Zĩig ning d sẽn na n bao leoorã

“Wakat sẽn-kõn-sa namsgã zãmsg yaa bũmb sẽn ka zems ne tẽeb ne Wẽnnaam nonglmã ne bũmb nins b sẽn naanã. . . . Tall tẽeb ne sɩɩgã wakat sẽn-kõn-sa sɩbgr yʋʋm a wãn tudgr yĩnga, tɩ b pa kõ-a segb t’a maan demsgã, yaa kɩɩs tagsg tõogã noy fãa.”—NIKHILANANDA, SẼN YAA ẼNDU FILOZOFE.

1, 2. Tẽebã sẽn yaa toɛ-toɛ Laasrã wɛɛngẽ wã wata ne sʋgs-bʋse?

WALA Ẽndu filozof a Nikhilananda, wakat sẽn-kõn-sa sɩbgrã zãmsg ka noom neb wʋsg rũndã-rũndã ye. Bʋʋm a woto yĩng me, yaa toog ne neb a taab tɩ b wʋm zãmsg kẽer võor wala Nirvana paoong bɩ yembr yɩɩb ne Tao wã.

² Baasg zãnga, zãmsg ning sẽn yaa tɩ sɩɩg pa kiidã kɩtame tɩ Yaang ne Nin-taoor tũudmã fãa wa ne tẽeb zãmsg yel-toeemds sẽn pʋg taab sẽn kẽesd weoog Laasrã wɛɛngẽ. B tõe n bãnga sɩdã sẽn tɩ loe ne bũmb ning sẽn paamd tõnd d sã n ki wã bɩ? Sɩɩg yaa bũmb sẽn sɩd pa kiid bɩ? Yɛ la d tõe n bao leoorã?

Siãnsã la filozofi wã

3. Siãnsã la siãnsã yɛl-baoob manesem kõta sʋgsg nins sẽn tɩ loe ne vɩɩm kũum poorã leoor bɩ?

³ Siãnsã la siãnsã yɛl-baoob manesem tara sʋgsgã sẽn tɩ loe ne Laasrã leoor bɩ? Vaeesdb kẽer tika kɩbay sẽn pa kaoos sẽn tɩ loe ne yõor sẽn dat n tõsg bɩ ‘ka be yĩng pʋgẽ’ yɛl b sẽn vɩɩmd zut n kõ tagsa vɩɩm kũum poorã wɛɛngẽ. A sẽn vaeesd bãmb dãmb goam kẽer a kõnferãns ning gom-zug sẽn yaa “Kũum yaa sor sẽn na yɩl n kẽ vẽenemẽ bɩ?” wã pʋgẽ, katolik teoloziẽ a Hans Küng baas n yeela woto: “Yɛl b sẽn vɩɩmd a woto buud pa kõt poeer ba a ye vɩɩm sẽn tõe n be kũum poor wɛɛngẽ ye: Yel-kãens tɩ loee ne yaoolem minit a nu wã sẽn deng kũuma, lakae ka vɩɩm sẽn-kõn-sa kũum poor ye.” A paasame: “Vɩɩm sẽn tõe n be kũum poorã yell tara yõod kẽeng ne sẽn vɩ-bã. A baooda leoor b sẽn tog n bao zĩig a to, sã n mik tɩ b ka tõe n paam-a logtoɛɛmbã nengẽ.”

4. Filozofi wã tõe n sõnga tõnd tɩ d yã leoorã vɩɩm kũum poorã soy wʋsgã tũudum toɛ-toɛyã sẽn kãabdã sʋk bɩ?

⁴ Yaa wãn to yẽ ne filozofi wã? A tõe n sõnga tõnd tɩ d yã leoorã vɩɩm kũum poorã soy wʋsgã tũudum toɛ-toɛyã sẽn kãabdã sʋk bɩ? “Zug bãngr no-koeemd wẽeb tʋʋmd” bee filozofi wã baoob pʋgẽ, yʋʋm kob-gĩnd 20 soab Gãrãnd Bertayn filozof a Bertrand Russell sẽn yeele. Sã n yaa ne The World Book Encyclopedia, filozofi yaa “bao-n-bãng buudu: vaees-n-gese, mag yõod n gese, võor wilgri, la no-koeemd wẽeb manesem.” Laasrã wɛɛngẽ, filozofi no-koɛɛmã talla tagsa toɛ-toɛya, kẽer yet tɩ pa-kiid halhaalã yaa tagsa sẽn pukd tʋlsem bala, t’a taab yaool n moon-a wala ninsaal fãa rog-ne sore.

