D sẽn tõe n wilg nin-paalsã koɛɛgã mooneg to-to
1. Yãmb sẽn sɩng koɛɛgã mooneg pipi daarã yɩɩ wãn-wãn ne-yã?
1 Yãmb ket n tẽra daar ning y sẽn sɩng koɛɛgã mooneg zak-zakã bɩ? Tõe tɩ y ra yɛɛsda wʋsgo. Yãmb sã n da tũuda ned ning sẽn da zãmsd yãmb Biiblã bɩ koe-moond a to, yaa vẽeneg tɩ y sũur yɩɩ noog y sẽn paam t’a sõng yãmbã. Masã yãmb me sẽn paam minim koɛɛgã mooneg pʋgẽ wã, y tõe n wilga nin-paalsã koɛɛgã moonego.
2. Neb nins sẽn nan sɩng koɛɛgã moonegã segd n bãnga bõe ne bõe?
2 Neb nins sẽn nan sɩng koɛɛgã moonegã segd n bãnga b sẽn tõe n sɩng sõsg ne ned to-to, b sẽn na n tʋm ne Biiblã to-to, b sẽn na n lebg n tɩ ges nebã to-to, la b sẽn na n sɩng Biibl zãmsg ne ned to-to. B segd n bãnga b sẽn tõe n moon soaya noyã, koosmã zĩisẽ la zĩis a taab to-to. Y tõe n sõnga nin-kãensã ne y mak-sõngã la y saglsã tɩ b paas b minimã rẽ fãa wɛɛngẽ.
3. Wãn to la d tõe n sõng koe-moond paalsã ne d mak-sõngã?
3 Ne y mak-sõngã: A Zezi wilga a karen-biisã b sẽn segd n moon koɛɛgã to-to. (Luk 8:1; 1 Pɩɛ. 2:21) Y sã n wa rat n moon ne koe-moond paalga, segl-y bũmb y sẽn na n yeel n sɩng sõsg ne nebã koɛɛg-koɛɛga, a sẽn tõe n togs nana-nana. Tõe n yɩɩ bũmb sẽn yit tõnd sɛbã pʋsẽ. Moonegã sasa bɩ y reng n moon zak a ye bɩ a yiibu, sẽn na yɩl tɩ koe-moond paalgã kelg y sẽn yetã sõma. Y sã n wa yi zak pʋgẽ n na n kẽ a to pʋgẽ, y tõe n sok-a lame n ges a sã n tõe n maana wa yãmb sẽn maanã. Woto na n sõng-a lame t’a bãng tɩ f sã n tũud ned koɛɛgã mooneg sasa yaa sõma, la kɩt me t’a sak sagls nins f na n kõ-a a moonegã wɛɛngẽ wã.
4. D sã n kelg koe-moond paalg poore, wãn to la d tõe n sõng-a?
4 Ne y saglsã: A Zezi kõo a karen-biisã sagls koɛɛgã mooneg wɛɛngẽ. (Mat. 10:5-14) Yãmb me tõe n kõo koe-moond paalg saglse. Sã n wa yaa yẽ n moonde, bɩ y maag y yĩng n kelge. Y sã n wa yi zakẽ wã, baa a sã n yeela bũmb sẽn pa zemse, bɩ y pẽg-a bũmb nins sẽn yɩ sõma wã yĩnga. Ra yɩ-y tao-tao n sagl-a ye. Bas-y t’a moon zak a ye n paas tɩ y ges a sẽn na n maan to-to, bala tõe tɩ pipi wã yaa a sẽn da yɛɛsdã yĩnga. Ning-y y yamẽ tɩ koe-moondbã minim pa taaba, la tɩ nebã sẽn moond koɛɛgã to-to wã tõe n yɩɩ toor-toor tɩ fãa yaool n yaa sõma.—1 Kor. 12:4-7.
5. D sã n na n sagl koe-moonda, bõe la d tõe n yeele?
5 Wakat ninga koe-moond paalg tõe n kosa tõnd saglse. Baa a pa wa kose, bɩ d bãng t’a rata sõngre, la d sõng-a. Wãn to la d tõe n maan dẽ n da sãam a sũuri? Koe-moondb kẽer sẽn tar minim nong n sokda woto: “M tõe n bõos n wilg-f-la bũmb bɩ?” Pa rẽ bɩ b sok woto: “Fo tagsg yaa wãn ne fo sẽn yeel bũmb ningã?” Y tõe n yeela woto me: “Mam sẽn sɩng koɛɛgã moonegã, woto la woto da yaa toog ne maam, la woto ne woto n sõng maam.” Wakat ninga y tõe n naaga taab n ges Comment raisonner sebrã pʋgẽ n paam saglse. Sẽn na yɩl n da yirb-a, bɩ y kõ-a saglg a ye bala.
6. Koɛɛgã mooneg wɛɛngẽ, wãn to la ‘kut saasd kutu’?
6 Kut n saasd kutu: A Tɩmote ra yaa koe-moond sẽn tar minim, la a Poll sagl-a lame t’a kell n modg ne nebã zãmsgo, la a maan tɩ yɩ sõma n paase. (1 Tɩm. 4:13, 15) Baa y sẽn sɩng koɛɛgã mooneg sã n kaoosame, y segd n ket n modgdame n paasd y moonegã sõmblem. Rɩk-y yam koe-moondb a taabã nengẽ, baa koe-moondb nins minim sẽn pa ta yãmbã nengẽ. Gũusd-y n get neb nins sẽn dat sõngrã, sẽn yɩɩd fãa nin-paalsã la y sõng-b tɩ b paam minim koe-noogã mooneg pʋgẽ.—Yel. 27:17.