“Bɩ y maan sẽn yaa neer daar fãa”
1 Kiris-neb vɩɩmã baoodame tɩ b ‘maand sẽn yaa neer daar fãa neba fãa sʋka.’ (1 Tes. 5:15) Tõnd tigims gĩn sul tigis-kãsemsẽ wã, d tara soay wʋsg n tõe n maan sẽn yaa neer neb a taabã yĩnga. Wakat kãense, neba geta tõndo, la tagsg ning nin-kãensã fãa sẽn na n tall ne tõndã na n tika manesem ning d sẽn tall ne bãmbã zugu. D sẽn ya a Zeova Kaset rãmbã d sã n dat n kell n tall d yʋ-noogã, rɩlla d wilg ne d tʋʋm tɩ d ‘waoogda neba fãa.’ (1 Pɩɛ. 2:17) Woto baoodame tɩ tõnd “ned kam fãa da ges a meng yell bal ye, bɩ [d] ges taab yell me.” (Fil. 2:4) D ges rẽ sẽn tɩ loe ne tigis-kãsengã segls ro-gãadsã wɛɛngẽ to-to.
2 Yãmb zoe n tagsa zĩig ning y sẽn na n zĩnd tigims gĩn sull tigis-kãsengã wakatã baoob yell bɩ? Zags kẽer n tags tɩ ro-gãads na n ket n beeme, tɩ b sã n ta tigis-kãsengã zĩigẽ lamusa bɩ arzũma yibeoog bal bɩ b kose. Woto ka segd ye. Ad sagls a wãn yãmb sẽn na n gãand neb zagsẽ bɩ neb wʋsg gãag zĩisẽ wã sẽn segd n tẽege: 1) Y sã n paam ro-gãag kosg sebrã bal bɩ y pids-a tao-tao n toole. 2) Ra wa-y ne neb sõor sẽn yɩɩd sõor ning y sẽn ning ro-gãagã kosg sebr zugã ye. 3) Baa ro-gãagã b sẽn kõ-yã sõmblem sã n ka ta y mengã zaka, bɩ y tall nanebo. Y tõe n wilga nanebo, y sã n sõng y gãag-soabã ne kooma la kʋʋra wã ligdi. 4) Aksɩdã sã n maan yãmb ro-gãagã zĩigẽ bɩ y togs tigis-kãsengã yel-gɛtb tao-tao. 5) Sã n mikame tɩ zĩig ning b sẽn ning yãmbã, saam-biisã gãag zĩig yãka toor tɩ saam-bi-pogsã gãag zĩig me yãk toore, bɩ y sak tigis-kãsengã yel-gɛtb sẽn kõ noy ninsã. Sã n yaa lotɛllẽ la y gãe me, bɩ y ning sẽn pʋgdã y yamẽ: 1) Tall-y sũ-mar ne lotɛllã tʋm-tʋmdba, la y waoogd-ba. 2) Tũ-y noy nins lotɛllã rãmb sẽn kõ lotɛllã zĩig la a teedã wɛɛngẽ. 3) Gũus-y y kambã manesem. Bɩ d fãa modg tɩ neba sã n be b zĩigẽ n ka rat tiisg bɩ d ra tiis-b ye, sẽn paase d bee lotɛllẽ tɩ yaa ned yir me bɩ d maan sẽn yaa neere.
3 Zãms-y y kambã sẽn yaa neer maanego: Wakat ninga kamb la b bas n ka gũus sõma lotelsẽ, bɩ ro-gãads a taabẽ, tɩ b wa ne zu-loeese. (Yel. 29:15) Wakat kẽere roagdbã ra maanda yɛl a taab n bas b kambã lotɛllã roogẽ bɩ lotɛllã zĩig a to bɩ zakã pʋgẽ tɩ ned ka gũusd-b ye. Kambã kẽer yaarã ra ya n looga noor hal tɩ lotɛllã taoor dãmba, bɩ gãag-soabã, yã tɩ yaa tɩlae tɩ b gɩdg-b tɩ ra sɩɩs lotɛllã teed kẽer ye. Rẽ tiisa neb a taabã sẽn gãe be wã, Kaset rãmb la sẽn ka-b Kaset rãmba. Sã n yaa saam-biig bɩ neb sẽn nong sɩdã bal n deeg tõnd b zagsẽ, bɩ d tũ noy nins b sẽn kõ-dã, n da tɩ kẽed bãmb mens ro-gãads bɩ zĩis a taab b sẽn pa kõ-d sor tɩ d kẽngẽ ye. D bõos tɩ y modg tɩ y kambã wʋm no-kãens võor la b tũ-ba.
4 Roagdba, yɩta sõma tɩ sẽn deng tigis-kãsengã bɩ y bao sẽk tɩ yãmb ne y kambã lebg n ges manesem ning b sẽn gũud tɩ kiris-ned tall wakat fãa la zĩig fãa wã. (Ef. 6:4) Wala makre, wilg-y-b tɩ kiris-neb nonglem hakɩkã “ka maand sẽn ka zems ye, la a ka baood a meng sõngr bal ye, la a ka maand sũ-yikr ye.” (1 Kor. 13:5) Kãsembã tõe n paasa no-kãensã pãnga, bãmb mensã sã n kõ mak-sõng tɩ b fãa yã. Kambã, yãmb tõe n maana sẽn yaa neer y sã n sakd y roagdbã, y sã n ka sãamd gãag-soabã zak teedo, la y sã n waoogd neb a taabã sẽn be ne yãmbã. (Kol. 3:20) Tõnd sã n lagem taab n modgd n maand sẽn yaa neer neba fãa sʋka, tõnd ‘Wẽnnaam sẽn yaa tõnd Fãagda kareng paamda waoogr ne bũmb fãa.’—Tɩt 2:10.
5 Tõnd manesem sõngã na n talla pãn-tusd sõng neb a taabã sẽn get tõndã ne sẽn dag n sãbgd-b tõnd pĩndã yɛl toɛy-toɛy yĩngã zutu. Bũmb ning fãa d sẽn maand tigis-kãsengẽ wã bɩ tigis-kãsengã galʋ-tẽngẽ wã pʋgẽ, tõnd goamã la d tʋʋma segd n wilgame tɩ d maanda sẽn yaa neere. Yaa soay zut la d kẽnda, rɩɩb roogẽ la d be, bɩ kaset la d kõt ne manesem sẽn ka yãk wakat me segd n yɩɩ woto.
[Zĩ-gũbri, seb-neng a 4]
D bõos tɩ y tẽeg yel-kãensã:
■ Pids-y ro-gãagã kosg sebr sõma la tao-tao.
■ Ra wa-y ne neb sõor sẽn yɩɩd sõor ning y sẽn ning ro-gãag kosg sebrã zug ye.
■ Sak-y tigis-kãsengã yel-gɛtb noyã.
■ Waoog-y lotɛllã tʋm-tʋmdb bɩ y gãag-soabã.