D sigl d yɛlã ‘wa sẽn segde, la ra yɩ yaar ye’

¹ Neb wʋsg n segd n lagem taab n tʋm sõma sẽn na yɩl tɩ tigims gĩn sull tigis-kãseng tõog n yɩ sõma. Tigis-kãsengã yel-gɛtb na n segla tigsg zĩig sẽn zems la b yã neb sẽn na yɩl n paam ro-gãase. Neba la zags toɛ-toɛ neb maanda segls n na n tog sore, la b paam ro-gãase. B rata yamleoog tʋm-tʋmdb wʋsg tigis-kãsengẽ wã. Dẽ tigimsã lagemda taab n sõngd ne yamleoog tʋm-tʋmdbã. D sẽn dat yaa “bũmba fãa maan wa sẽn segde la ra yɩ yaar ye.”—1 Kor. 14:40, Sebr Sõngo.

² Y sã n wa tʋmd ne tigis-kãsengã sigindb fãa, bɩ y ning y yamẽ tɩ rɩkda kiisi, bɩ yʋʋm meng sẽn na yɩl n segl tigis-kãsenga. Saam-biis kobs n dɩkd sẽk wʋsg sẽn na yɩl n sigl yɛlã. Yel-kãens yaa rot luaasgo, teed la yamleoog tʋm-tʋmdb baoobo. Reng-n-segl a woto wata ne bark tẽebã wɛɛngẽ d fãa yĩnga. Bõe la d tõe n maan n sõnge?

³ Sak-y n tũ segls nins b sẽn maan ro-gãasã wɛɛngẽ wã: Tara yõod wʋsg tɩ tõnd fãa sak n tũ tigis-kãsengã seglse. Sẽn yɩɩd fãa, d segd n maana woto, d sã n wa baood ro-gãase. Yaa tɩlae tɩ b paam ro-gãas kobs tigis-kãseng fãa yĩnga. Tõnd saam-biisã wʋsg sẽn yɩɩd nug ka são ye. Rẽ n so tɩ b baood rot ligd sẽn yaa põ-põ. B maana modgr wʋsg sẽn na yɩl n bao n paam ro-gãase. Ne nonglem d tog n gesa neb a taabã raab yelle, tɩ ‘tõnd ned kam fãa da ges a meng yell bal ye, bɩ d ges taab yell me.’—Fil. 2:4.

⁴ Tõnd sã n tũ Sosiete wã noy ro-gãasã baoob wɛɛngẽ, rẽ nafda neb nins fãa rotã yell sẽn pakã. D sã n pa tũ no-kãense, wata ne zu-loees zaalem. Wala makre b tõe n bĩnga roog ned yĩnga, tɩ wakatã kẽ n bõog t’a soabã yaool n yeel t’a le ka rat ye. Woto rat n yeelame tɩ saam-biig a to sẽn da rat roog zĩ-kãng n kong roogã. Rẽ tõe n kɩtame tɩ saam-biis kẽng zĩig sẽn zãr n yɩɩda, bɩ yɩ tɩlae tɩ b sak roog sẽn ka ta b raab zãnga. Ad sɩd yɩtẽ-la sõma n yɩɩda, tõnd sã n yaa neb sẽn ka toeemd d noore, tɩ d ‘n-yẽe, yɩ n-yẽe’! (Mat. 5:37) B rãmb nins gãag-soben dãmb sẽn yaa saam-biisã me segd n tũu no-kãensã.

⁵ Zĩis nins d sẽn tõe n sõnge: Yɛl sẽn yaa nana la d tõe n maan n sõng tigis-kãsengã sigindb ro-gãasã bao-n-bĩngã wɛɛngẽ. 1) Pids-y ro-gãag kosg sebrã neere. 2) Ra tall-y neb sõor sẽn yɩɩd sõor ning y sẽn gʋls ro-gãagã kosg sebr zugã gãagã zĩigẽ ye. 3) Sõng-y y gãag-soben dãmbã n yao koomã la kʋʋra wã ligdi. 4) Aksɩdã sã n maan y gãagã zĩigẽ bɩ y togs tigis-kãsengã yel-gɛtb tao-tao. 5) B tõeeme n yeel-y tɩ y tɩ gãand zĩigẽ b sẽn welgẽ pagbã la rapã gãag zĩig toore. Sak-y n waoog la y tũ tigis-kãsengã yel-gɛtb noy zĩ-kãng wɛɛngẽ. Bɩ d modg n bas ned kam fãa a zĩigẽ laafɩ n da tiis-a ye, la d tall manesem sẽn be burkĩnd wakat fãa.

⁶ D sẽn yaa Wẽnnaam a Zeova sõgen dãmbã, bũmb nins fãa d sẽn maandã pʋgẽ d segd n dɩka togs-n-taar ne yẽ. Segls maaneg tigis-kãsemsã yĩng la b kẽngr bee bõn-kãens sʋka. Wẽnnaam yʋʋrã yaool n kẽeda yel-kãensã sʋka. Tẽeg-y tɩ “Wẽnd yaa laafɩ Wẽnnaam, b ka zũnd-zãnd Wẽnd ye.” (1 Kor. 14:33, Sebr Sõngo) Dẽ, bɩ d rɩk sard kãn-kãe n maan tɩ neb a taaba fãa yã a Zeova zʋg-sõng kãngã tõnd manesmẽ wã, d sã n wa segend n na n kẽng “Wẽnnaam Gomdã karen-saam dãmba” tigims gĩn sull tigis-kãsengã. Bɩ neb a taab sẽn tar pʋ-peelem wa tõog n bãng t’a Zeova kʋʋngã sẽn tigmã sigla ‘wa sẽn segde la ka yaar ye.’—Yɩɩl 68:26.