta, d segd n dɩka sẽk semen a wãn n sõs rondã zug d zak pʋgẽ zaabr Biibl zãmsgã sasa. Sẽn paase, y tõe n naaga y zakã neb n karem Biiblã vɛrse nins b sẽn yãk tɩ d segd n karem Tẽegrã sasa wã. Tags-y rondã sẽn naf yãmb to-to, la rondã sẽn kɩt tɩ y tagsgã ne a Zeova, y mengã, neb a taabã la beoog daarã sẽn toeem to-to wã. Sã n mik tɩ y tigingã neb zoe n paama yɩɩlã seb-paalã, y tõeeme n zãms yɩɩl a 8 ne 109 wã sẽn yaa yɩɩn-paal a yiibã b sẽn yãk n na n yɩɩl Tẽegrã sasa wã.—Yɩɩl 77:13.

3. Wãn to la d tõe n wilg d mi-beoogo?

³ D sẽn tõe n wilg d mi-beoog to-to: D sẽn tar mi-beoog ne a Zeova rondã yĩnga kɩtame tɩ d wilgd nebã a sẽn yaa a soabã la tɩ yaa a sẽn nong d wʋsgã yĩng n kɩt t’a tʋm a Biigã. (Yɩɩl 145:2-7) Tʋʋlgo, tʋʋl-nif la sig-noy kiisã sasa, sẽn na yɩl n wilg a Zeova b mi-beoogo, zags kẽer neb sõngda b ned a ye bɩ sẽn yɩɩd woto tɩ b lebg sõngr so-pakdba. Y sã n pa tõe n maand woto, bɩ y maan y sẽn tõe tɛk n moon koɛɛgã wʋsg n paase. (Ef. 5:16) D mi-beoogã na n kɩtame tɩ d bool nebã tɩ b wa naag-d n maan Kirist kũumã tẽegre. (Wil. 22:17) Sẽn na yɩl n tõog n pʋɩ Tẽegrã seb-vãadã wʋsgo, d tõe n deng n gʋlsa d lebg-n-tɩ-ges-rãmbã, d karen-biisã, d roagdbã, d tʋmd-n-taasã, la d yagsã yʋy sebr zug n yaool n wa bool-ba.

4. Tʋʋlgo, tʋʋl-nif la sig-noy kiisã, bõe la d segd n modg n maane?

⁴ Tʋʋlgo, tʋʋl-nif la sig-noy kiisã yaa wakat d sẽn tõe n wilg a Zeova d mi-beoog kũun ning a sẽn kõ ninsaalbã yĩnga. Kiis a tãabã sasa, bɩ d modg n tall mi-beoog ne a Zeova n paase “Kiristã arzɛgsã sẽn ka tɛkã” ne rondã yĩnga.—Ef. 3:8.