Yɩ-y mak-sõma ne tʋʋm sõma maanego
1. Sẽn yɩɩd fãa, yaa bõe yĩng la d sẽn segd n gũusd d manesmã tigims gĩn sull tigis-kãsengẽ wã?
1 Tõnd sã n tigim taab wʋsg tigims gĩn sull tigis-kãsemsẽ wã, nebã nee tõnd manesmã la d sẽn maand neb a taabã bũmb ningã vẽeneg n yɩɩda. Yaa rẽ yĩng la tõnd ned kam fãa sẽn segd n kelg Biiblã sagl-kãngã wã: “Yɩ[-y] mi-m-meng rãmba. La bɩ fo menga yɩ mamsg ne tʋʋm sõama fãa.” (Tɩt 2:6, 7) Tõe n yaa tɩlae tɩ d maan modgr n paas sẽn na yɩl tɩ ‘tõnd ned kam fãa da ges a meng yell bal ye, la d ges taab yell me.’ (Fil. 2:4) Bɩ d ges zĩis kẽer d sẽn tõe n tũ sagl-kãngã, tigims gĩn sull tigis-kãseng ning sẽn watã sasa, t’a gom-zugã yaa “Pẽg-y Wẽnnaamã.”
2. Ro-gãasã wɛɛngẽ, yel-bʋs la d segd n ning d yamẽ?
2 Seglsã ro-gãasã wɛɛngẽ: Neb nins sẽn geend n na n gãand neb zagsẽ, ro-gãadsẽ bɩ lotelsẽ wã tara soay sẽn yaa sõma wʋsg b sẽn tõe n tũnug ne n maan tʋʋm sõma. Ad sagls a wãn sẽn na n sõng-y tɩ y maan dẽ: Pids-y ro-gãag kosg sebrã neer n kɩs sekertɛɛrã. Wa-y ne neb sõor ning y sẽn gʋls sebrã zugã bala. Kãab-y y gãag-soabã tɩ y na n sõng-a lame n yao koomã la kʋʋrã wã ligdi. Yell sã n maan y sẽn gãẽ wã bɩ y togs tigis-kãsengã yel-gɛtb tao-tao. Y sã n yaa maag-m-meng soab la y lagemd n tʋmd ne lotellsã tʋm-tʋmdb la ne tigis-kãsengã yel-gɛtba, y na n puka Wẽnnaam vʋʋsem sõngã biis la y yɩ mak-sõma ne tʋʋm sõma maanego.—Gal. 5:22, 23.
3, 4. Wãn to la kambã tõe n pẽg a Zeova, la zɩɩb bʋs la roagdbã tara?
3 Kambã ne b roagdbã: Dũni kãngã pʋgẽ, kamb wʋsg ka tar manesem sõma ye, la tõnd kambã sẽn yaa toorã yĩngã, yaa ziir n kõ a Zeova la a siglgã. La wakat ninga b sã n pa ges kambã yell neere, wat n waa ne zu-loeese. (Yel. 29:15) Roagdbã segd n gesa b kambã yell neer lotɛllẽ wã, koom reeng zĩigẽ wã sẽn naage, nebã zagsẽ bɩ tigis-kãsengã zĩigẽ.
4 Nand tɩ tigis-kãsengã ta, roagdb kẽer yãame tɩ tara yõod tɩ b gom ne b kambã n wilg-b b sẽn dat tɩ b tall manesem ninga. (Ef. 6:4) B sõngda b kambã tɩ b bãng tɩ kiris-neb hakɩk nonglmã ‘ka maand sẽn ka zemse,’ la a “ka baood a meng sõngr bal ye.” (1 Kor. 13:5) Tigims gĩn sull tigis-kãsengã wakat yaa sasa b sẽn yãk tɩ d na n paam a Zeova zãmsgo, tɩ kamb la kãsemb fãa tõe n wilg b waoogr ne segl-kãngã, ne b sẽn na n tall manesem ning tigis-kãsengẽ wã la zĩis a taaba.—Ezai 54:13.
5. Pãn-tusdg bʋg la tõnd manesem sõma wã tõe n tall neb a taabã zutu?
5 Tõnd manesem sõngã tõe n sõnga tõnd tɩ d kɩɩs tags-kɛgã la kɩt tɩ nebã sak baleng hakɩkã. (Mat. 5:16; 1 Pɩɛ. 2:12) Bɩ tõnd tʋʋma la d manesmã ne neb nins d sẽn na n seg d tigims gĩn sull tigis-kãsengẽ wã yɩ kaset sõng n kõ-ba. D sã n maan woto, d na n yɩɩ ‘mak-sõma ne tʋʋm sõma’ maanego, la d pẽg a Zeova.—Tɩt 2:7.
6. Bõe yĩng tɩ tar yõod wʋsg tɩ d yɩ yɩlem la d maneg d mengã sõma?
6 Neb sẽn yaa yɩlma, la sẽn pa zũnd-zãnde: Tõnd yalẽ wã segd n wilgame tɩ d tũuda Wẽnnaam sẽn yaa yɩlemd la sẽn pa zũnd-zãnd Wẽnnaamã noya. (1 Kor. 14:33; 2 Kor. 7:1) Tõnd mengã, d zoobdã, la d nug-yẽesã segd n yɩɩ yɩlma, tɩ d mengã yalẽ wã sakd gesgo. Rũndã-rũndã neb wʋsg nong n basda b mens n yaa yɛɛ. La kiris-ned ka segd n bas a meng yɛɛ, filim bɩ ɛspoor gãndaoog sẽn maan woto yĩng ye. Tõnd sã n tũud modɛll paals neb wʋsg sẽn nongã, tõe n yɩɩ toog ne nebã tɩ b bãng neb nins sẽn tũud sɩd Wẽnnaamã la b rãmb nins sẽn ka tũud-a wã n welge.—Mal. 3:18.
