Yɩ-y sõma y yel-manesmã fãa pʋgẽ
1. Bõe yĩng tɩ tar yõod tɩ d yɩ sõma d yel-manesmã fãa pʋgẽ?
1 D sẽn yaa Wẽnnaam sõng a Zeova sõgen dãmbã yĩngã, d modgdame n na n yɩ sõma d yel-manesmã fãa pʋgẽ. (1 Pɩɛ. 1:15, 16, Kãab-paalgã Koe-noogo) Woto rat n yeelame tɩ d modgdame n tũud a Zeova noyã d vɩɩmã nens fãa pʋsẽ. Rõandã tigims gĩn sul tigis-kãsemsẽ wã yɛsa d na n tõogame n tall yel-manesem sẽn yaa sõma.
2. Wãn to la d tõe n tall manesem sõma ro-gãasẽ wã?
2 Ro-gãasã zĩisẽ: Wilg-y tɩ y sũur nooma ne bũmb ning b sẽn maan n kõ-yã, la y wilg tɩ y yaa mi-beoog soaba, n sak ro-gãagã soab seglse.
3. Wãn to la Kaset rãmb nins sẽn yaa kom-bɩɩsã yel-manesem tõe n noog neb a taabã sũyã?
3 Tõnd manesem sõma wã tõe n kõo neb a taabã kaset sõma. Rɩẽ, Kaset soab sẽn yaa bi-bɩɩg n kos lotɛll tʋm-tʋmd poak bũmb sẽn na n gʋlse, la a pʋʋs-a barka. Rẽ yɩɩ tʋm-tʋmd poakã noogo. B wʋma a sẽn yeel meng tɩ: “Masã b ka leb n tõe n yã kom-bɩɩs sẽn tar manesem sõma woto ye.” La b yaool n yãa kamb kẽer b roagdb sẽn pa gũusd-b sẽn tall manesem sẽn ka zemse. Roagdbã ka segd n bas b kambã yaar ye, b segd n gũusd-b lame, n sõng-b tɩ b tall manesem sõma sẽn waoogd a Zeova.—Yel. 29:15.
4. Manesem sõma tallg baoodame tɩ d maan bõe ne bõe tigis-kãsengã zĩigẽ?
4 Tigis-kãsengã zĩigẽ: Sẽn yɩɩd fãa, zĩig ning d sẽn segd n tall manesem sõma vẽeneg yaa tigis-kãsengã zĩigẽ. D bõos tɩ y tũ sẽn deegd-b nebã noya, parkĩngẽ wã la tigis-kãsengã roogẽ. (Heb. 13:17) Zagsã neb segd n zĩi ne taaba. B ka segd n bas kamba, n paas kom-bɩɩsã, tɩ b tɩ zĩnd ne kom-bɩɩs sul a taab ye. B ka segd n sel fot rãmbã la filim dãmbã rɩkr teed wĩy kʋʋrã wã bɩ wʋmbã teed zĩigẽ ye. Sẽn talld-b te-kãensã n tʋmdẽ wã me ka segd n tiis neb a taabã ye. Sõssã wakate, y sã n dɩkd fot me, bɩ y ra maan tɩ yãg ye. B pa segd n bas tɩ selilɛɛr dãmbã maan bʋrg n tiis neba ye. D leb n segd n talla kiris-ned manesem me seb-paalã pʋɩɩb wakate.
5. Wãn to la tõnd yel-manesmã tigis-kãsemsẽ wã waoogd Wẽnnaam?
5 Tõnd yel-manesmã kɩtdame tɩ d yaa toor ne neb a taabã, la waoogd tõnd Wẽnnaamã. (1 Pɩɛ. 2:12) Tigis-kãsengẽ wã neba nee a Zeova Kaset rãmbã sẽn maand bũmb ningã. Woto yĩnga, rɩk-y sard sẽn ka vigsd n yɩ sõma y yel-manesmã fãa pʋgẽ.
[Zĩ-gũbri, seb-neng a 5]
Tall-y yel-manesem sẽn yaa sõma
◼ Tall-y mi-beoog ro-gãagã yĩnga
◼ Gũus-y y kambã neere
◼ Waoog-y neb a taabã