Y na n dɩka a Zeova ne a Zezi naoore, n moon koɛɛgã ne yẽesem tẽegrã kiis sasa bɩ?

1. Bõe la a Zeova Kaset rãmb modgd n maand tẽegrã kiis sasa?

¹ A Zeova pidsda a raab buud fãa ne yẽesem. Ezai 9:6 goma Wẽnnaam Rĩungã sẽn na n wa ne bark ninsã kẽer yelle, n yeel tɩ yaa “Saasẽ-pãng-soabã [“yẽesmã,” MN] n na n maan woto.” Wẽnnaam Bi-riblã sẽn wa n be tẽngã zugã me, a teela tũudum hakɩkã ne yẽesem. (Zã 2:13-17; 4:34) Yʋʋmd fãa, tẽegrã kiis sasa, koe-moondb milyõ-rãmb n modgd n dɩkd a Zeova ne a Zezi togs-n-taar yẽesmã wɛɛngẽ. Yãmb me na n maana woto bɩ?

2. D sã n moon koɛɛgã ne yẽesem tʋʋlg kiuug rasem a 7 tɛka, bõe la d na n tõog n maane?

² Seb-vãoogã pʋɩɩbo: Rõandã, d na n sɩnga seb-vãoogã pʋɩɩb tʋʋlg kiuug rasem a 7 sibrã daare. Bɩ d segl mens masã, n wa tõog n naag n pʋɩ seb-vãoogã sõma. Tigimsã neb na n moona koɛɛgã ne sũ-noog n bool b moonegã zĩig neb wʋsg tɩ b wa tẽegrã. D mao n kõ seb-vãoogã d tʋmd-n-taase, d roagdba, d karen-bi-taase, neb nins d sẽn da zoe n moon koɛɛgã, la neb a taaba. Pa rẽ bɩ d kẽ jw.org n telesarz seb-vãoogã, n tool-ba.

3. Wãn to la d tõe n moon koɛɛgã n paas tʋʋlg la tʋʋl-nif kiisã?

³ Sõngr so-pakrã: D yẽesmã na n kɩtame me tɩ d moon koɛɛgã n paase. Sãmbg sẽn ka be, koe-moondb wʋsg na n tõog n yɩɩ sõngr so-pakdb tʋʋlg la tʋʋl-nif kiisã. Bala ki-kãense, koe-moond sã n data, a tõe n yɩɩ sõngr so-pakda, n moon lɛɛr 30. Yãmb zak pʋgẽ Biibl zãmsgã sasa, wall y sã n wa n zãmsd Biiblã y ye, bɩ y bao y sẽn tõe n maan to-to n yɩ sõngr so-pakda. (Yel. 15:22) Y sã n naag n pʋɩ seb-vãoogã ne yẽesem, tõe n kɩtame tɩ neb a taabã tʋll n dɩk y togs-n-taare. Woto yĩnga, gom-y ne y taabã yãmb sẽn magd n na n moon to-to wã. Y sã n maneg y yɛlã sẽn na yɩl n moon koɛɛgã ne yẽesem, y rɩkda a Zezi togs-n-taare.—Mark 6:31-34.

4. D sã n dɩk a Zeova ne a Zezi naoor n tall yẽesem, nafa bʋs la d na n maane?

⁴ D sã n dɩk a Zeova ne a Zezi naoor n tall yẽesem tẽegrã kiis sasa, d na n paama barka. Wala makre, d na n tõogame tɩ koe-noogã ta d moonegã zĩig neb wʋsgo. Sẽn paase, d sũy na n yɩɩ noogo, bala d maanda a Zeova raabo, la d sõngd nebã. (Tʋʋ. 20:35) La sẽn yɩɩd fãa, d Wẽnnaamã ne a Bi-riblã sẽn tʋmd b tʋʋmã ne yẽesmã sũy na n yɩɩ noog ne-do.