Leoor yẽgr sẽn ka to

5. Sebr ning sẽn yaa kʋdr n yɩɩd to b sẽn zɩ n gʋlsã la bʋgo?

⁵ Baasg zãnga sebr n be sẽn tar sʋgs-kãsemsã vɩɩmã la kũumã wɛɛngẽ wã leoor sẽn yaa sɩda. Yaa sebr ning sẽn yaa kʋdr n yɩɩd to b sẽn zɩ n gʋlsã, tɩ b gʋls a babs kẽer sẽn pẽneg yʋʋm 3 500 sẽn looge. B gʋlsa seb-kãngã pipi babgã yʋʋm kob-gĩn a wãn tɩ b nan ka maan Ẽndu gʋlsgã sẽn yaa Vedas wã dẽenem tũudum yɩɩl ye, la yʋʋm tusr la bal sẽn deng t’a Buddha, a Mahâvîra, la a Kõnfisius zĩnd tẽng zugu. B baasa seb-kãngã yʋʋmd 98 T.W., tɩ rẽ yɩɩd yʋʋm 500 sẽn deng t’a Mahãmad lugl Lɩslaamdã. Yam sẽn yaa kãseng n yɩɩd yẽgr sẽn ka to kãngã yaa Biiblã.a

6. Bõe yĩng tɩ d segd n gũ tɩ Biiblã togs tõnd sɩɩg sẽn yaa bũmb ninga?

⁶ Sɛb nins fãa sẽn be wã sʋka, Biiblã n tar pĩnd kʋdemd sẽn yaa takɩ n yɩɩdã. Kʋdemdã b sẽn gʋls Biiblã pʋgẽ wã leba poorẽ hal n gom ninsaalbã buud sɩngr yelle, la a wilgd d sẽn wa n be tẽng zug ka to-to. A togsda tõnd meng yɛl sẽn zĩnd wakat ning sẽn deng tɩ b maan ninsaalbã. Sebr a woto sɩd tõe n kõo tõnd bãngr sẽn tɩ loe ne b sẽn maan ninsaalã to-to la sɩɩgã sẽn ya a soabã.

7, 8. Bõe yĩng tɩ ne bas-yardo d tõe n bao leoor sẽn yaa sɩd la sẽn tat yam sẽn tɩ loe ne bũmb ning sẽn maand d sã n ki wã Biiblã pʋgẽ?

⁷ Sẽn paase, Biiblã yaa bãngr-goam pidsg sẽn zɩ n vaal sebre. Wala makre, a reng n togsa Meed ne Pɛrs rãmbã la Gerɛs soolem dãmbã yikr la b lʋɩɩs ne togs-n-welg kãsenga. Gom-kãensã ra yaa takɩ wʋsg hal tɩ yel-gẽnesdb kẽer mak n na n kõ poeer tɩ b ra gʋls-b-la yɛlã pidsg poore, n konge. (Dãniyɛll 8:1-7, 20-22) Bãngr-goam kẽer b sẽn gʋls Biiblã pʋgẽ paamda pidsg b nen-bõonesã pʋsẽ tõnd wakatã menga.b—Matɩe, sak 24; Mark, sak 13; Luk, sak 21; 2 Tɩmote 3:1-5, 13.

⁸ Ninsaal ba a ye, ba a bãngrã sẽn taẽ zĩig ninga, ka tõe n deng n togs beoog-daar yɛl takɩ woto ye. Yaa ãndũniyã Naand sẽn tar pãng sẽn tõe fãa la sẽn tar yam ne bũmb fãa wã bal n tõe rẽ. (2 Tɩmote 3:16, 17; 2 Pɩɛɛr 1:20, 21) Biiblã sɩd yaa sebr sẽn yit Wẽnnaam nengẽ. Sãmbg sẽn ka be, sebr a woto tõe n kõo tõnd leoor sẽn yaa sɩd la sẽn tat yam bũmb ning sẽn paamd tõnd d sã n ki wã wɛɛngẽ. Nananda, d ges bũmb ning a sẽn yet sɩɩgã wɛɛngẽ.

[Tẽngr not rãmbã]

[Foto, seb-neng 18]

Sebr sẽn yaa kʋdr n yɩɩd to b sẽn zɩ n gʋlsã

[Foto, seb-neng 18]

Sebr sẽn kõt leoor sẽn zems ne bas-m-yam la sẽn tat yam