Tʋʋl-nif kiuugã yaa wakat d sẽn tog n tall yẽesem ne tʋʋm sõma maanego!
1 Saag-seb-kẽeng sã n kolgd zĩig neb sẽn beẽ, lebgda yãgb yell tɩ b keoog nebã ne yellã sẽn laandã. Saag seb-kẽengã sã n kolgd wʋsg n paasdẽ fãa, b tog n wɩngda ne keoogrã n paasdẽ. Bõe yĩnga? Bala neb yõy n be yell pʋgẽ! Tõeeme tɩ neb kẽer ra ka wʋm keoogr nins b sẽn da maan pĩndã ye. Tõeeme tɩ neb me n wʋm n maan yam-kaalg ne segls rɩkre. Yaa woto me ne keoogr ning Wẽnnaam sẽn kõ-d tɩ d moon sẽn deng tɩ Wẽnnaam sũ-puugrã sẽn yaa tɩrgã ‘sobg’ wa loog ne dũni wẽng kãnga fãa wã. (Yel. 10:25) Neb milyaar dãmb vɩɩm sẽn-kõn-sa bee yell pʋgẽ! B tog n moona keoogrã. Tõnd tog n ‘wɩnga ne tʋʋm sõma maanego.’—Tɩt 2:11-14.
2 Hal yʋʋm pi-gĩna, a Zeova nin-buiidã sũy tus-b lame tɩ b maan tɩ Tẽegrã wakat yɩ yẽesem wilgr sẽn yaa zall wakat ministɛɛrã pʋgẽ. Yʋʋmd 1939 pẽrẽntã wã, Informateur sẽn yaa D Rĩungã Ministɛɛrã reng-taoor soabã kõo sagl-kãngã: “Tʋʋl-nif kiuugã tara hat rãmb a nu. Sibr woo sibr sẽn be a pʋgẽ taa bãmb b nu me. Kɩt-y tɩ sibr fãa la hat fãa tʋʋl-nif kiuugã . . . yɩ kaset kũun wakat sẽn yaa zalle.” Wã ra yaa bõn-datl sẽn yaa kãseng meng b sẽn da yãk saam-biisã yĩng yʋʋm 60 la woto! Wala yʋʋmd 1939 wã, rõandã me tʋʋl-nif kiuugã tara wɩkɛn dãmb a nu. Bõe la y geend n na n maan ki-kãngã? Yel-bʋs la y gʋls y kalãndirie wã zug yʋʋmd 2000 tʋʋl-nif kiuugã yĩnga? Rɩk-y segls n kẽes y meng sõma tʋʋm-sõma maaneg pʋgẽ ne a Zeova nin-buiid a taabã ki-kãngã sẽn yaa zallã pʋgẽ, wakat ning d sẽn na n wɩng ne tẽebã tʋʋm n yɩɩdã.
3 Bũmb ning d sẽn saagd n na n maane: Yʋʋmd 2000 wã daar ning sẽn tar yõod n yɩɩdã bee ki-kãngã pʋgẽ. Ra-kãng yaa tʋʋl-nif kiuugã rasem 19, sẽn yaa a Zezi kũumã tẽegr daarã. Bɩ d maan modgr zall n bool neb wʋsg wa d sẽn tõe tɛk tɩ b wa Tẽegrã. Wa b sẽn sagl kiuug ning sẽn loogã, gʋls-y neb nins fãa sẽn tõe n wa Tẽegrã yʋy la y gũus n da long ned ba a yembr ye. Koe-moond sẽn ka le moond fãa, Biibl karen-biisã, lebg-n-tɩ-ges rãmba, neb sẽn da zãms Biiblã pĩnda, tʋmd-n-taase, karen-bi-taase, yagse, roagdba, la mitb a taab segd n zĩnda b sẽn na n bool-b rãmbã sʋka. Rẽ yĩnga b rãmb nins sẽn dat n wa wã tara bõn-zoambdg bɩ ned sẽn na n dɩk-b bɩ? Sã n ka woto, ne nonglem y tõe n sõng-b lame bɩ? Tẽegrã daar yʋngo tõnd fãa tara zu-noog n na n wilg b rãmb nins sẽn wa wã tɩ b bãng tɩ d sũur yaa noog ne b waoongã. Tẽegrã poore, d tõe n pʋga ratmã n sõng nin-kãensã sẽn wilg ratmã tẽebã wɛɛngẽ n paase.
