Yãmb wilgda nebã Biibl zãmsg sẽn maand to-to y pipi sõsgã sasa bɩ?

Wakat ninga f sã n kãab neb Biibl zãmsgo, b yetame tɩ b pa rate, bɩ tɩ bãmb me tara wakat n zãmsd Biiblã b egiliizẽ wã. Sẽn mik tɩ yaa b sẽn maand to-to bãmb egiliizẽ wã bal la b mi wã, b pa tõe n bãng tɩ tõnd sẽn zãmsd nebã Biiblã to-to wã bee yamleoog wʋsg ye. Rẽ n so tɩ d pa segd n kãab-b Biiblã zãmsg d pipi sõsgã sasa bal ye. Zĩig pʋgẽ bala, d segdame n wilg-b tõnd sẽn zãmsd nebã Biiblã to-to. Wala makre, d pa na n yeel ned tɩ d tara rɩ-noog n na n wa kõ-a nindaar ye. D tog n kõ-a-la zĩig pʋgẽ t’a lembe. Y tõe n tũnuga ne sagls nins sẽn be yʋʋmd 2006 yʋʋm-vẽkr kiuug Rĩungã Tʋʋmd seb-neng a 6 pʋgẽ wã. Ad a yembre:

“Yãmb tagsdame tɩ wakat n wat tɩ gom-kãensã na n pids bɩ? [Karm-y Ezai 33:24, la y bas t’a leoke.] Ges-y seb-kãngã sẽn wilgd bũmb ning rẽ wɛɛngẽ.” Lak-y Biiblã yetame sebrã neng 36 sull 22 wã n wilg-a. Karm-y sokr 22 wã la y kos-a t’a gẽes leoorã y sã n wa karemd sullã. Y sã n karem sullã n sa bɩ y lebs n sok sokrã la y kelg a soabã sẽn na n leok to-to. Lebs-y n karm-y vɛrse a to sẽn be sullã pʋgẽ. Rẽ poor bɩ y sok sokr n yeel tɩ y na n wa leoka rẽ nindaare, la y yãk daarã la lɛɛrã. Y sã n maan woto yaa Biibl zãmsg la y sẽn sɩngã.