B maana periodik rãmbã tɩ b kareng noom neb buud toor-toore
1. Wãn to la tʋm-tʋmd sẽn tũud sɩd la sẽn tar yamã rɩkd tʋm-tʋmd a Poll togs-n-taare?
1 Wa tʋm-tʋmd a Poll sẽn da moond neb buud toor-toor koe-noogã tɩ zemsd ne ned fãa yɛl sẽn yaa to-to wã, tʋm-tʋmd sẽn tũud sɩd la sẽn tar yamã me maanda periodik rãmbã sẽn na yɩl tɩ b kareng yɩ nebã noogo, baa b sẽn yitẽ, la b tũudmã sẽn yaa a soaba. (1 Kor. 9:22, 23) Sẽn na yɩl n bãng n tʋm ne Gũusg Gasgã la Réveillez-vous ! wã sõma, d segd n bãnga neb nins yĩng b sẽn yiis-bã.
2. B yiisda Réveillez-vous ! wã ãnd rãmb yĩnga?
2 Réveillez-vous ! wã: B yiisda Réveillez-vous ! wã sẽn na yɩl n sõng neb nins sẽn tar “Atɛn nebã” tagsgã buudã. (Tʋʋ. 17:22) Neb nins tʋm-tʋmd a Poll sẽn moon Atɛnnã ra pa kiris-neba, b ra pa mi Gʋlsg Sõamyã sõma me ye. Woto, b yiisda Réveillez-vous ! wã me neb nins sẽn pa mi Biiblã sõma wã, bɩ sẽn pa mi-a baa bilfã yĩnga. Nin-kãensã tõeeme n pa mi kiris-neb hakɩkã sẽn tẽed bũmb ninsã, b tõeeme n pa kɩs sɩd ne tũudum, bɩ b tõeeme n pa mi tɩ Biiblã tara sagls takɩ sẽn tõe n sõng ned ye. Sẽn yɩɩd fãa, b yiisda Réveillez-vous ! wã sẽn na yɩl n sõng nebã tɩ b bãng tɩ Wẽnnaam sɩd beeme. Leb n yaa sẽn na yɩl n sõng nebã tɩ b tẽ Biiblã, la b bãng t’a Zeova Kaset rãmbã tũudum yaa toor ne tũudum a taabã.
3. B yiisda Gũusg Gasg a yiibã ãnd rãmb yĩnga?
3 Gũusg Gasgã: B yiisda Gũusg Gasgã sẽn yit kiuug fãa pipi daarã neb nins sẽn tẽed Wẽnnaam la Biiblã yĩnga. Yaa neb sẽn mi yɛl kẽer sẽn be Biiblã pʋgẽ, la b pa mi a sẽn sɩd yet bũmb ningã ye. Yaa nin-kãensã buud la a Poll sẽn yeel tɩ b yaa neb sẽn “zoet Wẽnnaamã.” (Tʋʋ. 13:14-16) B yiisda Gũusg Gasg a to wã a Zeova Kaset rãmbã zãmsg yĩnga. A Poll ra tagsdame tɩ neb nins sẽn na n karem a lɛta wã zoe n mii Gʋlsg Sõamyã, la tɩ b sɩd wʋmda a sẽn yetã võore. (1 Kor. 1:1, 2) Woto, sõss nins sẽn be Gũusg Gasg kãng pʋgẽ wã me yaa sẽn na yɩl n sõng neb nins sẽn wat tigissã n mi a Zeova Kaset rãmbã sẽn tẽed bũmb ninsã, la b gom-biis kẽerã.
4. Bõe yĩng tɩ d segd n modg n bãng bũmb ning sẽn be periodik fãa pʋgẽ?
4 Baa ne d sẽn miẽ n magd periodik rãmbã yiib-yiib n kãabd nebã, yaa a yembr bal zug la d nong n gomda. Woto yĩnga, bɩ d modg n bãng bũmb ning sẽn be periodik fãa pʋgẽ, tɩ d sã n wa seg ned fãa bɩ d bãng d sẽn na n tik zĩig ning n wilg-a.