‘Wɩng-y wʋsg’ ne koe-moonegã

¹ Tõnd karmame n yã tɩ tʋm-tʋmd a Poll ra maanda fu-rot a sẽn da wa n be Korẽntã. Tõeeme tɩ d wa tagsdẽ tɩ tʋʋm kãngã kɩtame t’a ra ka tõe n moon wʋsg ye. Baasgo, Tʋʋma 18:5 (NW ) togsda woto: “a Poll sɩngame n wɩngd wʋsg ne koɛɛgã togsgo, n kõt Zʋɩf rãmbã kaset n wilgdẽ t’a Zezi la Kiristã.” Bõe yĩng t’a Poll ra wɩngd wʋsg woto ne koe-moonegã? Neb wʋsg ra zoe n lebga tẽedb Korẽnt yaa sɩda, la Soaala togsame tɩ neb wʋsg n da ket n be tẽn-kãng pʋgẽ n segd n lebg karen-biisi. (Tʋʋ. 18:8-11) Bũmb sẽn wõnd woto n segd n tus tõnd tɩ d wɩng wʋsg ne koe-moonegã bɩ? N-ye. Tõnd ket n tõe n yãa neb wʋsg n zãms-b sɩdã.

² D moon wʋsg n paas tʋʋl-nif kiuugã: Tõeeme tɩ y sẽn dat yaa y moond koe-noogã wʋsg kiuug fãa. La kiis kẽere d tõe n ‘wɩnga wʋsg’ tʋʋm-kãngã pʋgẽ n yɩɩda. Tʋʋl-nif kiuugã sẽn yaa Tẽegrã wakatã bee ki-kãens sʋka. Yãmb tõogame n yɩ sõngr so-pakda, bɩ n modg n paas koe-moonegã pʋgẽ wakat kãngã bɩ? Koe-moondb wʋsg nins sẽn maand dẽ wã paama bark wʋsgo. (2 Kor. 9:6) Y sã n maand y sẽn tõe fãa bɩ y bãng t’a Zeova sũur nooma y sẽn balemd-a ne y sɩɩg fãa wã. (Luk 21:2-4) Tʋʋl-nif kiuugã bɩ y modg n ‘wɩng wʋsg’ ne koe-moonegã, baa ne yɛlã sẽn yaa to-to fãa. La ra yĩm-y la y kɩs y moonegã tʋʋmd kɩbay sebr kiuugã baasgẽ ye. Dẽ b na n tõog n sõda yãmb sẽn maanã n naag a Zeova sõgen dãmb a taabã rẽndã.

³ Tʋg-y n ges nin-paals nins sẽn wa Tẽegrã: Dũni gill tʋʋmdã kɩbay b sẽn wilg yʋʋmd 2001, yʋʋm-vẽkr kiuug 1 daar Gũusg Gasgã seb-neng 28-31 pʋgẽ wã wilgdame tɩ rɩẽ neb tus kobs n wa Tẽegrã Afirik nen-taoor la a tẽn-sʋk tẽnsã. D nan ka mi neb nins sẽn wa Tẽegrã rõandã wã sõor ye. La kɩbay d sẽn paam wilgdame tɩ neb wʋsg n be d sẽn tõe n ‘tigis’ wʋsg n yɩɩda. (Mat. 9:37, 38) Rẽ n so tɩ d segd n maan segls tao-tao n lebg n tɩ ges neb nins sẽn wa Tẽegrã n sõng-b tẽebã wɛɛngẽ wã. D sã n ka maan dẽ tao-tao, d tõe n wa basame tɩ ‘wẽng soaba wa yiis bũmb nins sẽn fẽrg b sũyã pʋsẽ wã.’ (Mat. 13:19) La y sã n lebg n kẽng tao-tao rẽ wilgdame tɩ y sɩd ‘wɩngda wʋsg’ ne koe-moonegã.