4 D sã n ‘wɩng ne tʋʋm sõma maaneg’ rasem nins sẽn deng Tẽegrã la a poore, rẽ yɩta manesem sẽn tar dasãnd sẽn na yɩl n wilg a Zeova d mi-beoog ne bũmb nins fãa a sẽn maan d yĩngã. Yãmb sã n yaa sõngr so-pakda, y na n tʋllame n maan y sẽn tõe fãa n maan lɛɛr 50 bɩ sẽn yɩɩd woto ministɛɛrã pʋgẽ. (Mat. 5:37) Tũ-y geelg-n-tʋm ning y sẽn sigl kiuugã sɩngrẽ wã sõma. (Koɛ. 3:1; 1 Kor. 14:40, NW ) Bɩ tõnd fãa sẽn kellã maan d sẽn tõe n teel so-pakdbã fãa, ne d sẽn na n daoond-b la d tʋmd ne-b koe-moonegã pʋgẽ. (Mak-y ne 2 Rĩm dãmba 10:15, 16.) Tõnd sã n bʋd ne yẽesem tʋʋl-nif kiuugã, d tõe n gũume n paam sũ-no-kãseng la bark sẽn yit a Zeova nengẽ. (Mal. 3:10) Tõe tɩ rẽ na n segl-d lame tɩ d kell n maand sõngr so-pakrã wakat fãa, bɩ tɩ d yɩ wakat fãa so-pakdba. Bɩ tẽeb pãn-tusdg ning d sẽn paam tʋʋl-nif kiuugã kell n kẽng taoor kiis nins sẽn pʋgdã pʋsẽ, wakat ning d sẽn na n ket n yaa Rĩungã koe-moondb sẽn ka vaandã.
5 Sãmbg sẽn ka be, ki-kãngã, a Zeova nin-buiidã tusa na n sɩnga yirẽ Biibl zãmsg ne neba. Yãmb me nongẽ lame n sɩng Biibl zãmsg ne ned bɩ? Pʋʋs-y n kos Biibl zãmsgo, la y tʋm tɩ zems ne y pʋʋsgã. Y tõe n kɩsa sɩd t’a Zeova sũur na n yɩɩ noog ne sõngrã y sẽn kot ne sik-m-meng sẽn na yɩl n paam pʋ-peelem soab n zãmsã.—1 Zã 3:22.
6 Ad manesem b sẽn tõe n tũnug ne n sɩng sõss ne neb tɩ wom biis wʋsgo. Sɩng-y ne sʋk kãngã: “Yãmb tagsdame tɩ bi-be-tʋʋmã karen-biis kẽer sẽn maandã yaa yɩɩrã n wa ne bɩ yaa kambã sẽn ka yã wubrã n wa ne rẽ?” Bas-y t’a soabã leoke. A soabã sã n leok tɩ yaa “karen-biisã yɩɩre,” bɩ y karem Rom dãmba 12:19 n wilg vẽeneg tɩ ka b sẽn na n maan n lebs la b paamd yɛl sẽn pa tɩrsã tɩɩm ye. Rẽ poor bɩ y lak Baood seb-bilã zãmsg a 6, n wilg tɩ Wẽnnaam Rĩungã sẽn yaa tɩrgã naam wakate neba fãa na n paama bʋʋd kaoob sẽn yaa tɩrga. Kẽng-y taoor n karem pipi sul a yiibã la y sõs b zutu. Nedã sã n yeel tɩ yaa ‘kambã sẽn ka yã wubrã’ n wa ne bi-be-tʋʋma lekoll dãmbẽ wã, bɩ y karem 2 Tɩmote 3:1-3 la y wilg yɛl nins sẽn sõng n wa ne zu-loe-kãngã vẽenegã. Rẽ poor bɩ y lak Baood seb-bilã zãmsg a 8 wã, n karem sull a 5 wã, la y kẽng taoor ne sõasgã. Y sã n tõe n zemsa ne-a n yãk raar n lebg n wa, yaa sor la y segend woto sẽn na yɩl n wa maan Biibl zãmsg sẽn ka vaand ne nedã. Poorẽ, y sã n wa wa raar ning bɩ y sʋk-a n ges a sã n mii ned a to sũur sẽn na n yɩ noog t’a wʋm bũmb ning a sẽn zãmsdã.
7 Manesem a to sẽn na yɩl n ‘wɩng ne tʋʋm sõma maaneg’ tʋʋl-nif kiuugã yaa d sẽn na n kẽes d mens moonegã nens toɛ-toɛy pʋsẽ. Yãmb tagsa kaset kũun park bɩ parkĩng zĩigẽ maaneg yell bɩ? Biis rãmb yalsg zĩisẽ la tẽr gaarẽ bɩ? Bɩ y na n makame n kõ kasetã raasẽ, soay zutu, bɩ leebgã zĩisẽ? Bõe yĩng tɩ y ka na n maan woto ki-kãngã? A Zeova na n sõng-y lame tɩ y paam daood ning y sẽn datã. (Tʋʋ. 4:31; 1 Tes. 2:2b, NW ) Tõe tɩ y tõog n zems ne so-pakd bɩ koe-moond sẽn tar minim ministɛɛrã nen-kãensã pʋsẽ n yãk wakat n yi ne-a.