7. Wãn to la d tõe n modg tɩ d yalẽ wã zems ne saglg ning sẽn be 1 Tɩmote 2:9, 10 pʋgẽ wã?
7 Fut nins sẽn zems ne kiris-nebã: Tʋm-tʋmd a Poll sẽn da wa n gʋls a Tɩmote sẽn yaa kiris-neb yel-gɛtã, a sagla ‘pagbã tɩ b maneg b mens n pil fut sẽn zems ne yõk-m-meng la gũus-m-menga, la tɩ b maneg b mens ne tʋʋm-sõama wa pagb sẽn sakd Wẽnnaam.’ (1 Tɩm. 2:9, 10) Sẽn na yɩl tɩ d futa manegr yɩ sõma, rẽnda d reng n tags a zug neere. Tõnd futã segd n yaa kɛpɩ, yɩlma, la b zemse. Pa segd n yaa sẽn nags tɩ loog noore, bɩ sẽn nekd pag ne rao lageng tʋlsem ye.—1 Pɩɛ. 3:3.
8, 9. Sagl-bʋs la rap la pagb nins sẽn yaa kiris-nebã segd n tũ?
8 A Poll leb n sagla pagbã me tɩ b ra yɩ maan tɩ loog rãmb n ‘wẽed pʋg-sadr ne zut pãneng ne sãnem la kĩndi ne nagem fut’ ligd sẽn toe wʋsg ye. (1 Tɩm. 2:9) Kiris-nin-pogsã segd n talla yam manesem n yɩ kɩls-tɩ-zems rãmb nag-teedã wɛɛngẽ, la b sẽn nagsd b mens to-to wã wɛɛngẽ.—Yel. 11:2.
9 Sagls nins a Poll sẽn kõ pagb nins sẽn yaa kiris-nebã paka kiris-nin-doapã me. Saam-biisã ka segd n tũ models sẽn pukd dũniyã tagsg la a manesem ye. (1 Zã 2:16) Wala makre, tẽns kẽere, neb wʋsg nong n ningda fut la kurs sẽn yaa yongls tɩ loog noore, la meng manegr models a woto ka zems ne Wẽnnaam sõgen ye.
10. Bõe yĩng tɩ d segd n ning fut la d maneg d mens sõma d sã n togd sor n debd tigis-kãsengã zĩigẽ bɩ d yii be n lebdẽ, d sã n wa be tigis-kãsengã zĩigẽ, la sõssã poor daar fãa?
10 Bũmb nins d sẽn maand pemsem kokrã wakatã: Tigis-kãsengã sõss wakat menga, saam-biis la saam-bi-pogs wʋsg sẽn tɩ yɩɩd kõta mak-sõng b futã ningr la b mensã manegr wɛɛngẽ. La kɩbay d sẽn paam wilgdame tɩ b sã n togd sor n wat tigis-kãsengã zĩigẽ bɩ b sã n yii be n lebdẽ, la pemsem kokrã wakat sõssã poore, saam-biis la saam-bi-pogs wʋsg ka manegd d mens sõma ye. Yaa tigis-kãsengã zĩigẽ tɩ yaa zĩis a taab me, tõnd yalẽ wã tõe n talla pãn-tusdg neb a taabã sẽn get Wẽnnaam nin-buiidã to-to wã zugu. Tõnd sẽn ning d tigis-kãsengã badz rãmbã yĩngã, wakat fãa d segd n yera fut sẽn zems ne kiris-nebã. Naoor wʋsgo, rẽ tõe n kɩtame tɩ neb a taabã pẽg tõndo, la pak sor tɩ d kõ kasetã.—1 Kor. 10:31-33.
11. Tõnd sã n manegd d futã la d mensã neere, pãn-tusdg bʋg la rẽ tõe n tall neb a taabã zutu?
11 Wala noor sẽn be laad sẽn kɩtd tɩ ned neng gesg be yamleoogã, woto me, tõnd sã n manegd d futã la d mensã neere, kɩtdame tɩ koɛɛgã tõnd sẽn moondã la siglg ning yĩng tõnd sẽn tʋmdã tall burkĩndi. Rõandã, tigims gĩn sull tigis-kãsengã gom-zug sẽn yaa “Pẽg-y Wẽnnaamã” sasa, tõeeme tɩ neb kẽer sẽn na n yã tõndã bao n bãng bũmb ning sẽn kɩt tɩ d yaa toorã, n wa baas n yeele: “Bas-y tɩ d tũ yãmb n kẽnge; bala, tõnd wʋmame tɩ Wẽnnaam bee ne yãmba.” (Zak. 8:23) Bɩ tõnd ned kam fãa waoog a Zeova ne d sẽn ningd d futã la d manegd d mensã to-to wã.
[Zĩ-gũbri, seb-neng a 4]
Waoog-y neb a taabã
▪ Yɩ-y maag-m-meng soab y waoongã la y loogrã wakate
▪ Ges-y y kambã yell neere
Maneg-y y mens sõma
▪ Y sã n togd sore
▪ Tigis-kãsengã zĩigẽ
▪ Pemsem kokrã wakate