⁴ Ket-y n sõngd neb nins sẽn ka le moondã: Wao-fugdg kiuugã pʋgẽ, d sɩngame n modgd wʋsg n sõngd neb nins sẽn ka le moondã. La sã n mikame tɩ bãmb kẽer n be tɩ kãsem dãmbã nan ka tɩ gese, b segd n maana segls n tɩ ges-b tɩ tʋʋl-nif kiuugã nan pa ki ye. Kãsem dãmbã na n modgame n bãng bũmb ning sẽn kɩt tɩ nedã ka le moondã, n ges b sẽn na n maan to-to n sõng-a t’a le lebg a Zeova sõgen yẽesenga. Kãsem dãmbã sã n kõt sõngr woto ne nonglem, wilgdame tɩ b yaa pe-kɩɩmb sẽn get “Wẽnnaam piisã” yell neere. (1 Pɩɛ. 5:2; Tʋʋ. 20:28) Yʋʋmd 1993, bõn-bɩʋʋng kiuug rasem 15 Gũusg Gasgã (farende), seb-neng 22-3 tara sagl-sõma kãsem dãmbã sẽn tõe n tũnug ne. Sagl-kãens tõe n sõng-b lame tɩ b welg zu-loees buud a nu wã sẽn ka le moond-bã sẽn mii n tarẽ wã. B tõeeme n ket n sõngd kẽer tɩ b lebs n sɩng mooneg tʋʋl-nif kiuugã, tɩ sã n tõeyã.

⁵ Sõng-y neb wʋsg n paas tɩ b lebg koe-moondb sẽn ka reeg lisgu: Yãmb kambã tara zʋgd nins sẽn segdã n na n sɩng koe-noogã mooneg bɩ? Yaa wãn to yẽ ne y sẽn zãmsd Biiblã ne neb ninsã? Kãsem dãmbã sã n sak-ba, rẽ yĩnga tʋʋl-nif kiuugã ka yɩtẽ wakat sẽn zems ne neb a woto tɩ b sɩng mooneg sɩda? Ned sã n bɩt sõma tẽebã pʋgẽ, la a zoe n zãms Baood seb-bila ne Bãngr sebrã n sa, zãmsgã tõe n kẽnga taoor sebr a yiib-n-soab pʋgẽ. Seb-kãng tõe n yɩɩ Parole de Dieu sebrã, La paix et la sécurité véritables sebrã, bɩ Unis dans le culte sebrã. Yãmb datame n sõng karen-biigã t’a paam bãngr ne sɩdã n paase, t’a tall zʋgd nins sẽn segdã n lebg koe-moond sẽn ka reeg lisgu. Sẽn paase, y ratame tɩ rẽ poor bɩ a rɩk a meng n kõ a Zeova n deeg lisg n lebg a Kaset soaba.—Ef. 3:17-19; 1 Tɩm. 1:12; 1 Pɩɛ. 3:21.

⁶ Yãmb sã n wilgd nonglem ne y karen-biisã wakat fãa, rẽ tõe n sõng-b lame tɩ b wa baas n tũ sɩdã b vɩɩmã pʋgẽ. Kaset soab a yembr n seg ned ne a pag sẽn kʋʋle, tɩ b sak ne b sũy fãa n na n zãms Biiblã. La raoã ne a pagã viiga zãmsgã semen a tãab n pʋg taaba. B wa n baas n sɩnga zãmsgã. Rẽ poore, semen a yiib fãa b ra kɩtdame tɩ zãmsgã vaandẽ. La pagã wa n bɩɩme n ta lisg reegre. Saam-biigã tẽega woto: “Pagã maana sũ-noog wʋsg a lisgã poore, la rẽ kɩtame tɩ maam ne m pagã me maan sũ-noog wʋsgo.” N-ye, d sã n ‘wɩng wʋsg’ ne koe-noogã moonego d paamda sũ-no-kãsenga!

⁷ Biiblã bãngr-goam la dũniyã yɛl wilgdame tɩ d bee sɛɛbã wakat baasgẽ. Masã la wakat ning Wẽnnaam nin-buiidã sẽn segd n ‘wɩng wʋsg’ n taas koe-noogã neb a taabã. Tʋm-tʋmd a Poll kõo tõnd bas-m-yam n yeel tɩ d “sẽn tʋmd Zusoaba tʋʋmda ka na n yɩ zaalem ye.”—1 Kor. 15:58.