8 Ned ning fãa sẽn tʋll n paas a kaset kũun tʋʋmdã segd n datame n maan kaset kũun sẽn ka yãk wakate. Naoor wʋsgo baoodame bal tɩ d sɩng zood sõasg ne neda. Nana-nana bala sɩng-y ne gom-zug sẽn pak neb wʋsgo, tõeeme tɩ y tũnug ne manesem ning b sẽn wilg sul a 6 pʋgẽ wã. Modg-y n dɩk-y baa sẽk bilf y sẽn paam tɩ ra tõe n yɩẽ bõnã n tʋm sõma. Bõe yĩng tɩ d ka na n dɩk minit a nu, minit 10, bɩ minit 15 d sẽn paam fãa n kõ kaset ne manesem sẽn ka yãk wakate?
9 Tagsg wakate: Yãmb wee n lebg n tags zãmsg sẽn tar pãng ning “Wẽnnaam bãngr-goamã gomd” bab-sak tigis-kãsengã dram sẽn kõ rɩẽ wã. Drama gom-zug sẽn yaa D tall naneb ne d tẽeb rogem-pʋɩɩrã kɩtame tɩ d tags a Zakoob ne a Ezayu sẽn yaa toorã zug neere. A Ezayu yeelame tɩ wala a Zakoobe, yẽ me ra nonga tẽebã yɛla, la a Ezayu tʋʋmã ka wilg rẽ ye. (Sɩn. 25:29-34) Ad wã yaa keoogr sẽn tar pãng tõnd yĩnga! Wala a Zakoobe, bɩ d segl n sa sẽn na yɩl n nang pãng wʋsgo, n mao menga, n paam a Zeova barkã. (Sɩn. 32:24-29) Bõe yĩng tɩ d ka na n tũnug ne tʋʋl-nif kiuugã la kiis a taabã sẽn pʋgdã n paas d yẽesmã, n da tol n ges d tẽeb rogem pʋɩɩrã sẽn yaa kãsengã wa bõn-zaalga?
10 “Zusoaba ra-kãsenga kolgame, a wata tao-tao wʋsgo.” (Sof. 1:14) B tog n moona Rĩungã koe-noogo. Neb yõy n be yell pʋgẽ! Bɩ sẽn yɩɩd fãa ki-kãngã yɩ kiuug sẽn tar bark a Zeova nin-buiidã fãa yĩnga, wakat ning d sẽn lagem taab n wilgdẽ tɩ d ‘wɩngda ne tʋʋm sõma maanegã.’
[Zĩ-gũbri, seb-neng a 4]
Yɛl d sẽn na n ning d yamẽ Tẽegrã yĩnga
Tẽegrã maaneg rõandã yaa tʋʋl-nif kiuugã 19, arba raare. Kẽem dãmbã segd n gũusame n maan yɛl nins sẽn pʋgdã:
◼ Y sã n wa yãkd tigisgã lɛɛre, kɩs-y sɩd tɩ b ka na n pɩʋʋg ne makdsã sã n ka wĩndgã lʋɩɩs poor ye.
◼ B segdame n togs nebã fãa, sõasdã sẽn paase, zĩig ning la wakat ning takɩ b sẽn na n maan Tẽegrã.
◼ B segd n baoo bur la dɩvẽ ning buud sẽn zemsã n segl n dɩgle.—Ges-y yʋʋmd 1985, wao-fugdg kiuug rasem 15, Gũusg Gasgã (farende), seb-vã-neng 17.
◼ B segd n denga pĩnd n tall laase, vɛɛr dãmbã, taabl sẽn zems la taabl peend n wa roogẽ wã la b ning-ba.
◼ B segdame n deng pĩnd n pek Rĩungã Roog bɩ zĩig a to ning b sẽn na n maan tigisgã sõma.
◼ B segd n denga pĩnd n tũus sãamb rɛɛgdbã la sẽn na n pɩʋʋg-b ne makdsã n wilg-b b zɩɩbã la yɛla sẽn segd n maan to-to.
◼ B segd n dɩka segls n kõ makdsã sẽn zae-bã a ye fãa sẽn yaa koams n pa tõe n wa.
◼ B sã n geendame n na n maan Tẽegr sẽn yɩɩd a ye Rĩung Ro-yɛng pʋgẽ, zems-taab sẽn yaa sõma n segd n zĩnd tigimsã sʋk sẽn na yɩl n gil yãmbg sẽn ka tɩlae zĩ-kẽndsẽ wã, rig-noyẽ wã, soyã noy neb sẽn kẽndẽ wã, la parkĩng rãmbã zĩisẽ.